San Mateo 1
1
Nij xi̱i Jesús nij síí ma̱n ga̱a naá a
1Yanj nihánj me taj xnaꞌanj cheꞌé nij xi̱i Jesús Si̱j Caꞌnéé Yaꞌanj Ti̱nanii man Yuvii̱ rihaan Sayuun a. Veé xi̱i Jesús me rey cuꞌna̱j David síí cayáán ga̱a naá, ne̱ xi̱i David me síí cuꞌna̱j Abraham ado̱nj.
2Dan me se síí cuꞌna̱j Abraham me rej síí cuꞌna̱j Isaac,
ne̱ Isaac me rej síí cuꞌna̱j Jacob,
ne̱ Jacob me rej nij tinu̱j síí cuꞌna̱j Judá,
3ne̱ Judá me rej síí cuꞌna̱j Fares ga̱ síí cuꞌna̱j Zara, ne̱ chana̱ cuꞌna̱j Tamar me nii ro̱j soꞌ a.
Ne̱ Fares me rej síí cuꞌna̱j Esrom,
ne̱ Esrom me rej síí cuꞌna̱j Aram,
4ne̱ Aram me rej síí cuꞌna̱j Aminadab,
ne̱ Aminadab me rej síí cuꞌna̱j Naasón,
ne̱ Naasón me rej síí cuꞌna̱j Salmón,
5ne̱ Salmón me rej síí cuꞌna̱j Booz, ne̱ nii Booz me chana̱ cuꞌna̱j Rahab a.
Ne̱ Booz me rej síí cuꞌna̱j Obed, ne̱ nii Obed me chana̱ cuꞌna̱j Rut a.
Ne̱ Obed me rej síí cuꞌna̱j Isaí,
6ne̱ Isaí me rej síí cuꞌna̱j David, ne̱ síí cuꞌna̱j David roꞌ, me síí nica̱j suun rey uun chij rihaan nij yuvii̱ israelitá ado̱nj.
Ne̱ David me rej síí cuꞌna̱j Salomón, ne̱ nii Salomón me nica̱ síí cuꞌna̱j Urías ga̱a rque̱ a.
7Ne̱ Salomón me rej síí cuꞌna̱j Roboam,
ne̱ Roboam me rej síí cuꞌna̱j Abías,
ne̱ Abías me rej síí cuꞌna̱j Asa a.
8Ne̱ Asa me rej síí cuꞌna̱j Josafat,
ne̱ Josafat me rej síí cuꞌna̱j Joram,
ne̱ Joram me rej síí cuꞌna̱j Uzías a.
9Ne̱ Uzías me rej síí cuꞌna̱j Jotam,
ne̱ Jotam me rej síí cuꞌna̱j Acaz,
ne̱ Acaz me rej síí cuꞌna̱j Ezequías a.
10Ne̱ Ezequías me rej síí cuꞌna̱j Manasés,
ne̱ Manasés me rej síí cuꞌna̱j Amón,
ne̱ Amón me rej síí cuꞌna̱j Josías a.
11Ne̱ Josías me rej nij tinu̱j síí cuꞌna̱j Jeconías,
ne̱ cayáán nij soꞌ tiempó quiꞌyaj canaán nij síí ma̱n yoꞌóó noco̱o cuꞌna̱j Babilonia rihaan nij yuvii̱ israelitá,
ne̱ caꞌanj nica̱j nij soꞌ man nij yuvii̱ israelitá chiháán nij soꞌ gu̱un nij yuvii̱ israelitá mozó rihaan nij soꞌ ado̱nj.
12Guun naá do̱j, ne̱ guun Jeconías rej síí cuꞌna̱j Salatiel,
ne̱ Salatiel me rej síí cuꞌna̱j Zorobabel,
13ne̱ Zorobabel me rej síí cuꞌna̱j Abiud,
ne̱ Abiud me rej síí cuꞌna̱j Eliaquim,
ne̱ Eliaquim me rej síí cuꞌna̱j Azor a.
14Ne̱ Azor me rej síí cuꞌna̱j Sadoc,
ne̱ Sadoc me rej síí cuꞌna̱j Aquim,
ne̱ Aquim me rej síí cuꞌna̱j Eliud,
15ne̱ Eliud me rej síí cuꞌna̱j Eleazar,
ne̱ Eleazar me rej síí cuꞌna̱j Matán,
ne̱ Matán me rej síí cuꞌna̱j Jacob a.
16Ne̱ Jacob me rej síí cuꞌna̱j José,
ne̱ José me síí xcaj man chana̱ cuꞌna̱j Mariá,
ne̱ noꞌ me nii Jesús, síí cuꞌna̱j Síí Caꞌnéé Yaꞌanj Ti̱nanii man Yuvii̱ rihaan Sayuun ado̱nj.
17Dan me se asi̱j síí cuꞌna̱j Abraham nda̱a síí cuꞌna̱j David síj xcaꞌa̱nj xi̱i síí cuꞌna̱j Jesús a. Ne̱ asi̱j David nda̱a caꞌanj nica̱j nij síí ma̱n Babilonia man nij yuvii̱ israelitá chiháán nij soꞌ síj ꞌó xcaꞌa̱nj xi̱i Jesús a. Ne̱ asi̱j caꞌanj nica̱j nij síí ma̱n Babilonia man nij yuvii̱ israelitá chiháán nij soꞌ nda̱a caꞌngaa Jesús Si̱j Caꞌnéé Yaꞌanj Ti̱nanii man Yuvii̱ rihaan Sayuun, ne̱ síj ꞌó xcaꞌa̱nj nij xi̱i Jesús uún ado̱nj.
