If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

नीकुदेमुस नावां रौ एक आदमी ज़ुण फरीसी थौ, ज़ुण यहुदिऊ रौ खास स्याणौ थौ। तिणीऐ राची यीशु काऐ आशीयौ तेसलै बोलौ, “ओ गुरु, आमै ज़ाणी कि तू परमेश्‍वरा री तौरफा कु आशौ औन्दौ गुरु ई, कैलैकि कोई इऊं नोखै काम ज़ेज़ै तू देखाल़ाई, अगर परमेश्‍वर तेस आइलै नाईं औआ थौ, ता नाईं देखाल़ी बौल़दौ।” यीशुऐ तेसलै ज़वाब दैऔ, “हाऊं तुमुलै सौच़्च़ौ-सौच़्च़ौ बोलाऊ, अगर कुण दुजी बारै पैदौ नाईं हुआ लौ ता परमेश्‍वरा रौ राज़ नाईं देखी बौल़दौ।” नीकुदेमुसै तेसलै बोलौ, “आदमी ज़ेबी बुड़ौ औई जाआ, तैबै सेऊ किणै कौरीऐ जनम नीं सौका? का सेऊ आपणी आमारै गौरबा दी दुजी बारै डेइयौ जनम नीं बौल़ा आ?” यीशुऐ ज़वाब दैऔ, कि हाऊं तुमुलै सौच़्च़ौ-सौच़्च़ौ बोलाऊ, “ज़ेबी झ़ांऊ केज़ौ भी आदमी पाणी और आत्मा कु पैदौ नाईं हुआ लौ सेऊ परमेश्‍वरा रै राज़्य दी नाईं डेई बौल़दौ। कैलैकि ज़ुण शरीरा कु आ ज़न्मौ औन्दौ। सेऊ शरीर आ, और ज़ुण आ पवित्र आत्मा कु ज़न्मौ औन्दौ। सेऊ आ आत्मा। हैरान ना हुऐ कि मुंइऐ ताउंलै बोलौ आ, ‘तुमुऐ दुजी बारै ज़नम निणौ ज़ुरुरी आ।’ बागुर ज़ेज़ी भिलै बौइणौ च़ाहा सा, सेज़ी भिलै बौआ सा और तू बागुरा री हाक शुणाई, पर नाईं ज़ाणदौ कि सै किदरौ बौआ और केशी डिया? ज़ुण भी आत्मा कु ज़न्मौ औन्दौ आ, सेऊ इणी ई आ”। नीकुदेमुसै तेसलै ज़वाब दैऔ, “एज़ी बुशै किणै कौरीऐ हुआई?” इणै शुणियौ यीशुऐ तेसलै बोलौ, “तू इस्राइलिऊ रौ गुरु हुईऔ भी इऊं बुशै नाईं सौमुझ़दौ? हाऊं ताउंलै सौच़्च़ौ-सौच़्च़ौ बोलाऊ कि आमै ज़ो कुछ़ ज़ाणी ई, तेसी बोली ई, और ज़ो आमुऐ देखौ औन्दौ आ, तेसी री गवाही देई ई, और तुमै आमारी गवाही नाईं मानदै। ज़ेबी मुंइऐ तुमुलै धौतरी री बुशै बोली, और तुमैं विश्वास नाईं कौरदै, अगर हाऊं तुमुकै सौरगा री बुशै बोलु लै, ता तैबै तुमै किणै कौरीऐ कौरा ई विश्वास? मुं आदमी रै छ़ोहरु छ़ाड़ियौ कोई भी सौरगा दी नाईं डैऔ, सिरफ सेऊ ज़ुण सौरगा कु तौल़ै आशौ, ज़ुण सौरगा दी आ। और ज़ेज़ी रीती कौरी मुसै ज़ांगला दी साप उंच़ै माथै चौड़ाऔ, सेज़ी रीती कौरी ज़ुरुरी आ की मुं आदमी रौ छ़ोहरु भी उंच़ै माथै चौड़ाऊणौ च़ांई। ताकी ज़ुण मुं माथै विश्वास कौरालौ सेऊ सौदा री ज़िन्दगी पा।
“कैलैकि परमेश्‍वरै धौतरी रै लोगु आइलै इणौ प्यार छ़ाड़ौ कि परमेश्‍वरै आपणौ एकलौतौ छ़ोहरु दैऔ, ताकी ज़ुण-कुण भी तेस माथै विश्वास कौरालौ सेऊ नाश नाईं औआ, पर सौदा री ज़िन्दगी पा। परमेश्‍वरै आपणौ छ़ोहरु धौतरी दी एज़ी ताइंऐ नाईं भेज़ौ, कि धौतरी रै लोगु माथै सौज़ा रौ हुकम दिआ, पर एज़ी ताइंऐ कि धौतरी रै लोग तेसरै ज़ौरिऐ छ़ुटकारौ पा। ज़ुण मुं माथै विश्वास कौरा आ, तेस माथै सौज़ा रौ हुकम नाईं औन्दौ, पर ज़ुण विश्वास नाईं कौरदौ, सेऊ आरोपी बौणी जा। एथीलै की तिणीऐ परमेश्‍वरा रै एकलौतै छ़ोहरु रै नावां माथै विश्वास नाईं कियौ। और सौज़ा रै हुकमा रौ कारण एऊ आ की प्याशौ धौतरी दी आशौ आ, और आदमीउऐ न्यारौ प्याशै कु प्यारौ ज़ाणौ कैलैकि तिंउरै काम बुरै थै। कैलैकि ज़ुण बुराई कौरा सा, सेऊ सौच़्च़ाई कु नफरत छ़ाड़ा सा, और प्याशै रै नज़दीक नाईं आशदौ, इणौ ना च़ांई हुऔ कि तेसरै बुरै कामा माथै आरोप लागा। पर ज़ुण सौच़्च़ाई माथै आण्डा सा, सेऊ प्याशै रै नज़दीक आशा आ ताकी तेसरै काम पौगड़ै औआ, कि सै परमेश्‍वरा री तौरफा कु ई किऐ औन्दै।”

