Matiu 11
11
Yoniꞌa agaiꞌa anagala hu-ma-tegeꞌya Yisasitega umainae.
1Yisasiꞌa tuelufuꞌa (12) agaiꞌaenema tokaeꞌya nemaiya anagaꞌmogamina huge ama-ve-lige huteno alu kumate kumate Anumaya Koti kea mo hama-paino hu-mave-li-maine.
2-3Yoniꞌa ti fale neꞌamatea kanoa nofipi maineno Kalaisiꞌma hia kavafena haviteno nagoꞌa agaiꞌa anagala Yisasife havigegahe hu-ma-tegeꞌya mage huꞌya me hae “Kagaya egahiema hu-mainaya kano emainapi alu kanohe agava maisune?” huꞌya hae. 4Hageno Yisasiꞌa mage huno hie “Tamakaya utama haviya yaꞌene agaya yaꞌene Yonina mo hapaiho. 5Ma ya agone hutama hiho amaulaga asu hu-mainea veaꞌmoꞌya amaulaga neꞌagae. Amaiya haviya hu-mainea veaꞌmogami amaiyamoꞌa kanale hu-mate. Fugitaya amake-mainea veala kanale hu-mate. Amakesa tile-mainea veala eteꞌya nehaviye. Fali-mainaya veala hetiꞌya mainae. Afenoꞌami omalenea veala Anumaya Kotina kanale keꞌa nehaviye. 6Nagai kehema tole amakesa ohavisaya veaꞌmoꞌya kanaleꞌya huꞌya maigahae.” huno hu-maine.
7Yoniꞌma hu-ma-tegeꞌya aya veaꞌmoꞌya neꞌvageno Yisasiꞌa anile mainaya veaꞌmogamina Yonife mage huno hamavige “Tamakaya kaꞌme kotega na ya mogegahe neꞌvae? Nago kanoa yasimoꞌa hopa kana huno ali fagagi mainea kanomona agegahe neꞌvao? 8Ifi na ya agegahe umainae? Kanale kena fai-linesia kano agegahe neꞌvao? Aꞌao kanale kena fai-linesaya vayala kaꞌme kotega omaigahagi sauve kanomo nopi maigahae. 9Na ya agegahe neꞌvae? Anumaya Koti aune kano agegahe neꞌvao? Ifi tamage tamaha-nepauve mukiꞌa amaune vayaꞌmogamina amakase-mainea kanoa Yoni maine. 10Yonife huꞌya nayona Anumaya Koti autaꞌmafina mage huꞌya kae-malenayane
‘Haviho nagaya Anumaya Kotiꞌna aliꞌya kanoꞌnimona hu-tesugeno uhagotegatenoꞌma visana kana valino ali-hilato huga-tegahie.’ huno kae-maleneane.
11Tamage huꞌna tamaha-nepauve Yoniꞌa ti fale-neꞌamatea kanomoꞌa mukiꞌa ma mopale vayaꞌmogamina ago amakase-maineanagino nagoꞌa afa veaꞌmoꞌya Anumaya Kotife ‘Kava yagailato.’ huꞌya hu-mainesaya veala Yonina ago agase-mainae. 12Yoniꞌa ti fale-neꞌamatea kanomoꞌa kea hama-pai-mainea kanaleti aepa heꞌya tokiyaꞌami hanea veaꞌmoꞌya Anumaya Kotiꞌma kava yagai-lama-tesia yafe tokiyaꞌage huꞌya ‘Ani yapi maigahune.’ huꞌya hu-mainayanagi nagoꞌa vayaꞌmoꞌya tusiya huꞌya ani yafena kame nehae. 13Mukiꞌa kanafina Moseseꞌene Anumaya Koti amaune vayaꞌene kea hu-haleꞌya hu-mainayanagino Yoniꞌa evaꞌyi hu-maine. 14Ani vayaꞌmoꞌya nagoꞌma esia kanomofena, Ilaiyaꞌe kanomofena ago tamaha-pai-mainayanagi ‘Yoniꞌa ani kano maineꞌ hutama havinutamahena havigahae. 15Tamakesama hanesia veaꞌmogatama haviho.
16Meni kanafima mainaya veaꞌmogatamahena hanaꞌa veaꞌne mainae huꞌna tamaha-paisue? Ma ma hisua augafa nafaꞌneyagamoꞌya mainaya avamete hutama mainae. Ani nafaꞌneyagamoꞌya veaꞌne alitalu huꞌya mainalega maineꞌya alu nafaꞌneyagahena ke huꞌya mage huꞌya hae. 17‘Yaveꞌya aikolunana tamakaya amoa noꞌayae. Tagaya tahau hisuna yagame nehunana tamakaya avia noꞌatae.’ huꞌya hu-mainae. 18Yoniꞌa ti fale-ma-te kanomoꞌa kaveꞌene haviliꞌene mosino emainegeꞌya amakaya ‘Satani Avamula aguꞌafina maine.’ huꞌya hu-mainae. 19Hayanagi ikapinagati emainoa kanoa vayaꞌmo natenea nafaꞌnemoꞌna tina kavela me nenogetama nagaifena ‘Kaveꞌene tiꞌene neno haꞌno hugeno omai kano maineno musufaya huꞌya amaugafaleti takisi neꞌaliya vayaꞌene kefo yama nehaya vayaꞌene vayaꞌamoꞌya mainae.’ huꞌya hu-mainae. Hayanagi Anumaya Kotina kanale agu agesama hanea yapiti kanale yana falote hu-maineafe vayaꞌmoꞌya ‘Fatago kava nehie.’ huꞌya hu-mainae.” huno hie.
