Luka 17
17
'Ili'ilixo Ane Uolexa'a ta Mitema sou Isusu Noxou Lataua
(Mat 18:6-7, 21-22; Mak 9:42)
1Iesu muvikalane'i ta Palisaio mukalu, la muvikalane'i ta molomolo noxou la aloxo 'o, “Mimii ane uolexa'a ta mitema sou isusu noxou Lataua ne, anu a uxoxolu. Ia itema ane uolexa'a ta mitema sou isusu noxou Lataua ne, Lataua ulosou navunavu. 2Lexe itema vile uolexu vile noxi'a ta mitema ane imuxamuxaxu tane'i noxilo loxo ta molomolo ta kitu'a sio sou isusu noxou Lataua, la laixe lexe isakiinu lavo'o vile tatila no xolanu mo ilea ulu'elai no luaki, mo sou Lataua ulosou navunavu uasi. 3#Mat 18:15Aloxo ne, la sou ngingi ngasaxila'inge laixe.
Ia lexe menexinge vile ane mumulaxu tanu noxou Lataua io u'oxonu 'ilixo vile masua, la nakaitolonu. Xe lexe anu upala'alixu susu noxou noxine mo uxiu opoonu, la nini naxiu tumalineu. 4Mo lexe anu u'oxonu 'ili'ilixo masumasua noxine alaxu muxatele tamei no anu voxo vile, ia anu une'e noxine alaxu muxatele tamei sou upala'alixu 'ili'ilixo masumasua noxou ne, la nini naxiu tumalineu.”
5Ta mitema sou xaixai noxou Iesu mivikalanu Tila aloxo 'o, “Na'oxonexi mo tamuxamuxaxu tanexi pekia'u noxou Lataua!”
6 # Mat 17:20; 21:21 La sou anu muvikalane'i aloxo 'o, “Lexe ngingi ngamuxamuxaxu tangengi noxou Lataua kitu'asi umomomo loxo ovu masitati ngiaxu, la ngingi ngamomomo sou ngavikalanu ovu vile 'o lexe, ‘Naluvuneni no mukuluxene mo nalai natouneni no luaki,’ la anu ulomungengesi.”
7Iesu musolonu vaikala noxou aloxo 'o la, “Lexe ngingi vile ne, upalusou itema sou xaixai noxou sou lexe uxaxai no xaixu mo usaxila'a ta sipsipiu, xe ulivu une'e, la loxovaa anu uvikalanu lexe, ‘Nane'e avile mo naxolu mo na'ani.’ Uasi. 8Ia anu uvikalanu lexe, ‘Nalalaxii la'ilalixo mo natavulenu ilou lexasou une'e sou a'ou mo aiemolu, io nini natutulumaieli. Xe eni a'ani mo aie ukalu, la sou nini na'ani xe naie.’ 9Mo lovoxaa anu uvikala laixe noxou itema sou xaixai noxou ne xo anu mulomusou mu'oxonu mii ane anu muvikalanuxu ne? Uasi. 10Aloxo ne, la sou ngingi kalumo lexe nga'oxonu mii ane tilasinge uvikalangengixu ne, la sou ngavikala lexe, ‘Nexi minu ne ta mitema sou xaixai noxine vitanisi. Nexi te'oxo xaixaimexisi ane nini nelosixe.’”
Iesu Mupamauline'i ta Mitema Mavolovexa Ane Vulukali Mu'i'a
11Iesu muvikalane'i mukalu, la mulutu sou lexe ulai ne Ielusalemu. La mumuamua'i mulai mumulinu pilixasou xalee lia tila ne Samalia xe Xalilaia. 12Anu sou u'una no tuala vile, la ta mitema mavulovexa ane vulukali mu'i'a ne, mine'e mimaisou Iesu no vote'i. La ane'i mitulu no paxasi, 13#Liv 13:45-46ia mi'ava tatila mulai noxou lexe, “Tila Iesu, nini taneninexe!”
14 # Liv 14:2-3; Mat 8:3-4 Ia no mine Iesu mumaisi'a, la muvikalane'i aloxo 'o, “Ngalai mo ngamaxa'inge noxi'a ta aili'i.” Xe ane'i mimuamua'i milalai no vote'i, la vasime'a laixe mukalu.
15La sou vile noxi'a mumaisou vasimolu lexe muxali laixe mukalu, la mu'ava'ava tatila sou mu'itinu Lataua ualasou mo mulivu mune'e noxou Iesu. 16Mune'e, la mulapau mulu'e noxou Iesu tava'u sou muvikala laixe mulai noxou. Ia itema ane ne sie Samalia mo.
