Apozelɨyara 4
4
Kaajolɨyaraayaba Pitalyɨ Jonɨjɨ wɨdahɨlya'nesɨ.
1Pitalyɨ Jonɨjɨ saraai a'mweraavɨ kuna wɨdadaakɨlyɨyagaa' Gotɨyarɨna mubɨthɨka yɨra'dɨvɨsarajɨ Gotɨyare Angevɨna dameraavɨ maremwaaidelyɨ A'mwe Sazuzɨyarajɨ sara bɨna ye'. 2Bɨna yeva sɨnna tɨka wɨda'daasɨyara. Sahwara dɨnyɨna “ ‘Jizaazai balaka ayɨna dɨkaavakelyɨ,’ wɨdɨvanɨgɨlya'na a'mwera sɨmunya nyawɨpɨdɨka! ‘Sɨnnawɨ Jizaazai kadɨkaava' nemɨ kabalawaajɨ dɨvi dɨkavaade'nanyɨ,’ nyawɨpɨdɨka!” Dɨnyɨna kye' sɨnna tɨka wɨdavakerera. 3Sɨnna tɨka wɨda'daasɨ nyɨlyai walakyagaa' a'mwe naangera yawɨ'na yeva “Sawɨsavɨ kotɨya' madaannera!” Pitalyɨ Jonɨjɨ saraarɨ wɨla pwɨyeva dɨnyɨna “Sawɨsa'na kalavuzangevɨ wakawaajɨ mwanyavɨ kotɨya' yaana!” Dɨnyɨna yeva kalavuzavɨ wɨmwaaihɨna ye'. 4Wɨmwaaihɨna kye' kɨrɨ' a'mwe kwalaalyara wɨdahɨlyavɨ kadɨka wɨ'neva Jizaazarɨ lɨmwagare'. Sagaa' a'mwe sara sahwarɨ lɨmwagesara kwala naanga naanga 5,000 mwaale'.
5Mwanyagaa' Anga Jeruzaalemɨ saba Juyaraavɨ maremwaaidɨvɨsarajɨ a'mwe naangerajɨ Juyaraavɨre Kɨwɨjarajɨ yɨkabɨna yɨna ye'. 6Yɨkabɨna yɨna kye' Gotɨyarɨna Yɨra'de Naangei Anaazalyɨ Kaayapaazalyɨ Jonɨjɨ Alekɨzaadalyɨ Gotɨyarɨna Yɨra'de Naangere jɨlɨkaimɨraayarajɨ bamwaaina yɨna ye'. 7Bamwaaina yɨna kye' tɨnnyaba Kaajolɨyara Pitarɨjɨ Jonɨmɨjɨ saraarɨ wɨmwaaiheva yɨwaarave' “Sa' gara yawaaihɨla? Be dɨragɨnyavaka? Kɨrɨmɨre jawaaihɨla sa' aarɨne yayavaka?” 8Sara kyɨwaarave' Pitarɨ Kuryai Tewaanyai yunebanna wɨlamwaaidɨ'nyɨ wɨda' “Nemaremwaaidɨvɨsaihɨlyɨ a'mwe naangeihɨlyɨ saihi, 9sɨvɨla kayaa'nanyarɨ tewaanya yɨke' gamɨre sɨvɨlyɨraai tewaanyɨraai yavada'galyawaaiholya'na danehɨthɨwaava! 10Sa'na sarɨmɨ yuyaihɨlyɨ Yɨzɨrelɨya yuyarajɨ saihi dara yawɨpɨja' ‘Ai, Kɨraazɨtɨya Jizaazai Naazaretɨ mwaalyare dɨragɨnya' kyawaalɨ' a'mwe dai maamɨdaryai yɨma'naka nemɨnyaba daa'manɨkei daaka!’ Yɨhɨthɨwolyai Jizaazarɨ yɨsavɨri sarɨmɨ nilɨya karame' baryarɨ Gotɨyai ayɨna yɨdɨkaavakelyɨ. 11Sahwarɨna dɨnɨke'
‘Sɨlaangerɨna madɨvɨsaihi “Waryaanyasɨ,” dɨneva wasɨ'ne',
Gotɨyai simɨdaangerɨ nayaa marayɨlamwaaihakelyɨ.’
Sa' dɨnɨkesɨ sahwarɨna. 12Kayaa'nanyanna Jizaazai gavei nevadaihasamaa'delyɨ. Kwaaka yuyavakɨ aane pwai kwarɨ Gotɨyai madahɨlakyaka nemɨre kayaa'nanya wasɨ'nya'nerɨ Jizaazarɨ wɨmwaaiha'. Aane pwaina kwaina mi'. Sahwai gavelyɨra,” sara wɨda' Pitai.
