Mateyu 5
5
Yesusini Yu Lombili Andoringi Yomboma Ungu-Mane Sirimu Unguma
5:1–8:1
1Yesusini yombo awisili maku toko yu lombili puringima kanopale ma-pangina ola pumba molorumu kinia yu lombili andolima yu molorumuna oringi. 2Kanu-kinia yuni ono ungu-mane sipa nimbale:
Olio Konopu Peanga Pepili Molomolo Ungu-Pulumu Yesusini Nimba Sirimu Semanemo
(5:3-12)
3“Yombo konopuna koropa pulimú pilielemele yomboma Pulu Yemo ononga ye nokoli kingimu molopa ono nokolemomonga ono “Konopu peanga pepili molko kondangi.” nilimú aulkana molemele.
4“Yombo kola seko konopu kiri pepili molemele yomboma Pulu Yemone “Ono konopu peanga pepa toyombo topili.” nimbámonga ono “Konopu peanga pepili molko kondangi.” nilimú aulkana molemele.
5“Yombo taka leko molko yombo lupama pilku molemele yomboma ma-koleama pali Pulu Yemone ono simba lingímunga ono “Konopu peanga pepili molko kondangi.” nilimú aulkana molemele.
6“Pulu Yemone “Saa.” nilimú ulu sumbi nilima sengendo yakala kolko molemele yomboma manda molongemonga ono “Konopu peanga pepili molko kondangi.” nilimú aulkana molemele.
7“Yombo lupama kondo kololemele yomboma Pulu Yemone kondo kolombamonga ono “Konopu peanga pepili molko kondangi.” nilimú aulkana molemele.
8“Yombo konopu kake sepili molemele yombomane Pulu Yemo kanongemonga ono “Konopu peanga pepili molko kondangi.” nilimú aulkana molemele.
9“‘Yomboma konopu seluna pupili molangi.’ nilimili yomboma Pulu Yemone ‘Ono nanga bolangoma.’ nimbámonga ono “Konopu peanga pepili molko kondangi.” nilimú aulkana molemele.
10“Pulu Yemone “Saa.” nilimú ulu sumbi nilima seko molemelemonga yombo lupamane ono mindili silimili ˻akumunga˼ Pulu Yemo ononga ye nokoli kingimu molombamonga ono “Konopu peanga pepili molko kondangi.” nilimú aulkana molemele.
11“Na pilku molemele yomboma, ono nanga yomboma molemelemonga we-yombomane ono ungu-taka tondoko mindili siku, ungu kiri lupa lupama ononga bulkundu kolo toko nindingí kinia ono “Konopu peanga pepili molko kondangi.” nilimú aulkana molemele. 12˻Yombomane ono aku siku mele selemelemonga˼ ono mulu-koleana pungí kinia kanuna Pulu Yemone ono méle kalopa kondomba kene konopu paa awili seko siku konopu peanga pepili molayo. Yombomane kiniá ono mindili silimili mele aku siku ono naa molangi koro-u Pulu Yemone ungu-umbu tondorumuma pilku yomboma ningu siliku andoringi yomboma we-yombomane ono kepe mindili siringila kanumu.” ˻nirimu.˼
Olio Api-Kusamo Mele Molemolo Ungu-Ikumu
(5:13)
13“Ono ma-koleana yombomanga api-kusa mele molemele. ˻Akumu méle peanga˼-na-kolo yu songo naa sembá kinia ‘Yu kelepa songo sepili.’ nimbu ungu se manda semoloye? Yu kongono sembá tondolo se kelepa naa pembamonga we topo eltomolo kinia yomboma kimbumane kulku sembambu singí kinia papu.
