Avar - 2008 Edition (Non-Drama - NT)

Avar - 2008 Edition (Drama - NT)

Гьел киналго, Гӏисаги вачун, рахъун Пилатихъе ана. Гьениб гьез Гӏисаде гӏайиб гӏунтӏизабулеб букӏана, жидер халкъ дандечӏеялде гьусулев ва къайсарасе магъало кьогеянги жив Масихӏ-Парччахӏ вугиланги абулев ватанин гьевилан.
Пилатица Гӏисада гьикъана:
– Мунищха кколев жугьутӏазул Парччахӏ?
Гӏисаца жаваб кьуна:
– Дуца абулеб бугоха гьедин.
Чӏахӏиял кашишзабаздаги халкъалдаги Пилатица абуна гьав чиясе тамихӏ гьабизе гӏураб гӏайиб жинда батулеб гьечӏилан. Амма гьез тӏаса ричӏичӏого абулеб букӏана гьес халкъ багъа-бачаризабулеб бугин, тӏолабго Ягьудиялдаго, хӏатта Галилеялдаса бахъараб гьанибе щвезегӏан, гьес жиндирго насихӏат гьабулеб букӏанин.
Галилеялъул цӏар бахъулеб рагӏидал, Пилатица гьикъана Галилеялдасацин гурищ гьав чийилан. Гьеродил вилаяталдаса вукӏин лъайдал, Пилатица Гӏиса витӏана гьел къоязда Иерусалималде вачӏун вукӏарав Гьеродихъе. Гӏиса вихьаравго, Гьерод цӏакъ вохана. Цебего бокьун букӏана гьесие Гӏиса вихьизе, гӏемерал харбал рагӏулел рукӏиндалха гьесул хӏакъалъулъ. Цо хӏикмат жиндаги бихьизабилародаян хьулги букӏана Гьеродил. Гьеродица гӏемерал суалал кьуна Гӏисае, амма гьес цонигиялъе жавабцин кьечӏо. Гьенир рахъун чӏун чӏахӏиял кашишзабазги диниял гӏалимзабазги гӏасилъун-ццидахун Гӏисаде гӏайибал гӏунтӏизарулел рукӏана. Гьеродицаги гьесул рагъухъабазги Гӏиса гӏад-хочӏие гьавун, инжит-хӏакъир гьавун чӏухӏараб ретӏел ретӏана гьесда ва тӏадвуссун Пилатихъе витӏана. Цебеккун цоцазда гьоркьоб тушманлъи букӏарал Гьеродги Пилатги гьеб къоялдаса нахъе гьудулзабилъун лъугьана.
Чӏахӏиял кашишзабиги, чӏухӏби-хӏакимзабиги, цогидал гӏадамалги ахӏун, Пилатица гьезда абуна:
– Гьас халкъ дандечӏеялде гьусулеб бугилан вачун вачӏун вуго нужеца гьав чи дихъе. Гьале дица нужги ралагьун цӏех-рех гьабидал, дида гьав чиясда батичӏо нужеца гьасде гӏунтӏизарурал гӏайибазул цонигияб. Гьеродидаги батичӏо, гьединлъидал дос гьав тӏадвуссун нилъехъе витӏун вачӏана. Чӏвазе къотӏизе гӏураб цониги такъсирги гьас гьабун гьечӏо. Цӏалацаги вацӏун, нахъе виччала дица гьав.
Амма халкъалъ цо кӏалдисан гӏадин ахӏулеб букӏана:
– Гьев чӏвазе витӏе! Барабба кье нижехъе! – ян.
Барабба вукӏана, шагьаралда цо питнаялда гӏахьаллъиялъул ва чи чӏваялъул такъсир тӏад чӏун, гвандинив тӏамун вугев чи. Гӏиса нахъе виччазе бокьун нахъеги халкъалдехун кӏалъана Пилат.
Амма гӏадамал ахӏдезе лъугьана:
– Хъанчида вазе витӏе гьев! Хъанчида вазе витӏе! – ян.
Лъабабизеги абуна Пилатица гьезда:
– Гьас гьабураб квешлъи щиб? Чӏвазе гӏураб гӏайиб батичӏо дида гьасул. Гьединлъидал, цӏалацаги вацӏун, нахъе виччала.
Амма, кутакаб ахӏи-хӏур багъаризабун, тӏадчӏун гӏадамаз гьарулеб букӏана Гӏиса хъанчида вазе витӏейилан, ва гьезул ахӏи-хӏур бергьана. Пилатица хӏукму гьабуна гьезул гьари къабул гьабизе: питнаялда гӏахьаллъанилан ва чи чӏванилан гвандиниве рехун вукӏарав чиги, гӏадамазул гьариялда рекъон, къватӏиве виччан, Гӏиса гьезул ихтияралде кьуна.

