Iranian Azeri Bible

عئسا اونا قولاق آسان خالقا بو سؤزلرئن هامیسینی دیئب بئتئرندن سونرا، کفرناحوما گئردی. اورادا بئر یوز باشینین قولو کی، اونون یانیندا چوخ عزئز ائدی، ناخوشلاییب اؤلوم حالینا دوشموشدو. عئسانین خبرئنی اشئدن زامان، او، یهودئلرئن بعضی آغساقّاللارینی اونون یانینا گؤندَ‌ردی کی، اوندان گلئب قولونون صاغالتماسینی خاهئش اتسئنلر. اونلار دا عئسانین یانینا گلدئلر و تأکئدله یالواریب ددئلر: «بو آدام لایئقدئر کی، سن اونون اوچون بونو اده‌سن. چونکی خالقیمیزی سوئر و بئزه کنئسه تئکئب.»
عئسا اونلارلا گتدی. یوزباشینین اِوئنه یاخینلاشدیغی زامان، او، اؤز دوستلارینی اونون پئشوازینا گؤندَ‌ردی کی، اونا دسئنلر: «یارب، زحمت چکمه؛ من لایئق دیئلم کی، منئم دامیمیم آلتینا گئره‌سن. بو سببدن ده اؤزومو لایئق گؤرمه‌دئم کی، سنئن یانینا گلئم. آنجاق بئر کلمه دِه و قولوم صاغالسین. چونکی من ده حؤکم آلتیندا اولان بئر آدامام و الئمئن آلتیندا عسگرلر وار. بئرئنه ”گت“ دِسَم گدر، بئرئسئنه ”گل“ دِسَم گلر و قولوما ”بونو ات“ دِسَم، اِدَر.»
عئسا بونو اشئدن واخت تعجّوب اتدی و دؤنوب دالینجا گلن خالقا ددی: «سئزه دیئرم کی، ائسرایئلده بله بو قدر بؤیوک ائمانا راست گلمه‌دئم.» گؤندَ‌رئلمئش آداملار اِوه قاییتدیقلاری زامان، ناخوش قولو صاغالمیش تاپدیلار.

بوندان سونرا عئسا نایئن دیئلن بئر شهره گتدی. شاگئردلرئنئن چوخو و بؤیوک بئر جاماعات اونونلا گدئردی. شهرئن دروازاسینا یاخینلاشان زامان، دول بئر آروادین بئری-بئردانه اوغلونون جنازه‌سئنی چیخاردیردیلار. شهر اهلئندن چوخ آدام اونونلا گدئردی. رب او آنانی گؤرن واخت، اونا یازیغی گلدی و ددی: «آغلاما.» و یاخینلاشیب الئنی اؤلونون اوزاندیغی تابوتا قویدو. آپارانلار دایاندیلار. و عئسا ددی: «ای جاوان، سنه دیئرم، دور!» اؤلو دوروب اوتوردو و دانیشماغا باشلادی. عئسا اونو آناسینا گری وردی.
هامینی قورخو بورودو و تارییا حمد ادئب دیئردئلر: «آرامیزدا بؤیوک بئر پیغمبر ظوهور ادئب» و «تاری خالقینین گؤروشویونه گلئب.» اونون باره‌سئنده بو خبر بوتون یهودئیه و اطرافدا اولان وئلایتلرئن هامیسینا یاییلدی.


