Matiye 4
4
ꞌSɛ̰ngərɛ̰ na Jeju Kirisi
Mrk 1.12-13; Lug 4.1-13
1Be ɓa Njil Luba aw gə Jeju ndag lo gə, mba kar ꞌSɛ̰ngərɛ̰ ɗe n-ɛ. 2N-tɔl m-e ɓo kar dɔg sɔɔ gə cil dɔg sɔɔ, ɗaa ɓo ɔr-ɛ. 3Nje kərə dəwje le ɗe inga-a ɗaa pa ar-ɛ na: To gə ɓo ꞌto Ngon lə Luba nama, un ndu-i ar kɔr ərje gə nee le ꞌtəl mbə d-ar-i usa. 4Jeju ila kəne na: ꞌƊa mə mbede gə na:
Dəw a kaw kəm baa mba mbə ja baa ang ngaa, tarje tɔ̰y gə ce ta Luba gə ɓa dəw a kaw ne kəm baa. # 4.4
Ttt 8.3
5Cibi ꞌSɛ̰ngərɛ̰ ɔr-ɛ aw sə-a mə ɓe gə Jerujalɛm gə to ɓe gə to gə losang-ɛ, aw ila dɔ sam kəy gə lə Luba 6ngaɓa pa ar-ɛ na: To gə ɓo ꞌi to ngon lə Luba nama, ḭ taar ꞌce oso nangə, mba ꞌɗa mə mbede gə na:
Luba a kun ndu kar anjije lə-a mba-i;
Ɗaa d-a kunda ji-je ta-i nee,
Mba kar gɔl-i dar ər ang.
7Jeju pa ar-ɛ na: ꞌƊa mə mbede gə na: ꞋI a na Mbayɓe, Luba lə-i ang.#4.7 Ttt 6.16
8ꞌSɛ̰ngərɛ̰ ɔr-ɛ aw sə-a dɔ ər gə ndəw ya̰ ɓa tɔj-ɛ ɓeko̰je tɔ̰y gə dɔ nangə nee gə nemayje gə kəne, 9ɗaa pa ar-ɛ na: To gə ɓo ɔsə takəji nangə no-m gə, ꞌpolo-m nama m-a kar-i tɔ̰y ja. 10Jeju pa ar-ɛ na: ꞌSu ɔdə gə ɗangə! Mba ꞌɗa mə mbede gə na: ꞋI a polo Mbayɓe, Luba lə-i, ngaɓa ꞌne ja gə kar-ɛ baa ɓa a kun rɔ-i kar-ɛ.#4.10 Ttt 6.13
11Be ɓa ꞌSɛ̰ngərɛ̰ ɔdə ḭya̰ Jeju, ɗaa anjije ꞌɗe gə nekusa d-ar Jeju.
Jeju aw dɔ nangə gə Galile
Mrk 1.16-20; Lug 4.14-15; Ja̰ 1.35-43
12Jeju o tar kuwa gə d-uwa Ja̰ d-ila kəy kula gə, ɗaa ɔdə aw dɔ nangə gə Galile. 13Jeju ɔdə mə ɓe gə Najarɛd aw isi mə ɓe gə Kapɛrənom, to ər gə ta man bo gə ɗəw nim dɔ nangə gə Jabulo̰ gə Nɛpətali, 14be ɓa gə mba kar tar gə pajambərə Ejay pa le aw ne lo-e gə:
15 Dɔ nangə gə Jabulo̰ gə dɔ nangə gə Nɛpətali,
Go lo gə to mbɔr babo gə, tura man baa Jurədɛ̰ gə,
Dɔ nangə gə Galile gə dəwje gə ꞌgərə Luba ang d-isi kəne;
16 Dəwje gə d-isi dan cil ciməri gə,
A d-o lokarə gə boy,
Ngaɓa dəwje gə d-isi dɔ nangə gə Galile.
Gə d-isi cil ciməri mba kuy, # 4.16
Eja 8.23
Ɓa lo ar dɔ-je gə.
17Dɔ kar-ɛ gə Jeju ila mbərə ngaɓa pa na: ꞌTuruje kəji lə-si mba ɓeko̰ gə dara nay əw ang baa. 18Ndɔ kara be Jeju aw nja ta babo gə Galile, n-o ngan ko̰ naaje joo, Simo gə ɓar-ɛ Piyɛr, je gə ngon ko̰-ɛ Andəre gə d-aw d-ila bura man, mba ꞌto mbawje. 19Jeju pa ar-je na: Uwaje go-m, m-a turu-si gə njendo̰ dəwje. 20Lo-e gə nee ja, ꞌtusu buraje d-ḭya̰ ɗaa d-uwa go Jeju. 21Logə Jeju ɔdə nja gə kede njɛ̰ ɗaa, n-o ngan ko̰ naaje gə ɗangə joo ɓi, Jagə je gə Ja̰ ngan lə Jebede, d-aw gɔl kəm buraje gə bɔ-jeje mə to gə. 22Jeju ɓar-je ɗaa, lo-e gə nee ja, d-iya̰ to gə bɔ-jeje, d-uwa go Jeju.
23Jeju nja dɔ nangə gə Galile tɔ̰y, tɔji dəwje ne mə kəy nendoje gə lə Jiibije, ngaɓa ila mbərə Tar gə May ɔji dɔ ɓeko̰ nəm, aji njerɔko̰je ɓədə-ɓədə gə njeməndəje ɓədə-ɓədə horo dəw mə ɓeje nəm tɔ. 24No kula lə Jeju oso dɔ nangə gə Siiri ja tɔ̰y. ꞌƊe gə dəwje tɔ̰y gə rɔko̰je bula ula kəm-je ndoo gə naməje dang-dang, nje gə njilje gə kṵra̰y ula gərəng mə-je gə, njeməngərəje, gə nje gə dəbə rɔ-je uy ɗaa n-aji-je. 25Bula bo dəwje gə d-ḭ dɔ nangə gə Galile, gə Dekapɔl gə to ɓe mbo̰ gə dɔg, gə ɓe gə Jerujalɛm, gə dɔ nangə gə Jude nəm ngaɓa ɓeje gə tura baa Jurədɛ̰ gə ꞌndole go-e.
Právě zvoleno:
Matiye 4: lap
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2020, ATALTRAB. All rights reserved