Olio Pa Sélimu Molemolo Ungu-Ikumu
(5:14-16)
14“Ono ma-koleana yombomanga pa sendelima molemele. Kolea-awili ma-pangina ola lembamo manda lopi naa senge. 15Yombomane sepe-llame kandokole mingina sukundu naa panjilimili. ‘Mélema kanangi, ulka sukundu pa sepili.’ ningu polo senga ola taltolemele. 16Aku sipa mele ‘Olione ulu peangama selemolo mele yombomane kanokole olionga Lapa, mulu-koleana molemomo, kape niengi.’ ningu ononga pa selemomone yomboma kanangi, pa sendangi.” ˻nirimu.˼
Mosisini Pulu Yemonga Ungu-Mane Sirimumanga Ungu-Pulu Se
(5:17-20)
17“Nane ‘Pulu Yemonga ungu-manema ˻Mosisini˼ bokuna torumu unguma kinia Pulu Yemone ungu-umbu tondorumuma pilku yomboma ningu siringi yemane bokuna toringi unguma kinia ‘mania pupili.’ nimbá okomo.’ ningu naa piliangi. Nane ‘Kanu unguma kamu mania pupili.’ nimbú naa okoro. ‘Aku ungumanga ungu-pulu pelemoma kamu wendo opili.’ nimbú okoro. 18Nane onondo paa sika nikiru: “Mulu matolo u pora naa nipili Pulu Yemonga ungu-manemanga ungu kanga-kolte kepe paa we mania naa pumbá. Ungu-manemanga pali ungu awili kangamanga pali kongonoma u wendo ombá.” nikiru. 19Akumunga, yombo sene kanu ungu-manemanga ungu-mane kanga se kepe pulua topa, yombo lupama mane sipale “Pulua tangi.” nimbá yombomo Pulu Yemo ye nokoli kingimu molopa nokolemo koleana yunga imbi paa mania molomba. Aku-na-kolo yombo sene kanu ungu-manema pilipa lipa sengena panjipa molopa, yombo lupama mane simba yombomo Pulu Yemo ye nokoli kingimu molopa nokolemo koleana yunga imbi paa olandopa molomba. 20Nane ono nimbu sikiru: “Parisima kinia Pulu Yemonga ungu-manemanga puluma pilku mane silimili yema kinia onone ulu sumbi nilima selemele ungumanga olandopa ono we-yombomane naa sengi liemu, Pulu Yemo ye nokoli kingimu molopa yombo nokolemo talapena sukundu ono paa naa pungu molonge.” nikiru. ˻Kanu yemane ungu-manema pilkuli selemele mele lupa. Pulu Yemone kanopa ulu sumbi nilima nimba kanolemo mele lupa.˼” ˻nirimu.˼
Mumindili Kololimunga Ulu Se
(5:21-26)
21“Koro-u ˻Mosisini˼ anda-kolepalimando ungu-mane se sirimumu ono pilielemele. Kanu ungu-manemo i-sipa:
“Ono yomboma toko naa kondangi.
Yombo topa kondomba yombomo kotena liku anjiku “Yu pundu topili.” ningu umbuna singí.”
nirimu kanumu. 22Aku-na-kolo kiniá nane ono kanu ungu-manemonga ungu-pulumu i nimbu simbú sekero: “Yombo sene yunga genu kinia mumindili kolomba yombomo ˻willisi-˼kotena liku anjiku “Yu pundu topili.” ningu umbuna singí.” nikiru. Yombo sene yunga genundu ungu-taka tondopa “Nu kamakoye?” nimbá yombomo poropinjili-kotena mengo pungu kote sendenge. Yombo sene yombo sendo “Nu paa kongi mele aroma tolimu!” nimbá yombomo sepe-koleana pumbá.
23“Aku siku senge yomboma umbuna menge kene nuni ‘Pulu Yemone na kanopa peanga piliepili.’ ningu yunga mélema sepena kaloli polona Pulu Yemo kongi molo kera popo toko kalko sinindu mengo ongole nu genane nu-kinia we mumindili se kolomba pilkuli ninimuni, 24nu Pulu Yemo kalko sini mélema Pulu Yemo popo toko kaloli polo pundukundu we liepili taltokole kelko anju pungu genando “Konopu seluna pupili sere lepo manda molambili.” ningu pungu ni-punguli, pe kelko ongo nu Pulu Yemo kaloni mélema ongo yu kalko sieni.
