Luk 18
18
A tahol a amoaba na tsonun ona
1Be Iesu e hatei ranei u katunun tsitsilo u haharuei teka, u hihatutsuna tegi singo nitöa uaien tere Sunahan batema sökanari. 2Ba nonei e ranga mera nen, “Tara töa taun, a tsonun ona e ka. A katuun teka ema tatei matoute ii e Sunahan nema tara marei has rai u katuun. 3A töa tahol a amoaba e kaia tara taun teka e roron lala uu i tanen bate poeiena, ‘A katuun te paköe noulia e ngilin kato homie noulia. Alö go taguhe moulia.’ 4A katuun pan teka ema mala hengo koru ii tara pöata a ngangaha koru, kaba i murinen ba nonei e poeiena i tanen pouts, ‘Alia ema matoutegi e Sunahan, na lia ema tara marei has ragi u katuun. 5Kaba tahol a amoaba teka emi roron ranga nitöana. Bara, alia e taguhe goien turu kout. Taraha? Nonei e namots la nitöa nama bate kato hasökanena a peisar.’”
6Ba Tsunono e ranga lenina me poeiena, “Alimiou go hengoeiam u raranga te kati a tsonun ona a omi teka. 7Ga e Sunahan ema taguhu ranoui romana u katuun hamatskö i tanen te singo nitöa uaier i tanen tara lan na bong? Nonei e taguhu boroboro koru ranouen batema antunan hahaloso nei. 8Alia e ranga meragou limiou, nonei e kato hakapa boroboro tune nou u kout i taren. Kaba pöata te la pouts guma lia romana i puta, alia tu butun Katunuma, alia e sabe has ragou u katuun te hamanar?”
A Parasi na tson lulu takis
9E Iesu e hatei hasiin u haharuei teka turu katuun ti pei nori te matskör bate sigala raier a palair u katuun. 10Ba nonei e poeiena, “A huol a katuun i sei uu tara Luman Lotu Pan mena singor. A töa a Parasi, na tai a lulu takis. 11A Parasi e tuol pepeisa me mar singo uana teka, ‘O Sunahan, alia e haniga uagu i tamölö te namala kato homi uagi lia te kato uaier a palair u katuun. Alia ema kopkop gi, nema gamogamo gi, nema tsikolo gi. Na lia ema kato homi has uagi te markato uana a lulu takis i tioum. 12Turu huol u lan iahana u mamanu wik alia e roron agono negu a kannou, na tara moni i tar alia e roron hale gilö a hamalotona a makum.’ 13Kaba a tson lulu takis e tuol ma i lehana me tötöroköna. Ba nonei e mukumukeiena a lumlumanen te taatagi uaien me poeiena, ‘O Sunahan, alö go taatagi namoulia a katuun a omi.’” 14Be Iesu e poeiena, “Alia e ranga mera goulimiou, a katuun teka te matsköna i matana e Sunahan tara pöata te la pouts uaien i han, kaba a Parasi e möa. A katuun te hala seiena a peisanen ena hala putei riou. Na katuun te hala puteiena a peisanen ena hala seie riou.”
E Iesu e kalaler a matsi galapien
(Matiu 19:13-15, Mak 10:13-16)
15U katuun e mi piou raia a galapien u göama tere Iesu ba nonei e sebele ranen. Ba u katunun tsitsilo e tarer a ka teka me ranga hapiou raren. 16Kaba e Iesu e ngö merai a galapien i tanen me poeiena turu katunun tsitsilo, “Haka raiam a galapien egi la uama i tar. E möa tego hapiou mera mien limiou. Taraha? A Nipepeito tere Sunahan e ka uana turu mar katuun teka. 17Alia e hatei hamana ragou limiou, a katuun tema hengo hanige nei u raranga tere Sunahan temar hengo haniga uana a pien, nonei ema antunan tasu noi tara Nipepeito tere Sunahan.”
