MATHAI 1
1
Zisu Khri thokehnah
(Luk 3:23-38)
1Abraham pathlah, David pathlah a cangpaw Zisu Khri thokehnah cazing leco,
2Abraham cawh Isak a paw cang ka,
Isak cawh Jakob a paw a cang.
Jakob cawh Judah le a uny sahlo aa paw a cang.
3Judah cawh Perez le Zera aa paw cang ka, aa no cawh Tama a cang.
Perez cawh Hezron a paw cang ka,
Hezron cawh Ram a paw a cang.
4Ram cawh Aminada a paw cang ka,
Aminada cawh Nashon a paw a cang.
Nashon cawh Salmon a paw a cang,
5Salmon cawh Boaz a paw cang ka, a no cawh Rahab a cang.
Boaz cawh Obed a paw cang ka, a no cawh Ruth a cang.
Obed cawh Jesi a paw cang ka,
6Jesi cawh siangpahrang David a paw a cang.
David cawh Solomon a paw cang ka, Solomon a no cawh Uria a nupui tawpaw khah a cang.
7Solomon cawh Rehoboam a paw cang ka,
Rehoboam cawh Abija a paw a cang.
Abija cawh Asa a paw cang ka,
8Asa cawh Jehoshafat a paw a cang.
Jehoshafat cawh Jehoram a paw cang ka,
Jehoram cawh Uziah a paw a cang.
9Uziah cawh Jotham a paw cang ka,
Jotham cawh Ahas a paw a cang.
Ahas cawh Hezekia a paw cang ka,
10Hezekia cawh Manaseh a paw a cang.
Manaseh cawh Amon a paw cang ka,
Amon cawh Josai a paw a cang.
11Josai cawh Jekhonia le a uny sahlo aa paw cang ka, ma cai leco Babilon raang lang khah sae tah seikhui a cang he.
12Babilon raang lang sae tah seikhui aa cang khy taiteipaw:
Jekhonia cawh Shealtia a paw a cang.
Shealtia cawh Zerubabel a paw cang ka,
13Zerubabel cawh Abiud a paw a cang.
Abiud cawh Eliakim a paw cang ka,
Eliakim cawh Azor a paw a cang.
14Azor cawh Zadok a paw cang ka,
Zadok cawh Akhim a paw a cang.
Akhim cawh Eliud a paw cang ka,
15Eliud cawh Eleazar a paw a cang.
Eleazar cawh Mathan a paw cang ka,
Mathan cawh Jakob a paw a cang.
16Jakob cawh Khri tatei aa tahpaw Zisu a no Mari a pasaepaw Josef a paw khah a cang.
17Ma hrahei Abraham taitah David tai letah chaihraw hluipali, David taitah Babilon raang lang sae tah seikhui aa cangnah tai letah chaihraw hluipali, sae tah seikhui aa cangnah taitah Khri#1:17 Khri (Grik rei), Mesiah (Hebru rei) aa silang cawh, Sathy thupaw, tahnah a cang. a pinah tai letah chaihraw hluipali a cang.
Zisu Khri pinah
(Luk 2:1-7)
18Zisu Khri a pinah konglang cawh ma hrahei a cang. A no Mari cawh Josef khatah a pahlawng pawtah pahapaw a cang. Canghrasala aa pahlawng hlai he tah Mari cawh Thlawpaw Pathai hmingtuakhynah thongtah sawtei a pho. 19A pasae ruapaw Josef cawh mehding mehchaw a cangnah cawtah mingzawpui hme letah Mari a ningzawsah khah du be ca ka, kaa pahlawng peh aa tahpaw khah aparuh teitah bia ka pheh kaw a tatah a pacang.
20Canghrasala, ma hratei a pacang khy taico, Abuipaw a vaiming pakheh cawh ama khatah a mang letah a za paly ka, a hai letah, “David pathlah a cangpaw Josef, Mari cawh nupui rua tah chui pawtah lung ngerai lytah ung kheh. Zecawtamaw tatah punglong lytah a cangpaw khah Thlawpaw Pathai thongtah a cang. 21Sawcapaw sah a ka, a ming tah Zisu#1:21 Zisu cawh, Pachahtu Buipaw, tahnah a cang. na sá a. Zecawtamaw tatah Ama taco a cawngsaw sahlo khah aa suanah taitah a pachá he a,” tatah a tah.
22Ma hming vytei a va ungpaw heh Abuipaw tah Khazing khuavang hmang tei a reipaw: 23“Laisaw pathai tah sawtei pho ka, sawcapaw a sá a, Ama cawh Immanuel tatah aa y a,”#Isai 7:14 tatah a tah. Immanuel a silang cawh, “Khazing kaaning khatah a ung,” tahnah a cang.
24Josef cawh a ka hraw tihtah Abuipaw a vaiming tei a chingpaw hrakhei tua ka, Mari cawh nupui ruapaw takhei ing lang cawh a chui. 25Canghrasala sawcapaw a sah hlai vytei khah cawh ung hrui be. Taico sawcapaw a sahpaw cawh Zisu tatah ming a sah.
S'ha seleccionat:
MATHAI 1: zyp
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2017, Bible Society of Myanmar and Wycliffe Bible Translators, Inc.