Luk 6
6
U Hirarina turu Lan u Göagono turu Jiu
(Matiu 12:1-8, Mak 2:23-28)
1E Iesu e silaia iahana u kuin wit turu Lan u Göagono. Ba u katunun tsitsilo i tanen e patsikeier a bakun wit me musase ren me noue ren. 2Kaba a palair u Parasi i tara raien me poeier, “Aha tsiponi te kato memi limiou a ka te hapiou nena a Lo i tarara egima katoe ii turu Lan u Göagono?” 3Be Iesu e ranga palis ranen, “Alimiou ego mala rit hanigeiam a ka te katoe e Devit. Tara töa pöata nonei na u katuun i tanen i möa ta kannou ba nori e besir. 4Ba nonei e tasuna i luma tere Sunahan me luena u beret u göagono ti hakeia i matana e Sunahan. E Devit e noueien me hala has rena u katuun i tanen. A Lo turu lotu i tarara e hapiou nena tegima nou menai a beret teka. U pris peisa te tatei noue ren.” 5Be Iesu e hakapena u ranga me poeiena, “Alia tu butun Katunuma e tsunono negu u Lan u Göagono.”
A katuun a limamate
(Matiu 12:9-14, Mak 3:1-6)
6Turu tana u Lan u Göagono e Iesu e la uu tara töa luman lotu me hihatutsina. A töa katuun a pal matou i lima nen te mate e ka tara pöata teka. 7A palair u tson hihatuts tara Lo na u Parasi i pepeito kapiin ta ka ta omi tega katoe e Iesu. Ba nori e pepeito kap hatagala koru naren tega kato haniga pouts menaien ta katuun turu Lan u Göagono. 8Kaba e Iesu e atei sil u hakhakats i taren me poeiena tara katuun a limamate, “Alö ego takei ba lö tena tuol mia i hagus.” Ba katuun e takeina me tuoluna. 9Be Iesu e poeiena i taren, “Alia e rangata ragou limiou, aha te hatangana nena a Lo i tarara tegi kati ra turu Lan u Göagono? A niniganiga tsi a niomi? Aragi taguhu a katuun bate töatöa poutsuna tsi aragi atung hamateien?” 10Ba nonei e hula tara uana i taren hoboto me poeiena tara katuun, “Hasoa nema a limamölö!” Ba nonei e hasoa nena a limanen me niga poutsuna. 11Kaba u Parasi na u tson hihatuts i raharaha koru me hiararanga ner ta ka tegi katoeien tere Iesu.
E Iesu e hopö kapir a maloto na huol a aposol
(Matiu 10:1-4, Mak 3:13-19)
12Tara pöata teka e Iesu e la sei uu turu töa u pokus me singo uana tere Sunahan tara töa bong a ohots. 13Ba tara bongbong ba nonei e ngörena u katunun tsitsilo i tanen me hopö kap rena a maloto na huol a katuun me ngö raneien u aposol. 14A soloren ere Saimon (ti ngö hasei e Pita) na e toulana e Saimon e Endru. Na palai has i taren ere Jemis mere Jon na e Pilip ne Batolomio. 15Na e Matiu ne Tomas, na e Jemis a pien tson tere Alpius ne Saimon na i Silot.#6:15 E Saimon ema solo uanei tanen e Selot, e Selot e mouna uana teka: a katununa tara töa hun katuun ti ngil a han i Israel ega tarakap pepeisein a peisanen. 16Na e Judas a pien tson tere Jemis na e Judas Iskariot, a tson tena harötein e Iesu i matar u pakö i tanen.
E Iesu e hihatuts na e kato haniga pouts hasir u katuun
(Matiu 4:23-25)
17Be Iesu e koul gono mere namen turu pokus, ba nonei e tuol gono merena u katunun tsitsilo u parpara i tanen tara töa makum a tataabala. U katuun u parpara koru i ka has, u katuun ti lama tara mamana han iahana provins i Judia na tara taun i Jerusalem, na pala has ti lama i tasi tara taun i Tair na i Saidon. 18Nori i la silema tegomi hengo uaien tere Iesu na tego kato haniga pouts meraien e Iesu tara man siki i taren. U katuun has ti ka mei u liliahanei u omi i lama me mi kato haniga pouts raier. 19U katuun hoboto i torohanan hasebeleia i tanen. Taraha? A nitagala e butuma i tanen me kato haniga pouts ranen hoboto.
A nisasaala na nitaatagi
(Matiu 5:1-12)
20E Iesu e tara uu turu katunun tsitsilo i tanen me poeiena,
“Sasaalaiam, alimiou ti möa ta ka.
Taraha? A Nipepeito tere Sunahan e ka uana i tamilimiou!
21Sasaalaiam, alimiou te bes miou i romana.
Alimiou e hamasul rariou!
Sasaalaiam, alimiou te tabe miou.
Alimiou e golgol mou!
22Sasaalaiam tara pöata te omi raria limiou,
na te tori hasoala raria limiou,
na te ranga homi raria limiou,
na te tsuga raria limiou,
te hamana uami limiou i tar, alia tu butun Katunuma.”
23“Sasaalaiam tara pöata te butuna romana a manka teka, bate sani memiou a nisasaala! Taraha? U hamatana pan e haka bera rilimiou i Kolö. U tuburen i markato homi has merai u propet u niga teka.
24Kaba a nomi pan e ka uanou i tamilimiou u katuun te ka mer a moni a parpara i romana.
Alimiou u lu hakapeiam a pöatan sasaala i tamilimiou.
25A nomi e ka uanou i tamilimiou te masul miou.
Alimiou e na bes mou!
A nomi e ka uanou i tamilimiou te golgol miou.
Alimiou e ton mou bate tabe miou.
