Lukɨ 9
9
Jizaazai gamɨre sɨvɨlɨrɨdaa'nyɨ pwaraalyaraavɨ wɨdaasake'nesɨ.
(Matɨyui 10:5-15; Maakɨ 6:7-13)
1Sagaa' gamɨre sɨvɨlɨrɨdaa'nyɨ pwaraalyaraavɨ jaka wɨjɨvwarɨjɨmaa'nyɨna yɨna yaka sare saraavɨ dɨragɨnya naangesɨ naangaangenna ya'neraavɨne dɨragɨnyabulyɨ wɨjaavɨna. Yuya yɨmakeraavɨjɨ nalaaya dala nabinanyangɨjɨ marasɨ'nya'nebwi wɨjaavɨna. 2Gotɨyai a'mweraavɨ maremwaaidevɨjɨ wɨjɨwaakya'neraavɨ nabaai nalaavɨnakeraavɨ tewaanya yavada'galya'neraavɨ wɨdaasɨna. 3Wɨdaasɨna yakegaa' wɨdɨna “Sarɨmɨ gɨlyɨvɨta kaanya yamarya'ne aane pɨrɨ' kɨrɨ' namaapɨdɨka! Yadisarɨkajɨ gɨlya yɨvɨlyajɨ wapaayajɨ nɨgwiajɨ wana yuna namaapɨka! Nabaai sarɨmɨ baazɨ'ma'nya pɨrɨwaaina namaapɨdɨka! 4Nabaai sarɨmɨ anga pɨrɨvɨ wɨlapɨjɨ yɨ yune anga dazahɨrɨvɨna dɨmwaalyideihɨlyɨ. Anga saba wɨjɨwaakɨna jideihɨlyɨ. Dɨvi anga dazavɨ yagalya'mavapɨjɨ yɨ kaanna dɨwideihɨlyɨ. 5Pwara kumɨre angengɨna mihɨmakwi yɨhipɨjaraavɨ anga naanga dazaba jahalya'makwideihɨlyɨ. Sara yapɨjɨyaihi sarɨmɨre sɨvɨlyangɨ kwaatɨrɨdɨrɨnya dɨvurakɨrasɨ'nɨgwideihɨlyɨ. Sahwara tɨnna wanganapɨjɨ kumɨre sabwinajɨ Gotɨyai taanga wɨjaaya'najɨ yawɨpɨ'de'nanyɨ. Kumɨnyɨne jalɨkurakya'nesɨ.” 6Wɨdɨna kya' sahwara anga yuyabanya kaanya yamarina yadɨvɨ' yagaala tewaanya' wɨjɨwaakɨna yadɨvɨ' gazabazaba nalaavɨnakeraavɨ nawɨ'nya yavada'galamwaaihɨna ye'.
(Matɨyui 14:1-12; Maakɨ 6:14-29)
7Galɨli saba maremwaalaka maalɨkei Erotɨyai yuya dazangɨne'na kadɨka wɨ'nyɨna yaka yawɨta kwalaalya yɨna. Jizaazarɨna a'mwe pwara dɨna “Jonɨ kavi'nɨnnyavɨdaa'nyai ayɨna dɨkaa'mwakerɨnereva.” 8Nabaai pwara dɨna “Ne Pɨropetɨya Yɨlaajai yɨma'naabɨvanɨkerɨnereva.” Nabaai pwara “Pɨropetɨya sɨnnawɨ kɨgaakunanya pwai ayɨna dɨkaa'mwakerɨnereva.” Sara wɨdesa'na yawɨta kwalaalya yɨna. 9Sarevɨ Erotɨyai dɨna “Nɨmɨ Jonɨmɨre tɨlɨnnya' mena woripuragerɨnera. Kɨrɨ' a'mwe dazai yagaala dazavɨ sasara wɨ'nɨvanɨgei bewalaka?” Sara dakei “A'mwe sahwarɨ tɨnna wanganɨma!” daka yakelyɨ.
