Xa̱bo̱ Róma̱ 7
7
Mbá xkri̱da ga̱jma̱á numúú xa̱bo̱ tsí nida-mijná
1A̱ngui̱nꞌ, á tsíya̱álaꞌ rí i̱ndo̱ó máꞌ mbiꞌi rí xtáa ndaꞌya xa̱bo̱ nithán-ñájwíi̱n eꞌne xtángoo rá dxe̱ꞌ. (Numuu rí na̱tha̱nꞌlaꞌ ikháanꞌlaꞌ tsáanꞌ nu̱ne̱-nuwiinlaꞌ xtángoo.) 2Ma̱ña̱ꞌlaꞌ mbá xkri̱da: ga̱jma̱á majñu̱u̱ xtángoo nduꞌyáálóꞌ rí mbáa a̱ꞌgo̱ tsí ninújún, ma̱nindxu̱u̱ a̱ꞌgui̱i xa̱bo̱ awúun mbiꞌi rí xtáa ndaꞌya. Jamí xí nijáñuu máꞌ a̱jmbee̱ rá, nánguá máꞌ wéje̱ inuu̱ rí ma̱ꞌne-mbánuu̱ xtángoo rúꞌkhue̱n. 3Ikhaa jngó, xí awúun mbiꞌi rí xtáa ndaꞌya a̱jmbee̱ ndayáa̱ i̱mba̱a̱ꞌ xa̱biya̱, mi̱ꞌthán rí nabóo̱ ga̱jmáa̱ xa̱bo̱ tsí táyáa̱. Jamí xí nijáñuu máꞌ a̱jmbee̱ rá, nánguá gíꞌmaa̱ rí ma̱ꞌne-mbánuu̱ xtángoo rúꞌkhue̱n. Maske máꞌ ndayáa̱ i̱mba̱a̱ꞌ xa̱biya̱, ma̱xíꞌthán rí nabóo̱ ga̱jmáa̱ xa̱bo̱ tsí táyáa̱.
4Xkuaꞌnii máꞌ mangáanꞌlaꞌ a̱ngui̱nꞌ, nijáñalaꞌ ná inuu xtángoo ga̱jma̱á majñu̱u̱ rí nijáñuu Krísto̱, kajngó ma̱nindxa̱ꞌlaꞌ xa̱bi̱i i̱mba̱a̱ꞌ. Rí xúge̱ꞌ rá, ñajwanlaꞌ xa̱bi̱i Krísto̱, tsí ndiyáa mbiꞌyuu. Xkuaꞌnii kajngó ma̱grui̱gúu gamaku Ana̱ꞌlóꞌ ga̱jma̱á numuu rí máján nu̱ꞌne̱lóꞌ. 5Numuu rí nákhí nijuwalóꞌ xómá rí nandoo xuyalóꞌ, rí xtángoo nixkaxi̱i xuyalóꞌ rí ma̱ni̱gua̱ꞌlóꞌ mu̱ꞌne̱lóꞌ aꞌkhán, rí na̱ka̱ jaguáanꞌlóꞌ ná ma̱ja̱ñálóꞌ. 6Xómáꞌ xúge̱ꞌ rá, nijáñalóꞌ ná inuu xtángoo, jamí nánguá máꞌ gíꞌdoo ne̱ tsiakhe̱ rí maꞌthán-ñájwanlóꞌ, kajngó ma̱goo mu̱ꞌne̱-mba̱a̱lóꞌ Ana̱ꞌlóꞌ ga̱jma̱á majñu̱u̱ mbiꞌyalóꞌ rí nuxe̱ꞌ rí naxnálóꞌ Xu̱u̱ꞌ Ana̱ꞌlóꞌ, ra̱ꞌkhá ga̱jma̱á majñu̱u̱ xtángoo wayuu rí ninguanúu máꞌ tsu̱di̱í.
