Korwa - WBT (NT) Non Drama

Korwa - WBT (NT) Drama

पउलूस अरू सिलास दिरबे सहररेकिन सोदोरनेन अरू हनाते लुसतरा सहररेकिन सेनेडा। हंडा तिमुतियूस ञावीग मी होड़ ईसूरीग चेला दोहोना। हाँयरीग एंगात ईसू एचेरेय बिसवासगेःआ मी होड़ एहूदा अइमी दोहोना अरू हाँयरीग अपात बेगर एहूदा होड़े दोहोना। लुसतरा अरू इकुनियुमरिकुःआ बिसवासी होड़कू हाँय बदीरे नपायकू कताया। दो पउलूस हाँयग तिमुतियूस आँयग सुदा गोःगेय लगाय चहाःआ। हंडाकुःआ एहूदाकू सुसुदीःआ हाँयग तिमुतियूसराः खतना मेर होयागान अरू हाँयरीग अपात बेगर एहूदा होड़े दोहोना। हनालगा पउलूस तिमुतियूसे एचे खतनातेरा। हनते हँकू एटाः एटाः सहरकूनरे सेनेवाडखन बिसवासी होड़कू मनावगे लगा एरुसलेमरे ईसूरिकुःआ मूक चेलाकू अरू कलसियारिकुःआ अगुवा होड़कू रायवातेरा हना नियमकून हँकू एचेरेकू कता उदुःतेरा। नानाः इया हंडाकुःआ बिसवासी होड़कू ईसू मसीराः बिसवासरेकू बड़ियाड़यान अरू मुरुक होड़कू ईसू एचेरेकू बिसवासतेरा।

भगवानराः सुद बिरुवा आसिया राइज सेन अते रोंकावतेडकुःआ। हनालगा पउलूस अरू आँयगरिकुःआ सउंगताकू पिरगिया अरू गलातिया छतरतेकू सेनेडा। दो हँकू मूसिया छतरराः सिमान वरीकू सोदोरनेन दो हँकू बितुनिया छतर सेन लगाकू कुरनिसतेरा। मनदो ईसूराः बिरुवा हँकू सेने अतेय रोंकावगोतेडकू। हनालगा हँकू मूसिया छतर पारनेनखन समुंदर धरीराः तोरोवास सहररेकू सेनेडा।
दो हना रइत पउलूस मीटोंग दरसने ञेलतेरा। हना दरसनरे मकिदुनिया देसरीग मी होड़ हाँय एचेरे चड़ाँनेनखने असेया, “मकिदुनिया देसमे वेग, अरू अलेम संघरावा।” पउलूस नाःआ दरसन ञेलतेडखन तयोमरेय सुदीगोतेड, मकिदुनिया देसरिकुःआ होड़कू एचेरे भगवानराः नपाय सरवन कता उदुः लगा भगवान अलेय राःतना, माःआन। अरू ओहेन मकिदुनिया देस सेन लगाले सपड़ावनेना।

तोरोवास अते जहाजते अले सोएग समोतरोके डुगुले सेनेडा। हनते एटाः दिन नियापुलिस सहर तोराले। हंडा अले जहाज अते उतरावनेनखन पिलिपी सहर दुनूर दूरले सेनेडा। हना सहर मकिदुनिया राइजराः मीटोंग मरंग सहर दोहोना अरू रूमी देसरिकुःआ होड़कू हंडा मुरुककू दोहोना। अरू अले दो मुरुक दिन वरी हंडाले दोहोना।
दो एटाः लोड़ोनराः दिनरे अले हना सहरराः हता दुवार बहरी नई अगीले सेनेडा। अले ओंगोलतेरा, नंडा अरजीगे लगा होड़कू जुमावता, माःआन। अले हंडाले दुड़ुःनेन अरू जुमावतो अइमीकू सुदाले बुतुड़ुःआ। हँकुःआ अइमीकू अते मी होड़राः ञाव दोहोना लिदिया। हाँय मुरुक किमइतराः धुः-धुमइल रांगराः सोनहेकूनराः फेरवइत होड़े दोहोना। हाँय थायतिरा सहररीग होड़े दोहोना अरू भगवान जाग घड़ीने सेवातेरा। पउलूस कतातेरा भगवानराः हना नपाय सरवन बिसवासगे लगा परबू भगवान हाँयग लिदियाए एचे मनेवातेरा। हनते हाँय अरू आँयग ओड़ाःरिकुःआ जमा होड़कू हाँय सुदा बतिसमाकू गोःतेरा। अरू हाँय अलेय नेत-नेवारतेडखने कताया, “अपे ईंग मी होड़ बिसवासी होड़ माःआनपे ओंगलेयिंगतना दो, ईंग ओड़ाःरे गुतियापे वेग।” अरू अले हाँय ओड़ाः अरीनले सेन वरी हाँय रेनहातेडलेःआ।

