If you would like a copy of this version please contact info@davaraudiobibles.org

Gamit New Testament, CC-BY-SA-4.0, The Love Fellowship. Gamit New Testament Audio Bible, CC-BY-SA-4.0, Davar Partners International, The Love Fellowship, 2022.

Gamit New Testament

Gamit Bible (ગામીત), by The Love Fellowship is licensed under Creative Commons Attribution-ShareAlike 4.0 License.

નિકોદેમુસ નાંવા યોક માટડો આતો, તો યહૂદીયાહા મોઠી સોબાયે આગેવાન આતો, તો યોક પોરૂષી બી આતો. તો રાતી ઈસુવાપાય યેનો, એને ચ્યાલ આખ્યાં કા, “ઓ ગુરુજી, આમહાન ખોબાર હેય કા, પોરમેહેરાય તુલ આમહાન હિકાડાંહાટી દોવાડલો હેય, કાહાકા જ્યા ચમત્કાર તું કોઅતોહો, જોવે પોરમેહેર ચ્યાઆરે નાંય રોય તોવે ચ્યા ચમત્કાર કાદાં માઅહું નાંય દેખાડી હોકે.” ઈસુવે ચ્યાલ જાવાબ દેનો, “આંય તુલ હાચ્ચાં-હાચ્ચાં આખતાહાવ, જોવે માઅહું પાછો જન્મો નાંય લેય તે પોરમેહેરા રાજ્ય નાંય એઇ હોકે.” નિકોદેમુસે ચ્યાલ આખ્યાં, “માઅહું ડાઆયા ઓઈ ગીયા, પાછે કેહે કોઇન જન્મો લેય હોકે? તો પાછો ચ્યા આયહે બુકામાય ઉરાઈન પાછો જન્મો લેય હોકહે કા?” ઈસુવે જવાબ દેનો, “આંય તુલ હાચ્ચાં-હાચ્ચાં આખતાહાવ, જોવે માઅહું પાઅયા કોઇન એને પવિત્ર આત્માકોય જન્મો નાંય લેય તોવે તો પોરમેહેરા રાજ્યામાય નાંય પ્રવેશ કોઅઇ હોકે. કાહાકા માઅહા પાઅને જન્મો શારીરિક જન્મો હેય, એને પવિત્ર આત્માપાઅને જન્મો તો નોવો જન્મો હેય. તું નોવાય નાંય પામા જોજે, માયે તુલ આખ્યાં કા, તુલ નોવો જન્મો લેઅના જરુરી હેય. જીં માઅહું પવિત્ર આત્માકોય જોન્મુલા હેય તો વારા હારખો હેય, વારો ગોમે તાં જાહાય, ચ્યા આવાજ તું વોનાતોહો, બાકી તો કેછને યેહે એને કેછ જાહાય, તી તુલ ખોબાર નાંય પોડે.” નિકોદેમુસે ચ્યાલ પુછ્યાં, “ઈ કેહેકેન શક્ય હેય?” ઈસુવે જવાબ દેનો, “તું ઈસરાયેલ લોકહા ગુરુ હેય, તુલ યો વાતો હોમજી જાં જોજે.” આંય તુલ હાચ્ચાં-હાચ્ચાં આખતાહાવ, આમા જીં જાંઅજેહે તીંજ આખજેહે, એને આમહાય જીં એઅયા ચ્યા સાક્ષી દેજહે, બાકી આમા જીં આખજેહે ચ્યાવોય તુમા બોરહો નાંય કોએત. જોવે તુમહાન માયે દુનિયામાઅને વાત આખી તોવે ચ્યેવોય તુમા બોરહો નાંય કોએત, તો જોવે હોરગા બારામાય વાત આખું, તોવે ચ્યાવોય તુમા કેહેકે બોરહો કોઅહા? કાદાં માઅહું હોરગામાય નાંય ગીયહા બાકી કેવળ આંય, માઅહા પોહો હોરગામાઅને નિચે ઉતી યેનહો. એને જેહેકેન મૂસાય જાડયેમાય પિતળા હાપડાલ ઉચે ચોડવ્યો, તેહે કોઅઈન માન, માઅહા પોહાલ બી ઉચે ચોડાવના જરુરી હેય. યાહાટી કા, જીં માઅહું માયેવોય બોરહો કોઅહે ચ્યાલ અનંતજીવન મિળહે.
“પોરમેહેરે દુનિયા લોકહાવોય ઓહડા મહાન પ્રેમ કોઅયા, યા લીદે ચ્યા યોકને-યોક પોહાલ બલિદાન કોઇ દેનો, યાહાટી કા જીં કાદાં માઅહું ચ્ચાવોય બોરહો કોઅહે, ચ્યા નાશ નાંય ઓઅય, બાકી ચ્યાલ અનંતજીવન મીળે. કાહાકા પોરમેહેરે ચ્યા પોહાલ દુનિયા લોકહાવોય ડોંડ દાં નાંય દોવાડયો, બાકી ચ્યાકોય દુનિયા લોકહા તારણ કોઅરાહાટી દોવાડયો. જીં માઅહું પોરમેહેરા પોહાવોય બોરહો કોઅહે, ચ્યાલ ડોંડ નાંય દી, બાકી જીં માઅહું પોરમેહેરા પોહાવોય બોરહો નાંય થોવે, તો ડોંડ બોગવી ચુકલો હેય, કાહાકા ચ્યે પોરમેહેરા યોકને-યોક પોહાવોય બોરહો નાંય કોઅયો. એને ડોંડ દેઅના કારણ ઈંજ હેય કા, ઉજવાડો દુનિયામાય યેનો, બાકી લોકહાય ઉજવાડા કોઅતા આંદારાલ પોસાન કોઅયા, કાહાકા ચ્યાહા કામે ખારાબ આતેં. કાહાકા જીં માઅહું ખારાબ કામ કોઅહે, તી ઉજવાડા વિરુદ કોઅહે, એને ચ્યા ખારાબ કામહા ખોબાર નાંય પોડા જોજે યાહાટી તી ઉજવાડામાય નાંય યેય. બાકી જીં માઅહું હાચ્ચાયેવોય ચાલહે, તી ઉજવાડા પાય યેહે, કા ચ્યા કામહા ખોબાર પોડે જ્યેં પોરમેહેરા ઇચ્છાકોય કોઅલે હેય.”