Xkujndu rí guáꞌdáálóꞌ ga̱jma̱á nindxu̱u̱ aꞌkhán
7Dí gúꞌthánlóꞌ xúꞌkhue̱n rá. Á mu̱ꞌthánlóꞌ rí aꞌkhán ñajuun xtángoo rá. ¡Na̱nguá mbá jayu! I̱ndo̱ó máꞌ numuu rí ikhúúnꞌ ma̱xáne̱-núwíinlo̱ꞌ aꞌkhán xí ra̱ꞌkhá ga̱jma̱á numuu xtángoo. Xúꞌkhue̱n máꞌ mangaa, ma̱xáni̱gu̱ꞌ máꞌ ma̱gúꞌdo̱ꞌ rí na̱nguá gúꞌdo̱ꞌ, xí ra̱ꞌkhá numuu rí xtángoo naꞌthán: «Ma̱xáni̱gua̱a̱ꞌ ma̱raꞌdáá rí na̱nguá xtaꞌdáá». 8Xómáꞌ aꞌkhán ndiyá ne̱ tsiakhe̱ rí ríga̱ xtángoo, a̱ꞌkhue̱n nijmuu ne̱ xtángoo rí maxkaxi̱i ne̱ a̱kui̱nꞌ kajngó ma̱ni̱gu̱ꞌ ma̱gúꞌdo̱ꞌ mbá xúgíí inii rí ríga̱ ná numbaa. Numuu rí nda̱a̱ máꞌ ski̱yu̱u̱ꞌ rí aꞌkhán ído̱ rí nda̱a̱ xtángoo. 9Rí nákhí wajyúú, nákhí rí xóó nda̱a̱ xtángoo, ikhúúnꞌ tsímáá xtáálo̱ꞌ. I̱ndo̱ó máꞌ numuu ído̱ rí ni̱ꞌkha̱ xtángoo rá, a̱ꞌkhue̱n ni̱gi̱ꞌdu̱u̱n rí na̱wa̱ꞌa̱ a̱kui̱nꞌ ma̱ne̱ aꞌkhán, jamí ikhúúnꞌ nijáñuꞌ ná inuu Ana̱ꞌlóꞌ. 10A̱ꞌkhue̱n ndi̱yo̱o̱ rí ikhaa xtángoo rí jaꞌyoo ma̱ꞌne rí mba̱ya̱, ikhaa ne̱ neꞌne rí ma̱ja̱ñúꞌ. 11Numuu rí aꞌkhán ndiyá ne̱ tsiakhe̱ ga̱jma̱á xtángoo, a̱ꞌkhue̱n neꞌne-nduwúún ne̱. Jamí xúꞌkhue̱n máꞌ ga̱jma̱á majñu̱u̱ xtángoo neꞌne ne̱ rí ma̱ja̱ñúꞌ.
12Ikhaa jngó, rí xtángoo jaꞌwu ne̱, jamí mbámbá ajngóo ne̱ jaꞌwu mangaa, phú jmbu ne̱ jamí máján ne̱. 13Á ikhaa rí máján neꞌne rí ma̱ja̱ñúꞌ xúꞌkhue̱n rá. ¡Na̱nguá mbá jayu! Rí aꞌkhán neꞌne rí ma̱ja̱ñúꞌ ga̱jma̱á majñu̱u̱ mbá rí máján kajngó ma̱kujma xáne phú jaꞌnii rí aꞌkhán. Ikhaa jngó, ga̱jma̱á majñu̱u̱ xtángoo nakujma rí phú xkawe̱ꞌ rí aꞌkhán.