Jizaazai a'mwe paaivɨ taawɨzanɨyaraavɨ (5,000) wapaaya wɨjaavake'nesɨ.
(Matɨyui 14:13-21; Maakɨ 6:30-44; Jonɨ 6:1-14)
10Wɨdaasakera apozelɨyara yagalaawɨna yeva yuya kumɨ yageta sanna gamɨnyɨ wɨdɨna. Mena wɨdɨna kye' sahwai sahwaraavɨ maarɨna yaka a'mwe pwaraavɨ yagalya'ma'na yɨna yaka yune kumɨ sarana anga naanga pɨbanna Betɨzaaitha wo'nɨkebanna kaanna makuna. 11Makuna kya' kɨrɨ' dɨvidaa'nyɨ a'mwera dazavɨna yawɨ'na yeva sahwarɨ mɨjamakuna. Sara yevera gamɨnyawɨnna yɨkabɨna kye' gamɨnyawɨnna bahesa'na sahwai yɨlaaya yɨna. Yɨlaaya yɨna yaka Gotɨyai a'mweraavɨ maremwaaidevɨna wɨjɨwaakɨna. Sara yada a'mwe nalaavɨnakeraavɨ nawɨ'nya yavada'gaina. 12Sara kya' sawɨtɨrɨnyaburɨ gamɨre sɨvɨlɨrɨdaa'nyɨ pwaraalyara gamɨnyawɨnna bɨna yɨna yeva wɨdɨna “Gɨmɨ a'mweraavɨ kamaryaasa'gɨzɨ anga yuyabanyajɨ wawɨnangejɨ sawɨnna ‘Wawopɨjɨ wapaaya napɨjɨ se wa'mwaraawɨpɨka!’ da'gɨzɨ dɨmaryaasa! ‘Nemɨ mwaaihoya dimagɨ a'mwera maayɨmagɨnyɨra,’ gɨthɨwo'nanyɨ.” 13Sara wɨdɨna kye' kɨrɨ' wɨdɨna “Yune sarɨmɨ saihina tɨka nya'ne duzaayɨla!” Kɨrɨ' sahwara wɨdɨna “Nemɨ wapaaya kwalaalya manewarika. Bɨretɨya atina yaka jawɨnya pwaraalyɨna warɨka. A'mwe yuya datharaavɨne'na nemɨ tɨka munne mubawaade'na sara dahayawɨ'mwaana?” 14Sare' dare'nanyɨ. A'mwe paaivɨ taawɨzanɨya (5,000) darerabɨ' mwaaidapi. Gamɨre mɨdɨdɨvɨsaraavɨ wɨdɨna “Sarɨmɨ duzɨla! ‘Pivɨti pivɨtiyara avaala pɨba yɨ'bwa'napɨjɨ nayaa walamwaaina jɨla!’” 15Wɨdɨna kya' sara wɨdɨna yeva a'mwe yuyaraavɨ nayaa sara waladɨmwaaihɨna. 16Waladɨmwaaihɨna kye' bɨretɨya atɨlya sajɨ jawɨnyaraalyɨ maarɨna yaka Sɨgunyavɨna maranganna yaka “Wapaayanna yɨlaaya gɨmaryɨwa!” wɨdɨna. Sara mena yakegaa' gunyɨna yaka a'mwe kwala bwa'naanyaraavɨ yanga bumumulaawia'ne gamɨreraavɨ wɨmaarina. 17Wɨmaarina kya' yuyaraavɨna wɨjavaawɨna kye' yunebanna mena nyɨna yeva. Yuyara munya mena yɨnyɨna kwia' nɨganamudɨwɨraketa yuya sa kuna bwakwodɨ'nyɨ soigɨlya sɨvɨlɨrɨdaa'nyɨ pukaalyangɨ maramihɨna.
Pitai “Jizaazai Kɨraazɨtɨyalyɨra,” jalɨkurakake'nesɨ.
