Lukɨ 2
2
Maarɨyaa' Jizaazarɨ maarake'nesɨ.
(Matɨyui 1:18-25)
1Yɨrɨka sangɨ Romɨ Ga'maanɨya Maremwaaidei Sizaa Wohazɨtaazai wɨda' “Kwaaka yuyavakaavɨ mwaalyaraavɨre yaya bukuyavɨ maapɨka!” 2Sagaa' yaya mudɨ'na maaryagaa' Kwirɨnɨyaazai Kwaaka Sɨrɨya maremwaaidehaakɨ. 3“Yaya maapɨka!” kuda' sare'na kuvɨnɨmaangeraavɨre angewɨnna yuyara kaanna wɨna ye'. Gazaizai gannya abwaibwalaasavɨna wɨna.
4Ne Devitɨmɨre yɨsavaakɨdaasai Jozepɨyai mwaalakelyɨ. Ne Devitɨmɨrei Kwaaka Galɨli Anga Naazaretɨdaa'nyai Kwaaka Juthɨya Anga Betɨlemɨna kaanna wɨna. Anga savɨ kɨgaakuna Kingɨya Devitɨmɨre angebanyɨ. Saba Devitɨmɨ ganaange' maryaakebanyɨ. 5Jozepɨyarɨne taaya' dakɨnɨke' Maarɨyaa' kaimɨraavɨmunnake' kɨrɨsɨ “Naarɨmɨre yaya maapɨka!” dahɨla kaanna wɨna. 6Kaanna wɨna yagɨla Betɨlemɨ mwaaidakɨlyɨ Maarɨyaa' kaimɨraaya maaryagaa' yɨbwakɨna'. 7Sara yaka gannya sɨraangei maarɨna. Maarɨna yaka kwaabɨhannya maryewaa'mwanna yaka bulɨmakaawoyaraavɨre wapaaya nadɨvɨsavɨ maradɨ'gwalakɨna ya'. Anga pwara waraawia'nevɨ yuneba gɨrasɨ'nake'na bulɨmakaawoyaraavɨrevɨ maradɨ'gwalakɨna yakelyɨ.
Ejelɨyara sipɨzipɨyangɨ maremwaaidɨvɨsaraavɨ wɨdesa'nesɨ.
8Saba angeba mwasɨlaa sipɨzipɨyangɨ maremwaaidɨvɨsara mwaaidɨvɨ' sawɨta savɨ kaabidaryawɨ sipɨzipɨyangɨ maremwaaina ye'. 9Sipɨzipɨyangɨ maremwaaina yadapi Naangere ejelɨyai yɨma'naabɨna kya' Naangere byaanna dɨragɨnya' wannyɨna yakesɨ kumɨnyaba. Wannyɨna kya' lɨka naanga kye' 10mamaayai wɨda' “Lɨka mipɨna! Sare' dare'nesɨ. Yɨthaanyi, yagaala tewaanya' makwaimanaabɨhe. Yagaala sa' yuyara wɨ'napɨjɨ yɨlaaya naanga yɨpɨ'de' makwaimwaabe. 11Dahaasagaa' Ne Devitɨmɨre angeba kaimalerɨ maa'mwakei. Sai sarɨmɨre kayaa'nanyaburɨjɨ pwaraavɨre kayaa'nanyaburɨjɨ yɨhɨvadaihasamaaradelyɨ. Sarɨ Gotɨyai dahɨlakaka maryasaabɨwakei Kɨraazɨtɨyalyɨ. Naangelyɨ. Sare'na kwalaalyara yɨlaaya naanga yɨpɨ'de'nanyɨ. 12Sarɨmɨ wawapɨjɨ sarɨmɨnyɨ wɨjɨwaainya'ne' dara wangabɨza' ‘Ai! Bulɨmakaawoyaraavɨre wapaaya nadɨvɨsavɨ kwaabɨhannya yewaa'mwannɨkei daaka!’ Tɨnna mi'na wanganapɨjɨ jawɨryide ‘Nebulyasɨ. Sai nemaaradelyɨ.’”
13Ejelɨyaryaba ejelɨya kwala naange' yarai yɨma'naabɨna yeva Gotɨyare aamiyara Gotɨyarɨ yɨlaaya yadɨvɨ' yɨledaata pɨrɨ' naanna de'
14“Gotɨyai Sɨgunyavɨ munya ke'mwewɨ mwaalɨ'.