14Numuu nduꞌyáálóꞌ máꞌ rí ná inuu Ana̱ꞌlóꞌ ni̱ꞌkha̱ rí xtángoo. Xómáꞌ ikhúúnꞌ rá, xa̱bo̱ numbaa jayu ñajunꞌ, jamí watangu̱ju̱ún ná ñawúun aꞌkhán. 15Tsífroꞌo̱ꞌ rí na̱ne̱lo̱ꞌ, numuu rí tsíne̱lo̱ꞌ rí nandoꞌ. Maphú ikhaa rí tsíyoꞌ gáne̱lo̱ꞌ, ikhaa e̱ne̱lo̱ꞌ. 16Jamí xí ikhaa rí tsíyoꞌ gáne̱lo̱ꞌ, ikhaa e̱ne̱lo̱ꞌ rá, rúꞌkhue̱n iꞌthán rí nda̱yo̱o̱ máꞌ rí máján rí xtángoo. 17Ikhaa jngó, ra̱ꞌkhá ikhúúnꞌ ñajunꞌ tsí naꞌne rí xkawe̱ꞌ na̱ne̱lo̱ꞌ, rí aꞌkhán rí kra̱ꞌa ná xuyuꞌ naꞌne ne̱. 18Jamí ikhúúnꞌ nda̱yo̱o̱ rí ga̱jma̱á nindxu̱ꞌ ikhúúnꞌ, rí xa̱bo̱ numbaa ñajunꞌ, nda̱a̱ rí máján. Numuu rí naꞌne máꞌ a̱kui̱nꞌ rí ma̱ne̱lo̱ꞌ rí máján, i̱ndo̱ó máꞌ numuu rí tsíyoo rí ma̱ne̱lo̱ꞌ ne̱. 19Numuu rí tsíne̱lo̱ꞌ rí máján rí naꞌne a̱kui̱nꞌ rí ma̱ne̱lo̱ꞌ, rí i̱ndo̱ó máꞌ na̱ne̱lo̱ꞌ rí xkawe̱ꞌ rí tsíyoꞌ gáne̱lo̱ꞌ. 20Ikhaa jngó, xí na̱ne̱lo̱ꞌ rí tsíyoꞌ gáne̱lo̱ꞌ, ra̱ꞌkhá ikhúúnꞌ e̱ne̱lo̱ꞌ ne̱, rí aꞌkhán rí kra̱ꞌa ná xuyuꞌ naꞌne ne̱.
21Ikhaa jngó, ído̱ rí nandoꞌ gáne̱lo̱ꞌ rí máján, na̱xkamaa ríge̱ꞌ: i̱ndo̱ó máꞌ rí xkawe̱ꞌ ríga̱ ná xuyuꞌ jamí tsíyoo gáni̱ꞌñúu-ra̱ne̱ rí xkawe̱ꞌ. 22Ná awúun a̱kui̱nꞌ awúún, phú naꞌne a̱kui̱nꞌ rí ma̱ne̱-mbánuu xtángawoo Ana̱ꞌlóꞌ. 23Xómáꞌ ná awúun xuyuꞌ rá, ríga̱ i̱mba̱ xtángoo rí tsíyoo gániñiꞌ ma̱ne̱ rí nda̱yo̱o̱ máꞌ rí máján ma̱ne̱, jamí xa̱ꞌ gatuwúún ne̱ asndo xó rí gíꞌdúún ne̱ ná géjwa̱nꞌ jaꞌnii: ikhaa rúꞌkhue̱n ñajuun xtángoo drígo̱o̱ aꞌkhán rí ríga̱ ná xuyuꞌ.
24¡Phú mingínúú mi̱ndaꞌkho! Tsáa gáꞌne-jríñúu ná ñawúun xuwi aꞌkhán ríge̱ꞌ rí naꞌne rí ma̱ja̱ñúꞌ róꞌ. 25¡I̱ndo̱ó máꞌ numuu rí núma̱aꞌ la Ana̱ꞌlóꞌ ga̱jma̱á majñu̱u̱ Tátiálóꞌ Jesukrísto̱!
Ikhaa jngó, jmínu̱úꞌ máꞌ ikhúúnꞌ ga̱jma̱á ju̱mu̱ꞌ na̱ne̱-mbánuulo̱ꞌ xtángawoo Ana̱ꞌlóꞌ, xómáꞌ rí xa̱bo̱ numbaa ñajunꞌ rá, na̱ne̱-mbánuulo̱ꞌ xtángawoo aꞌkhán.
Právě zvoleno:
Xa̱bo̱ Róma̱ 7: tcf
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 SIL Global. Creative commons license CC BY-SA.