(Matɨyui 16:13-28; Maakɨ 8:27–9:1)
18Pɨgaa' sahwai gavei Gotɨyarɨ wɨdadaa'nyɨ gamɨre mɨdɨdɨvɨsara gamɨjɨ ye'mwannemwaaina. Sagaa' sahwai sahwaraavɨ yɨdaanganna “Kwala bwa'naanya nɨmɨnyɨna nyɨdɨvanɨgata aaihwainyaka?” 19Sarevɨ nabaai sahwara ja'nawɨdɨna “Pwara ‘Jonɨ Bavɨtaazɨya Yadelyɨra,’ gɨthɨvanɨgasaigɨnyɨ. Nabaai pwara ‘Yɨlaajalyɨra,’ gɨthɨvanɨgasaigɨnyɨ. Nabaai pwara dɨna ‘Pɨropetɨya sɨnnawɨ kɨgaakunanya pwai gɨlekavi'nɨnnyavɨ ayɨna dɨkaa'mwakelyɨreva.’ ” 20Sara ja'nawɨdɨna kye' sai wɨdɨna “Nabaai yune sarɨmɨ saihi nɨmɨnyɨna nyɨdɨvanɨgata bewainyaka?” Sara wɨdɨna kya' Pitai ja'nawɨdɨna “Gɨmɨ Gotɨyai gɨthahɨlakaka maryasaabakeigɨ Kɨraazɨtɨyaigɨnyɨra. Gotɨyareigɨnyɨra.” 21Kɨrɨ' kumɨnyɨ dɨragɨnna wɨdɨna “Mala nayaa jɨwannyɨla! A'mwe pwara kwaraavɨ yagaala daza' wɨjɨwaakya'na kɨmaakɨya mi'na dakɨwana!” 22Sara wɨdɨna yaka wɨdɨna “A'mweraavɨne Kaimɨraayai taanga kwalaalya maaradelyɨra. Sarevɨ nabaai a'mwe naangerajɨ Gotɨyarɨne tamira'dɨvɨta naangerajɨ Kɨwɨjarajɨ sahwarɨ bule'na wɨjaavɨpɨ'delyɨra. Sara yapɨjɨ sahwarɨ tamakɨpɨjai yɨrɨka daryaai darɨkɨ sahwarɨ ayɨna yɨdɨkaavadelyɨ.”
23Sahwai yuyaraavɨ wɨdɨna “Nabaai a'mwe pwai kwai nɨmɨnyɨ ‘Mɨdɨnɨma!’ yawɨrajai gamɨ sai gannya sɨmunyavɨ wiekɨrakada yuya yɨrɨkerɨkaavɨ gannya yɨta yovihɨrarannɨke' nayaa marikwavade'bɨ'na ‘Nɨmɨ Jizaazarɨna baimuja' tewaanyasɨ. A'mwera Jizaazarɨna kayaa'na nyɨpɨ'de' wikɨra,’ yawɨ'da nɨmɨnyɨ sɨvigɨ'nyɨrɨ nayaa nyɨmɨdɨnadelyɨ. 24Sare' dare'nesɨ. A'mwe pwai ‘Jizaazarɨna nanyɨramakɨpɨdɨka!’ dazai nɨmɨnyɨ nyɨmarasɨ'najai kuna mwaalade kɨrɨ' gamɨre gaala mwaalyabwi yagalya'mavadevulyɨ. Kɨrɨ' pwai nɨmɨnyɨna yawɨrojɨ balajai dɨragɨnna nyɨlɨmwagazai yɨ yɨnɨga wi'nanyɨra. Sahware gaalyabwi tewaanna padaihasamaa'nadelyɨ. 25Sare' dare'nesɨ. A'mwe pwai nɨgwia gɨlyɨvɨta saza Kwaakevakɨya yuya sa maarajai sarevɨ gamɨ sai yuna kayaaka yɨma'nada nabaai gamɨre gaala mwaalyabwi yagalya'mavojɨ gamɨ yuya maarɨna yaja sasare daza gamɨnyɨ gatha'dara gaimwagathengaka! 26Sare' dare'nesɨ. A'mwe pwai nɨmɨnyɨnajɨ nɨmɨre yagaalyavɨnajɨ sangɨna ‘Wagɨla nanyɨvwa'nadɨka! Sahwarɨ wasɨ'nɨma!’ dazai A'mweraavɨne Kaimɨraayai gannya byaanna naangevɨjɨ Nɨmwarevɨjɨ ejelɨya tewaanyaraavɨrevɨjɨ walaabathehaa' yɨ sahwai ‘A'mwe dazai kwarɨna wagɨla nanyɨvwa'nadɨka! Bule wɨjaavɨma!’ wɨdathelyɨ. 27Sare' kɨrɨ' nebulya'na yɨhɨthɨvanɨge. Nabaai a'mwe pwara dava daakata dara yarai mabalyadapi Gotɨyai a'mweraavɨ maremwaaidevɨ tɨnna wangabɨ'dehaa'nanyɨ.”