ચ્યા પાછે ઈસુ એને ચ્યા શિષ્ય યહૂદીયા વિસ્તારામાય યેના, એને તો તાં ચ્યાહાઆરે રોઇન બાપતિસ્મા દાં લાગ્યો. તોવે યોહાનબી એનોન ગાવામાય જીં સામરિયા ભાગા સાલેમ ગાવા પાહાય હેય, તાં બાપતિસ્મા દેતો આતો. કાહાકા તાં બોજ પાઆઈ આતા એને લોક ચ્યાપાય યેઇન બાપતિસ્મા લેતે આતેં. કાહાકા યોહાન યે સમયે લોગુ જેલેમાય નાંય કોંડલો આતો.
તાં યોહાના શિષ્યહા કાદા યહૂદી માઅહા આરે યહૂદીયાહા ધાર્મિક નિયમા પરમાણે આથ દોવના રુડી બારામાય બોલાબોલી જાયી. તોવે યોહાના શિષ્યહાય યોહાનાપાય જાયને આખ્યાં, “ઓ ગુરુ, જીં માઅહું યારદેન નોયે ચ્યેમેરે ચ્યાહા આરી આતો, જ્યા બારામાય તુયે આખ્યેલ, એએ, તો આમી બાપતિસ્મા દેહે, એને બોદે ચ્યાપાય જાતહેં.” યોહાને જાવાબ દેનો, “જાવ લોગુ માઅહાલ હોરગામાઅને નાંય દેનલા જાય, તાંવ લોગુ માઅહું કાય નાંય મેળવી હોકે. તુમહાય પોતે માન આખતા વોનાયાહા, આંય ખ્રિસ્ત નાંય હેતાઉ, બાકી ચ્યા પેલ્લા દોવાડલો હેતાઉ.” વોવડો વોવડી આરે વોરાડ કોઅઇ લેહે, બાકી વોવડા આર્યો જો ચ્યાપાય ઉબો રોઇન ચ્યા આવાજ વોનાઈન આનંદ કોઅહે, તેહેકેન મા લીદે બી આનંદાકોય બોઆય ગીયા. તો બોજ મહત્વપૂર્ણ ઓઈ જાં જોજે, એને આંય વોછો મહત્વપૂર્ણ બોનુ.
“જો હોરગામાઅને યેહે, તો બોદહા કોઅતો મહાન હેય, જો દોરત્યેવોયને યેહે તો દોરત્યેવોયને હેય એને દોરતીજ વાતો કોઅહે, એને જો હોરગામાઅને યેહે તો બોદહા ઉચે હેય. જીં કાય ચ્યાય એઅયા, એને વોનાલો હેય, ચ્યાજ સાક્ષી દેહે, એને બોજ વોછા લોક ચ્યા સાક્ષીવોય બોરહો કોઅતાહા. બાકી જીં માઅહું ચ્યા સાક્ષી માનહે તો સાબિત કોઅહે કા, પોરમેહેર હાચ્ચો હેય. કાહાકા, જ્યાલ પોરમેહેરે દોવાડયો તો પોરમેહેરા વાત આખહે, કાહાકા પોરમેહેર ચ્યાલ બો બોદા પવિત્ર આત્મા દેહે. પોરમેહેર આબહો પોહાવોય પ્રેમ કોઅહે, એને બોદ્યોજ વસ્તુ ચ્યા તાબામાંય દેય દેનહા. જીં માઅહું પોરમેહેરા પોહાવોય બોરહો કોઅહે, અનંતજીવન ચ્યાજ હેય, બાકી જીં પોરમેહેરા પોહાવોય બોરહો નાંય કોએ, ચ્યાલ અનંતજીવન નાંય મીળે, બાકી પોરમેહેરા ડોંડ ચ્યાવોય બોની રોય.”

Poslouchat યોહાન 3