A-pûn Awang 17
17
Ahpyo-kuq Hpyit É Dangshikaq
1Abram gi, chyungxe zànwut 99 zân bo é hkûn, haû Yhûmsîng Garai gi, yhang lé htoq shit mù, “Ngò gi, Wum-o a-tsam dìk shoq bò Sû Garai Gasang#17:1 Wum-o a-tsam dìk shoq bò Sû Garai Gasang gâ é lé, Hebre má gi, Eli-Shadai gâ lhê. nghut lhê; Ngá é hí má, mara hûn jang a bo é za sô nyì àq. 2Ngò gi, nàng eq Ngá é gyoro má, Ngá é dangshikaq hkyak to râ nghut mù, náng é byù du gyai yhang lhoqmyo byi râ nghut lhê.” ga taî ri.
3Haú hkûn, Abram gi, myòqdong ngóm gòp jáng, Garai Gasang gi, yhang lé, 4“Nàng eq tô é Ngá é dangshikaq gi, shí dông nghut bê: Nàng gi, byù myû myo myô é îwa dùt râ nghut lhê. 5Nang lé gi, Abram#17:5 Abram gâ é gi, hkya-on wàq toq huî é îwa gâ é lichyúm nghut lhê. ga lo râ a nghut; náng é myìng gi, Abraham#17:5 Abraham gâ é gi, byù myo myô é îwa gâ é lichyúm nghut lhê. ga berâ nghut lhê; hkâsu mù gâ le, Ngò gi, nang lé byù myû myo myô é îwa dùt nhâng bê nghut lhê. 6Ngò gi, nang lé myo luq jebe nhâng râ nghut lhê; Ngò gi, náng chyáng mai, byù myû wuì le, hkóhkam pé le, htoq lô nhâng râ nghut lhê. 7Ngò gi, náng é Garai Gasang le, náng é htâng má nyi lé lô râ nghut é náng é awùt ashîn pê é Garai Gasang le kut nyî râ nghû, nàng eq náng é htâng má nyi lé lô râ pyàt bán myo myo nghut é náng é awùt ashín pé eq Ngá é gyoro má, ahtum abyùq dangshikaq nghut é, Ngá é dangshikaq lé to râ nghut lhê. 8Ngò gi, ahkuî nàng byù bíng kut nyi é jang, Hkanan mau gón shî lé, ahtum abyùq sing yù râ matú, nàng eq náng htâng má nyi lé lô râ nghut é náng é awùt ashîn pé lé byi râ nghut lhê; Ngò gi, yhángmòq é Garai Gasang dùt râ nghut lhê.” ga taî ri.
9Hau htâng, Garai Gasang gi, Abraham lé, “Nàng eq náng é htâng má nyi lé lô râ pyàt bán myo myo nghut é, náng é awùt ashín pé gi, Ngá é dangshikaq lé cháng ra râ nghut lhê. 10Nàng eq náng htâng má nyi lé lô râ nghut é, náng é awùt ashín pé cháng râ Ngá é dangshikaq gi, shí dông nghut lhê: Núngmòq mâ é yùqzo hkangmó gi, ahpyo-kuq hpyit râ dùt lhê. 11Núngmòq gi, ahpyo-kuq hpyit é hkam yù râ dùt lhê; haû gi, núngmòq eq Ngá é gyoro mâ é dangshikaq masàt alhô agàn dùt râ nghut lhê. 12Núngmòq é pyàt bán hkangmó mâ é yùqzo hkangmó gi, núngmòq é yhûm má hku é bang nghut nghut, núngmòq é awùt ashín a nghut é za, ngun èq wui hpyit yu é bang nghut nghut, hku htâng shit nyí nghut jáng, ahpyo-kuq hpyit ra râ nghut lhê. 13Yhûmsing é yhûm má hku é sû nghut nghut, yhûmsing é ngun èq wui yu é sû nghut nghut, ahpyo-kuq hpyit é hkam yù ra râ nghut lhê. Núngmòq é gùngsho má, Ngò tô é Ngá é dangshikaq gi, ahtum abyùq é dangshikaq dùt râ nghut lhê. 14Gùngsho má ahpyo-kuq a hpyit é yùqzo gi, yhâng é byu pé mai chyung hpyit pyâm é hui râ nghut lhê. Haú yùq gi, Ngá é dangshikaq lé lhoqhpyoq pyâm é sû nghut ri.” ga taî ri.