Гьев вачун унаго, гьесда хадуб хъанч баччизабуна хуриса вачӏунев вукӏун данде ккарав Киренеялдаса цо Симон абулев чиясда. Цӏакъ гӏемераб халкъ букӏана Гӏисада хадуб бачӏунеб, хасго руччаби рукӏана гӏодилел ва магӏаби гьарулел. Нахъвуссун гьезухъги валагьун, Гӏисаца абуна:
– Я, Иерусалималъул руччаби! Нуж дихъ гӏодуге! Нуж гӏоде нужехъго ва нужер лъималазухъ. «Чехь къинлъун лъимер гьабичӏел, керен кьун гьеб хахизабичӏел руччаби гьардарал гурищ!» – ан нужеца абулел къоял рачӏине руго. Тӏаде рортун ниж гъоркь ккезареян мугӏрузда гьардела гӏадамал гьебмехалъ, щущан ун ниж щинкӏизареян гохӏазда гьардела. Гӏурччинаб гъветӏалъе гьадинал ишал гьарулел ругони, – бакъвараб гъотӏое щибдай гьабила!
Кӏиго хъачагъги вукӏана гьесда цадахъ тамихӏалъе вачун унев. «Гвангвара» абулеб бакӏалде щведал, Гӏиса хъанчида вана; цояв кваранаб рахъалда, цогидавги квегӏаб рахъалда – дов кӏиявго хъачагъги вана хъанчида. Гӏисаца абуна:
– Я, дир Эмен! Гьазда тӏасалъугьа мун. Жидецаго гьабулеб бугеб жо гьазда лъалеб гьечӏо, – ян.
Рагъухъаби рукӏана, можоро тӏамун, гьасул ретӏел жидедаго гьоркьоб бикьулел. Халкъ балагьун чӏун букӏана. Чӏухӏби-хӏакимзаби гьасда тӏад релъанхъулел рукӏана:
– Аллагьас тӏаса вищарав Масихӏ вугев ватани, живго хвасар гьавеян абе, цогидал хвасар гьарулин досилан абулеб букӏанин.
Рагъухъабазги гӏад-хочӏ гьавулев вукӏана гьев. Аскӏоре ун, цӏекӏаб чагъир бегьулеб букӏана гьесухъе.
– Мун жугьутӏазул парччахӏ ватани, мунго хвасар гьаве! – ян абулеб букӏана.
«Гьав вуго жугьутӏазул парччахӏ» абун греказул, румазул ва жугьутӏазул мацӏалъ тӏад хъвараб хъарщиги букӏана гьесул бетӏералда тӏадехун хӏобода чӏван.
Гьесда цадахъ хъанчида варав цо хъачагъас Гӏиса инжит-къабихӏ гьавулев вукӏана:
– Мун Масихӏ гурищ? Гьаха, мунгоги нижги хвасар гьаре, – ян.
Цогидав хъачагъас, досул кӏал къазабун, абуна:
– Мун Аллагьасукьагӏагийищ хӏинкъуларев? Дуеги гьебго тамихӏлъидал бугеб! Нилъее тамихӏ битӏун гьабулеб буго, нилъеца гьабуралда рекъон къотӏун бугелъул нилъее судги. Амма гьас щибго квешлъи гьабичӏо.
Гӏисадехун гьес абуна:
– Я, Гӏиса, Парччахӏлъун мун вачӏараб мехалъ, дунги ракӏалде щва дуда, – ян.
Гӏисаца гьесда абуна:
– Хӏакълъун абулеб буго дица дуда: жакъаго дида аскӏов алжаналъувин мун вукӏине вугев!

Къалъулеб гӏужалда бакъ ккуна. Къалъудаса лъабго сагӏат инегӏан тӏолабго дуниял бецӏлъана. Мукъадасаб Рукъалъул бищунго хирияб рокъоб бигъун букӏараб пардав бакьулъа бихъун ана. Цо гучаб гьаракь гьабун ахӏана Гӏисаца:
– Я, дир Эмен! Дуда кодобе кьолеб буго дица дирго рухӏ!
Гьедин абун хадуб гьесул рухӏ босун ана.
Гьеб бихьарав Мукъадасаб Рукъ цӏунулел рагъухъабазул нусилбетӏерас, Аллагьасе рецц гьабун, абуна:
– Хӏакъикъаталдаги вацӏцӏадав чи вукӏун вуго гьав.
Гьеб киналъухъго балагьизе бачӏун букӏараб тӏолабго халкъги, гьениб ккараб жо бихьидал, бухулаго керенгун, тӏадбуссун ана. Гӏиса лъалев вукӏарал киналго гӏадамалги Галилеялдаса рахъарал гьесда цадахъ рукӏарал руччабиги нахъегӏан чӏун ралагьун рукӏана.

Гьале Ягьудиялъул Ариматея шагьаралдаса Аллагьасул Парччахӏлъиялде хьул лъурав Юсуп абулев цо лъикӏав ва ритӏухъав чи (тӏадегӏанаб судалда гьоркьове унев вукӏаниги, гьев разилъун вукӏинчӏо гьелъ гьабураб хӏукмуялдаги гьеб тӏубазабиялдаги), – Пилатихъе ана Гӏисал жаназа кьеян гьаризе. Хъанчидаса бахъун, хӏебтил мусрудулъги жемун, кьурулъ бикӏун хӏадурун букӏараб жеги щивниги чи лъечӏеб хабалазул нохъода букъула гьесул жаназа.
Гьеб букӏана рузман къо, тӏаде щолеб букӏана шамат сордо. Галилеялдаса рахъарал Гӏисада цадахъ рукӏарал руччабиги ана Юсупида хадур ва гьездаги бихьана гьеб хобги хабалъ гьев лъураб куцги. Цинги тӏадруссун рокъоре щведал, Гӏисал мусруялда бахине махӏгьуинаб нах хӏадурана гьез. Къануналда рекъон, шамат къоялъ парахат чӏана.

Poslouchat Лукаца бицараб Рохалил хабар 23