یحیانین شاگئردلری اونا بونلارین هامیسینی خبر وردئلر. یحیا شاگئردلرئندن ائکئسئنی چاغیریب ربّئن یانینا گؤندَ‌ردی کی، اوندان سوروشسونلار: «آیا گلمه‌لی اولان سن‌سن، یوخسا آیری بئرئنی گؤزله‌یک؟»
یحیانین شاگئردلری عئسانین یانینا گلئب ددئلر: «تعمئد ورن یحیا بئزی سنئن یانینا گؤندَ‌رئب کی، سوروشاق: ”گلمه‌لی اولان سن‌سن، یوخسا آیری بئرئنی گؤزله‌یک؟“»
اله او واخت عئسا بئر چوخلارینی ناخوشلوقلاردان، آزارلاردان و ناپاک روح الئندن خئلاص اتدی؛ کور اولانلاردان بئر چوخونون گؤزلرئنی آچدی. عئسا جاوابیندا اونلارا ددی: «گدئن نه گؤردویونوزو و نه اشئتدئیئنئزی یحیایا بئلدئرئن: کورلار گؤرورلر، چولاقلار یرئیئرلر، جوذاملی‌لار طاهئر اولورلار، کارلار اشئدئرلر، اؤلولر دئرئلئرلر، و فاغیرلارا خوش خبر موژده ورئلئر. خوش او آدامین حالینا کی، مندن اؤتری بودره‌مه‌سئن.»
یحیانین اِلچئلری گدندن سونرا، عئسا یحیانین حاقّیندا خالقا دانیشماغا باشلادی: «چؤله نه گؤرمه‌یه گتدئنئز، یلئن ترپتدئیی قامیشی؟ دیئن، نه گؤرمه‌یه چیخدینیز، ظرئف پالتارلار گیمئش بئر آدامی؟ آمّا ظرئف پالتار گیئنئب دبدبه ائله یاشایانلار، پادشاه سارایلاریندادیرلار. بس نه گؤرمه‌یه گتدئنئز، بئر پیغمبر؟ بلی، سئزه دیئرم، پیغمبردن ده افضل اولانی. بو، او آدامدیر کی، اونون حاقّیندا یازیلیب:
”باخ، سنئن قاباغیندا اؤز الچئمی گؤندَ‌رئرم.
او سندن قاباق سنئن یولونو حاضیرلایاجاق.“
سئزه دیئرم: آرواددان دوغولانلار آراسیندا تعمئد ورن یحیادان بؤیوک، هچ بئر آدام یوخدور. لاکئن تارینین پادشاهلیغیندا لاپ کئچئک اولان یحیادان بؤیوکدور.»
او زامان کی، بوتون خالق و باج ییغانلار بونو اشئتدئلر، تارینین عدالتئنی تصدئق اتدئلر، چونکی یحیادان تعمئد آلمیشدیلار. آمّا فرئسئلر و قاضی‌لار تارینین اونلار حاقّیندا اولان هدفئنی ردّ اتدئلر. چونکی یحیادان تعمئد آلمامیشدیلار.
«بو نسلئن آداملارینی نه‌یه بنزه‌دئم و اونلار کئمه بنزه‌یئرلر؟ اونلار میدانلاردا اوتوران اوشاقلارا بنزه‌یئرلر کی، بئربئرئنی چاغیریب دیئرلر: ”بئز سئزه توتک چالدیق، سئز اوینامادینیز. سئزه نوحه اوخودوق، آغلامادینیز.“ چونکی تعمئد ورن یحیا، گلن واخت، نه چؤرک یئین، نه ده شراب ائچن ائدی و سئز دیئرسئنئز: ”اوندا بئر ائبلئس وار.“ ائنسان اوغلو، گلن واخت، ییئر و ائچئر و سئز دیئرسئنئز: ”باخ، قارینقولو و شرابخار بئر آدامدیر، باج ییغانلارین و گوناهکارلارین دوستو!“ لاکئن حئکمت اؤز اؤولادلارینین هامیسی طرفئندن تصدئق اولونور.»

فرئسئلردن بئری عئسادان خاهئش اتدی کی، اونلارلا یمک یسئن. او دا فرئسئنئن اِوئنه گئرئب، سوفره باشیندا اوتوردو. او شهرده یاشایان گوناهکار بئر آرواد عئسانین فرئسئنئن اِوئنده سوفره باشیندا اوتوردوغوندان خبردار اولوب، آغ مرمر بئر قابدا بئر عطئر گتئردی و آرخادا، اونون آیاقلارینین یانیندا دوروب آغلایا-آغلایا عئسانین آیاقلارینی گؤزیاشلاری ائله ائسلادیردی و ساچلاری ائله سئلئب، آیاقلارینی اؤپوردو و عطئری اونون آیاقلارینا سورتوردو. عئسانی اِوئنه دعوت ادن فرئسی، بونو گؤرن واخت، اؤز-اؤزونه ددی: «بو آدام اگر پیغمبر اولسایدی، اونا توخونان آروادین کئم اولدوغونو و نه‌چی اولدوغونو بئلردی. چونکی بو، گوناهکار بئر آرواددیر.»
او زامان عئسا اونا جاواب ورئب ددی: «شمعون! سنه دمه‌لی بئر سؤزوم وار.»
او دا ددی: «بویور، اوستاد.»
عئسا ددی: «بئر طلبکارین ائکی بورجلوسو وار ائدی؛ بئری بش یوز دئنار و او بئری الّی دئنار بورجلو ائدی. بورجلارینی ورمه‌یه هچ بئر شیلری اولمادیغینا گؤره، بورجو هر ائکئسئنه باغیشلادی. ائندی ده گؤروم اونلارین هانسی اونو چوخ سوه‌جک؟»
شمعون جاواب ورئب ددی: «گومان ادئرم او کی، اونا آرتیق باغیشلاندی.»
عئسا ددی: «دوز حؤکم اتدئن.»
و آروادین طرفئنه دؤنوب شمعونا ددی: «بو آروادی گؤرورسن؟ سنئن اِوئنه گئردئم، آیاقلاریم اوچون سو گتئرمه‌دئن. لاکئن او، منئم آیاقلاریمی گؤز یاشلاری ائله ائسلاتدی و ساچلاری ائله سئلدی. سن منی اؤپمه‌دئن. لاکئن او، من گلندن بری آیاقلاریمی اؤپمکدن دورمور. سن باشیمی یاغلا یاغلامادین. لاکئن او، آیاقلاریمی عطئرله یاغلادی. بونا گؤره ده سنه دیئرم: اونون چوخ اولان گوناهلاری باغیشلاندی، چونکی چوخ سوگی گؤرستدی. لاکئن کئمه آز باغیشلانسا، آز دا سِوَر.»
و آروادا ددی: «گوناهلارین باغیشلاندی.»
عئسا ائله سوفره باشیندا اوتورانلار، آرالاریندا دیئردئلر: «بو کئمدئر کی، گوناهلاری دا باغیشلاییر؟!»
عئسا آروادا ددی: «ائمانین سنی خئلاص اتدی. سالامات گت.»

Poslouchat لوقا 7