Text: &copy; 2015 Wycliffe Bible Translators, Inc. Audio: ℗ 2013 Hosanna

Tyap - 2015 Edition (NT) Drama

Tyap - 2015 Edition (NT) Non Drama

Nang Yesu nchyok a̱ neet tazwa ntsok ka a̱ni, susot á̱niet ma̱ a̱di̱di̱t si̱ khwi ngguu. A̱jawa a̱tyu gbap a̱ghyang si̱ kin mbai, a̱ ba̱ kpaat a̱khwukhwut a̱zaghyi Yesu, a̱ si̱ nyia̱, “A̱tyoli, ma̱sa̱kut, ka̱ a shim, a maai a choot nung n tyia̱ za̱za̱rak.” Yesu si̱ neap bwak, a̱ si̱ byiam guu, a̱ si̱ nyia̱, “N shim, da̱ choot!” Mi̱ di̱ yong a̱hwa, gbap hu si̱ kin choot. Vam hu si̱ tyia̱ za̱za̱rak. Yesu si̱ nyia̱ ma̱ng a̱nggu, “Yok hyia̱ ma̱ng a̱yin bah. Da̱ a̱kwonu a̱kya, nat a si̱ tyai a̱pyia̱ ang da̱ a̱vwuo pris gu ka mak ang. A bu nwuak za̱nang ji ma̱nang á̱ ntak mi̱ doka Musa ji a̱ni, da̱nian konyan a̱ ka lyen kpa̱sai nang a ntyia̱ za̱za̱rak.”


A̱wot nang Yesu nnwuo a̱keang Ka̱fanahum a̱ni, a̱kwak a̱son á̱niet nzwang A̱romawa si̱ bai da̱ a̱vwuo nggu. A̱ si̱ naai nggu nyia̱, “A̱tyoli, a̱khwo nung wu nyia̱ ma̱ng zwan! A̱ myian a̱mali, vam hu khwu, a̱ swuo a̱bung ba̱t!”
Yesu si̱ nyia̱ ma̱ng a̱nggu, “N chobai ma̱nini, n choot guu.”
A̱kwak a̱son a̱wa si̱ nyia̱, “A̱tyoli, n maai a sak tak ang a̱gbang nung bah. Ka̱ a kaat mi̱ swang a̱lyiat, a si̱ kam zwan ji da̱ a̱vwuo ka nang a nshya̱ ma̱nini a̱ni, a̱khwo nung wu na choot.
“Mat nung meang, n byia̱ a̱yaakwak a̱son ba̱ shya̱ a̱zanson nung a̱ni, n si̱ ma shya̱ a̱zanson á̱niet nzwang á̱ghyang. Ki̱ n kam nyia̱, ‘Nyi nat a̱ja̱u,’ si̱ ba̱ nat. Á̱ghyang á̱niet meang, ka̱ n kam nyia̱, ‘Nyi bai a̱ji,’ si̱ ba̱ bai. A̱wot ka̱ n hyia̱ ma̱ng á̱khwo nung ba, ‘Nyi nyia̱ si̱ huni,’ si̱ ba̱ nyia̱ nhu.”
Nang Yesu nfa̱k a̱nia a̱ni, a̱ si̱ fa̱k a̱ga̱de. Huhwa gu nyia̱ ma̱ng á̱niet ba̱ khwi nggu a̱ni, “N tak nyin a̱tsak a̱lyiat, n ka̱n di tangka̱i a̱gba̱ndang nwuak fwuo huni da̱ nung mami á̱niet Isi̱rela bah! A̱wot n shei nyin, nnwap ma̱ a̱di̱di̱t na̱ nwai yet A̱yahudawa a̱ni, na ghwut koji mi̱ swanta hu, neet a̱tyin ma̱ng jenshyung, ba̱ ba̱ swan mi̱ Tyok Ma A̱gwaza tswazwa hu, ba̱ ya tsa á̱ nswuo ma̱ a̱yet dundung ma̱ng Ibrahim, Ishaku, ma̱ng Yakubu. Ma̱ng a̱nia, á̱niet Isi̱rela ma̱ a̱di̱di̱t, ba̱ wa yet á̱niet nang á̱ jhyi tyok hu á̱ sak mba ndyo a̱ni, á̱ na kwok ba á̱ tang mami a̱gbi̱ri̱ng ndyin. A̱ja wa ba̱ na ntwei á̱ tsa nywai a̱nyunyung.”
Yesu si̱ nyia̱ ma̱ng a̱kwak a̱son á̱niet nzwang A̱romawa wu, “Nkat a̱mali. Mat nang a nnwuak a̱chuchuk da̱ a̱lyiat nung na a̱ni, a̱khwo ang wu choot.” A̱wot fi̱ng a̱khwo hu si̱ choot ma̱ cha̱chaat njen a̱wa.