15Garai Gasang, Abraham lé xoq taî é gi, “Náng é yhûmsîng myhí Sarai lé, nàng, Sarai nghû a ge wùt lo; yhâng é myìng lé gi, Sara nghû berâ nghut lhê. 16Ngò gi, yhang lé shimân byi râ nghut mù, yhâng èq, nang lé, teng za yùqzo rayùq bau byi râ nghut lhê. Yhang gi, byù myû wui é înu dùt râ matú, Ngò, yhang lé shimân byi râ nghut lhê; yhâng chyáng mai, byù myû wui é hkóhkam pé htoq lô râ nghut lhê.” gâ ri.
17Abraham gi, myòqdong ngóm gòp luî, wuì uchyang, yhânggùng yhang, “Rashô zan é yùqgè rayùq gi, yùqzo wó shirâ lhú? Sara gi, chyungxe zànwut 90 zàn má zoshâng wó hkû shirâ lhú?” ga taî ri. 18Hau htâng, Abraham gi, Garai Gasang lé, “Ishima-elaq gi, Náng é jeju ahkaû má chyungxe dui nyì sháng gàq!” ga taî ri.
19Haú hkûn, Garai Gasang gi, “Nghut kôlhang, náng é yhûmsîng myhí Sara gi, nang lé yùqzo rayùq hkû byi râ nghut mù, nàng gi, yhang lé Isak#17:19 Isak gâ é gi, yhang wui chik é gâ é lichyúm nghut lhê. nghû myìng myhíng byi ra râ nghut lhê. Yhâng mai nyi lé lô râ nghut é yhâng é awùt ashîn pê é matú, ahtum abyùq é dangshikaq nghut nyî râ dông, Ngò gi, yhang eq, Ngá é dangshikaq tô to râ nghut lhê. 20Ishima-elaq eq séng luî, Ngò, nang lé gyo byi bê nghut lhê. Ngò gi, teng za yhang lé shimân byi râ nghut lhê; Ngò gi, yhang lé zo myo myhû nhâng mù, yhâng é byù du lé myoluq jebe nhâng râ nghut lhê. Yhang gi, zau raxe í yùq é yhâng wa dùt râ nghut mù, Ngò gi, yhang lé a-myû mó dùt nhâng râ nghut lhê. 21Nghut kôlhang, Ngò gi, náng é matú, sâ-nhik shí nám lé Sara hkû byi râ nghut é Isak eq, Ngá é dangshikaq to râ nghut lhê.” ga taî ri. 22Garai Gasang gi, Abraham eq dang ban nyò jáng, yhâng chyáng mai dòq ló byùq bê nghut ri.
23Haú nyí má yhâng, Abraham gi, yhang lé Garai Gasang taî é eq rajung za, yhang zo Ishima-elaq lé le, yhâng yhûm má hku é eq yhâng é ngun èq wui hpyit yu é yùqzô pé lé le, yhâng yhûm má nyi é yùqgè wuì yùq hkangmó lé ahpyo-kuq hpyit byi bê nghut ri. 24Abraham gi, yhang ahpyo-kuq hpyit hkam é hkûn, chyungxe zànwut 99 zân bò bê nghut mù, 25yhang zo yùqzo Ishima-elaq gi, yhang ahpyo-kuq hpyit hkam é hkûn, chyungxe zànwut 13 zân bò bê nghut ri. 26Abraham eq yhang zo yùqzo Ishima-elaq hpe tâng gi, haú nyí má yhang í hpê é ahpyo-kuq hpyit yû bekô nghut ri. 27Abraham é yhûm má hku é eq gótû a-myû mai ngun èq wui hpyit yu é yùqzo hkangmó gi, yhang eq rahá ahpyo-kuq hpyit hkam yù bekô nghut ri.
S'ha seleccionat:
A-pûn Awang 17: znot
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025, Wycliffe Bible Translators, Inc.