Oblíbené biblické verše z ᤗᤠᤶᤍᤡᤰ 7

Sdílet

ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤑᤠᤖᤥᤸᤗᤧ ᤁᤢᤗᤠᤃᤡ ᤔᤠᤱ ᤜᤧᤰᤋᤱᤒᤠ ᤆᤥ᤺ᤰᤏᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤧᤶᤓᤢ᤹ ᤜᤠᤖᤢᤏᤧᤴ ᤂᤧᤏᤧ᤹ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤐᤥᤱᤅᤠᤱ ᤐᤠ᤺ᤳ॥

ᤁᤖ ᤀᤠᤱᤃᤠ᤹ ᤜᤠᤱᤅᤡᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤡᤛᤪᤀᤥ ᤀᤠᤰᤂᤩᤠᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤛᤠᤱ ᤂᤧᤸᤗᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢᤴ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤔᤡᤛᤪ ᤗᤠᤈᤣ᤹ᤀᤥ ᤀᤥᤛᤣ᤺ᤴᤎᤠᤱ ᤆᤥᤃᤢᤱ᤹. ᤜᤧᤰᤁᤩᤠᤱ ᤕᤶᤒᤠ ᤂᤠᤛᤧᤴ ᤆᤥᤃᤢᤱᤅᤠᤱ ᤀᤠᤱᤃᤠ᤹ ᤀᤠᤎᤰᤛᤢᤒᤠ. ᤀᤡᤛᤪᤠᤀᤡᤗᤡ ᤀᤠᤛᤢᤘᤠᤱᤜᤠ᤹ ᤔᤡᤛᤪᤗᤠᤶᤒᤠ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ᤹॥

ᤀᤠᤸᤗ ᤀᤠᤱᤃᤠ᤹ ᤔᤡᤛᤪᤡᤜᤠ᤹ ᤔᤢᤰᤛᤠᤶᤛᤠᤒᤠ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱᤅᤠᤱ ᤂᤢᤴᤇᤡ᤹ ᤗᤢᤶᤔᤥᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤔᤡᤛᤪᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥”

ᤂᤧᤒᤩᤠᤱ ᤜᤠᤱᤅᤡᤸᤗᤧᤀᤠᤱ ᤛᤡᤰᤁᤢᤶᤛᤠᤒᤠ ᤁᤢᤔᤏᤠᤜᤠ᤹ ᤏᤢ ᤁᤢᤃᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤢ᤺ᤳᤇᤧ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤔᤡᤰᤗᤧ᤺ᤱᤔᤠᤗᤠᤶ ᤜᤧᤰᤋᤱᤒᤠᤀᤣ ᤔᤧᤈᤥᤃᤢ॥ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤰᤁᤠ᤺ᤳᤜᤠ᤹ ᤗᤠᤵᤔᤧᤓᤢᤛᤢ ᤜᤧᤰᤁᤩᤠᤱ ᤂᤧᤴ ᤋᤰᤁᤠ᤺ᤳᤜᤠ᤹ ᤀᤛᤣ᤺ᤰ ᤔᤧᤒᤥ᤺ᤰᤂᤧ॥ ᤁᤖ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤰᤁᤠ᤺ᤳᤜᤠ᤹ ᤗᤖᤢᤍᤣᤛᤢᤛᤡ॥

ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤜᤠᤱᤅᤣ. ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤂᤢᤏᤧ᤹ ᤜᤠ᤺ᤳᤗᤧᤳᤇ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤛᤣ᤺ᤴ ᤁᤧᤏᤡᤛᤢ᤹॥ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤁᤴ ᤋᤰᤁᤠ᤺ᤳᤋᤡᤸᤗᤧ ᤏᤡᤗ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤜᤡᤵᤋᤢᤱ᤹ ᤜᤧᤰᤁᤩᤠᤱ ᤆᤫᤠ᤺ᤳᤋᤡᤴ ᤔᤠᤰᤂᤡ᤹ ᤐᤥᤱ᤹॥

“ᤑᤠᤖᤥᤸᤗᤧ ᤂᤡᤴᤇᤡ᤹ ᤀᤠᤵᤑᤣᤰ ᤔᤡᤰᤛᤣᤴ ᤐᤡᤔᤠᤖᤧ ᤗᤠᤃᤡ ᤂᤢᤏᤧ᤹ ᤗᤳᤇᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤠᤱᤛᤡᤏᤧᤓᤃᤪ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤑᤠᤖᤥᤸᤗᤧ ᤁᤢᤍᤃᤡ ᤗᤠᤵᤑᤢᤔᤠ ᤐᤠᤱᤄᤧ᤹ ᤜᤧᤰᤁᤩᤠᤱ ᤂᤧᤴ ᤀᤛᤣ᤺ᤰ ᤐᤥᤱ᤹॥” ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤑᤠᤖᤥᤀᤥ ᤐᤣᤛᤧᤳᤇᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤆᤥᤃᤧᤛᤢ॥ ᤜᤠᤖᤢᤏᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤠᤱ ᤑᤠᤖᤥ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤠᤵᤑᤢᤛᤢ ᤜᤧᤰᤁᤩᤠᤱ ᤂᤧᤴ ᤗᤳᤇᤠ ᤀᤛᤣ᤺ᤰ ᤐᤥ᤺ᤰᤂᤧ॥