Nang Yesu nnwuo a̱mali Bitut ka a̱ni, a̱ si̱ shya̱ nang a̱kwang Bitut wu myian da̱ a̱gbaat, nang nzwan a̱sok a̱za ja nyia̱ nggu. A̱wot nang Yesu mbyiam gu di̱ mbwak a̱ni, a̱ si̱ kin choot. A̱ si̱ doot, a̱ si̱ wan Yesu kyayak.
Jenshyung a̱tuk a̱kya, á̱ si̱ bai ma̱ng Yesu á̱niet ma̱ a̱di̱di̱t ba̱ byia̱ á̱ka̱tuk ntswá a̱ni. A̱ si̱ kaat swang a̱lyiat ma̱ a̱da̱dei, á̱ka̱tuk ntswá ba si̱ ghwut ma̱ a̱mba, a̱ si̱ choot a̱mgba̱m á̱niet nzwán ba. Si̱ huni ku bai da̱ a̱nu ka ma̱ cha̱chaat ma̱ng shei á̱zanson nang Ishaya a̱ta̱m a̱kwonu A̱gwaza ku shei gbangbang a̱ni, nyia̱,
“A̱ choot zi̱t nwai fa̱k nyinyang nzi̱t hu.
A̱ si̱ turung nzi̱t kuzang tangka̱i nzwan.”


Nang Yesu ndi susot á̱kpa á̱niet ji ntyong gu á̱ keang a̱ni, a̱ si̱ nyia̱ ma̱ng mman nta̱m nggu na ba̱ wak á̱ byia̱k á̱ nat a̱ma̱nyi a̱gba̱ndang jok ka. A̱jawa a̱tyo nyiung mami á̱niet tyiet doka Musa si̱ nyia̱ ma̱ng Yesu, “A̱tyu tyiet, n na khwi ang nat kuzang a̱vwuo nang a naat a̱ni.”
Yesu si̱ nyia̱ ma̱ng a̱nggu a̱ni, “A̱ka̱kyong swuat ma̱ a̱bubwong, a̱ka̱man si̱ byia̱ a̱ka̱le. A̱wot nung, Nggwon A̱tyubishyi, mbyia̱ a̱vwuo kwai bah.”
A̱ghyang a̱niet mami mman ta̱m Yesu na si̱ nyia̱, “A̱tyoli, ka̱ a shim, yok n ya mbwuok nat a̱mali, n si̱ nchok a̱li a̱tyia̱ nung ka, n fwuong jen a̱khwu nggu ji, n sii mbwuok n khwi ang.”
Yesu si̱ nwuak gu shim nyia̱, “Khwi nung! Yok á̱niet ba̱ nwai khwi A̱gwaza a̱ni, ba̱ niat nkwom mba na.”