तेथ बासिऐ यीशु और तेसरै च़ेलै यहुदिया परदेशा दी आशै। और सेऊ तिऊं आइलै रौइयौ बपतिस्मौ दैंदै लागौ। यहुन्ना भी शालेमा शहरा रै नज़दीक ऐनोन गांवा दी बपतिस्मौ दिआ थौ, कैलैकि तिऐ भौरी पाणी थौ, और लोग आशीयौ बपतिस्मौ नियां थै। यहुन्ना तेबी झ़ांऊ ज़ेला दी नाईं पाऔ थौ तिऐ यहुन्ना रै च़ेलेऊ रौ कास यहुदी आइलै शुद्धी रै बारै दी सवाल-ज़वाब हुऐ। और तिंउऐ यहुन्ना काऐ आशीयौ तेसलै बोलौ, “ओ गुरु, ज़ेज़ौ आदमी यरदना नौईं पार भिला रौ ताऊं आइलै थौ, और ज़ासरी ताइंऐ गवाही देई आ। देख, सेऊ बपतिस्मौ दिआ सा, और सारै लोग तेस काऐ आशा ई।” यहुन्नै ज़वाब दैऔ, ज़ेबी झ़ांऊ आदमी लै सौरगा कु नाईं दिआ लै, तेबी झ़ांऊ सेऊ कुछ़ नाईं पाई बौल़दौ। तुमै ता आपु ई मैरै गवाह, कि मुंइऐ बोलौ, “हाऊं मसीह नाईं, पर तेसकु औगाड़िऐ ऊ भेज़ौ औन्दौ।” लाड़ी ता लाड़ै री हुआ आ पर लाड़ै रौ गोश्टण ज़ुण खौड़ौ तेसरी शुणा, लाड़ै री बुशेऊ शुणियौ भौरी खुश हुआ। ऐबै मेरी बौड़ी खुशी पुरी हुई आ। ज़ुरुरी आ कि सेऊ बौड़ा, और हाऊं घौटू।
“ज़ो सौरगा कु आशा सा, सेऊ सारेऊ कु आच़्छ़ौ आ। ज़ो आशा सा धौतरी कु सेऊ आ धौतरी रौ। और धौतरी री ई बुशै बोला सा: ज़ो सौरगा कु आशा आ सेऊ सारेऊ कु माथै आ। ज़ो कुछ़ तिणीऐ देखौ, और शुणौ आ, तेथी री गवाही दिआ आ। और कुछ़ ई लोग तेस माथी विश्वास कौरा ई। पर ज़ुणिऐ तेसरी गवाही मानी गोई तिणीऐ एज़ी बुशु माथै मोहर लाई गोई कि परमेश्‍वर सौच़्च़ौ आ। कैलैकि ज़ो परमेश्‍वरै आ भेज़ौ औन्दौ, सेऊ परमेश्‍वरा री बुशै बोला सा। कैलैकि परमेश्‍वर तेसकै पवित्र आत्मा नापी-तोलीऔ नाईं पर रौज़ीयौ दिया आ। बाब परमेश्‍वर छ़ोहरु कु प्यार छ़ाड़ा आ, और तिणीऐ सारी च़िज़ै तेसरै हाथा दी देई गोई आ। ज़ुण परमेश्‍वरा रै छ़ोहरु माथै विश्वास कौरा सा, सौदा री ज़िन्दगी तेसरी आ। पर ज़ुण परमेश्‍वरा रै छ़ोहरु री नाईं मानदौ, तेसलै सौदा री ज़िन्दगी नाईं मिलदी, पर परमेश्‍वरा रै सौज़ा तेस माथै रौआ ई।”

گوێگرتن لە यहुन्ना 3