Sarɨna nemɨ yɨlaaya naanga yaana! Su!
Kwaakewɨnyaraavɨna Gotɨyarɨ kale wiada
‘Kwaamu'nanyabwi wɨwakɨma!’ dɨna yadelyɨ.”
Sipɨzipɨyangɨ maremwaaidɨvɨsara Jizaazarɨ tɨnna wanganya'nera.
15Mamaayara Sɨgunyavɨnera ayɨna yɨlaawɨna kye' sipɨzipɨyangɨ maremwaaidɨvɨsara dɨnyɨna ye' “Betɨlemɨna kaanyaana! Sara yɨma'nɨwakevɨna Gotɨyai sara nedɨwake'na tɨnna wanganaade'na kaanyaana!” 16Dɨnyɨna yeva yarai kaanna wɨna yeva wanganna ye'. Maarɨyaasɨ Jozepɨyalyɨ bulɨmakaawoyaraavɨre wapaaya nadɨvɨsavɨ kaimɨraayai wɨla'dɨsɨyaba tɨnna wangane'. 17Gamɨnyɨ tɨnna wanganeva yagaala mamaayai wɨdake' wɨde' kaimɨraaya bwaranyarɨna. 18Kumɨ sara yagaala kade' pwara wɨ'nyɨna yeva atɨka wɨ'nare'. 19Maarɨyaa' gannya sɨmunyavɨ yagaala sa wakɨna yaka yawɨramaremwaaina yadesɨ. 20Sipɨzipɨyangɨ maremwaaidɨvɨsara ayɨna wodɨvɨ' “Ejelɨyai sara nedɨwake' nebulyasɨra. Nemɨ kadɨka wɨ'nona tɨnna wangamwo naange'nanyasɨ,” dɨwɨna yadɨvɨ' Gotɨyarɨ yaya' byaannake' munyaba makina yeva Gotɨyarɨ yɨlaaya naanga yɨwɨna ye'.
Jizaazarɨ yaya' wɨdesa'nesɨ.
21Dɨvi sawɨta ati ata purɨdaa'nyɨ pɨrɨwaai mi'na kajɨnna' kɨlaaka pimagɨnyajɨ' dawasɨ'na yadɨvɨsagaa' kaimɨraayare kɨlaaka dawasɨ'na yeva “Jizaazala,” wɨdɨna ye'. Kɨgaa' Maarɨyaa' kaimɨraavɨmunya kune' mwaaidɨ'nyɨ mamaayai yaya sa' wɨdake' “Jizaazala,” wɨdɨna ye'.
Gotɨyare Angevɨ Sɨmɨyonɨjɨ Anasɨ Jizaazarɨ wanganagɨlya'nesɨ.
22Ne Mozɨzare Kɨwɨnya dɨnɨke'na (yɨrɨka 40) Jozepɨyalyɨ Maarɨyaasɨ sayoi mudange'ne gɨrɨkita'nanya' wasɨ'nya'ne'na Angeba Jeruzaalemɨna kaanna wɨna. 23Nabaai Naangere Kɨwɨnya dɨnɨkabaaibɨsasɨ. Bwaranya sɨnnawɨnyai Naangerɨnelyɨ. Sara dɨnɨke'na Jeruzaalemɨna kaimɨraayarɨ wɨjɨwaainya'na kaanna makuna. 24Nabaai Naangere Kɨwɨnya' dɨnɨ' “ ‘Kwaamɨryawaai dahamwaaihi? Gulɨkwaamɨrya tihɨnyawaai dahamwaaihi?’ da'gɨzɨ dɨka yɨra'na yɨja' dɨka nasɨ'na yadesɨ Gotɨyarɨne'. Mudange'ne gɨrɨkita'nanya marasɨ'nya'nebwinanyɨ.” 25Yɨthaa, Angeba Jeruzaalemɨ a'mwei Sɨmɨyonɨ wo'nɨkei mwaalɨna ya'. Sai a'mwe tewaanyai Gotɨyare yagaala dɨragɨnna lɨmwaga'dei Sɨmɨyonɨ Yɨzɨrelɨyaraavɨ tewaanya yɨvaimwaderɨna yemwaaina yakelyɨ. Gotɨyare Kuryai Tewaanyai gamɨnyɨ mwaaida yagaala naanga wɨda' 26“Sɨnnawɨ Naangere wɨdahɨlakyai Kɨraazɨtɨyarɨ tɨnna wangana'gɨzɨ dɨvi dɨvaideigɨnyɨ. Sɨnnawɨ dɨvaide' mɨka!” 27Sarei mwaalɨna kya' Kuryai Tewaanyai Gotɨyare Angevɨ wibwarɨdaakuna kya' sai kaanna wɨlaabɨna. Kaanna wɨlaabɨna yaka Gotɨyare Angevɨ mwaaidɨ'nyɨ ganɨmaangelyɨ ganaangesɨ sayoi kaimɨraaya Jizaazarɨ makabɨna. “Gotɨyare kɨwɨnya' dɨnɨke'na sara wɨjɨwainaawɨna yaka!” dahɨla makabɨna. 28Mi'na makabɨna kyagi Sɨmɨyonɨ kaimɨraayarɨ asɨrɨ yɨlamarayagalakɨna yaka Gotɨyarɨna yɨlaaya yada wɨdɨna
29“Naangeigɨ, dahaa' naanga nyɨdahɨnya' yɨwaa.
