If you would like a copy of this version please contact info@davaraudiobibles.org

Nahali New Testament, CC-BY-SA-4.0, The Love Fellowship. Nahali New Testament, CC-BY-SA-4.0, Davar Partners International, The Love Fellowship, 2023.

Nahali New Testament

Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.

गर्दीह देखीन तो चेढ गीयो, एने ताहरो तो बोह गीयो तेवी तान चेला तान आहने आव. तेवी तो आपणो मूय उघाडीन हिकाडणे लागो.


“धन्य हेते ता जान आपणा मोनान गरीब हेते, काहाकाय स्वर्गान राज्य ताचने हि.”
“धन्य हेते जा विलाप केरणू, कारण ताह सांत्वना जुडी.”
“धन्य हेते जा नम्र, हेते काहाकाय ताह जोमनिन अधिकार जुडी.”
“धन्य हेते जा धार्मिकतान बुखल्या एने तिहल्यू हेते, काहाकाय ता तृप्त एती.”
“धन्य हेते ता जा दयालु हेते, काहाकाय तापोर दया केरणेम आवी.”
“धन्य हेते ता जान मोन शुद्ध हि, काहाकाय ता बोगवाना देखती.”
“धन्य हेते ता जा मेल करनेवाला हेते, काहाकाय ता बोगवानान सोरा केवाती.”
“धन्य हेते जा धार्मिकतान कामान वजेसे विताडातेह, काहाकाय स्वर्गान राज्य ताचने हि.”
“धन्य हेते तुमु, जेवी माणहे मार वजेसे तुमरी निंदा केरती, तुमूह वेखडति एने जुठ बोली बोलीन तुमरो विरुद्ध खाराब वातू केरती. तेवी आनंद एने चेकलावो केरू, काहाकाय स्वर्गाम तुमरीकेरता मोठो फोल हि. काहाकाय तुमरे पेल जा भविष्यवक्ता ताहा भी ता इहीच केरीन विताडताला.”


“तुमु जोमनिन मीठ हेते, पुण जेर मीठान होवाद बिगडी जाय ते तो, पोशो खारसो कायताच भी केरीन केरता नाह आवीत, ओवतो तो काइच कामाम नाह आवीत, होवाद नाह शिवाय जगारणे एने माणहान पाया बुंदे चेंदाणेम.” तुमु जगान उजालो हेते. बोयडीपोर वालो गाव ली पोशो नाह आव सकीत. एने दिवू लागडीन मापान बुंदे मेलणेन नाह पुण, पुण दिवह उपेर मेलणे, काहा का घेरामाय आखा माणहाह उजालो पोची. तुमरो उजालो माणहान तिहीस केरीन जपोड्ने जुवी का, तुमरा हाजो कामा देखीन, तुमरा आबाकने, जो स्वर्गाम हि तान बोडायी केरती.

“ज्यो होमजू मा का, मी व्यवस्था एने भविष्यवक्ता पुस्तकाह नाश केरणे केरता आयील हि, मी ताहा पुरो करने आयील हि.” मी तुमूह हाचीच केथु, का जेवीह वोर आकाश एने पृथ्वी टेल नेय जाय, तेवी तक व्यवस्थाम रीन एक अतीच वात भी पुरी एय बिगेर टेली नेय. तान वजसे जो कूण भी आत्यामरीन आती आज्ञा तोडीन हिक दिहीराह आपी, तो बोगवानान स्वर्ग राज्याम आखामरीन आत्यो केवाय, एने जो आज्ञा पाली एने दिहीराह भी हिकाडी तो बोगवानान राज्याम मोठो केवाय. मी तुमूह केथु कि, जाहवोर तुमरी धार्मिकता शास्त्री एने फरीसीह रीन वोदिन, नेय रेय ताहवोर तुमु कधीच स्वर्गान राज्याम नाह जाय शकते.

“तुमु होमलील हेते, का खुन केरहू मा, एने जो कूण खुन केरी तो दण्ड बोगणेन लायक हि.” पुण मी तुमूह ज्यो केथु, का जो कूण आपणा बायाक पोर राग केरी, तो भी दण्डन लायक हि, एने जो कूण आपणा बायाक कायकामान नाह इही केय तो महासभामाय दण्डन लायक हि, एने जो कूण केय अरे मूर्ख तो नरकान आग्ठामाय टाकणेन लायक हि. जर तू आपणी भेट वेदीन आहने लावही, एने तुवाह इही एर आवी का, मार बायाकान मोनामा मार बद्दल विरोधत हि तुवाह एर आवी, ते आपणी भेट तू वेदी ओगांण तोहलीच मेल दी, एने दजाइन आपणा बायाकहे-यो मिलिन मेल केरली एने ओवतो आवीन आपणी भेट अर्पण केर. जर तू आपणा दुश्मोन हेऱ्यो वाटीच हि, ते तहरीच ताहे-यो जेल्दी मेल केरली काहाकाय तार दुश्मोन तो तुवाह न्यायधीशाह होपी एने न्यायाधीश तुवाह शिपायान आथे होपी, एने तो तुवाह जेलीमाय टाकी. मी तुमूह हाचलीन केथु का, जेवीवोर तू एक एक रुपयो नाह सुट देत ताहवोर तू सुटणार नाहं.