दो एनेटाः दिन अले अरजी ततेर अगी सेन मेला, मी होड़ बेगारीन सुदाले जुमावनेना। हाँय एचेरे मीटोंग भूत दोहोना अरू हाँयग भूतते हाँय दरवाःआ हना कताकूने कता उदुःआ। नाःआ अते आँयगरिकुःआ मालिककू लगा मुरुक ढिबुवाय अदेरतेरा। हाँयग धंगड़ी पउलूस अरू एटाः एटाः होड़कू तयोम अगी वेगवाडखन खिररी घड़ीने कताया, नँकुःआ होड़कू भाबी भगवानरिकुःआ होड़कू हवे। होड़कू अँकूराः कसूर दूर अड़ाःकेडखन सडाव जुवाःराः दूरकू उदुःतना, माःआन। नाःआ इया मुरुक दिन वरी होयानेना। दो मी दिन पउलूस मुरुके रीसनेन अरू हाँय उलटावनेनखन हाँयग भूत एचेरेय कताया, ईसू मसीराः ञावरे ईंग आम एचेरेयिंग कतायतना, नाँयग धंगड़ीतेम उडुंग जुवाः, माःआन। अरू हननमेला हाँय उडुंगनेना।
हाँयग बेगारीनरिकुःआ मालिककू सुदीगोतेड अबूराः ढिबुवा अदेरगेराः असरा चलाः एंडानतना, माःआन। दो हँकू पउलूस अरू सिलास साबतेडखन बजार अगी हना सहररिकुःआ हातपात होड़कू एचेरेकू ओर गोःयाडकिन। दो हँकू हँकिन रूमी देसरिकुःआ फड़ियावदारकू एचेरेकू गोःतेडकिना अरू बदीतेडकिनखनकू कताया, “नँकिनाः होड़किन एहूदा होड़किन हवे अरू अबूराः सहररिकुःआ होड़कू तलारे कड़ीगकिन रेमतना। नँकिन अबू रूमीरिकुःआ होड़कूराः नियम इया कोवानेःआ अरू मेरबू मनाःता सहे मेरबू कबुलाःता हना एहूदाकूराः रिती-बिधीकिन चेडकूतना।”
सहररिकुःआ होड़कू हों पउलूस अरू सिलास बदीरेकू जुमावनेना, दो हना सहररिकुःआ फड़ियावदार होड़कू हँकिनराः सोनहे एचे तोलेगकेडखन बोंगते ञेडकिन लगाकू हुकुमतेरा। हँकू हँकिन मुरुककू ञेडतेडकिनखन जेहेलरेकू एचे सींगगोडकिन। हँकू हना जेहेलरीग अगुरा होड़ हँकिन नपायते अगुराकिन लगाकू हुकुमतेरा। अरू नाःआते हाँयग अगुरा होड़ हना जेहेल पेंदराःआ छिनारे हँकिनराः काट कठवारे सजावतेडखनकू ठोंकाव रहावगोतेडकिन।

