Basketo - 2014 BSE (NT) Drama

Basketo - 2014 BSE (NT) Non Drama

ዎጊ̇ ጋላስ ጌ̈ሽ ማጫ̇ን ፌ ጊ̈ጊስኖን ሺቲ̇ን ኤካ̇ሪ ቢርት ሳ̈ዚን ዎንታ̇ ዉራካ̇ይዶ̈ን ዱ̈ፊን ጋርታ̇ ሉኪ̇ዴ። ሹቺ̇ንዳሬ ዱ̈ፊን ካሪን ጋልዳፖ̇ ፊራር ፋኪ̇ንዶ̈ን ቤቂ̇ዴ። ኢንታ̇ር ዱ̈ፊን ጋርታ̇ ጌ̈ታ ሉካ̇ሪ ጎዳ ዬሱ̈ሳ ኣሂን ዲጛካ̇ይ ኣቲ̇ዴ። ዪና̇ባር ጌይዝ ባዚ ኢንታ ዪን ዎንባራ ዎይሊን ጴች ቦልቂ̇ዝ ኣፊላ ማኢኖ ናምኢ ኣሳን ኢንቲ̇ ቆፓ̇ካ̇ዮን ጋርታ̇ ኢንታ̇ ላፍ ኤቂ̇ዴ። ማጫ̇ንሬ ዎይሊን ኢ̈ጪ̇ኖኮታ̇ቦ ሳዝ ሳዝ ቤቃ̇ር ዎንባራ ኣሳን ኢንታ̇ኮ “ዪንቲ̇ ሼምፓባሮ ናሳ̈ዳ ዓይ ዓይቂ̇ኖ ኣሳን ጋርታ̇ ኣባብ ኮዪ̈ራ? ኢ ዲንዲኔ፤ ዓይዲ ባዬ̇። ማ ኢ ጋሊላ ዎ ኬል̇ባራ ዪንታ̇ክ ኣብዝ ጌይኖኮ ኢዞ ኤልቅ ዎቲብቴ̇፤ ‘ታ ኣሳ ናኣ̈ዲ ናጋራንቻ̇ን ኩሽታ̇ ኣ̈̇ ኢሚ̇ንታ̇ንዳቦ፥ ሶቲንታ̇ንዳብኬ ዓይዚ ቃምባራ ዲንዳንዳቦ ኮሺ̇̈ሬ’ ጌይኔ” ጌይዴ።
ማጫ̇ንሬ ዪና̇ ኢዝባራ ዬሱ̈ሲ ጌይኖ ቃ̈ሊን ኤልቅ ዎቲዴ። ኢንቲ̇ ዱ̈ፊን ቤሲ̇ምፖ̇ ማ̈ቃ̇ሪ ዪ ዎይ ባዛ ታጶ̇ ፔታ̇ናንብኬ ኣቲ̇ኖንቦ ዎይ ሶ̈ሊዴ። ዪን ባዛን ሃዋ̈ራታንቦ ሶ̈ሊኖን ማ̈ራማ ማግዳሎ̈ንዶ̇፣ ዮ̈ሃና ጋ̈ዚንዶ፣ ዓይቆ̈ባ ኢንዲ̇ን ማ̈ራሚኬ ኢንታ̇ባር ዎ ሜላ ማጫ̇ን ዎይዬ። ኢንታ̇ሬ ማጫ̇ን ሶ̈ሊኖ ሶ̈ሊን ኢንታ̇ክ ቦይቲቲዛ ማይጺኖኮታ̇ቦ ኣማ̇ናካ̇ይ ኣቲ̇ዴ። ጴ̈ጥሮ̈ሲ ዲንዳ̇ር ዱ̈ፊንኮ̇ ዎጺ̇ዴ። ኢና ዬላ̇ር ዪርክ ጋ̈ር ዶ̈ቺ̇ን ጋርታ̇ ቤቃ̇ዚምባራ ኢያ ጻቂኖን ኣፊሊን ፌ̈ብ ዱማ ዎዶ̈ን ቤቂ̇ዴ። ኢናፖ̇ ኢ ፌ ቤቂ̇ኖ ባዚንባር ጋራ̇ሚንቲ̇ሙታ̇ ፌ ኣ̈ል ማ̈ቂ̇ዴ።