13Kaajolɨyara dara wanganesa' “Nɨwaava, Pitalyɨ Jonɨjɨ saraai lɨka myɨvanɨgɨlyaraai daaka! Saraai a'mweraai nemɨre sɨkulɨyavɨ myadisaraai daaka!” Deva atɨka maru'nare'. Atɨka maru'nareva dara yawɨresa' “O, a'mwe saraai Jizaazalyɨ kaanya jamaryagɨla!” 14Sara deva Pitalyɨ Jonɨjɨ saraaryaba a'mwerɨ yavada'gainɨkerɨ wanganeva dɨnyɨna ye' “Tewaanyai mena daa'manɨke'na saraarɨ maiyagaala aane pɨrɨ' kɨrɨ' mudaanna!” 15Mi'na dɨnyɨna yeva “Mwasawɨnna dɨmwaalyɨla!” dɨragɨnna wɨdɨna ye'. Mi'na wɨdɨna kye' kwalyawe' Kaajolɨyara dɨnyɨna ye'. 16Dɨnyɨna yadɨvɨ' pwara yɨwaara'na yɨna ye' “A'mwe saraarɨna gara yaajɨwona? Sare' dare'nesɨ. Jeruzaalemɨ dava yuyara mwaaihasara yawɨ'manɨga' ‘Saraai tewaanya' dɨragɨnya' yawaaihɨla.’ Sara yawɨ'manɨgasa' majɨna ‘Sa' nebulya' mɨka!’ mujɨ yaanneinera. 17Aawa. A'mweraayaba yuneba yagaala sa' nudɨpɨdɨka! Dɨragɨnna wɨdaathera. Sahware yayavɨna a'mwe aane pwai kwarɨ mujɨkanera! Savɨne'na mala nayɨhɨramaadɨka!” 18Mi'na dɨneva saraarɨ jaka wɨdɨna kye' saraai ayɨna wɨladaa'dakɨlyɨ wɨdɨna ye' “A'mweraaihi, yuyagaa' a'mweraavɨ Jizaazare yagaala mujɨkanera! Jizaazarɨna mujɨwaakyɨkanera!”
19Saraavɨ Pitalyɨ Jonɨjɨ ma'maaragi “Sarɨmɨ sahwaihi tewaanna jawɨbwaryɨla! Gotɨyai kanengamanɨ' Gotɨyare yagaalya' yagalya'mavakwolyɨ sarɨmɨre yagaalya' yakade'na tewaanyabwi daaka! Gara jawɨryijɨwaava? 20Sare' dare'nesɨ. Naarɨmɨ sahwainaai tɨnna wanganolyajɨ kadɨka wɨ'nolyajɨ sangɨna wɨdakajainaai wɨjalɨkurakakaneinaalyɨ.” 21Sara kudahi Kaajolɨyara dɨragɨnna ayɨna wɨdeva “Newɨ'nakɨlyɨ yagaala sa' mujɨwaakyɨkanera!” wɨde' “Dalyula!” Sahwara a'mweraavɨna lɨka yesare. A'mwera sɨvɨla kayaa'nanyai tewaanya yɨma'nake'na Gotɨyarɨna “Byaannakela,” dɨna ye'. Sara dɨna yadaapɨjɨ Kaajolɨyara yawɨ'na kye' “Aane pɨrɨ' kɨrɨ' mabɨramaariwo. Maramaannera!” Pitarɨjɨ Jonɨmɨjɨ saraarɨ daanga muvɨnya'. 22Sare' dare'nesɨ. A'mwe sai wɨjɨwaainya' yɨma'naka sai tewaanna yavada'galagɨlyai mɨgɨnyai mɨ'. Kwarame a'mweraare ata sɨvɨlɨraalya wavɨla'nɨkelyɨ sagaa'.
Jizaazarɨ wɨ'nadɨvɨsara Gotɨyarɨ wɨdesa'nesɨ.
23Pitalyɨ Jonɨjɨ ya'ma'na yagɨla kɨrɨmɨreraayawɨnna wɨlaawɨna yagɨla Gotɨyarɨna mubɨthɨka yɨra'dɨvɨta naangerajɨ a'mwe naangerajɨ wɨdesa' wɨdahi. 24Kudahi yuyara sɨmunya gavevɨ yawɨ'dɨvɨ' Gotɨyarɨ wɨde' “Nemaremwaaidɨnyaigɨ Sɨgunyasɨ Kwaakevasɨ saalaalyasɨ sa wakaka yuya sangɨ mwaaihasaraavɨjɨ yuyangɨjɨ wakagɨnyaigɨnyɨra. 25Kɨgaakuna gɨmɨre Kuryai Tewaanyai Ne sɨnnawɨnyai Devitɨmɨ sɨmunya' wɨjaavɨna Kɨraazɨtɨyarɨna. Wɨjaavɨna kyaa' Devitɨ gɨmɨre wɨdaayadei gɨmɨre yawɨsa'na pɨkarya dara yɨda'na
‘Ajɨmyangɨyaraavɨre sɨnna tɨka be'na wɨdava'?
