Mak 13
13
E Iesu e hatein tegi rura menai a Luman Lotu Pan
(Matiu 24:1-2, Luk 21:5-6)
1Pöata te lakasa ma e Iesu tara Luman Lotu Pan, ba töa katunun tsitsilo i tanen e poeiena, “Tson Hihatuts, röto tara man hatu pan koru teka na tara man luma pan teka.”
2Be Iesu e rangate nen, “Alö e tarem a man luma pan koru teka? E möa lel nou ta töa ta hatu tega opö ia ieluna a tabi, nori e lapo ba hoboto raroua i puta.”
A pöata a omi koru
(Matiu 24:3-14, Luk 21:7-19)
3-4Pöata te gum ia e Iesu turu Pokus tara Ruein Olip i hapalana Luman Lotu Pan, be Pita mere Jemis na e Jon na e Endru e rangata momouse ren me poeier i tanen. “Hatei ramou lam, i hangisa te butuna romana a manka teka, na u saha u mar hiharöto te haröto nanou a pöata tega butu ia a mamanaka teka?”
5Be Iesu e tanian hatuts ranen me poeiena, “Hanei sileiam tego gamo mera ii limiou ta katuun. 6U katuun u parpara ena la rima romana batemi poe riou a solor, bate poeier, ‘Alia e Mesaia,’ ba nori te gamo rariou u katuun u para. 7Pöata te hengo namoa limiou a pula na u bulungana tara pula alimiou goma tokumi. A manka teka ega butu iou, kaba a kapkapana pöata ema la noa namei. 8A man han e hia pulapula riou, na man hun katuun e hia pulapula riou. A nun a para e butu noua tara mamana makum turu han hoboto na bes pan has e butu nou. A mamanaka teka e herena romana a tantania tara kamits pan tutuun tara tahol te katsin posana.
9“Alimiou go hanei iam, taraha u katuun e pile kap rariou limiou bate hala mera roi limiou turu kout, ba nori te atung raroua limiou tara man luman lotu.#13:9 A man makumun hagum turu Jiu i manasa. Na limiou ena tuol möa i matar u gamman na u king, taraha alimiou e hamana mia i tar, ba limiou te hatei ramouien u Bulungana u Niga. 10Na u Bulungana u Niga egi rarare mameia turu han hoboto.
11“Na pöata te pile kap rarien limiou bate las mera rilimiou turu kout, alimiou goma hakats hapara mam nami a manka tena ranga namou limiou. Ranga naiam a saha ka te hatei raroui limiou tara pöata, taraha, ema limiou nei te ranga miou, kaba u Namnamei u Göagono. 12U katuun e hala naroua u toularen turu katuun bate atung hamate raren, bu tamaren te kato has uariou iesana tara galapien i taren. A galapien e hiatatung gono has merariou u tamaren na u tsinaren bate hala mera rien turu katuun te atung hamate raren romana. 13Ba u katuun hoboto te pakö sil raroui limiou a solor. Kaba u katuun te pile kap hatagala nitöa ner a markato tere Sunahan tara pöata a omi teka, e Sunahan e lu pouts mera noien i tanen.”
A ka a omi koru
(Matiu 24:15-28, Luk 21:20-24)
14Be Iesu e poeiena, “Alimiou e tare mou a ka a omi koru e tuolna romana tara makum te hagöagono ba narien.” (A katuun te ritena u raranga teka ega hakats hanigein te mouna uanen.) “Ba pala te ka ria i Judia egi bus uu tara pokus. 15Na katuun te kana i punganana a luma i tanen ema tatei tasu nei i luma batena lu bena ta tsi ka i tanen. 16Na katuun te kana tara kui ema tatei gala pouts nei i han batena luena u hasobö u ngahangaha i tanen. 17Haromana koru tara touhaliou te pikar na tara touhaliou te hasus raier a galapien tara pöata teka. 18Singo sileiam a ka teka egoma butu romana ii tara pöata turu hamuri. 19U kamits tara pöata teka e pan saluhe nanou romana u kamits hoboto tara pöata i manasa, tara pöata i mam koru te katoeia e Sunahan a mamanaka bate noana tara pöata i romana. Na tara pöata hoboto has i murimuri e möa lel nou ta kamits tega mar butu uaiou teka. 20Sanena a Tsunono tema hamakmakumei a pöata teka, ega möa ta töa tega töatöa. Kaba turu katuun lahas te hopö kap raien ba nonei te hamakmakum bera neien a pöata teka.