ዪና̇ ኢዝ ጋላስ ዬሱ̈ሳ ታማ̈ራን ጋርታ̇ፖ̇ ናምኣን ዬሩሳ̈ላማፖ̇ ናምኢ ሳኣ̈ታፌ̈ን ዬሲዝ ኤማ̈ሁስ ጋ̈ዝ ጊላ̇ ካታሚን ጋርታ̇ ሉኪ̇̈ርዶ̈ን፥ ኢንቲ̇ ዬሩሳ̈ላም ጋርታ̇ ኣሳን ዬሱ̈ሳ ጋልዳ ዎቲኖ ባዛን ዎል ዎልኣ ሶ̈ሊንቲ̇̈ርዶ̈ን፥ ዪኖ̇ ኢንቲ̇ ዎልዎልኣ ሶ̈ሊንቲ̇ ሙታ̇ ሉካ̇ዚን ጋርታ̇ ዬሱ̈ሲ ፌ ቆሚ̇ን ኢንታ̇ክ ዬ̈ሪ ኢንታ̇ባር ዬ ኤ̈̇ዴ። ዎቲናካር ኢንቲ̇ ኢያ ቤቂ̇ ሙታ̇ዶ̈ሪ ኢ ዬሱ̈ሳ ማ̈ቂ̇ኖን ኤራንዳብ ዳንዳኣካ̇ይ ኣቲ̇ዴ። ኢያር ኢንታ̇ኮ “ዪንቲ̇ ጎይም ጋልዳ ዬ̇ ሙታ̇ዶ̈ን ዎል ዎልኣ ሶ̈ሊንታ̇ዚን ኣብዛ?” ጌይዴ።
ኢንታ̇ር ሙርሚ ሙታ̇ዶ̈ር ፌ ዎ ቤሲ̇ን ጋልዳ ኤቂ̇ዴ። ኢንታ̇ ጋርታፖ̇ ፔታ̇ና ቄሎ̈ጳ̇ ጌይዝ ና̈ሳ̈ዲ “ኔ̈ኒ ዪን ቃማ̇ን ጋርታ̇ ዬሩሳ̈ላም ጋርታ̇ ማ̈ቂ̇ኖ ባዛን ኤራባሶ፥ ኣን ኔ̈ኒ ጋዲን ዪኒ̇ ጋርታ ዛቃ̇ ሙታ̇?” ጋ̈ር ኢ̈ብ ማሂዴ።
ኢያሬ ኢንታ̇ኮ “ዪና̇ ኢዛ ማ̈ቂ̇ኖ ባዚን ኣብዛ?” ጌይዴ። ኢንታ̇ሬ “ጾ̈ሳ̇̇ ቲ̈ንኬ ኣሳ ዎይ ቲ̈ን ኦ̈ዝ ኦ̈ሲን ባርኬ ሶ̈ሊዝ ቃ̈ላባራ ዎይሊን ሚ̈ን ማ̈ቂ̇ኖ ናባ ና̈ዝሬ̈ቶ ዬሱ̈ሳኮ̈ዳ። ኢያ ቄ̈ሳ ኣላቃንኬ ጋዳ ኣቂሲዝ ዳይናን ዓይቃብ ኣ̈ ኢሚ̇ዴ፥ ሶቲ̇ዴ። ኑ ኢያ ‘ኢስሬ̈ላ ዎርዣ ናጻ ኬሲ̇ዛ ኢያ’ ጌዪ ኣማ̇ኒንዶ̈ን፤ ዎቲናካሬ ዪ̈ዲሼ ዪ ዎይ ማ̈ቂ̇ኖፖ̇ ዓታ̇̈ቦ ዓይዚ̇ ቃሜ̇። ማ ኑ ጋርታ̇ፖ̇ ፔቲ̇ ፔቲ̇ ማጫ̇ን ኑ̈ና ጋራ̇ሚሲዴ። ኢንቲ̇ ጌ̈ሽ ቃም ዲንዳ̇ር ጎሪን ጋርታ̇ ሉኪ̇ንዶ̈ን፥ ዬሱ̈ሳ ኣሂን ዲጛካ̇ይ ኣታ̇ር ዬ̈ሪ ‘ኢ ፋ ዎ! ዪዝ ጌዪ ኑ̈ብ ሶ̈ሊኖ ኪ̈ታንቻ̇ን ኑ ሳጻባር ቤቂ̇ዴ’ ጋ̈ር ኑ̈ብ ሶ̈ሊዴ። ኑ ጋርታ̇ፖ̇ ፔታ̇ን ፔታ̇ናን ጎሪን ጋርታ̇ ሉኪ̇ን ኪን ማጫ̇ን ጌይኖንዲፌ̈ን ማ̈ቃ̇ር ኢንታ̇ብ ቤንታ̇ዴ። ዎቲናካሬ ዬሱ̈ሳ ዲጛካ̇ይ ኣቲ̇ዴ” ጋ̈ር ኢ̈ብ ሶ̈ሊን፥ ኢያር ኢንታ̇ኮ “ዪንቲ̇ ቆፒ̇ ቢሪንባ̈ሶ ኣሳን ናባንር ዪንታ̇ብ ሶ̈ሊኖ ባዛን ዎይ ዪንታ̇ ቡ̈ዳባር ኣማ̇ኒባ̈ሶን! ክርስቶ̈ሲ ዪ ዎይ ሜታ ኤካ̇ንዳብኬ ፌ ቦንቻ̇ ቤሲ̇ን ጌላ̇ንዳብ ኢ̈ብ ኮሺ̇ባ̈ሳ?” ጌይዴ። ሙ̈ሳኬ ናባን ዎይንፖ̇ ኤ̈̇ር ጌ̈ሻ̇ ማጻ̈ፋን ጋዳል ኢ ባዝ ጻ̈ፊንቲ̇ኖን ኢንታ̇ብ ሶ̈ሊ ኤሪሲዴ።
