ईसु नोःआँ तुन्दरा के नेल केते बुरु रे रकाःब नाय आउर दुड़ूः नाय। हुनी आलकु चेला हुनी दुबाःड़े हीःग नेनाकु। आउर हुनी नोःआँ कंहड़ी यअते हुंकू के उपदेस एमोअ एहेःब लःअय,
“धनया आकु हुंकू जे अपन मन रे गरीबाकु,
सिरमा राईज हिंकु आला हेके!
धनया आकु हुंकू जे ईया-मेआकु,
एता लःअय ची हुंकू के डिढ़ भेटाव कोआ!
धनया आकु हुंकू जे सोझ-सोझांड़ एदान कुआ,
एता लःअय ची हुंकू नोःआँ धरती रिनकु हकदार पाड़ी कोआकु!
धनया आकु हुंकू जे धरम रअः राँगेगाकु आउर तेतांगाकु।
एता लःअय ची हुंकू बी कोआकु!
धनया आकु हुंकू जे दयालु आकु,
एता लःअय ची हुंकू रे दया कोआ!
धनया आकु हुंकू जेकर मन सुधा,
एता लःअय ची हुंकू परमेसर के नेल कियाकु!
धनया आकु हुंकू जे मेल-जोल कुआकु,
एता लःअय ची हुंकू परमेसर आलकु होपोन कहलाव कोआकु!
धनया आकु हुंकू जे परमेसर आला इकछा मोताबिक चलाआकु, आउर होना चलते सताव कुआकु।
एता लःअय ची सिरमा राईज हिंकु आला हेके!
“धनया एदान पेआ आपे, जदि होड़ ईङ रअः चलते आपे के बे-माईन पेआकु, आउर सताव आउर कंहड़ी-कंहड़ी आपे आला बिरोध रे जामा बरन रअः गादुस बात कंहड़ीआकु। रिझोअ पे आउर डेगाअ पे, एता लःअय ची आपे के सिरमा रे बड़े जोअ भेटाव कोआ। आपे आलकु पहिल रिनकु आगमजानीकु केहोः, हुंकू निआँ लकान सताव लिकुआकु।


“आपे ओत रेनपे बुलूङ हेके, जदि बुलूङ रेनअः सिबील सीठा जुनोआ, दो होना सिबील के फिन से सिबील एरे रूवाड़ दाड़ी योआ? होना एतान काम रअः होः का-ताहिनोआ, होना के बाहरी गिड़ी आउर होड़कु आला जांगा रे तिका सेरेःड-गुल तआकु।
“आपे दुनिया रेनपे मरसल हेके। बुरु रे बसाव उना सहर एरे उकु योआ। होड़ ढिबरी बराव केते, खाईचलः रअः लतार रे कोवान, बकिर दिलखा रे दोहो याकु, जे एड़े तरअः होना ओड़ाअ रिनकु जामा होड़कु के मरसल कुआय। हिना लकान आपे आला मरसल होड़कु मड़ांग रे लवकाव एकान, जेकर से ची हुंकू आपे आला बढ़ियाँ काम के नेल केते आपे आली सिरमा रिनी बाबा आला बड़ाई-याकु।

“नोःआँ आलपे समझाव कोअ ची ईङ मुसा आला कनहुन चाहे आगमजानीकु आला लिखा लअः बात के च-चबा लःअय हीःग तानिङ। होना के च-चबा लःअय कोवान, बकिर पुपुरा लःअय हीःग तानिङ। ईङ आपे के नोःआँ सचे कंहड़ी तानिङ, ची जब तक सिरमा आउर ओत ताहिकोआ जगुत, मुसा आला कनहुन रअः मि-मि कड़ी आउर मि-मि अकछर बनाल ताहीकोआ, होना तब तक बनाल ताहिकोआ, जब तक होना एरे पुरायोआ। हिना लःअय जाहें नोःआँ हुकूम मेसे छोटेअ केन हुकूम केहोः तोड़ायाय, आउर हिकान गी होड़कु केहोः सिखाव कुआय, हुनी सिरमा राईज रे जामा तरअः छोटे कहलाव कोआय। बकिर होना हुकूम के आयुमेआय आउर हुंकू के सिखाव कुआय, हिनी गी सिरमा राईज रे बड़े कहलाव कोआय। ईङ आपे के बेताअः दिपीईंग, जदि आपे आला धरमिकता धरम पुथी सि-सिखावकु आउर फरीसीकु आला धरमिकता तरअः बाईढ़ केते, एरे हुयाअः दो आपे सिरमा राईज रे एरपे बोल दड़ीआ।