दो हटिंग बरा रइतरे हँकिन बना होड़ पउलूस अरू सिलास भगवान एचेरेकिन अरजीतेरा अरू भगवान लगाकिन सेरेंगा। हनमेला हना जेहेलरे सींगतोकू दोहोना हँकुःआ एटाः होड़कू हों हँकिनराः सेरेंगकू अयूमाः। दो असाका हना ततेरराः ओत डोलावनेना अरू जेहेलराः नेव हों हिलावयान। हनमेला जेहेलराः जमा दुवारकून गीगयान अरू जमा होड़कूराः सिकिड़ी हों लड़ायान। दो जेहेलरीग अगुरा होड़ बेरेडनेनखन अरू जेहेलराः जमा दुवारकून गीगतोय ञेलतेरा दो हाँय ओंगोलतेरा, सींगतोकू दोहोना हँकुःआ होड़कू जमाकू ञीरयना। हनालगा हाँय आँयगराः तलवइरतेने उडुंगतेरा अरू अनँयग आँयग ञेड एंडान लगाय ओंगलेःआ। मनदो पउलूस खिररी घड़ीने कताया, “आम अनम जीव अहम लाय एंडागे। अले जमा होड़कू ननंडा इदानलेःआ।”
दो जेहेलरीग अगुरा होड़ मरसल अगूगे लगाय कतातेरा अरू बतकाव वेगवाडखन पउलूस अरू सिलास मड़ंगरे कलपाः घड़ीने उकुड़ोमनेना। हना तयोमरे हाँय हँकिन जेहेल बहरीय उडुंगतेडकिना अरूय असेतेरा, “साहेबकिन, सडाव जुवाः लगा चिलायिंग एचे?”
दो हँकिन कताया, “परबू ईसू एचेरेम बिसवासगे, दो आम अरू आमराः ओड़ाःरिकुःआ जमा होड़कू सडाव जुवाःता।” हनते हँकिन हाँय एचेरे अरू हाँयराः ओड़ाःरिकुःआ जमा होड़कू एचेरे परबूराः सरवनकिन कता उदुःतेरा। हनते हना जेहेलरीग अगुरा होड़ रनइत रइतरे हँकिनराः घावकूने बुहालतेरा। हना तयोमरे हाँय अरू आँयगराः ओड़ाःरिकुःआ जमा होड़कू बतिसमाकू गोःतेरा। हनते हाँयग अगुरा होड़ हँकिन आँयग ओड़ाःरेय गोःतेडकिनखन जोम लगाय एमेवातेडकिना। हाँय आँयग ओड़ाःरिकुःआ जमा होड़कू सुदा भगवान एचेरेकू बिसवासतेरा। हनालगा हाँय अरू आँयगराः ओड़ाःरिकुःआ जमा होड़कूराः जीव मुरुक बहालयान।
निंदावा फड़ियावदारकू हाँयग अगुरा होड़ एचेरे पुलीसकूतेनते नाःआ हुकुम कतातेडखनकू वारतेडकुःआ, हँकुःआ होड़कूम अड़ाःगोडकू, माःआन।
दो हाँयग अगुरा होड़ पउलूस एचेरेय कताया, “फड़ियावदारकू आम अरू सिलास अड़ाःबा लगाकू हुकुमकेरा। नुँहू अबा दूबा। सलसततेबा सलाव जुवाः।”
मनदो पउलूस कतातेरा, “अलिंग रूमी देसरिकिनाः थनहिया होड़किन हवे अरू बेगर नपाय फड़ियावते हँकू जमा होड़कू मड़ंगरे अलिंगकू ञेडतेडखन जेहेलरेकू एचे सींगतेडलिंग। दो नुँहू कलेकाल वेगकियानखन एचे अड़ाःलिंग लगाकू ओंगलेतना जा? बुरी, नाःआ इया कोवान। हँकू अँननकू अँकू नंडा वेगकियानखनकू एचे उडुंगलिंग।”
दो हँकुःआ पुलीसकू कुदा सेनेडखन फड़ियावदारकू एचेरे नाःआ कताकूनकू कता उदुःतेरा। पउलूस अरू सिलास रूमी देसरिकिनाः थनहिया होड़किन हवे माःआनकू अयूमतेरा दो हँकू मुरुककू बोरोयान। हँकिनकू मंदराव लगाकू वेजेडा अरू जेहेल अते एचे उडुंगतेडकिनखनकू हना सहर अते एटाः सहर अगीकिन सलाव जुवाः लगा हँकिन एचेरे असेतेडखनकू कतावातेडकिना। हनते पउलूस अरू सिलास जेहेल अतेकिन उडुंगनेन तयोमरे हँकिन लिदियाराः ओड़ाःरे तोराकिन। हंडा हँकिन बिसवासी होड़कू सुदाकिन जुमावनेना अरू हँकूकिन कता-बहालतेडखन हना सहर अते तोराकिन।

Lyt til मूक चेलाकू 16