ኢንቲ̇ ፌ ሉካ̇ዝ ቤሲ̇ን ዬላ̇ንዳ ዎታዚምባራ ዬሱ̈ሲ ኢንታ̇ፖ̇ ኣ̈̇ ሉኪ̇ዛ ማይጺዴ። ኢንታ̇ር ኢ̈ኮ “ሳ̈ዚን ቃማ̇ ሙታ̇ ዬ̈ሬ፤ ኣዋ̇ፊንዳር ጌላንዳ ዎታ̈ሬ፤ ዪ̈ኮታ̇ቦ ኑባራ ዓይ ኣቃቤ” ጋ̈ር ሚ̈ንር ኢያ ጌሺዴ። ኢያሬ ኣቃንዳብ ኢንታባር ጌሊዴ። ኢ ኢንታ̇ባር ዎልኣ ኢራ̈ታ ሞ̈ንዳብ ዶኢኖን ጋርታ̇ ኢ ሶ̈ሊ̇ን ኤካ̇ር ጾ̈ሳ̇̇ ጋላታር ዳርሳር ኢንታ̇ብ ኢሚ̇ዴ። ዪኒ̇ባራ ኢ ዬሱ̈ሳ ማ̈ቂ̇ኖን ኢንታ̇ብ ኤሪንታ̇ዴ። ኢንቲ̇ ኢያ ኤሪኖፖ̇ ዓኒ ኢ ኢንታ̇ ጋልዳፖ̇ ጌ̈ሚቲዴ። ኢንታ̇ሬ ዎል ዎልኣ “ኑ ዓታር ጎይም ጋልዳ ዬ̈ዚምባራ ኑ̈ና ሶ̈ሊሲ፥ ጌ̈ሻ̇ ማጻ̈ፋ ጋርታ̇ፖ̇ ኑ̈ና ታማ̈ርሳዚምባራ ኑ ቡ̈ዲን ጋርታ̇ ታማፌ̈ን ሚቻ̇ ዬ̇̈ር ባያ?” ጌይዴ። ኢንቲ̇ ዪና̇ ኢዝ ሳኣ̈ቲን ጋርታ̇ ዲንዳ̇ር ዬሩሳ̈ላም ማ̈ቂ̇ ዬይዴ። ኢና ታጶ̇ ፔቲ̇ ዬሱ̈ሳ ታማ̈ራንኬ ኢንታ̇ባር ዎንሬ ዎል ፔታ̇ን ሺ̈ቃር ዎዶን ዲጚዴ። ዪኒ̇ባር ኢንታ̇ር ዎል ዎልኣ “ጎዳ ኪን ዲንዲኔ! ሲሞ̈ናባራሬ ቤንቲ̇ኔ!” ጌይዴ። ናምኢ ኢ ታማ̈ራን ጎይም ጋልዳ ማ̈ቂ̇ኖ ባዚንዲኬ ዬሱ̈ሲ ሶ̈ሊ̇ን ዳርሳ̇ር ኢንታ̇ብ ኢሚ̇ን ዎዛርፌ̈ን ኢንቲ̇ ኢያ ኤሪኖኮ ኢና ሺ̈ቂኖ ኣሳ̈ቦ ሶ̈ሊዴ።


ኢንቲ̇ ዪኖ̇ ዎልዎልኣ ሶ̈ሊንቲ̇ ዎን ጋርታ̇ ዬሱ̈ሲ ፌ ቆሚ̇ን ኢንታ̇ ጊዳ̇ ኤቃ̇ሪ “ሳሪቲ ዪንታ̇ብ ማ̈ቆ̇!” ጌይዴ። ኢንቲ̇ ኤ̈ሻ̇ ቤቂ̇ኖ ኢንታ̇ብ ማይጺን ባቂታር ዎይሊን ኢ̈ጪ̇ዴ። ኢያር ኢንታ̇ኮ “ዪንቲ̇ ኣባብ ባቂቲ̈ራ? ኣባቦ ዪንታ̇ ቡ̈ዳባራ ሲ̈ራ? ቴ ኩሺንዲኬ ቴ ቶሂን ቤቂ̇ብቴ ቴ ታ̈ና፤ ማ ታ̈ና ኤ̈̇ራር ቤቂ̇ብቴ። ዪንቲ̇ ታ̈ና ቤቂ̇ኖንዲፌ̈ኒ፥ ታ̈ቦ ኣይሽኬ ሜቃ ዎ፤ ኤ̈ሻ̇ቦ ማ̈ቄ̇ጌይንዶ ኣይሽኬ ሜቃ ባዬ” ጌይዴ።