Jizaazai kɨlaakejɨ' nabinna yɨma'nake'nesɨ.
(Matɨyui 17:1-13; Maakɨ 9:2-13)
28Yagaala daza mena dakegaa', dɨvi yɨrɨka ata purɨdaa'nyɨ daraai mena kwavɨlava' sahwai Pitarɨjɨ Jonɨmɨjɨ Jemɨzarɨjɨ maarɨna yɨna yaka mugunyavɨna Gotɨyarɨ wɨja'nei yɨlaawɨna. 29Yɨlaawɨna yaka Gotɨyarɨ kuna wɨdɨvainadaa'dɨ'nyɨ gamɨre sɨnnyɨ' mudɨka pwaibɨ' yɨma'nyɨna yaka nabaai gamɨre baazɨ'ma'nya' yuna yaake' wannyɨna, kɨmihɨmɨla yɨna. 30Sara kya', yɨthaa, a'mwe pwaraai sahwalyɨ yagaala ye'mwannadɨna. Pwai Ne Mozɨzalyɨ. Pwai Ne Yɨlaajalyɨ. 31Yɨ sahwaraai byaanna naangevɨ yagɨleraai yɨma'naabɨna yagɨla sare saraai Jizaazai Jeruzaalemɨ yune'na ya'na sanna dɨnyɨna. Sahwai Kwaaka davakɨ yagalya'mavojɨ wawodelyɨra. 32Wɨdɨna yadaapi Pitalyɨ pwaraai gamɨjɨyaraalyɨ seyɨvɨta kwima'na' kɨrɨ' yaaka dɨkavayɨma'nyɨna yeva byaanna naange' sahwarɨdaa'nyɨ kima'na' tɨnna nayaa wanganna. Nabaai a'mwe dazaraai kwaraalyɨ sahwalyɨ ye'mwannadaa'dakɨlyɨ tɨnna wanganna. 33Saraai “Gamɨnyɨ yagalya'mavakwoihɨlyɨ wawaka!” dahɨla yadaakɨlyɨ Pitai Jizaazarɨ wɨdɨna “A'mwe naangeigɨ, nemɨ dava mwaaihoya' tewaanyasɨra. Sɨmɨnya dawaai dasa yarɨlaadeinera. Pɨrɨ' gɨmɨnyɨne', pɨrɨ' Mozɨzarɨne', pɨrɨ' Yɨlaajarɨne'.” Pitai sahwai sɨmunya nayaa myawɨryakei yagaala daza' sara wɨdɨna. 34Kuna wɨdɨna yadaa'nyɨ yɨraaya pɨjɨ' galayewaa'mwanna. Yɨraayajɨ' galayewaa'mwanna yadaa'nyɨ sahwara lɨka naanga yɨna. 35Lɨka yɨna yadaapi yɨraaya savɨ kusawɨdaa'nyɨ maanguraaya pɨrɨ' jaka yɨnyɨna “Dathai nɨmɨre Nyɨbwaalɨvaangelyɨra. Nɨmɨ mena wɨdahɨlakelyɨra. Gamɨre yagaalyavɨ kadɨka du'nyɨla!” 36Maanguraaya daza' mena kabinɨgwawa' Jizaazai yuna gavei mwaaidɨ'nyɨ tɨnna wanganna. Sara yeva kumɨre maange bɨpaina. Nabaai dazagaa' a'mwe aane pwai kwarɨ sahwara tɨnna wanganeta sanna mujɨna.