A tson moni
(Matiu 19:16-30, Mak 10:17-31)
18Ba töa katuun pan turu Jiu e rangatena e Iesu, “O Tson Hihatuts a niga, aha tego kati lia bate luegou a nitöatöa te ka nitöana?” 19Be Iesu e ranga palis uana i tanen, “Aha te ngö sile milö alia a katuun a niga? E Sunahan lasi te nigana. 20Alö e atei silem a man lo tere Sunahan. Hena: ‘Alö goma tsikolo ii. Alö goma hipuli ii. Alö goma kop ii. Alö goma gamogamo ii. Alö go hapani e tamamölö na e tsinamölö.’” 21Ba katuun e poeiena, “Alia u kukuti a man lo teka e taniama tu tetenei noa ma lia.” 22Pöata te hengoeia e Iesu a ka teka, ba nonei e poeiena i tanen, “A töa patu a ka tego kati lö. Alö go haholin a manka hoboto i tamölö bate hala rami u katuun ti möa ta ka. Ba lö te ka memou romana a mamanaka a niga i Kolö. Ba lö te töan kukutie mumou lia.” 23Kaba pöata te hengo naia a katuun a ka teka, ba nonei e tara hataatagi koruna. Taraha? Nonei e ka mei a moni a parpara koru. 24E Iesu e tari te taatagi uaien me poeiena, “U katunura tara moni e ka mer romana a toukui pan tegi tahongo uaien tara Nipepeito tere Sunahan! 25E palpal koruna tega tasu uu a katunun moni tara Nipepeito tere Sunahan, temar palpal has uana a kemol te katsin sipina tara tabutu tara salum.” 26Ba u katuun ti hengo e rangatar, “Gesi len te antunan tasuna?” 27Be Iesu e ranga palisina, “A ka tema antunan kato nanei a katuun e Sunahan e antunan kato nanen.” 28Be Pita e poeiena, “Tara! Alam u laba nema a han i tamulam me kukutie mumoulö.” 29-30Be Iesu e poeiena i taren, “Alia e ranga hamana mera goulimiou, a katuun te kato hatagala silena a Nipepeito tere Sunahan bate laba nena a luma i tanen tsi a tahol i tanen tsi u hatoulana i tanen tsi e tamanen tsi e tsinanen tsi a galapien i tanen, nonei e luena romana a ka a para koru lel tara mankana i romana, bate lu hase nou a nitöatöa te ka nitöana tara man pöata te la nama.”
E Iesu e ranga hatopisein a tou mate i tanen
(Matiu 20:17-19, Mak 10:32-34)
31Be Iesu e lu halhal rena a maloto na huol a katunun tsitsilo i tanen me poeiena, “Hengoiam! Ara e la uara i Jerusalem, na mamanaka ti kolotein u propet tega butuia i tar e butu hamana noua i Jerusalem. 32Taraha? Alia ena hala naroua turu katuun tema Jiu ri, ba nori te hahakos ria romana i tar bate kato hohomie riou lia bate kahus has nariou lia. 33Nori e lahuse riou lia romana bate atung hamate riou lia. Kaba turu hatopisana u lan ba lia te takei pouts gou.” 34Kaba u katunun tsitsilo ima atei sile ii a manka teka. A mouna u raranga teka i hamous ba raien, na nori ima atei sile ii a ka te rangein e Iesu.
E Iesu e kato hanigei a katuun a matakiou
(Matiu 20:29-34, Mak 10:46-52)
35Pöata te sukusukuia e Iesu tara taun i Jeriko, a töa katuun a matakiou e gum ia i rehina a maroro bate singo la nena ta moni. 36Pöata te hengoeien ti la karasa uu katuun u parpara koru ba nonei e rangatana, “Aha teka?” 37Ba u katuun e ranga uaier i tanen, “E Iesu na i Nasaret te la karasana.” 38Ba nonei e kuna, “O Iesu! A hatutubunei tere Devit! Alö go taatagi namoulia!” 39Ba u katuun ti mam e raharahe ren me poeier, “Alö go kakamoto!” Kaba nonei e ku hapan koru lel, “A hatutubunei tere Devit! Alö go taatagi namoulia!” 40-41Be Iesu e tuoluna me ranga nena a katuun a matakiou egimi piou naia i tanen. Pöata te la hasusuku men, be Iesu e rangate nen, “Aha te ngile mölö tego kato bei lia alö?” Ba nonei e ranga palisina, “O Tsunono, alia e ngilin taragu.” 42Be Iesu e poeiena i tanen, “Bara, alö go tara pouts! A nihamana i tamölö te kato haniga poutse noulö.” 43Ba nonei tara tsi pöata puku has teka ba nonei e tara poutsuna, me kukutiena e Iesu me haniga uana tere Sunahan. Ba pöata ti tareia u katuun a ka teka, ba nori e soloseier e Sunahan.
S'ha seleccionat:
Luk 18: HLA 2020
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.