Nang Yesu nnwuo a̱ swan mi̱ kukwon a̱wak hu ma̱ng mman ta̱m nggu na a̱ni, nang ba̱ nshya̱ da̱ wak ba̱ byia̱k a̱gba̱ndang jok Ga̱lili wu a̱ni; ma̱nang but á̱ghyi a̱ni, a̱ka̱tuk ngwun si̱ kin hyap mi̱ chet ma̱ a̱gba̱ndang jok wu, nang ywan a̱sa̱khwot hu chi̱p á̱ nwuai mi̱ kukwon a̱wak hu. A̱wot nang Yesu nshya̱ di̱ khat nda, mman ta̱m na si̱ nat á̱ si̱si̱ shyip gu, á̱ yei nggu mi̱ chet nyia̱, “A̱tyoli, san zi̱t! Zi̱ na kwi!”
Yesu si̱ nyia̱ ma̱ng a̱mba, “Ka̱a̱t! Nyin á̱niet nyi nwuak fwuo da̱ nung ma̱ a̱da̱dei a̱ni! Yihwa mbyia̱ nyi nfwuong a̱wun?” Yesu si̱ doot a̱ yong a̱ si̱ kam wun hu ma̱ng ywan a̱sa̱khwot hu. Kuzang kyang si̱ tyia̱ lyot!
A̱wot mman ta̱m nggu na si̱ fa̱k a̱ga̱de! Ba̱ si̱ lyip á̱ghyang ba nyia̱, “Zang tangka̱i a̱gba̱ndang tyok hwa nang a̱tyu wuni byia̱, nang wun ma̱ng ywan a̱sa̱khwot mun á̱ nfwuong guu?”


Nang Yesu ma̱ng mman ta̱m nggu na mbyia̱k a̱gba̱ndang jok Ga̱lili wu a̱ni, ba̱ si̱ tat fam a̱byin A̱ga̱da̱rawa. A̱ja wa á̱niet a̱feang ba̱ byia̱ á̱ka̱tuk ntswá a̱ni si̱ kin tyia̱ gba̱ng ma̱ng a̱nggu. Ba̱ ku swuat mi̱ kuu da̱ a̱vwuo nang á̱ nniat nkwom á̱niet a̱ni. Ba̱ si̱ yet á̱niet a̱ka̱kpa̱t bya ba̱t. A̱wot a̱yin si̱ mi̱n kai a̱ja bah, mat jhyiip mba ji.
Ba̱ si̱ kin ta̱bat yei Yesu mi̱ chet nyia̱, “Nwan nggwon A̱gwaza, yihwa yet a̱ka̱ta ang ka ma̱ng a̱nzi̱t? A bai a tyia̱ nzi̱t swuo a̱bung neet nang jen A̱gwaza sak a̱ni ka̱n nyia̱ baa?”
Nang a̱gba̱ndang a̱sorong a̱yaakusuru shya̱ ti̱taa á̱ ya a̱ja, á̱ka̱tuk ntswá ba, ba̱ shya̱ ma̱ á̱niet a̱bya a̱ni, si̱ naai Yesu nyia̱, “Ka̱ a na vwuong zi̱t zi̱ ghwut, yok zi̱ nwuo ma̱ a̱sorong a̱yaakusuru keniaau!”
Yesu si̱ nyia̱ ma̱ng a̱mba, “Nyi nat!” Á̱ka̱tuk ntswá ba si̱ kin ghwut, ba̱ si̱si̱ nwuai ma̱ a̱yaakusuru ba. A̱wot a̱mgba̱m a̱yaakusuru ba si̱ kan kpa̱k á̱ neet da̱ a̱gut wu, á̱ ba̱ kwa̱i mi̱ a̱gba̱ndang jok wu, ba̱ si̱ kwi.
Á̱niet chok a̱yaakusuru ba, si̱ tyong á̱ si̱ nwuo ma̱ a̱keang ka̱ shya̱ kpa̱mkpaan a̱ja a̱ni. Ba̱ si̱ kwok mi̱ konyan kyang ku shya̱ á̱niet ba̱ byia̱ á̱ka̱tuk ntswá ba a̱ni. A̱jawa, a̱mgba̱m á̱niet ma̱ a̱keang ba si̱ ghwut á̱ nat ba̱ si̱si̱ shya̱ Yesu. A̱wot ba̱ si̱ naai ngguu, gu ghwon fam a̱byin mba hu.

Lyt til Matyu 8