26A nomi e ka uanou i tamilimiou u katuun te saala rer u katuun hoboto.
Taraha? U tuburen i mar ranga has uu iesana turu propet u gamogamo.”
Ngil raiam u pakö
(Matiu 5:38-48, Matiu 7:12)
27“Kaba lia e ranga mera goulimiou eresi te hengoe riou lia, ngil raiam u pakö i tamilimiou. Kato haniga mia turu katuun te omi rariou limiou. 28Kalala raiam u katuun te ranga homi ria i tamilimiou, ba limiou te singo sil ramiou u katuun te kato homi ria i tamilimiou. 29Tega tapaleia ta töa ta katuun a abuabu mölö, hatapala hasiin a hapala. Tega lueia ta töa u hasobö pan i tamölö, hala hasei u hasobö u tetenei i tamölö. 30U katuun hoboto te rangata ner ta ka i tamölö, halari. Na tara pöata te lue ria a manka i tamölö, ma rangata nai tego lu pouts menaien lö. 31Kato merai a palai temar ngil has uamölö tegi markato uaien i tamölö.
32“Te ngil puku ramia lö u katuun te ngile rioulö, gaha tegi kalala silei lö? U katuun u omi e ngil has raier u katuun te ngil raren. 33Na tego kato haniga peisa uu lö turu katuun te kato haniga ria i tamölö, gaha tsiponi tegi kalala silei lö? Te markato has uaier u katuun u omi. 34Na te hala peisa ramia lö u katuun te pei mia lö nori e tatei hala pouts ner a manka, gaha tegi kalala silei lö? U katuun u omi e hala has raier u katuun u omi, kaba nori e ngilin lu pouts nariou a man haroho hoboto i murimuri. 35Kaba limiou go ngil raiam u pakö i tamilimiou bate kato haniga ramen. Alimiou go hala pukpukuiam, kaba ma hakats nami tego lu pouts menami ta ka. Ba limiou te lue miou romana u hamatana pan, bate haröto has namiou alimiou a galapien tere Sunahan Iasa Koru. Taraha? Nonei e niga has na turu katuun u omi tena mala haniga uari tere Sunahan. 36Alimiou ego taatagi raiam u katuun, temar taatagi has mera nei limiou e Tamamilimiou e Sunahan.”
E möa tego ona mena milimiou a tana katuun
(Matiu 7:1-5)
37Be Iesu e rangana me poeiena, “Ma ona rami a palai, ba limiou tema ona has raroui. Ma kato sil rami a palai gi hahuner, ba limiou tema hahuna has raroui. Alimiou ego nolo pouts raiam u katuun ti kato homia i tamilimiou, ba limiou te nolo pouts has rariou. 38Hala naiam a hitaguhu turu katuun ba palai te kato has uariou iesana i tamilimiou. Ba u katuun te hala haniga raroui limiou a skel i tamilimiou antunana te saputu nen bate pururukuna. A mar skel te roron hala rami limiou u katuun, tara mar skel teka te hala hapopo pouts has naria romana i tamilimiou.”
39Be Iesu e hatei raneien u haharuei teka. “A katuun a matakiou ema tatei peige nei a taina katuun a matakiou. Tegi markato tala uaien teka, ba nori hoboto tena tsia roa tara holö. 40A katunun tsitsilo ema tatei pan nanei a tson hihatuts i tanen. Kaba tara pöata te hakape ria u katuun u skul i taren, ba nori hoboto te töan here rari u tson hihatuts i taren. 41Taraha ba lö te tarem a tsi köahu i matana e toulamölö, ba lö tema taremi a makumun ruei i matamölö pouts? 42Aha te pei mölö tere toulamölö, ‘Alia ego luban a tsi köahu i matamölö’ ba lö tema taremi a makumun ruei i matamölö pouts? Alö a gamogamo! Luba mam bin a makumun ruei te kana i matamölö, ba lö te tara haniga mou bate töan luba nem a tsi köahu i matana e toulamölö.”
U ruei na hua i tanen
(Matiu 7:16-20, Matiu 12:33-35)
43Be Iesu e poeiena, “U ruei u niga ema tatei ka menei a hua a omi, na u ruei u omi ema ka has menei a hua a niga. 44U mamana u ruei e atei silanaria tara hua i taren. Alimiou ema tatei lue mia ta kutu tara pata, na limiou ema tatei lu hase mia ta huan lahou turu korkoru. 45A katuun a niga te ka mena u hakats u niga i torinen e habutena a markato na man raranga a man niga. Na katuun a omi te kamena u hakats u omi i torinen e habutena a markato na man raranga te omina. Taraha? A runguna a katuun te roron ranga nena a manka te saputena a torinen.”
A huol a tsonun kukui luma
(Matiu 7:24-27)
46Be Iesu e poei hasena, “Taraha ba limiou te ngöe milia ‘O Tsunono, Tsunono,’ batema katoemi a manka ti hatei rai limiou? 47A katuun te la uanama i tar bate hengoena u raranga i tar bate kukutie nen, alia e haröto ragoui limiou ime te markato uanen. 48Nonei e here nei a katuun te kaho uu iogana me hopöeiena u simen turu lapo me kuiena a luma ieluna u simen. Ba u uolo pan e la nama me mi torohanan söatena a luma. Kaba ema gaseien. Taraha? A luma i kui hanigei. 49Kaba a katuun te hengoena u raranga i tar batema kukutie neien e here nei a katuun te kuiena a luma turu tsiktsiki puku batema haka mamme nei tu simen. Ba pöata te la nama u uolo pan, batemi söatena a luma ba luma te tarura hakapa nitöana.”
S'ha seleccionat:
Luk 6: HLA 2020
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.