मत्ती 9
9
प्रभू यीशू ऐ अदरंगो का रूगी चाँगा करा
(मरकुस 2:1-12; लूका 5:17-26)
1तबे प्रभू यीशू नाँव गाशी बऐठियों झील शे पाँडे पाईले ढबे हुटे, अरह् आप्णे नगर दे आऐ। 2अरह् दे:खो, कंई लोगे अदरंगो का ऐक दु:खिया लुह्थों दा थागियों तिन कैई आँणा। प्रभू यीशू ऐ तिनका बिश्वाष देखियों, तेसी अदरंगो के दुखिया खे बुलो, “हे बैटा हिम्मत थह्, तेरे पाप माँफ़ हुऐ।” 3ईन्दें गाशी ऋषी-मूसा खे भेटे गुऐ, अज्ञाँ-निय्म के जाँण्णों वाल़े लोगे आप्णें सासो दो सुचो, के “ऐ तअ पंणमिश्वर के बरा-बरी करह्।” 4प्रभू यीशू ऐ तिनके मंन की बात जाँणियों बुलो, “तुँऐं लोगे आप्णे मंन दा बुरा बिचार कैई करी लुवा? 5आछो का असो? ऐजो बुल्णों, के ‘तेरे पाप माँफ हुऐ’, के ऐजो बुल्णों, के ‘बिऊँज अरह् उडा-पुडा हाँड।’ 6ईन्देंखे के तुँऐं जाँणी पाँव, के आदमी के बैटे खे धर्ती गाशी पाप माँफ कर्णो का भे हंक-अधिकार असो।” तबे प्रभू यीशू ऐ अदरंगो के दुखिया खे बुलो, “बिऊँज, आप्णा बिछ़ाँन्द्रा थाग, अरह् आप्णें घरे ज़ा।” 7सेजा अदरंगो का दुखिया बींऊँजा अरह् आप्णें घरे हुटा। 8लोग ऐजो देखियों डरी गुऐ, अरह् पंणमिश्वर की बड़ियाऐं कर्दे लागे, जिन्ऐं आदमी खे ऐष्णा हंक-अधिकार देऐ थुवा।
संत्त-मत्ती बईदा
(मरकुस 2:13-17; लूका 5:27-32)
9तेथै शे आगू हुटियों प्रभू यीशू ऐ ऐक मत्ती नाँव का आदमी कंण-चूंगी लोणों वाल़ी चोऊकी गाशी बईठा अंदा दे:खा, अरह् तेस्खे बुलो, “मुँह पाछी आ।” से बींऊँजियों तिनू पाछी चाला।
10जबे प्रभू यीशू घर दे भोजन कर्दे बईठे, तअ बेजाऐ भहिते चूंगी लोणों वाल़े, अरह् पापी आऐयों, प्रभू यीशू अरह् तिनके चैले की गईलो, खाँणों खाँदे बईठे। 11ऐजो दे:खियों, यहूदी भाट-बाँम्णें तिनके चैले खे बुलो, “तुवाँरा गुरू चूंगी-कंण लोणों वाल़े अरह् पापी लोगो आरी खाँणों खे कैई खाँव?” 12ऐजो शुणियों प्रभू यीशू ऐ तिनखे बुलो, “जड़यारें आछे-भले खे ने, परह् बीमार खे जरूरी असो। 13ईन्देखे तुऐं ज़ाव अरह् ऐजी अनाँणें का मतल्व अर्थ सम्झी पाव; ‘हाँव बल़ी-कुरबाँणीं ने परह् दया-रंय्म चहाँऊ।’ किन्देखे के हाँव धर्मियों खे ने, परह् पापियों खे बईददा आऐ रूवा।”
बरत का सुवाल
(मरकुस 2:18-22; लूका 5:33-39)
14तबे नहाँण-नूहाँणों वाल़े संत्त-यूहन्ना के चैले ऐ प्रभू यीशू कैई आऐयों बुलो, “का बात असो, के आँमें अरह् यहूदी भाट-बाँम्ण तअ ऐत्रा बरत करह्, परह् तुवाँरें चैले बरत ने कर्दे?” 15तबे प्रभू यीशू ऐ बुलो, “कियो बराती दा, ज़ाव तोड़ी दुह्ला तिनकी गईलो हों, से दु:ख शोक करी सको? परह् सेजे देसो आँदे, के जबे दुह्ला तिन शा दुरका करा ज़ाला, तेसी बख्ते से भे बरत कर्ले।”
16“नुऐं कपड़े की टाली कुँऐं पुराँणें खोट्णों दी ने लादी, किन्देखे के सेजी नंऐं टाली पुराणे खोट्णों हजो खींच्दी, अरह् सेजो पुराणों खटियोंण हजो बेगेही चिंरिन्दों। 17अरह् लोग नुवाँ दाख्ह-अंगूरोंह् का रंस पुराँणी मंष्को दा ने भर्दें, किन्देखे के ऐष्णों कर्णो लई पुराँणी मंष्को फाटी ज़ादी, अरह् अंगूरोह्-दाख्ह् का रंस ऊदा ज़ादा, अरह् सेजी मंष्को नाँष हऐ ज़ाँदी; परह् नुवाँ अंगूरोह्-दाख्ह् का रंस नंई मंष्क दा भरी तबे से दुईनें बंची ज़ाव।”
प्रभू यीशू मरी अंदे धियाँन्टी जीऊँदी करह्, अरह् बीमार तिरोंऐ चाँगी करह्
(मरकुस 5:21-43; लूका 8:40-56)