21“Na tara pöata teka, tega poeia ta katuun i tamilimiou, ‘Taraiam, e Mesaia teka!’ tsi ta katuun tega poei, ‘Taraiam, nonei e kana i tioum!’ Alimiou goma hamane mien. 22U Mesaia gamogamo na u katuun u gamogamo te ngöeroi a peisaren u propet tere Sunahan e butu riou romana. Ba nori te katoeriou u hiharöto pan na man mirakol, tegi antunan gamo meraien u katuun te hopö kapir e Sunahan. 23Alimiou ego haneiam. Alia e hatei hakapa ragulei limiou a mamanaka.”
E Iesu ena kopis nama romana
(Matiu 24:29-31, Luk 21:25-28)
24Be Iesu e poeiena, “Kaba tara man lan i murina tara pöata turu kamits teka,
‘ba pitala te kuhil nou,
na tsihou ema piri lel noi,
25na u pitopito ena rus rima i kolö,
na mamanaka a tagala na i kolö e gagas riou.’
26“Ba tara pöata teka u katuun ena tare riou alia, tu butun Katunuma e butu guma romana turu köasi bate lame guma a nitagala pan na u ualesala pan. 27Balia tena hala neguma a man angelo turu han hoboto i puta ba nori tena gono rarima romana u katuun te hopö kapir e Sunahan.”
U haharueina turu ruein fik
(Matiu 24:32-35, Luk 21:29-33)
28“Lue mia a niatei turu ruein fik. Pöata te rurus nen ba kala nen te kokoböna ba man kalan ruei te bututu nama, balimiou te atei silemiou a pöata tara pitala e sukusukuna. 29Na e markato has uana iesana, pöata te tare mia romana limiou a manka hoboto teka e butuna, ba limiou te atei sile mou a pöata e sukusuku koru nama, e ka hamanasa na tara tamana. 30Alia e hatei hamana koru ragou limiou, a manka hoboto teka e butuna romana i mam tara tou mate tara palair u katuun te töatöar tara pöata teka. 31U kolö na u puta e taia hakapariou romana, kaba u raranga i tar ema antunan tia noi romana.”
A ka tegi kahete kap nitöa meira
(Matiu 24:36-44)
32Be Iesu e poeiena, “Kaba e möa ta katuun tega atei sil u lan tsi a pöata te butu nama romana a manka teka. U angelo ri Kolö ema ateiri na lia#13:32 E Iesu. a Pien Tson tere Sunahan ema atei has gi. E Tamar pepeisa lasi te ateina. 33Haneiam, tara kap hanigaiam. Taraha, alimiou ema atei silemi i hangisa te butu nama romana a pöata teka.
34“E kato uana romana tara katuun te la uana i lehana, ba nonei te hataratara kap ranei u katunun kukui puku i tanen a manka, bate hala raneien a man tötöa a man toukui i taren. Ba nonei te hateiena a katunun taratarakap tara tamana tego pepeitokap haniga menaien. 35Na limiou go tara kap hanigaiam, taraha alimiou ema atei silemi i hangisa tena la nama romana a katuun terena luma. Nonei e la toum menama a lahibong tsi a bong roto tsi a gusuna bong tsi a lunlan. 36Nonei emi mots sabena tego soho uu lö tara pöata tena la hasingoto namen. 37A ka te ranga mera gilia alimiou e la has uana turu katuun hoboto: tara kap hanigaiam.”
S'ha seleccionat:
Mak 13: HLA 2020
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.