“तुमु होमलील हेते कियील हि का, व्यभिचार केरहू मा, पुण मी तुमूह किथे कि, जो कूण कानलीभी बायकू पोर खराब नेजेर टाकीह, तो आपणा मोना माय व्यभिचार केर लेदु. जर तारो जेवडयो डोलो तुवाह ठोकर खावाडी, ते ताह काडीन टाक दी, काहाकाय तारो आखो शरीर नरकाम टाकाय जाणे से ज्योच हाजो हि. जर तारो जेवड्यो आथ तुवाह ठोकर खावाडी, ते ताह काटीन टाक दी, काहाकाय तारो आखा डील नरकाम टाकायणे तारो एक शरीरान एक नाश एय तो तारे हाजो हि.”


“जो कूण आपणी बायकू सोडी तो तीह त्यागपत्र आपणे जुवी कियील एतो. पुण मी तुमूह केथु का, जो कूण आपणी बायकू सोडीन दिहीरा कालाबी कारणान से आपणो बायकूह सोडी, तो तीह व्यभिचार केरणे लागाडीणह एने जो कूण ओहली सोडील बायकू हेरी वाराड केरीह व्यभिचार केरीह.”

“पोशा तुमु होमलील हेते कि, डायला कियील एता, तुमु झुठो शपथ मा आपहो, पुण प्रभु केरता आपणी पुरावो पुरो केरो.” पुण मी तुमूह केथु का, केधी भी शपथ मा खाहू, नाह स्वर्गान कायकाय तो बोगवानान सिहांसन हि, एने पृथ्वीन भी नाहं कारण ती तान पाय मेलणे जागो, हि एने यरूशलेमान भी नाहं कारण तो राजान नगर हि. आपणा मुंडान भी शपथ मा खाहू, काहाकाय तू एक लेट्यो भी कालो एने धोवल्यो केर सकेत नाहं. पुण तुमरो बोलणे होव ते होव नाहं ते नाह ओलोच रेणे जुवी काहाकाय जो काय ज्यासे जादा तो बुराई से हि.


“तुमु होमलील हेते का, कियील एतो डोलान बोदले डोलो, एने दातान बोदलामाय दात पुण मी तुमूह केथु का, बुराई से लेढू मां, जो तार जेवड्यो गाडश्यापूर थापू देय तान ओगांण दिहरो भी फिराव भी दी” एने जर कूण तारपोर चौकशी केरीन डेगलो मांगी ते ताह तारो डेगलो भी आप जर कूण तुवाह एक किलोमीटर चालणे लीन जाथी ते तू ताहे-यो दुय किलोमीटर चाललीन जा जो कूण तुवा फाय मांगी ताह आप, एने जो कूण तुवा फायरीन उदार मागी तान उखेर रीन मुख मा फिरावही.


“तुमु होमलील हेते का कियील एता, तू आपणो शेजाऱ्यावर प्रेम केर, एने आपणो दुश्मनाह राग केर.” पुण मी तुमूह केथु कि, आपणा दुश्मना पोर भी प्रेम केर. जो तुमूह विताडी, तान केरता प्रार्थना केरू, ज्यासे तुमु आपणो स्वर्गामाय आबाकने सोरा बोणहो, काहाकाय तो धर्मी एने पापी दुयू पोर भी दिह उगाडीह, एने विश्वासी एने अधर्मी दुयू पोर भी पाणी पाडीह. काहाकाय जेर तुमु जा तुमु पोर प्रेम केरणू, ता पोरच प्रेम केरणू ते तान काय फायदा एय? काय केर वसूल केरणारा इहीच नाह केरते का? “जर तुमूह आपणा बायहो ओलाच नमस्कार केरतेह, तर काय मोठो काम केरतेह? काय अन्यजात भी इहीच नाह ते काय? केरीन तुमु भी ओहलाच बोणु, जोहलो तुमरो स्वर्गावालू आबुक हि.”

Poslouchat मत्ती 5