SAN JUAN 3
3
Jesús ne Nicodemo
1Chiqué uyuu tobi hombre de ca fariseu lá Nicodemo. Naca be tobi de ca xaíque sti ca judíu. 2Ti gueela uyé be ra nuu Jesús ne rabi be laa:
―Maistru, nanna du lii nga maistru ni beeda de Dios purti iruti ñanda ñuni ca milagru ni ru'nu ri pa ñaca cadi nuu né Dios laa.
3Para na Jesús rabi laabe:
―Gabe ca' lii, tu qué gale sti tiru la? qué zanda di chu' ra runi mandar Dios.
4Oraque na be:
―Ximodo zanda gale ti hombre ora ma huaniisi ya'. Zanda xa guiuu ndaani jñaa ne gale sti tiru.
5Bigueta na Jesús rabi laabe:
―Gabe ca' lii, tu qué gale de nisa ne de Espíritu, qué zanda di chu' ra runi mandar Dios. 6Ni gale de cuerpu la? cuerpu laa, ne ni gale de Espíritu la? espíritu laa. 7Cadi idxagayaa lu ti rabe lii naquiiñe gale tu sti tiru. 8Bi rundubi ladu tiisi ne runa diaga lu rixidxi, peru qué gannu padé zeeda nin paraa che'. Zacaca nga irá tu gale de Espíritu.
9Oraque na be:
―Ximodo zanda gaca ndi ya'.
10Para na Jesús rabi laabe:
―Lii naca lu ti maistru sti ca binni Israel ne qué riene lu ni la? 11Gabe ca' lii riní du de ni nanna du, ne rui né du laatu ni bidu'ya du, peru qué runi cre tu ni rabi du laatu. 12Pa huayabe laatu cosa de guidxilayú ne qué runi cre tu la? ximodo ñanda ñuni cre tu pa ñabe laatu cosa de ibá' ya'. 13Iruti huagui'ba ibá' pa cadi ni biete de ibá' ne nga nga Hombre Biseenda Dios, ne ibá' nga jlugar be. Ne naa nga Hombre Biseenda Dios que. 14Cásica gundisa Moisés beenda ndaani gui'xhi chiqué, zaqueca nga naquiiñe indisa cabe Hombre Biseenda Dios, 15ti irá ni guni cre laabe, cadi initilú sínuque gapa enda nabani ni qué zaluxe.
Nadxii Dios binni guidxilayú
16Purti nadxii xhaata Dios binni guidxilayú ngue runi bidii tobi lucha Xiiñi', ti irá tu guni cre Xiiñi be que la? cadi initilú sínuque gapa enda nabani ni qué zaluxe. 17Biseenda be Xiiñi be guidxilayú cadi para udxiiba donda ique binni, sínuque para ilá binni pur laa.
18Tu runi cre Xiiñi be que la? qué zagui'ba donda ique, peru tu qué runi cre Xiiñi be que la? maca dxi'ba donda ique purti qué runi cre tobi lucha Xiiñi be. 19Ma dxi'ba donda ique cani qué runi cre purti beeda biaani guidxilayú peru jma gunaxhii ca guelacahui que biaani, purti malu ni runi ca'. 20Irá ni runi ni cadi jneza la? nanala'dxi biaani' ne qué zie ra naya'ni ti cadi ihuinni ni runi. 21Peru ni runi jneza la? zie ra nuu biaani ti gu'ya irá xixé binni zeeda dxiiña sti de Dios.
Jesús ne Juan
22Udi'di si ngue la? yené Jesús ca discípulu sti Judea, ne biaana né be laaca raqué, ne uluu nisa be binni raqué. 23Juan laca caguu nisa ti lugar lá Enón gaxha de Salim purti raqué da' zia' nisa, ne cadxiña cabe laabe ne caguu nisa be laaca'. 24Ca'ru guieguyoo be dxi que.
25Ucuaa yú né ca discípulu sti Juan caadxi judíu tu jma riquiiñe enda riguu nisa sti', sti Juan la? o sti Jesús. 26Ne uyé ca ra nuu Juan, na ca rabi ca laabe:
―Maistru, ma caguu nisa dxa hombre ni uyuu né lii cherica Jordán, dxa ni byuí' lu stiidxa que, ne irá binni cayé ra nuu.
27Para na be rabi be laaca':
―Qué zanda icaa binni gasti pa qué gueeda ni de ibá'. 28Laaca tu nanna tu unié cadi naa dia' nga Cristu, sínuque bisá niru si Dios naa lú be. 29Ra ti enda xheela nabé rieche xhamigu novio ni zuhuaa raqué cucaa diaga ni caní' novio. Zacaca nga ma cayeche yanna. 30Cada dxi naquiiñe quiba be jma ne naa guiete'.
Ni beeda de ibá'
31Jma risaca ni beeda de ibá' que irá xixé binni. Ni za de guidxilayú la? binni guidxilayú laa, ne rui' stiidxa guidxilayú, peru ni beeda de ibá' la? laa huaxa jma risaca que irá xixé binni. 32Ne rui' né be binni ni bi'ya be ne ni bina diaga be, ne iruti runi cre laabe. 33Peru ni ricaa stiidxa be la? riní' de idubi ladxidó' ni runi Dios nga jneza. 34Ni biseenda Dios la? rui' stiidxa Dios, purti ruchá Dios ladxidó' de Espíritu Santu. 35Nadxii Dios Xiiñi, ne ma gudixhe irá xixé lu ná Xiiñi'. 36Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiá'.
S'ha seleccionat:
SAN JUAN 3: zai
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 1988, Wycliffe Bible Translators, Inc. All rights reserved.