Kumɨre a'mwera kayaa'na be'na yawɨre'?
26Kwaakevakɨre kingɨyara malya' maryamihe'.
Maremwaaidɨvɨsara gaidaasa'na yɨkabeva dɨne'
“Naangerɨjɨ gamɨre Kɨraazɨtɨyarɨjɨ yɨgalaana!” ’
27Sara yɨda'nɨke'na nebulya' dara yɨma'nakesɨ. Anga dava A'mwe Erotɨyalyɨ A'mwe Podɨyaazai Paailatɨjɨ ajɨmya pɨnɨngɨyarajɨ Yɨzɨrelɨyarajɨ yɨkabeva Jizaazai gɨmɨre wɨdaayadei dahɨlakagɨnyarɨna dɨnyɨna ‘Tamakaana!’ 28Savɨne'na dɨragɨnaangeigɨ sahwaigɨ yawɨ'na ‘Sara yɨdeinyɨ.’ Yawɨ'na yagɨnya' sara yɨkabeva kunnya sɨmunya myawɨryeva kɨrɨ' gɨmɨre sɨmunya' sara yɨna ye'. 29Naangeigɨ, maiyagaala nemɨjɨyaraarɨ wɨdɨwaasa' dahaasagaa' yawɨra'gɨzɨ gɨthayadaanyainaavɨ gɨnnya dɨragɨnya' kanejaava'gɨzɨ lɨka myadaa gɨmɨre yagaalya' wɨdaathe'nanyɨra. 30Gɨnnya dɨragɨnya' kanejaava'gɨzɨ nabalɨnakeraavɨ yavada'galawaajɨ nabaai gɨthaayade tewaanyai Jizaazare yaya' wɨdawaajɨ dɨragɨnyajɨ atɨka maru'narya'nejɨ yaadeigɨnyɨ.” 31Gotɨyarɨ mi'na kude' Kurya Tewaanyai yɨna kya' angevɨ wɨlamwaaleta ange' yonyɨ yonyɨ yɨdaasɨ Kuryai Tewaanyai yuyaraavɨ yunebanna wɨlamwaaina yada dɨragɨnya wɨjaavɨna ya'. Wɨjaavɨna kya' Gotɨyare yagaalya' dɨragɨnna wɨdadɨvɨ' lɨka myesare.
Jizaazarera avaaizɨmunya yawɨresa'nesɨ.
32Jizaazarɨ lɨmwaga'dɨvɨta yuyara sɨmunya avaalyasɨ kurya avaainanyasɨ yawɨ'dɨvɨ' yuyaraavɨ kale wiadaasɨ tewaanna mwaalɨna ye'. Pwai myawɨrina “Nɨmɨre pɨrɨ' kɨrɨ' nɨmɨnyɨnesɨ. Jizaazare pwaraavɨne' mɨka!” Aawa. Yuyara kunnya gɨlyɨvɨta yuya pwaraavɨnengɨra. 33Yanga yɨnyɨna yadɨvɨ' Wɨdaasadera a'mweraavɨ Naangei Jizaazai dɨkaavake'na dɨragɨnna wɨjalɨkurake'. Dɨragɨnna wɨjalɨkurakesa' Gotɨyai Jizaazareraavɨ nayaa kamaremwaala' yanga gaimwangebwi kumɨnyɨ warakesɨ. 34Sare' daresɨ. Nayaa mwaalɨna kye' wɨmudaasaka aane pwai kwai mamwaalya'. Sare' dare'nesɨ. Pwara nɨgwɨmaayaraavɨna yawɨ'na yeva wawɨnyangɨre kwɨyakwaravajɨ angengɨre kwɨyakwaravajɨ sara kunnya yaasadɨvɨ' nɨgwia makabɨna yeva 35Wɨdaasaderaavɨna wɨjaavɨna kye' Wɨdaasadera nɨgwɨmaayaraavɨna wɨjaavɨna ye'. Wɨjaavesa'na nɨgwɨmaayara mamwaalye'.
36Sagaa' savɨna Jozepɨyai Ahu'manna Saaipɨraazɨ mwaalyai sara ya'. Gamɨ sare yɨsavaa' Livaayai wo'nɨkerɨna Wɨdaasadera yaya mudɨke' Baanavaazai wɨdesalyɨra. Baanavaazai yagaala sa' “Pwaraavɨna sɨmunya dɨragɨnya yɨvaimwadelyɨ,” dɨnɨkesɨ. 37Baanavaazai gannya wawɨnya' kɨnɨnnakei savɨ yaasaka nɨgwia yuya makabɨna yaka Wɨdaasaderaavɨ wɨjaava'.
S'ha seleccionat:
Apozelɨyara 4: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.