“आपे आयुम तदापे, ची पुरखाकु तरअः कंहड़ी लअः एदनाअ, ‘आलपे गोएःग कु, जदि जाहें गोएःग कुआकु दो, हुनी के बड़े पंचाईत रे डांड़ भेटाव कोआ।’ बकिर ईङ आपे के बेताअः दिपीईंग, जाहें अपन बोको लोः खिसोआय, हुनी के बड़े पंचाईत रे डांड़ भेटाव कोआ, जदि हुनी अपन बोको तेके कंहड़ीआय, ‘ए मुरखाहा!’ दो हुनी के बड़े पंचाईत रे डांड़ भेटाव कोआ आउर जदि हुनी कंहड़ीआय, ‘ए बुधु, दो हुनी नरग रअः सेंगेल रे डांड़ भेटाव कोआ।’

“हिना लःअय जदि आम अपन भेंट बिदी रे रा-राकाःब लःअय आगु तदाम, आउर आम के होनाःड़े उईहार हीःग ना, ची ईङ आली बोको तिंग के ईङ आला जहान सिकाईत एदनाअ, आउर अपन भेंट बिदी हेनाःड बाईःग तुमे आउर सेन केते पहिल अपन बोको तरअः सलाहोअ मे, तब हीःग केते भेंट रकाबेमे।
“बड़े पंचाईत सेनोः बेरा होरा रेगी अपन मुदाई लोः सलाह कोअ मे, नोकान आलु हुयाव कोअ ची हुनी आम के हाकिम एड़े जिम्मा मे। हाकिम आम के सिपाहीकु एड़े जिम्माओ केमेआय, आउर सिपाही आम के जेहेल रे आदेर केमेआकु। ईङ आम के सचे बेताअः दिमीईंग, जब तक मि-मि कौड़ी काम चुकाया, तब तक होनाःड़े तरअः उड़ूंगोः एरोम दड़ीआ।

“आपे पहिल रे नोःआँ कंहड़ी तदाकु के आयुम तदापे, ची ‘ब्यबिचार आलपे के।’ बकिर ईङ आपे के कंहड़ीओ दिपीईंग, ची जाहें एटाअ आउराईत के बुरी नजाईर रे निलीयाय, हुनी अपन मन रे हुनी लोः ब्यबिचार केदाय। जदि आम आला जोम पखी तअः मेःड ताम पाप रअः कारन बनाआ, दो होना के उडुंग गिड़ी गोअ तामे। नोःआँ बेस एदनाअ ची आम आला होड़ो मेसे मियांड अंग चबायोआ बकिर आम आला गोटा होड़ो नरग रे एरे लगाआ। आउर जदि आम आला जोम तीः आम लःअय पाप रअः कारन बनाआ, दो होना के मांअ खांड़ा केते गिड़ी गोअ तामे। नोःआँ बेस एदनाअ ची आम आला अंग मेसे मियांड चबायोआ बकिर आम आला गोटा होड़ो नरग रे आलु सेन।