Yisasiꞌa amakuꞌa ai-yahae nohaya veafena tusiya huno hauna hu-neꞌamate.
20Yisasiꞌa mani kea huteno aepa heno agayama tokiya avame yama higeꞌya age-mainaya kumaꞌyagaletiꞌene ani kumate veaꞌmoꞌya kefo yaꞌamia neꞌataleꞌya amakuꞌa ai-yahae huꞌya akave nohaya yafe Yisasiꞌa tokiyaꞌage ke huno mage hu-maine. 21“Avoꞌneo Kolasini mainaya veaꞌmogatamaene Petesaita mainaya veaꞌmogatamaene tusiya huꞌna tamakaifena nahau nehue. Tamakai kumapina nagaya tokiyaꞌage avameꞌyana ago huanagi tamaipa ai-yahae ohayanagiꞌna ani tokiyaꞌage avame yama Taiyaene Saitoniene huleꞌasina ani kumate veaꞌmoꞌya kefo yaꞌamihena ago amaipa ai-yahae huꞌya kefo yama hu-mainaya yafena kayavo kena fai-liꞌya taꞌnefafi maileꞌasine. 22Nagaya tamaha-nepauve Anumaya Kotiꞌa kaiyekema hu-ma-tesia kanafina Taiya mainaya veaꞌnene Saitoni mainaya veaꞌnene amaugafa amagata yana aligahayanagi tamakaya tusiya hutama nagoꞌene tamaugafa tamagata yana aligahae. 23Tamakaya Kapaneamu mainaya veaꞌmogatama ‘Taugafa alita anale haigahune.’ hutama nehao? Aꞌao afete tavitama tamakaye nehinagetama maigahae. Tamakai kumapi hu-mainoa tokiyaꞌage avame yana Sotomu kumateꞌma huleꞌasina ani kumate veaꞌmoꞌya amakuꞌa ai-yahae hu-mainaleꞌasina atafina fanane ohaleꞌasine. 24Tamaha-nepauve Anumaya Kotiꞌma kaiyeke hu-ma-tesia yupa Sotomu mainaya veala amaugafa amakata aigahianagi tamakaya amakasetama tusiya huno tamaugafa tamakata aigahie.” huno hu-maine.
Yisasiꞌa “Nagaitega etama mai-falu hiho.” huno hu-maine.
25Ani yupa Yisasiꞌa nunamuna mage huno hie “Nenafagae mukiꞌa ma mopafi yaꞌene ikapinaga yaꞌene kava yagai-mainana Anumayamoga kanale kava nehane. Nagoꞌa veaꞌmoꞌya ‘Havi haviꞌyati hanea vea mainone.’ huꞌya nehaya veaꞌmogamifena ohavisae huka fala-ki-malenane. ‘Ala avo nopi umainona vea mainone.’ huꞌya hisaya veaꞌmogamifena ohavisae huka fala-ki-malenanagi ‘Inamu nafaꞌne kana huta mainone.’ huꞌya nehaya veala ago amaveli-mainana yafena aluya huꞌna musekaꞌa nehue. 26E, Nenafagae kagai kagu kagesamo hia kava huka ani kavala hu-mainane.” huno nunamuna hu-maine.
27Veaꞌmogamifena mage huno hu-maine “Nenafaꞌa mukiꞌa lokiya ago namine. Mukiꞌa veaꞌmoꞌya nagaila neꞌamonina aepaꞌnia ohavinagi Nenafaꞌa agaiꞌage nagai aepaꞌa haviline. Havilinegi mukiꞌa veaꞌmoꞌya Nenafa aepaꞌa ohavinae. Aniꞌa huꞌna nagaiꞌnige neꞌamoꞌna Nenafa aepaꞌa havilineꞌna nahaisia veaꞌmogamina hu-mave-lisugeꞌya Nenafana aepaꞌa havigahae.
28Tamakaya tusi aliꞌya neꞌalitama kana yama ali-mainaya veaꞌmogatama nagaitega egeꞌna mai-falu hisaya yana tamamino. 29Nagai aliꞌya aligeta tokaeta vaiyamano. Nagaya kayone kano maineꞌna naugafa aliꞌna ohai kano mainoafe aepaꞌnia havisageꞌna tamakuꞌamoꞌma mai-falu hisia yana tamamigahue. 30Tamakaya nagaiꞌene ai-lokaetama vaiyesayana kana ohugahianagitama yoꞌyo hutama vaiyegahae.”
S'ha seleccionat:
Matiu 11: kmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.