17Iesu mumaisou itema ne aloxo ne, la mutali'isou aloxo 'o, “Eni epamaulingengi ta mitema mavulovexa, ia muxatele tami'a ane'i 'ava? 18La ilivu ine'e mo i'itinu Lataua ualasou ua. Ia itema aasila soxu vilesisi 'o, mulivu mune'e sou mu'itinu Lataua ualasou 'o.” 19Mukalu, la Iesu muvikalanu aloxo 'o, “Natulu mo nalai. Xo nini nemuxamuxaxu taneni noxilo, la sou nini vasimene muxali laixe.”
Saxisaxila'u Noxou Lataua a Muxali ne
(Mat 24:23-28, 37-41)
20Ioxe, no voxo vile, la ta Palisaio mitali'isou Iesu lexe saxisaxila'u noxou Lataua une'e talu? La sou Iesu mukolinu tali'i noxi'a aloxo 'o, “Saxisaxila'u noxou Lataua ne uxali loxo mii e nenge tamaisou no anu ienge uasi. 21Mo umomomo sou ta mitema ivikala lexe, ‘Anu 'a lai 'o.’ mo ivikala lexe, ‘Anu 'a 'olele.’ uasi. Xo ngamaisou, Lataua Anu 'a usasaxila'inge ne.”
22Mukalu, la muvikalane'i ta molomolo noxou aloxo 'o, “Ngemasaxa lexe ngamaisou Itema 'Olu no anu voxo vilesisi 'o, ia voxo sou umomomo sou ngamaisou la uasi, a unene'e. 23#Mak 13:21; Luk 21:8Ia ta mitema ivikalangengi lexe, ‘Anu 'a 'olele.’ mo ivikala lexe, ‘Anu 'a lai 'o.’ Ia mamu sou ngalomuxa'a mo ngamuline'i. 24Xo voxo noxou Itema 'Olu ne, uxali loxo lele'e ulami e ukaasou opo loxotolo ukalusi. 25Ia tei no anu, la Anu utavulenu tu'utu'umaxu tapiena mo ta mitema vaimomo 'o ixiu tumali'a noxou.
26Mii ma'ia ane uxali no xovo ane ne, anu iou vilesisi aloxo no anu voxo noxou Noa. 27No anu voxo ane ne, la ta mitema i'ani'ani mo iie mo itataula'ixa'a ngatongato'o mulai muxali no voxo ane Noa mu'unalai no anu lasipi tatila. Io alipaa toxoxa'a muxali mole mu'uo'uosi'a mikalu avile.
28 # Tav 18:20; 19:25 Mo anu iou vilesisi aloxo no anu voxo noxou Loti kalumo. No anu voxo ane ne, la ta mitema i'ani'ani mo iie mo ilotolotonu mimii mo imomolo mimii sou ta mitema iloto noxi'a mo itotou la'ilali xe itutulusou tatani. 29Ia no anu voxo ane Loti mulutu mu'umesou tuala ne Sodomu, la navu ilou lavo'o axeaxexaxu mulapalapau molu no opo loxotolo mulu'e mu'elaxa'a mikalu avile.
30Voxo ane Itema 'Olu uxali ne, anu iou vilesisi kalumo aloxo ne. 31#Mat 24:17-18No anu voxo ane ne, la umomomo sou mitema ane uxolu teitexi no tani laxa'u ne, ulivu ulu'e no taasou sou utaxusou miumiu la uasi. Xe anu aloxo nesi, la itema ane mulai no xaixu ne, ulivu une'e no taasou sou uno'u mii vile la uasi. 32#Tav 19:17, 26Ngaxavutalane Loti semau. 33#Luk 9:24Lexe itema ane tanuxu maulixu sou lia 'o, la anu uxovulaunu mauli ane kaluxu uasi, xe itema ane uxovaunu maulixu sou lia 'o, la anu uno'u mauli ane kaluxu uasi. 34Eni avikalangengi lexe no anu 'olovoxo ane ne, la ta mitema tamei iai ipita no luu vile, ia ta angelo ino'u vile ulai io vile usu'a uai ne. 35-36Mo ta sema ta tamei i'ulaluu la'ilali, la ta angelo ine'e ino'e vile, io vile isu'a ixolu ne.”
37Xe ta molomolo noxou milomusou aloxo ne, la mitali'isou aloxo 'o, “Tila, mii ane ne, uxali 'a ne'ei?”
La Iesu mukoline'i aloxo 'o, “No anu xalee lia ane vasime'a ta mitema misoisoli uta'olu no anu, la ta suluvi nenu ine'e ipita sou i'i'a ta mitema e misoisoli ne.”
S'ha seleccionat:
Luka 17: ataNTpo
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.