18जबे तिनिऐं ऐजी बातो तिन कैई बुली ही लई थी, तअ तेथै ऐक यहूदी-चौत्रे का नंम्बरदार आया, अरह् प्रभू यीशू खे ढालो-बिन्ती करियों बुल्दा लागा, “हे प्रभू मेरी बेटी हाग्ड़ी मरी रंऐ, कृपा करियों तुऐं तियों गाशी आप्णा हाथ थंह्, तअ से जीऊँदी हऐ ज़ाली।” 19तबे प्रभू यीशू आप्णे चैले आरी तेसी पाछी हुटे। 20अरह् देखो, ऐक तिरंऐ जीयाँरें बारंह् साल शी ऊबी लह्ऊँ ढाल़े की बीमारी थी; से तिनू पाछ़ी आऐ, अरह् तिऐं प्रभू यीशू के च़ूग्गै का पाछ्ला पाला छुआ। 21किन्देखे के तियाँरें आप्णें सासो दो जाँणियों, के जे “हाँव ईनके च़ूग्गै का पाला भे छूह्बे, तबे भे हाँव चाँगी हऐ ज़ाह्ऊँबी।” 22प्रभू यीशू ऐ पाछू फीरियों तियों दे:खी अरह् बुलो, “बेटी हिम्मत थंह्; तेरे बिश्वाष ऐ ताँव चाँगी करी थऐ।”, तबे: सेजी तिरंई तेख्णी चाँगी हऐ गऐ। 23जबे प्रभू यीशू तेसी यहूदी चोंतरे के नंम्बरदार के घरे पईचे, तअ तेथै मुवाँकरी देणों वाल़े, अरह् पल़ाव बुल्णों वाल़े का रूल़ा पड़दे दे:खा। 24ईन्देंखे तिनिऐं तिन्खे अज्ञाँ दिती, “ईथे शे आगु ज़ाओ, किन्देंखे के ऐजी धियाँण्टी मरी ने रंई ऐ सुत्ती रंऐ” तबे सेजे लोग प्रभू यीशू के ठाटे पाड़दे लागे। 25जबे लोगो की भीड़ तेथै शी आगू हुटी, तअ प्रभू यीशू ऐ भिटे ज़ाऐयों तियों धियाँण्टी का हाथ थाँम्बंड़ा, अरह् से ऊबी बीऊँजी। 26अरह् तियों बातो की चर्चा तेसी बादे ईलाके दी फऐली गऐ।
प्रभू यीशी ऐं दू: शैड़े खे नंजरी का दाँण दिता
27जबे प्रभू यीशू तेथै शे आगू हुटे, तअ दो शैड़े तिनू पाछी लेलियाऐंयों चाले “हे दाऊद की अलाद, आँमों गाशी दया-रंय्म करह्।” 28जबे से घर दे पईचे, तअ सेजे शैड़े भे तेथै आऐं, अरह् प्रभू यीशू ऐ तिनखे बुलो, “कियों तुवाँरे बिश्वाष असो, के हाँव ऐजो करी सकू?” तिन्ऐ बुलो, “होर, प्रभू!” 29तबे प्रभू यीशू ऐ तिनकी आँ:खी छ़ूऐंयों बुलो, “तुवाँरे बिश्वाष के मुताबिक तुँओं आरी ऐष्णों ही हों।” 30अरह् तिनकी आँ:खी खुली गई। प्रभू यीशू ऐ तिनखे शुझीआरियों बुलो, “सकने-च़ौक्क्ष रूऐ, कोसी कैई ईयों बातो का किऐ पता ने लागो”। 31परह् तिन्ऐ तेथै शो नीक्ल़ियों बादे ईलाके दा तिनका ज़ष-कारा फईलाऐ दिता।
ऐक गूंगा चाँगा करा
32जबे प्रभू यीशू बाँईडे ज़ाँदे लागे थिऐ, तअ दे:खो, लोगे ऐक गूँगा जुण्जा दुष्ट-आत्त्मा का च़ूड़ा अंदा थिया तेसी तेथै तिन कैई आँणा; 33अरह् जबे तेस शी दुष्ट-आत्त्मा निकाल़ी पाऐ, तअ सेजा गूँगा बुलाँदा लागा। ईन्दें गाशी लोगो की भीड़ के तूरंबाँणच़ूटे, अरह् तिन्ऐं बुलो, “इस्राएली मुँझी आँमें ऐष्णों कद्दी हंदे ने दे:खी थई।” 34परह् यहूदी भाटे-बाँम्णें बुलो, “ऐ दुष्ट-आत्त्मा के मुखिया शैतान की मद्दतं शी दुष्ट-आत्त्मा गाड़ो।”
मालिक शी बिनती करह्
35प्रभू यीशू बादे नगर अरह् गाँव दे रिट्दे-फिर्दें रूऐ, अरह् यहूदी लोगो के चौत्रे दे शिक्क्षा देंदे लागे, अरह् पंणमिश्वर के राज्य की खुषख्बरी का प्रचार कर्दे, अरह् लोगों के साँत्त-भाँत्ती बीमारी अरह् कंमजूरी दुर्की कर्दे रूऐ।
36जबे प्रभू यीशू ऐ लोगो की भीड़ दे:खी, तअ तिनके लोगो गाशी तरष आया, किन्देखे के सेजे लोग तिनू भैड़ो के जिऐ थिऐ जिनका कुँऐं भैड़वाल़ा ने हों। 37तबे प्रभू यीशू ऐ आप्णें चैले खे बुलो, “पाच्चे अंदे खेच़ौ तअ बेजाऐ भहिते असो, परह् तिन्दें धियाड़ूवा-खेच़्यारे ठीके ही असो। 38ईन्देंखे खेच़ौ के मालिक शी बिनती-अरज करह्, के से आप्णें खेच़ौ लोणों खे हजो धियाड़ूवा-खेच़्यारे डेयाँल़ो।”
Právě zvoleno:
मत्ती 9: sri
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.
