زەبوورەکان 1:25-22
زەبوورەکان 1:25-22 پەیمانی نوێ و زەبوورەکان بە سۆرانی (PNTZS)
ئه‌ی په‌روه‌ردگار گیانی خۆم بۆ تۆ به‌رز ده‌كه‌مه‌وه. پشتم به تۆ به‌ستووه خودایه، شه‌رمه‌زارم مه‌كه. دوژمنانم پێ خۆش مه‌كه. هه‌موو ئه‌وانه‌ی ئومێدیان به تۆ بێت، شه‌رمه‌زار نابن. به‌ڵكو ئه‌وانه شه‌رمه‌زار ده‌بن كه به‌بێ هۆ ناپاكی ده‌كه‌ن. ئه‌ی په‌روه‌ردگار ڕێگاكانی خۆتم پێ بناسێنه. ڕێبازه‌كانی خۆتم فێر بكه. له ڕه‌وای خۆت ڕامبهێنه و فێرم بكه، چونكه تۆ خودای ڕزگاریده‌ری منی. به درێژایی ڕۆژ ئومێدم به تۆیه. ئه‌ی په‌روه‌ردگار میهره‌بانی و چاكه‌ی خۆت له بیر بێت، چونكه له ئه‌زه‌له‌وه هه‌بوونه. گوناهه‌كانی گه‌نجێتیم و یاخیبوونه‌كانم به بیری خۆت مه‌هێنه‌وه. به‌ڵكو به‌گوێره‌ی میهره‌بانیه‌كه‌ت بیرم لێ بكه‌وه له‌پێناوی چاكی خۆت ئه‌ی په‌روه‌ردگار. په‌روه‌ردگار چاک و سه‌رڕاسته، بۆیه گوناهباران فێری ڕاسته‌ڕێ ده‌كات. ڕاهێنانی دڵنه‌رمه‌كان ده‌كات بۆ ڕه‌وا، دڵنه‌رمه‌كان فێری ڕێگای خۆی ده‌كات. هه‌موو ڕێبازه‌كانی په‌روه‌ردگار میهره‌بانی و ڕه‌وان بۆ ئه‌وانه‌ی كه په‌یمان و گه‌واهیه‌كانی ده‌پارێزن. ئه‌ی په‌روه‌ردگار له‌پێناوی ناوی خۆت له تاوانم خۆش به، چونگه مه‌زنه. كێیه ئه‌و مرۆڤه‌ی له په‌روه‌ردگار ده‌ترسێت؟ خودا فێری ئه‌و ڕێگایه‌ی ده‌كات كه بۆی هه‌ڵبژاردووه. گیانی له خۆشیدا ده‌بێت و زه‌وی به میرات بۆ نه‌وه‌كانی ده‌مێنێته‌وه. نهێنیی په‌روه‌ردگار بۆ ئه‌وانه‌یه كه لێی ده‌ترسن، په‌یمانه‌كه‌شی بۆ فێركردنیانه. من هه‌میشه چاوم ڕووه‌و په‌روه‌ردگاره، چونكه خۆی پێم له ته‌ڵه ده‌كاته‌وه. ئاوڕم لێ بده‌وه و له‌گه‌ڵم میهره‌بان به، چونكه ته‌نیا و به‌دبه‌ختم. دڵته‌نگیم مه‌هێڵه. له ته‌نگانه‌كانم ده‌ربازم بكه. بڕوانه داماوی و ڕه‌نجكێشانم و له هه‌موو گوناهه‌كانم خۆش به. بڕوانه دوژمنه‌كانم چه‌ند زۆر بوون و چه‌ند به كینه‌وه ڕقیان لێمه. ژیانم بپارێزه و ده‌ربازم بكه، شه‌رمه‌زار نابم چونكه پشتم به تۆ به‌ستووه. ته‌واوی و سه‌رڕاستیم ده‌مپارێزێت، چونكه ئومێدم به تۆیه. خودایه، ئیسڕائیل بكڕه‌وه، له هه‌موو ته‌نگانه‌كانی.
زەبوورەکان 1:25-22 كوردی سۆرانی ستانده‌رد (KSS)
ئەی یەزدان، گیانی خۆم بۆ تۆ بەرز دەکەمەوە. ئەی خودای من، پشتم بە تۆ بەستووە. ڕێ مەدە شەرمەزار بم، دوژمنانم پێ خۆش مەکە. هەموو ئەوانەی ئومێدیان بە تۆ هەیە شەرمەزار نابن، بەڵکو ئەوانە شەرمەزار دەبن کە بەبێ هۆ ناپاکی دەکەن. ئەی یەزدان، ڕێگاکانی خۆتم پێ بناسێنە، ڕێڕەوەکانی خۆتم فێر بکە. لە ڕاستی خۆت ڕێنماییم بکە و فێرم بکە، چونکە تۆ خودای ڕزگارکەری منیت، بە درێژایی ڕۆژ ئومێدم هەر بە تۆیە. ئەی یەزدان، بەزەیی و خۆشەویستییە نەگۆڕەکەی خۆت لەبیر بێت، چونکە لە دێرزەمانەوە ئەمانە هەن. ئەی یەزدان، گوناهەکانی کاتی گەنجیەتیم و یاخیبوونەکانم بەبیر خۆت مەهێنەوە، بەڵکو بەگوێرەی خۆشەویستییە نەگۆڕەکەت بیرم لێ بکەرەوە، لە پێناوی چاکی خۆت. یەزدان چاک و سەرڕاستە، بۆیە گوناهباران فێری ڕاستەڕێیی دەکات، ڕابەرایەتی بێفیزەکان دەکات بۆ دادپەروەری، ئەوان فێری ڕێگای خۆی دەکات. هەموو ڕێگاکانی یەزدان ڕاست و خۆشەویستی نەگۆڕن بۆ ئەو کەسانەی فەرزەکانی پەیمانەکەی ناشکێنن. ئەی یەزدان، لە پێناوی ناوی خۆت، لە گوناهم خۆشبە، هەرچەندە گەورەشە. کێیە ئەو کەسەی لە یەزدان دەترسێت؟ خودا فێری ئەو ڕێگایەی دەکات کە بۆی هەڵبژاردووە. هەموو ڕۆژانی لە چاکەدا دەبێت و زەوی بە میرات بۆ نەوەکانی دەمێنێتەوە. خودا نهێنی خۆی بەوانە دەسپێرێت کە لێی دەترسن، وا دەکات پەیمانەکەی زانراو بێت لەلایان. من هەمیشە چاوم ئاراستەی یەزدان کردووە، چونکە تەنها ئەو پێم لە تەڵە دەکاتەوە. ئاوڕم لێ بدەوە و لەگەڵم میهرەبان بە، چونکە تەنها و کڵۆڵم. دڵتەنگیم زیاد بووە، لە تەنگانەکانم ڕزگارم بکە. تەماشای داماوی و ڕەنجکێشانم بکە و لە هەموو گوناهەکانم خۆشبە. تەماشای دوژمنەکانم بکە چەند زۆر بوونە و چەند بە قینەوە ڕقیان لێمە. ژیانم بپارێزە و ڕزگارم بکە، شەرمەزارم مەکە، چونکە پەنا وەبەر تۆ دەهێنم. با دروستی و سەرڕاستی پارێزەرم بن، چونکە ئومێدم بە تۆیە. ئەی خودایە، ئیسرائیل بکڕەوە لە هەموو تەنگانەکانی!