25“Nu kote sendemba sembá yombomo ‘Konopu seluna pupili manda molambili ungu se sambo.’ ninguli welea sani. Aku naa senu liemu nu kote sendemba yombomone nunga kote pilieli yemo molombana memba pumba simbanje. Pe kote pilieli yemone nu ka-ulka nokoli yemo lipa simba, yuni nu ka-ulkana lipa mundumba. 26Nane nundu paa sika nimbu sikirumu: “Nu ka-ulkana wendo onindu pundu paa pali tokole mindi wendo onimu. We manda wendo naa oni.” nikiru.” ˻nirimu.˼
Wa Ulu-Kirinale Sélimunga Ungu Se
(5:27-30)
27“˻U Mosisini˼ ungu-mane se sirimumu ono pilielemele.
Kanu ungu-manemo i-sipa:
‘Ambo ye pulima ye lupama kinia
wa ulu-kirinale naa seko,
ye ambo lilima ambo lupama kinia
wa ulu-kirinale naa sangi.’
nirimu kanumu. 28Aku-na-kolo kiniá nane ono ˻kanu ungu-manemonga ungu-pulumu˼ i nimbu sikiru: “Ye sene ambo se kanopale ‘Yu pea kopu sepo pelembolánje papu.’ konopu lemó akumu konopuna sukundu ambomo kinia kamu wa ulu-kirinale selemo.” nikiru.
29“Nunga mongotolone mélse kanokole konopuni ‘Liemboa.’ ningu pilku ulu-pulu-kiri se senu liemu mongotolo akuku eltani. Nunga mongotolo giliepili nu sepe-koleana liku mundungí kinia manda naa sembá kene kangimunga mélse wendo liku eltokole molko kondoni kinia papu. 30Nunga kitolone ulu-pulu-kiri se senu liemu aku kitolo kari leko eltani. Nunga kitolo giliepili nu sepe koleana liku mundungí kinia manda naa sembá kene kangimunga mélse wendo liku eltokole molko kondoni kinia papu.” ˻nirimu.˼
Yemane Ononga Amboma “Kamu Paa.” Nilimilimunga Ungu Se
(5:31-32)
31“˻U Mosisini˼ ungu-mane se sipa nimbale:
“Ye sene yunga ambomondo
‘Kamu pupili.’ nimba makorombando
ambomo “Kamu pu.” nimbá mele pepá se topa ambomo sipale
yundu “Kamu pu.” nimba aku sepili.”
nirimu kanumu. 32Aku-na-kolo nane kiniá ono nimbu sikiru: “Ye puli ambo se ye se kinia wa ulu-kirinale naa sepili yunga yemone yu makoropa “Kamu pu.” nimu liemu ‘Wa ulu-kirinale seli ambomo molopili.’ nimba aku selemo. “Pu.” nimba makorolemo ambomo pe ye sene yu limú kinia kanu yemo kepe wa ulu-kirinale selemóla.” nikiru.” ˻nirimu.˼
“Ono ‘Ungu Se ‘Sika Nikimulu.’ Ningu Kuru Mondangi.’ Ningu Mi Leko Pulu Yemo Imbi Naa Leangi.” Nirimu Ungu Se
(5:33-37)
33“Koro-u ˻Mosisini˼ anda-kolepalimando ungu-mane se pea sirimumu ono pilielemele. Kanu ungu-manemo i-sipa:
‘“Paa sika sembó.” ningu, ningu panjiku
mi lenge ungumu pulua naa tangi.
Awilimundu “Paa sika sembó.” ningu, ningu panjiku
mi lenge mele paa sika aku siku sangi.’
nirimu kanumu. 34Aku-na-kolo kiniá nane ono nimbu sikiru: “‘Paa sika nikimu.’ ningu piliangi.’ ningu méle awili senga imbi leko paa mi naa leangi. Mulu-koleamo kepe imbi leko mi naa leangi. Aku koleamo Pulu Yemo molopa mélema nokolemo koleamo kene aku naa sangi.” nikiru. 35Ma-koleamo kepe imbi leko mi naa leangila. Akumu Pulu Yemo yunga kimbu mundulimú polomo kanumu. Jerusalleme kepe imbi naala leangi. Akumu Ye Nokoli Kingi Paa Awilimunga kolea-awilimu kanumu. 36Nunga pengemo kepe. Akumu nuni penge-indi se ‘Kake sepili.’ molo ‘Pombora topili.’ ningu ulu se manda naa sení kene pengemo mangilku imbi leko mi naa leaa. 37Ulu se sika sení liemu sumbi siku “Sembó.” nieni. Naa sení liemu “Naa sembó.” nieni. Ulu-kirimanga pali ulu-pulumu pelemo ˻kuru˼muni ambololemo yombomane mindi ungu sulu seko niliku pungu mi lemele.” ˻nirimu.˼
Olio Seko Kinjingí Yomboma Pundu Naa Tamili Ungu Se
(5:38-42)
38“˻U Mosisini˼ ungu-mane se sirimumu ono pilielemele.