Gɨthaayadɨnyainyɨ nɨmɨre munya tewaanya wa'deinyɨ
Tewaanna yawɨ'na yadɨnyainyɨ nayaa balɨdeinyɨ.
30Nayaa balɨde sare' dare'nanyɨ.
Nɨnnya tɨnnyaraai dara wangamanɨge'
‘Gotɨyare nemɨnyɨ Nevadaihasamaaraderɨ dangamanɨge!’
31Sai tewaanyarɨ dahɨlakagɨna wɨmwaihɨwaa.
A'mwe yuyara wanganya'nerɨ wɨmwaihɨwaa.
32Sai baakei ajɨmya yuyangɨyaraavɨ wɨjɨwaakada
Gɨmɨreburɨ mudɨkera nayaa tɨnna wangabɨ'dere.
Gɨmɨreina Yɨzɨrelɨyaina byaanna dɨragɨnyavɨ mwalaadeine.”
33Sɨmɨyonɨ kaimɨraayarɨna wɨdake'na kaimɨraayare ganɨmaangelyɨ ganaangesɨ sawaai atɨka maru'na'na yagi. 34Atɨka maru'na'na yadaakɨlyɨ Sɨmɨyonɨ wɨda' “Gotɨyai tewaanya yanga yɨhyadelyɨ.” Wɨdaka ganaanga Maarɨyaavɨ wɨda'
“Gotɨyai kaimɨraaya darɨ dahɨlakakelyɨ.
Yɨzɨrelɨya pwara ku'napɨjɨ munyaba makɨladerera.
Pwara mu'nyɨ yɨpɨjara kwaakeba marulawakaderera.
Sai Gotɨyare sɨmunya' wɨjɨwaainada
Kwalaalyara sahwarɨ maanga wɨdɨpɨ'devɨne'na
35Yawɨta kayaa'nanya lɨka yulya'dɨvɨsaraavɨna
A'mwe yuyara nayaa yawɨrangabɨ'de'nanyɨ.
Kale naanga gyade'na
Kwaari'masɨramɨnya sɨnnake' gɨthavadevaaibɨsa'na
Kɨnna naanga dɨthathe'gɨnyɨ.”
36Gotɨyarɨ wɨ'nawɨjɨwaakade' pɨropetɨya' Ana' mwaala'. Sa' Panyɨwelɨmɨre garaavaanga', Ne sɨnnawɨnyai Aazarevaakɨdaa'nyasɨ. A'mwe sa' nesɨ. A'mwerɨ maa'naka a'mwelyɨyagaa' kwarame ati ata purɨdaa'nyɨ pɨrɨwaai mwaalaka 37yaanyɨwaake' kwarame 84 (a'mwe daraai daraalyaraavɨre atɨzɨvɨlɨraai yaka dawaai dawaai) wavɨla'nɨke' a'mwe ne' mwaala'. Gotɨyare Angevɨ yagalya'mata mi, yuyagaa' Gotɨyarɨ dɨragɨnna yɨdaangade' wapaayajɨ manyɨ, kɨmaaka mwaaida Gotɨyarɨ wɨdada mwaalakesɨ. 38Sɨmɨyonɨ kuna wɨdadaa'nyɨyagaa' a'mwe sa' bɨna yaka Gotɨyarɨ “Su! Su!” wɨdaka kaimɨraayarɨna pwaraavɨ wɨdɨna. Gotɨyai Anga Jeruzaalemɨ mwaalyaraavɨ wiwawɨnyabwi yɨpalasɨ'nya'na yemwaalesara sahwaraavɨ wɨdɨna ya' a'mwe sa'.