Caꞌngaa Jesús rihaan chumii̱ nihánj a
18Ne̱ nihánj me se vaa guun asi̱j rque̱ ga̱a ataa caꞌnga̱a̱ Jesús Si̱j Caꞌnéé Yaꞌanj Ti̱nanii man Yuvii̱ rihaan Sayuun a. Dan me se nii Jesús me chana̱ cuꞌna̱j Mariá a. Ga̱a asino ya̱a̱n guun ya̱ rá noꞌ ga̱ síí cuꞌna̱j José se vaa xca̱j tuviꞌ ro̱j soꞌ a. Ga̱a ataa cunu̱u rcuaꞌa̱a̱n ro̱j soꞌ, ne̱ xcaj noꞌ cuentá se vaa a̱j nariꞌ noꞌ neꞌej quiꞌyaj Nimán Yaꞌanj a. 19Dan me se José me síí xca̱j man Mariá, ne̱ xcaj soꞌ cuentá se vaa a̱j nuû rque noꞌ neꞌej a. Dan me se síí nica̱ nimán me José, ne̱ ne caꞌve̱j rá soꞌ cuta̱ꞌ soꞌ cacunꞌ xráá Mariá rihaan nij síí nica̱j suun a. Cheꞌé dan nuchruj ra̱a̱ soꞌ, ne̱ ta̱náj yuve̱ soꞌ man noꞌ, rá soꞌ a. 20Dan me se nuchruj ra̱a̱ soꞌ da̱j quiꞌya̱j soꞌ, ga̱a ne̱ cotoj soꞌ, ne̱ ta̱j niꞌyo̱n naquiꞌyaa rihaan soꞌ se vaa caꞌnaꞌ ꞌo̱ se‑mo̱zó Yaꞌanj Si̱j ꞌNi̱j Raꞌa man níꞌ, ne̱ cataj se‑mo̱zó Yaꞌanj rihaan soꞌ a:
―Cu̱nó so̱ꞌ caꞌmi̱i̱ ꞌu̱nj, José. ꞌO̱ se taꞌníí taꞌnij siꞌno̱ rey cuꞌna̱j David síí cayáán ga̱a naá mé so̱ꞌ ado̱nj. Se̱ cuchuꞌvíꞌ so̱ꞌ xca̱j so̱ꞌ man chana̱ cuꞌna̱j Mariá maꞌ. Ne tumé noꞌ cacunꞌ maꞌ. Nimán Yaꞌanj quiꞌyaj se vaa nariꞌ noꞌ neꞌej ado̱nj. 21Dan me se cuchru̱j noꞌ neꞌej sno̱ꞌo, ne̱ JESÚS tu̱cuꞌnáj so̱ꞌ man neꞌej yoꞌ á. Da̱nj tu̱cuꞌnáj soj man soꞌ, cheꞌé se ti̱nanii soꞌ man nij tuviꞌ soꞌ rihaan cacunꞌ tumé nij soꞌ ado̱nj ―da̱nj cataj se‑mo̱zó Síí ꞌNi̱j Raꞌa man níꞌ rihaan José a.
22Nu̱ꞌ nihánj me se vaa quiꞌyaj Yaꞌanj Si̱j ꞌNi̱j Raꞌa man níꞌ a. Quiꞌyaj gue̱e̱ soꞌ nu̱ꞌ nana̱ cataj xnaꞌanj soꞌ ga̱a naá rihaan ꞌo̱ síí nataꞌ snana̱ Yaꞌanj rihaan yuvii̱, ne̱ nihánj me nana̱ caꞌmii Yaꞌanj rihaan soꞌ a:
23Ni̱ꞌyaj soj á.
Nari̱ꞌ ꞌo̱ chana̱ ya̱a̱n neꞌej,
ne̱ cuchru̱j noꞌ neꞌej sno̱ꞌo,
ne̱ Emanuel cuꞌna̱j neꞌej ado̱nj,
da̱nj caꞌmii Yaꞌanj Si̱j ꞌNi̱j Raꞌa man níꞌ ga̱a naá rihaan síí nataꞌ snana̱ Yaꞌanj, ne̱ nana̱ Emanuel me raj cata̱a se vaa ca̱yáán maꞌa̱n Yaꞌanj ga̱ níꞌ ado̱nj.
24Veé dan, ne̱ nanuû rá José, ne̱ quiꞌyaj soꞌ nu̱ꞌ suun caꞌneꞌ se‑mo̱zó Yaꞌanj Si̱j ꞌNi̱j Raꞌa man níꞌ rihaan soꞌ, ne̱ xcaj soꞌ man chana̱ cuꞌna̱j Mariá a. 25Tza̱j ne̱ ne coto̱j soꞌ ga̱ noꞌ nda̱a se quisíj cuchruj noꞌ neꞌej sno̱ꞌo a. Ne̱ tucuꞌnáj José JESÚS man neꞌej ado̱nj.
دیاریکراوەکانی ئێستا:
San Mateo 1: trc
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Wycliffe Bible Translators, Inc. 2024 segunda versión electrónica