“नोःआँ होः कंहड़ी लअः एदनाअ, ‘जाहें अपन गोमकाईन के बाईयाय, दो हुनी के ब-बाई रेनअः चिठी एमा गोअ ताई में।’ बकिर ईङ आपे के कंहड़ीओ दिपीईंग, ची जाहें अपन गोमकाईन के बेलाज काम तरअः जहान एटाअ कारन रे बाईयाय, दो हुनी, हुनी तरअः ब्यबिचार चियाय, आउर जाहें हुनी बाई उनी लोः बिहा योआय, हुनी ब्यबिचार रेआय।

“आपे नोःआँ होः आयुम तदापे, ची पहिल पुरखा रिनकु होड़कु तरअः कंहड़ी लअः ताहिनेना, ‘झुठो रअः किरया आलपे जोम के, परभु तरअः जे किरया जोम तदापे होना के पुराय पे।’ बकिर ईङ आपे के कंहड़ीओ दिपीईंग, किरया ओका हिला होः कोवान जोजोम चाही, ना सिरमा रअः एता लःअय ची होना परमेसर आला राईज गदी हेके, ना ओत रअः, एता लःअय ची होना हुनी आला जांगा दो-दोहो वाला ठाँव हेके, ना जिरोसलेम रअः, एता लःअय ची होना महाराजाकु आला सहर हेके। आउर ना अपन बोहोअ रअः, एता लःअय ची आपे नोःआँ रअः मियांड-मिन उःब पुँड़ी चाहे का-कड़िया एरपे दड़ीआ। बकिर आपे आला कंहड़ी, ‘हाँ’ रे हाँ चाहे ‘कोवान’ रे कोवान, ताहिनोअ चाही। जे नोःआँ तरअः अलावा हुयाआ होना खपतान सैतान तरअः सिरजाआ।

“आपे आयुम तदापे, ची मेःड रअः बदली मेःड, आउर डाटा रअः बदली डाटा।” बकिर ईङ कंहड़ीओ दिपीईंग खपतानकु लोः आलपे झगड़ा कोअ। जदि जाहें आम आला जोम पखी तआ जोहा रे थपड़ाव मेआय दो एटाअ केहोः हुनी पखी गोअ तापे। जे केंस-फाउदारी लड़ाव केते आम आला कुड़ताः इईदी नामाय, हुनी के अपन पेछोड़ी के होः ईदीः चाईमें। आउर जाहें आम के मि-कोस ईदी मेआय, दो हुनी लोः बार कोस सेनोः जुनोः में। जाहें आम तरअः कोयाय, दो हुनी के एमा गोअ ताई मे, आउर जाहें आम तरअः उधरा इईदी नामाय, हुनी के एमाई में।


“आपे कंहड़ी लअः एदनाअ के आयुम तदापे, ची ‘अपन खुड़-खिरकी रिनकु के दुलार कुपे, आउर अपन बैरीकु लोः बैर।’ बकिर ईङ आपे के बेताः दिपीईंग अपन बैरीकु के दुलार कुपे, आउर जाहें आपे के सताव पेआकु, हुंकू लःअय बिनती पे, नोःआँ लकान आपे सिरमा रिनी बाबा आली होपोन ठहराव कोआपे। एता लःअय ची हुनी बेसकु आउर खपतानकु बनार तेंग रे आएंग आली सिंङ बोंगा के तुरीयाय, आउर धरमीकु आउर अधरमीकु तेंग रे दाअः गमायाय। बकिर जदि आपे अपन दुलार पेआकु लोः पेरेमेआपे, दो आपे लःअय एतान फयदा भेटाव कोआ? मालगुजारी ताइसलावकु होः नोकान काकुया एतान? आउर जदि आम अपन बोको-बोयहा के भाईर जोहार कुआम, दो इकिन बड़े काम कामीयाम? एटाअ जाईतकु होः नोकान काकुया एतान? हिना लःअय आपे सिध बनाअः पे, जे लकान ची आपे आली सिरमा रिनी बाबा सिध एदानिया।

گوێگرتن لە संत.मत्‍ती 5