If you have would like a copy of this version please contact info@davaraudiobibles.org

Tumbuka Bible

Sono chiphikiro cha Chingwa chambula chirungo icho chikachemekanga kuti Paska chikaneng'enera. Ŵasofi ŵarara na ŵamanyi-marango ŵakapenjanga nthowa umo ŵangakomera Yesu, chifukwa ŵakopanga ŵanthu.


Ntheura Satana wakanjira mwa Yudasi uyo wakachemeka Isikariyoti yumoza wa ŵasambiri 12. Ndipo wakawukapo na kuya kadumbirana na ŵasofi ŵarara na ŵarongozgi ŵa Nyumba ya Chiuta, ndipo wakapangana nawo umo wangamuperekera Yesu kwa iwo. Iwo ŵakasekerera, ndipo ŵakapangana kumupa ndarama. Yudasi wakazomera ndipo wakamba kupenja nyengo yiweme kuti wamupereke Yesu kwa iwo kwambula kuti ŵanthu ŵamanye.


Zuŵa la chiphikiro cha Chingwa chambula chirungo likiza, leneilo mwana-mberere wakuchitira Paska wakakomekanga kuŵa sembe. Ntheura Yesu wakatuma Petrosi na Yohane wakati, “Rutani mukatinozgere chakurya cha Paska mwakuti tizakarye.”
Kweni iwo ŵakamufumba ŵakati, “Kasi mukukhumba kuti tikanozgere nkhu, Paska?”
Yesu wakazgora wakati, “Para mwaya kanjira waka mu msumba, mwamkukumana na munthu uyo wayegha chiŵiya cha maji. Mukamurondezge kuya kafika mu nyumba iyo wamkunjiramo. Mukamuphalire mwene-nyumba mukati, ‘Musambizgi wakuti, kasi chipinda cha ŵalendo chili nkhu, mwenemumo ndingaryera Paska na ŵasambiri ŵane?’ Iyo wamkumurongorani chipinda chikuru cha pachanya chakunozgeka makora. Mwenemura ndimo mukatinozgere chakurya cha Paska.”
Ŵasambiri ŵara ŵakaruta, ŵakaya kavisanga vyose nga ndi umo wakaŵaphalirira, ndipo ŵakanozga chakurya cha Paska.


Para ora likati liza, Yesu wakakhara pa kurya pamoza na ŵakutumika. Wakati kwa iwo, “Ndakhumbisiska chomene kuti ndirye chakurya ichi cha Paska pamoza na imwe pambere ndindasuzgike. Pakuti nkhumuphalirani kuti, ndamkuryaso Paska chara, mpaka pa nyengo iyo chamkufiskira mu Ufumu wa Chiuta.”
Ndipo Yesu wakatora nkhombo, wakati wawonga, wakati, “Torani, ndipo mugaŵane. Chifukwa nkhumuphalirani kuti, kufuma sono na kunthazi kuti ndimwengeso vinyo lakufuma mu mpheska chara, kufikira pa nyengo iyo Ufumu wa Chiuta wamkwizira.”
Ndipo Yesu wakatora chingwa, wakawonga Chiuta, wakamenya ndipo wakaŵapa wakati, “Ili ndi thupi lane, ilo likuperekekera imwe. Chitani ichi kuti mundikumbuke.” Ntheura pera ŵakati ŵarya chakurya cha mise, Yesu wakatora nkhombo wakati, “Nkhombo iyi ndi phangano liphya mu ndopa zane izo zikuthikira imwe.
“Kweni uyo wakundendera mphiska wakurya nane pamoza. Pakuti nadi Mwana wa Munthu wakuruta nga ndi umo kuli kunozgekera, kweni soka kwa munthu uyo wakumwendera mphiska.”
Ndipo ŵakamba kufumbana kuti, “Kasi ndi nju wa iwo uyo wangachita chinthu cha ntheura.”