Jizaazai kaimɨraaya yɨmakei mwaaidɨ'nyɨyarɨ tewaanya yavada'galake'nesɨ.
(Matɨyui 17:14-21; Maakɨ 9:14-29)
37Yɨrɨka ayawɨdaasarɨkɨ mugunyavɨ yagalya'maveva walaawɨna kye' a'mwe kwala bwa'naanya naange' gamɨnyɨna burata'nyɨna. 38Burata'nyɨna kye', yɨthaa, a'mwe pwai kwala bwa'naanya dazavɨdaa'nyai jaka danganna, “Wɨjɨwaakadɨnyaigɨ, dɨragɨnna githaanganɨma! Nɨmɨre kaimɨraayarɨ tɨnna dɨnyanganya! Nɨmɨ kaimɨraaya yune gave dazahwainanyainyɨra. 39Sare sarɨ, yɨthaa, yɨmakei galapwelɨmwaga'delyɨra. Sara wiadaa'nyɨ sahwai jaahwasa'bɨ' kayaa'jaka dadelyɨra. Nabaai sara yada yɨmaka dazai yuna kayaa'na galarɨvɨtawakadelyɨra. Sara wiadaa'nyɨ gamɨre maangevɨdaa'nyɨ maagwaitala yaake' yɨma'naabadelyɨ. Gamɨre kɨlaakejɨkɨ yuna kayaaka wigalakada yarai yagalya'makwodei mɨ'. 40Nabaai ‘Yɨmaka dazai marasɨpɨka!’ dena gɨmɨre mɨdɨdɨvɨsaraavɨ wɨdena yagɨnna yɨdangadaari kɨrɨ' yuna aawaawa. Myɨ yɨpɨnere.” 41Jaka sara danganna kya' Jizaazai ja'nawɨdɨna “Sarɨmɨ a'mwe dathahaasaihi dɨragɨnna lɨmwangebwi kuneihi, sarɨmɨre sɨmunya' nayaa yɨda'na mwarikeihi, sarɨmɨjɨ kuna gatha'daregaa'na yɨhye'mwannemwaala'mujɨ sarɨmɨre taanginya maarɨdeinyaka! Gɨmɨre kaimɨraayai davanna dɨmakulaama!” 42Wɨdɨna kya' gamɨre kaimɨraayai kuna widavadaa'nyɨ yɨmaka dazai kwaakewɨ marawɨnangɨrakɨna yaka yuna kayaa'na yawɨnangɨrakɨna. Sara wiadaa'nyɨ kɨrɨ' Jizaazai yɨmaka dazarɨ maanga wɨdɨna yaka kaimɨraayarɨ tewaanya yavada'gaina yɨna yaka ganɨmaangerɨ ayɨna wɨjaavɨna. 43Sarevɨ a'mwe yuyara Gotɨyare dɨragɨnya' byaanna savɨ tɨnna wanganeva lɨka yɨwainɨgulɨna.