Anga Naazaretɨna ayɨna wɨna yesa'nesɨ.
39Naangere Kɨwɨnya dɨnɨka yuya mi'na yeva Kwaaka Galɨli kunnya Anga Naazaretɨna ayɨna wɨna yeva mwaalɨna ye'. 40Kaimɨraayai naanga gɨrina yaka dɨragɨnya yakelyɨ. Sai sɨmunya nayaa yawɨrakei Gotɨyare yanga wɨgaimwangebwi wa'delyɨ.
Gotɨyare Angevɨ kaimale Jizaazai mwaalake'nesɨ.
41Kwarame yuyagaa' Angeba Jeruzaalemɨna Jizaazare ganɨmaangelyɨ ganaangesɨ kaanna wɨna. Kɨgaakuna Gotɨyai Yɨzɨrelɨyaraavɨ maramyɨ yaka pari'ma'na yaake'na Juyara Pari'ma'munne' nyɨna yadɨvɨsa'na sawaai kaanna wɨna yagɨlyawaalyɨ. 42Jizaazarɨ kwarame atɨraai sɨvɨlyɨrɨdaa'nyɨ pɨrɨwaai kwavɨlava' sagaa' ayabaaibɨ' munne tɨka nya'na Jeruzaalemɨna wɨna yadi' Jizaazarɨ makilaawɨna. 43Mi'na makilaawɨna yagɨla munne nyɨna yagɨla kɨrɨnnya angevɨna kaanna wɨna. Kaanna wɨna yadaakɨlyɨ Anga Jeruzaalemɨ kaimale Jizaazai mwaalɨna. Sa'na ganɨmaangelyɨ ganaangesɨ myawɨri yagɨla 44“Pwarajɨ wɨwaka,” dahɨla yɨrɨka sari kaanna wɨna. Kaanna wɨna yagɨla sawɨsɨrɨ “Gawɨ mwaalɨka?” dahɨla kɨrɨmɨjɨyaraayaba kɨrya'mweraayaba bɨrɨna bɨrɨna. 45Aawa. Kunewɨ wanganagɨla Jeruzaalemɨna ayɨna wɨna yagɨla 46yɨrɨka daryaai darɨkɨ Jizaazarɨ bɨramaa'na. Gotɨyare Angevɨ Gotɨyare kɨwɨnya wɨjɨwaakadɨvɨsara Juyaraayaba bɨramaa'na yagi. Saba Jizaazai walamwaaina yada wɨjɨwaakadɨvɨsaraavɨre yagaala wɨ'naka kumɨnyɨ yɨwaara'na ya'. 47Sai sɨmunya nayaa yawɨ'da yagaala nayaa wɨdake'na a'mwera wɨ'nyɨna yeva atɨka maru'na'na ye'. 48Nabaai ganɨmaangelyɨ ganaangesɨ tɨnna wanganagɨla atɨka maru'na'na yagɨla ganaange' wɨdɨna “Kaimɨraayaigɨ, naarɨmɨnyɨna baa'na yɨwaa? Yɨthaa, gɨmaamaangelyɨ nɨmɨjɨ sa'naarɨ taanga nehyadaa'nyɨ gɨmɨnyɨna bɨ'manɨgoi.”
49Sai wɨda' “Nɨmɨnyɨna be'na bɨ'manɨgɨla? Nɨmware angevɨ mwaaimuja'na be'na bɨramarivanɨgɨla? Kɨrɨmɨ myawɨrijɨwaai?” 50Sara kuda' kɨrɨ' sawaai myawɨramaaryagi wɨdake'.
51Anga Naazaretɨna kɨrɨmɨjɨ walaawaka mwaalaka kɨrɨmɨ sawaarɨ kwaakewɨ nayaa mwaala'. Jizaazai yuya yake'na ganaange' gannya sɨmunyavɨ nayaa wakaka kave maremwaala'. 52Sɨmunya dɨragɨnna yawɨ'daa'nyɨ Jizaazare kɨlaakejɨsɨ sɨmunyasɨ tewaanna yada Gotɨyalyɨ a'mwerajɨ tɨnna wanganeva yɨlaaya yadaapɨjɨ mwaala'.
S'ha seleccionat:
Lukɨ 2: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.