Mphindano yikawukaso mukati mu ŵasambiri ŵakhe yakuti ndi nju wa iwo uyo wakupimika kuŵa mukuru. Yesu wakati kwa iwo, Ŵakaronga ŵa ŵamitundu ŵakurongora mazaza gha ufumu pa ŵanthu ŵawo, ndipo awo ŵakuwusa ŵakuchemeka wovwiri ŵawo. Kweni imwe mukwenera kuŵa ntheura chara. Mu malo mwakhe uyo ndi mukuru kwakuruska mukati mwinu, ndiyo waŵenge nga ndi muchoko wa wose, ndipo uyo ndi murongozgi waŵenge nga ndi uyo wakuteŵeta. Kasi mukuru ndi nju, uyo wakurya panji uyo wakuteŵeta? Asi ndi uyo wakurya? Kweni ine ndili mukati mwinu nga ndi uyo wakuteŵetera.
“Imwe ndimwe mwaŵa na ine mu viyezgo vyane vyose. Ntheura nkhumupani Ufumu nga ndi umo Ŵadada ŵakandipira ine. Mwakuti murye na kumwa pamoza nane mu Ufumu wane, na kukhara pa vizumbe vyakweruzga mafuko gha Israele 12.”


Ndipo Fumu yikati, “Simoni, Simoni, tegherezga! Satana wali kupoka chizomerezgo kuti wamusefani mose nga ndi tirigu. Kweni ndakurombera iwe Simoni kuti chipulikano chako chireke kutondeka. Ndipo para wang'anamukaso, wiza kaŵachinthiskanga ŵanyako.”
Kweni wakazgora wakati, “Fumu, ndili muchanya kale kuruta namwe nanga nkhu gadi, na ku nyifwa wuwo.”
Yesu wakati, “Nkhukuphalira Petrosi kuti pambere tambala wandalire usiku uno uti undikane katatu kuti ukundimanya chara.”

Ntheura Yesu wakafumba wakati, “Para nkhamutumani kwambula chibeta, thumba la pa ulendo, panji skapato, kasi mukasoŵerwa kanthu?”
Ŵakazgora ŵakati, “Chara.”
Wakati kwa iwo, “Kweni sono uyo wali na chibeta cha ndarama wayeghe, nanga ndi thumba la pa ulendo. Ndipo uyo walije lupanga waguliske chakuvwara chakhe, na kugula lupanga. Chifukwa nkhumuphalirani kuti malembo agha ghakwenera kufiskikira mwa ine, ghakuti, ‘Wakapendekera pamoza na ŵakwananga.’ Pakuti icho chili kulembeka na za ine, chikwenera kufiskika.”
Ŵasambiri ŵakazgora ŵakati, “Wonani Fumu, tili nagho malupanga ghaŵiri pano.”
Yesu wakati, “Mbwenu.”


Yesu wakafuma mu msumba na kuruta ku Phiri la maOlive nga ndi umo kakaŵira kaluso kakhe. Ndipo ŵasambiri ŵakamurondezga. Wakati wafika pa malo ghara, wakaŵaphalira ŵasambiri wakati, “Rombaninge kuti mureke kunjira mu kuyezgeka.”
Ndipo iyomwene wakapatukako kwa ŵasambiri ŵakhe kwakuyana na kamtunda ako libwe lingenda para waponya. Ntheura wakajikama pasi na kuromba. Wakati, “Ŵadada, usange mukukhumba, muwuskeko nkhombo iyi ya visuzgo kwa ine. Ndipouli, kuti muchite nga ndi umo ine nkhukhumbira chara, kweni khumbo linu ndilo lifiskike.” [Penepapo mungelo wakufuma kuchanya wakamuwonekera, na kumukhwimiska. Yesu pakuŵa mu urwirwi ukuru, wakafwirirapo mu kuromba ndipo mavuchi ghakhe ghakaŵa nga manthonyezi gha ndopa agho ghakanthonyanga pasi.]
Para wakati wawuka apo wakarombanga, wakiza ku ŵasambiri ŵakhe, wakasanga ŵagona chifukwa cha chitima. Wakaŵafumba wakati, “Chifukwa uli mukugona? Wukani murombenge, mwakuti mureke kunjira mu kuyezgeka.”