(Matɨyui 17:22-23; Maakɨ 9:30-32)
A'mwe yuyara Jizaazai yaka yuya dazanna atɨka kuna maru'na'na yadaapi gamɨre mɨdɨdɨvɨsaraavɨ wɨdɨna 44“Sarɨmɨ yagaala dathavɨne'na gɨthɨde' kadɨkikɨ nayaa dakyɨla! Da'daresɨ. Dɨvi kɨbawe maalɨkegaa' A'mweraavɨne Kaimɨraayainyɨ nɨmɨre yɨkamaangeraavɨna nyɨbwarɨdaakwadeinyɨra.” 45Kɨrɨ' sahwara yagaala dazavɨ nayaa myawɨramaari. Yagaala dazavɨne aaya kaavɨlya' sahwaraavɨna kuku'nya wɨla'na. Sarevɨdaa'nyɨ sahwara sahɨrɨvɨna nayaa myawɨramaari. Sarevɨ nabaai sahwara yagaala dazavɨna yɨdaanganya'na lɨka yɨna.
Gamɨrera “Nemɨnyɨdaa'nya naangei aaihwai dɨngaka?” dɨnesa'nesɨ.
(Matɨyui 18:1-5; Maakɨ 9:33-37)
46Sagaa' gamɨrera gemarasɨ'nyɨyagaala pɨrɨ' “Nemɨjɨya naangei aaihwalaka? Nɨmɨnyɨra. Nɨmɨnyɨra,” ge' bivɨkɨ'nɨguna. 47Ge' bivɨkɨ'nɨguna yadaapi Jizaazai kumɨre sɨmunyavɨ gemarasɨ'nyɨyagaalyavɨ yawɨranganna. Yawɨranganna yaka sarevɨ sahwai kaimɨraaya maalɨka pɨmɨlɨ' maarɨna yaka gamɨjɨ marye'mwannadaa'na. 48Sara yaka sai wɨdɨna “A'mwe pwai kaimɨraaya maalɨka dathamɨlɨkɨ nɨmɨnyɨne yayavɨna maarajai sai nɨmɨnyɨ nyɨmaaradelyɨ. Nabaai sai nɨmɨnyɨ nyɨmaarajai yɨ nɨmɨnyɨ nyɨmaryasaabaka dazarɨ maaradelyɨ. Sarebwi dare'nebulyɨ. A'mwei sarɨmɨ yuyaihɨrɨne'na tɨnnyabanyai yuna maalɨka mwaalajai yɨ Gotɨyarɨna sai yuna naangelyɨ.”
(Maakɨ 9:38-40)
49Jonɨ ja'nawɨdɨna “A'mwe naangeigɨ, a'mwe pwai gɨmɨnyɨne yayavɨ yɨmakeraavɨ wɨdasadaa'nyɨ tɨnna wangamwoine. Sara yada kɨrɨ' nemɨnyɨ manemɨdɨnyɨvanɨke'na sahwarɨna kɨmaakɨya dakɨwolyɨ.” 50Wɨdɨna kya' kɨrɨ' Jizaazai sahwarɨ wɨdɨna “Sahwarɨna kɨmaakɨya madakɨpɨnera! Sare' dare'nanyɨ. A'mwei sarɨmɨnyɨna yɨkamaanga mihivanɨkei sai sarɨmɨnyɨnelyɨra. Yɨkamaangei mɨka!”
Samerɨya mwaalyara kunnya angeba Jizaazarɨna kaanya tihɨresa'nesɨ.