Kanu ungu-manemo i-sipa:
“Yombo sene yombo senga mongomo
topa akundumba kinia yunga mongomo toko akundangila.
Yombo sene yombo senga ungúmu
topa langondomba kinia yunga ungúmu toko langondangila.”
nirimu kanumu. 39Aku-na-kolo kiniá nane ono nimbu sikiru: “Ono sepa kinjimba yombomo anju unguri naa seko, ‘We sepa kinjepili.’ niengi. Yombo sene nunga kumbikere ekendonga laruwa tomba kinia topele toko ‘Ekendonga kamu laruwa topili.’ nieni.” nikiru. 40Yombo sene ‘Nunga wale-pakolimu liembo.’ nimba kote sendemba sembá yombomo nunga wale sulu peangamo kepe ‘pea we lipili.’ nieni. 41˻Romo ami˼ ye sene nu ambolopale “Nuni na liku tapondoko mako senga ˻nanga mélema mendani˼ pambili.” nimbá kinia mako senga pea yu we liku tapondoko mélema mendeko pani. 42“Mélse si.” nimba mawa sembá yombomo mawa sembá mélemo we sieni. “Kou se pundu anjiku si.” nimbá yombomo “Mólo.” naa nieni.” ˻nirimu.˼
Yesusini “Opa-Tou Yomboma Konopu Mondaa.” Nirimu Ungu Se
(5:43-48)
43“˻U Mosisini˼ ungu-mane se sirimumu ono pilielemele. Kanu ungu-manemo i-sipa:
“Opa-geramemo konopu mondoko,
opa-toumu kanoko kiri piliani.”
nirimu kanumu. 44Aku-na-kolo kiniá nane ono nimbu sikiru: “Onone ononga opa-touma konopu mondoko, ono seko kinjilimili yomboma ‘Pulu Yemone sepa kondopili.’ ningu Pulu Yemo ononga ningu mawa sendangi. 45Ononga ‘Lapa mulu-koleana molemomonga bolangoma molamili.’ ningu aku siku sangi.” nikiru. Yuni yombo kiri peangama molemelena ‘Ena topili.’ nilimú. Yombo ulu sumbi nilima selemele yomboma kepe yombo ulu sumbi nilima naa selemele yomboma kepe ononga pea pali ‘Lo topili.’ nilimúla.
46“Ono konopu mondolemele yomboma mindi konopu mondolemele kinia Pulu Yemone kanopa peanga pilimbaye? ˻Romo gapomano˼ kou-takisi limili yombo ˻kirima˼ kepe anju yando akula selemele kene ˻ono kanoko kiri pilielemele yomboma pea konopu mondonge kinia peanga˼. 47Onone ononga pulu lemó yombomando mindi “Ono manda molemeleye?” nilimili kinia we-yombomane selemele mele maniandopa, onone selemele mele olandopaye? Ultukundu yombomane aku sikula naa selemeleye? 48Akumunga ˻Mosisini sirimu ungu-manema we pilku naa seko,˼ ononga Lapa mulu-koleana molemo ye paa sumbi nílimu molemo mele ono aku siku yombo sumbi nilima molangi.” ˻nirimu.˼
Konopu Talo Peli Kolo Toli Yemane Ulu Peangama Selemele Mele Semolo Kinia Pulu Yemone Olio Méle Naa Kalomba Ungu Mare
(6:1-21)
Právě zvoleno:
Mateyu 5: ubuA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 1998, Wycliffe Bible Translators, Inc. All rights reserved.