Apo wakaŵa wachali kuyowoya, mzinda wa ŵanthu ukiza uwo ukarongozgeka na yumoza wa ŵa 12, zina lakhe Yudasi. Iyo wakasenderera kufupi na Yesu kuti wamufyofyonthe. Kweni Yesu wakamufumba wakati, “Yudasi, kasi ukumupereka Mwana wa Munthu na mufyofyontho?”
Para ŵasambiri awo ŵakaŵa nayo pafupi ŵakawona icho chiŵengeko ŵakati, “Fumu, kasi tiŵahete na lupanga?” Ndipo yumoza wa iwo wakaheta muteŵeti wa Musofi Mukuru mpaka wakawunguzura khutu la maryero.
Kweni Yesu wakazgora wakati, “Ichi chingachitikangaso chara!” Ndipo wakakhwaska khutu la muteŵeti na kumuchizga.
Penepapo Yesu wakaŵaphalira ŵasofi ŵarara, ŵarongozgi ŵa Nyumba ya Chiuta, ndiposo na ŵarara awo ŵakiza kwiza kamukora wakati, “Kasi mwiza na malupanga na zinthonga nga nkhwa munkhungu? Zuŵa na zuŵa nkhaŵa namwe mu Nyumba ya Chiuta kuti mukiza na kundikora chara. Kweni iyi ndi nyengo yinu, ndipo na kuwusa kwa nkhongono za mu mdima.”


Ŵanthu ŵara ŵakati ŵamukora Yesu, ŵakaruta nayo ku nyumba ya Musofi Mukuru. Ndipo Petrosi wakaŵarondezganga pataliko. Iwo ŵakapemba moto mukati mu chipanga ndipo Petrosi nayo wakiza kakhara pasi pamoza na ŵanthu awo ŵakawothanga moto. Msungwana yunji wa nchito, wakati wakamuwona Petrosi apo wakakhara mu ungweru wa moto, wamudodoliska ndipo wakati, “Munthu uyu nayo wanguŵa pamoza na Yesu.”
Petrosi wakakana wakati, “Iwe wa mwanakazi ine kuti nkhumumanya chara.”
Pakati pajumphapo kanyengo kachoko waka, munthu munyakhe wakamuwona ndipo wakati, “Iwe nawe uli yumoza wa iwo.”
Kweni Petrosi wakakana wakati, “Iwe dada, ine kuti ndine chara.”
Pakati pajumphapo panji ora limoza, munthu munyakhe wakakoserezga chomene wakayowoya wakati, “Nadi uyu nayoso wakaŵa pamoza na Yesu, chifukwa ndi mu Galileya.”
Kweni Petrosi wakakana wakati, “Iwe dada, ine kuti nkhuchimanya chara icho ukuyowoya.”
Apo iyo wakaŵa wachali kuyowoya, tambala wakalira. Fumu yikang'anamuka na kulaŵiska Petrosi. Ndipo Petrosi wakakumbuka mazgu agho Fumu yikayowoya kwa iyo kuti, “Pambere tambala wandalire, muhanya uno wamkundikana katatu.” Petrosi wakafumira kuwaro ndipo wakalira chomene.


Ŵanthu awo ŵakasungiliranga Yesu ŵakamugoska na kumutimba. Ŵakamukaka ku maso kuti wareke kuwona na kumufumba kuti, “Loska! Ndi njani uyo wakutimba?” Ndipo ŵakamuyowoyera vinandi vyakumulengeska.


Kukati kwacha, mphara ya ŵarara ŵa ŵaYuda yikawungana pamoza na ŵasofi ŵarara na ŵamanyi-marango. Ndipo ŵakamutorera Yesu ku mphara yawo. Ŵakamufumba ŵakati, “Utiphalire, kasi ndiwe Mesiya?”
Yesu wakaŵazgora wakati, “Nanga ndingamuphalirani, imwe kuti mungapulikana chara, ndiposo usange ndingamufumbani fumbo, napo muti mundizgorenge chara. Kweni kufuma sono na kunthazi, Mwana wa Munthu wamkukhara ku woko la maryero la Chiuta, Mwenenkhongono zose.”
Ndipo wose ŵakati, “Kasi ndiko kuti ndiwe Mwana wa Chiuta?”
Yesu wakaŵazgora wakati, “Ndimwe mwayowoya kuti ndine ine.”
Ntheura ŵakati, “Chifukwa uli tikupenja ukaboni unyakhe? Tajipulikira tekha ivyo wayowoya kufuma mu mlomo wakhe.”

Lyt til Luka 22