51Jizaazarɨ Sɨgunyavɨna makilaawia ya'ne Gotɨyaregaa' aya kɨgaa' mena kima'na' gamɨre sɨmunyai yovɨrawakɨna yaka Jeruzaalemɨna kaanya wɨya'na. 52Sarevɨ gamɨnyɨ sɨnnawɨ yovɨrawakaawia'na pwaraarɨ yagaalya' wɨdaasɨna. Mi'na wɨdaasɨna kya' dazaraai kaanna wɨna yeva Samerɨya mwaalyaraavɨre anga pɨbanna wɨlaawɨna. 53Sabanna wɨlaawɨna kyagi kɨrɨ' anga dazabanyara Jizaazarɨ kumɨre angengɨna makwɨya'na “Aala!” dɨna, mamaari. Sahwara yawɨ'dɨvɨ' “Sahwai Jeruzaalemɨna wawade'nanyɨra. Nemɨre naangebanna mɨ'.” Sahwara gevwi yadɨvɨsa'na “Aala!” dɨna. 54“Aala!” dɨna kye' gamɨre mɨdɨdisaraai Jemɨzalyɨ Jonɨjɨ sahwaraai sasare saburɨ wanganagɨla wɨdɨna “Naangeigɨ, kayaa'na sara yɨwaasa'na Sɨgunyavɨdaa'nyɨ dɨke'na kudawaajɨ dɨke' walaabozɨ a'mwe datharaavɨ dɨke' nakade'na sɨmunya myawɨrijɨwaana?” 55Wɨdɨna kyagi kɨrɨmɨnyɨmagɨ gɨnyɨma'nyɨna yaka maanga wɨdɨna. 56Maanga wɨdɨna yaka sahwara anga pɨbannera kaanna wɨna.
A'mwera “Jizaazarɨ mɨdɨnɨma!” dɨpɨjara yadɨvɨsaraavɨnesɨ.
(Matɨyui 8:19-22)
57Sahwara tutaanyavɨ kaanya wodɨvɨ' a'mwe pwai gamɨnyɨ wɨdɨna “Gɨmɨ kaanya yamarija anga yuya sabanya nɨmɨ kwainyɨjɨ gɨmɨdɨnamarideinyɨ.” 58Wɨdɨna kya' Jizaazai wɨdɨna “Kavɨjɨlɨkera kwaakevakɨ kumɨre daibu'nya kɨnɨnnakerera. Nabaai sɨgunyavɨne yuta kwarajɨ arɨsa kɨnɨnnakerera. Sare' kɨrɨ' A'mweraavɨne Kaimɨraayai gamɨre mɨnyagɨnyɨ' yɨladɨhaihɨta ya'neba kunelyɨra.” 59Wɨdɨna yaka a'mwe pwarɨ wɨdɨna “Nɨmɨnyɨ dɨnyɨmɨdɨnaama!” Kɨrɨ' sai wɨdɨna “Gɨmɨ nɨmɨnyɨna ‘Ya,’ majɨ jɨtheigɨ dɨngaka? Nɨmɨnyɨ nɨmaamaangerɨ tɨvi'na maralɨkirakaawa'mujɨneinyɨra. (Mi'na kabalojɨ bɨdeinyɨra.)” 60Wɨdɨna kya' kɨrɨ' sahwarɨ wɨdɨna “Baa'nana! Pwara, Gotɨyarɨna majadɨvɨsara, kurya bainɨkera baryaraavɨ maralɨkirakɨpɨ'derera. Kɨrɨ' gɨmɨ kaanya wawa'gɨzɨ Gotɨyai maremwaaidevɨna a'mweraavɨ duzɨwakaawa!” 61Wɨdɨna kya' nabaai a'mwe pwai wɨdɨna “Naangeigɨ, gɨmɨnyɨ gɨmɨdɨmune kɨrɨ' nɨmɨnyɨna ‘Ya,’ kyawɨra'gɨzɨ nɨmɨ wawo'mujɨyagaa' nɨmɨjɨ avaaimwaalya yuyaraavɨ ata yune'na bwa'naawɨdeinyɨ.” 62Sarevɨ Jizaazai sarɨ wɨdɨna “Pwai nɨmɨre wawɨnya yadei kwai kɨrɨ' yuyagaa' dusɨmagɨnna gamɨre ayabwina gɨnyɨma'nangadei sasare sai Gotɨyai a'mweraavɨ maremwaaide'na wɨjɨwaakya'nei yɨnɨga wi'na yadei mɨka.”
S'ha seleccionat:
Lukɨ 9: byr
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2013, Wycliffe Bible Translators, Inc. All rights reserved.