ኢ ዪኖ̇ ጋ̈ሪ ፌ ኩሻንኬ ፌ ቶሃን ኢንታ̇ ቤይሲዴ። ኢንታ̇ሬ ኡፋይሳፕኬ ጋራ̇ሚንቲፖ̇ ዲንዲኖ ቢርት ኢያ ኣማ̇ናካ̇ይዶ̈ን “ዓንዳ ኣባክ ዪንታ̇ክ ሙይዝ ባዚ ዎ?” ጌዪ ኦይጪ̇ዴ። ኢንታ̇ሬ ሚቺ̇ኖ ሞላ ሙቃ̇ ኢ̈ብ ኢሚ̇ዴ። ኢያር ኤካ̇ር ኢንታ̇ ቲ̈ን ኢና ሙይዴ።
ኢያር ኢንታኮ “ቴ ዪንታ̇ባር ዎ ኬሊ̇ንባራ፥ ሙ̈ሳ ሂጋ̇ ጋልዳ፥ ናባን ማጻ̈ፋ ጋልዳኬ ማዝሙራ ማጻ̈ፋ ጋልዳ ታ ባዝ ጻ̈ፊንቲ̇ኖ ዎይ ፎቲንታ̇ንዳ̇ብ ኮሺ̇̈ሬ ጋ̈ር ቴ ዪንታ̇ብ ሶ̈ሊኖ ቃ̈ሊን ዓኒ̇ሼ” ጌይዴ።
ዪኒ̇ባራ ኢንቲ̇ ጌ̈ሻ̇ ማጻ̈ፋ ኤልቅ ዎታምፔ̈ኒ ኢንታ̇ ቡ̈ዳ ፊርቂ̇ዴ። ኢናፖ̇ ኢ ኢንታ̇ኮ ‘ክርስቶ̈ሲ ሜታ ኤኪ̈ሬ፤ ዓይዚ̇ ቃምባራ ዓይቃ ጋርታ̇ፖ̇ ዲንዲ̈ሬ፤ ማ̈ሪቲ ጌሌጌይንዶ̇ ዪንታ̇ ናጋራ ዪንታ̇ብ ኣቶ̇ ጌይንታ̇̈ሬ ጋ̈ዝ ሲብካ̇ቲንዳ̇ ዬሩሳ̈ላማፖ̇ ኤ̈̇ራ ዎርዣ ዎይ̈ቦ ኢ ሱምባራ ሳባ̇ኪንታ̇̈ሬ’ ጋ̈ዚንዳ ቲ̈ኒታር ጌ̈ሻ̇ ማጻ̈ፋ ጋልዳ ጻ̈ፊንቲ̇ኔ። ዪንታ̇ሬ ዪና̇ ኢዝቦ ማርካ̇። ቴ ባ̈ባ ኢማ̇ንዳ ጌዪ ቃ̇ላ ጌሊኖን ቴ ዪንታ̇ብ ሚሻንዳ። ዪንታ̇ር ማ ኣፋፖ̇ ዎልቃ ዲጚዝ ዲራ̈ስ ዬሩሳ̈ላም ካታሚን ጋርታ̇ ኢና ጋምኢብቴ̇” ጌይዴ።


ዪኒ̇ፖ ዓኒ ዬሱ̈ሲ ፌ ታማ̈ራን ኤካ̇ሪ ዬሩሳ̈ላማፖ̇ ቢታ̈ና ዲራ̈ስ ሉኪ̇ዴ። ኢና ፌ ኩሺን ኢንታ̇ ጋልዳ ጋዳ̇ሪ ኢንታ̇ ኣንጂዴ። ኢ ኢንታ̇ ኣንጂ̈ርዶሪ ኢንታ̇ ጋልዳፖ̇ ፉዳ ኣፋ ሉኪ̇ዴ። ኢንታ̇ሬ ኢ̈ብ ሞ̈ኪንቲ̇ዴ፤ ኢናፖ̇ ጴች ኡፋይስባራ ዬሩሳ̈ላም ማ̈ቂ̇ ሉኪ̇ዴ። ጾ̈ሳ̇̇ ጋላቲሙታ̇ ዎይ ጋላስ ጾ̈ሳ̇̇ ኬ̈ ጋርታ̇ ቲንእ ጋ̈ካ̇ይ ዶኢዴ።

Lyt til ሉቃ̈ሳ 24