1လေးစောယော့ရယ့်သော်ဖိလု၊ လူမျောတွို့ဟော် ငေါ်တွို့ကျောမောင် ဖှဂ်ပျဂ်ခယ့်ရယ့်အကျွောင်းအယော်တွို့ကွို ရယ်းဆောဖွို့ငေါ်တွို့ကျွိုးစောခယ့်ကျော့ရယ်။ 2အယ်းလွိုရယ်းဆောယော်မောင် ဆူတွို့ဟော် အစော့ခယန်းဆိခယ့်ပွီး ဖှဂ်ပျဂ်ခယ့်ရယ့် အဖျဂ်အပျဂ်မျောကွို မျိုခယ့်ယော့ရယ့်ဆူရယ်ခေါ့နေ ဟိုးပျော့ခယ့်ဖူးရယ့်အယော်ရယ်ကွို ရယ်းဆောခယ့်ကျော့ရယ်။ 3အယ်းယော်ကျွောင့် ငေါ်ဟော် အစော့ခယန်းခေါ့ပယ်း အယော်ယော်ကွို ခရုတစောဂ်စုန်စောင်းလေ့လော်ခယ့်ပွီး အဖှဂ်အပျဂ်မျောကွို နန်တွို့အတွ အစီအစန်တကှော့ရယ်းဆောဖွို့ ဆုန်းဖှဂ်ခယ့်ပေါ်ရယ်။ 4နန်တွို့ဆန်ယူခယ့်ယော့ရယ့် အကျွောင်းအယော်ရယ်ဟော် မင်ကန်ကျွောင်းကွိုဆိဆစေဖွို့ နန်တွို့နောင်း ဟော်လွိုမျွိုးအစီအစန်တကှော့ရယ်းဆောလောဂ်ယော့ခှန်း ဖှဂ်ပေါ်ရယ်။ 5ယုဒပှယ်မောင် ဟေရုဒ်မန်းကျွီးe အုတ်စွိုးရယ့်အခှိင်မောင် ဇာခရိလွို့ခိုရယ့် ဂျူးပုရောဟိတ်ဟော် အဘိယfလွို့ခိုရယ့် ပုရောဟိတ်တဦးယယ့်အဖွဝမ်ဖှဂ်လေရယ်။ ဆူ့ယယ့်မိင်းမော့ ဧလိရှဗက်ဟော်လယ်း အစ္စရေးပှယ်ယယ့် ပထမော့ဆုန်း ပုရောဟိတ်ဖှဂ်ရယ့်အာရုန်မျွိုးရွိုးခေါ့နေ ဆန်းလော်ဆူဖှဂ်ရယ်။ 6ဆူတွို့နေယွောဂ်ဟော် ဖရောဆန်ယယ့် ပညောဂ်တိုရယ်ကွို အပှယ့်အဝို့လောဂ်နော်ကျော့ပွီး ဖရောဆန်ယယ့်ချယ့်တိုမောင် ဖွှောင့်မတ်ဆူမျောgဖှဂ်ကျော့ရယ်။ 7ဟော်ပေမယ့်လယ်း ဆူတွို့မောင် ဆောဆမီးမဆိကျော့ပေါ်။ စော်ကျွောင့်လောဟန်ကော ဧလိရှဗက်ဟော် မှုံနေရယ့်အတွကျွောင့် ကွိုယ်ဝမ်မယော့နောင်ဝါးနောင့် ဆူတွို့နေယွောဂ်စလုန်းမောင်လယ်း အဆအရွာကော်တရော်ကျွီးနေပီဖှဂ်ရယ်။ 8တနေ့မောင် ဇာခရိယယ့်အဖွဟော် ဗိမာန်တိုh မောင် အလယ့်ကှော့တော်ဝမ်ကွိုထောင်းဆွောင်နေခှိင် 9ပုရောဟိတ်တွို့ယယ့် ဓလေ့ထုန်းစောင်အယော့ ဖရောဆန်ယယ့်ဗိမာန်တိုထားကွိုဝမ်ပွီး အမွီးနောင့်ဆော်မျောထွမ်းညိပူဇော်ဖွို့အတွ မယ်းနောဂ်ပွီးယွီးချာရယ့်အခေါ် ဇာခရိဟော်ယွီးချာခေါင်ယော့လေရယ်။ 10အယ်းယော်ကျွောင့် ဇာခရိဟော် အမွီးနောင့်ဆော်မျော ထွမ်းညိပူဇော်နေရယ့်အခှိင်မောင် လူအမျောဟော် ဗိမာန်တိုဝမ်းမောင် ဆုတွောင်းနေကျော့ရယ်။ 11အယ်းနွောဂ်မောင် ဖရောဆန်စေခွှဂ်တိုမူရယ့် နတ်ဒေဝါiဟော် အမွီးနောင့်ဆော်မျော ထွမ်းညိပူဇော်ယော့ရယ့် ပလ္လန်jယယ့်ညော်ဖဂ်မောင် ဇာခရိကွို ကွိုယ်ထန်ပျော့ပွီးမတ်နေရယ့်ဟော်ကွို 12ဇာခရိ မျိုရယ့်အခေါ် ဆူဟော် ကော်တရော်ကျွောဂ်လန့်ပွီးတွိင်ဆိုးလေရယ်။ 13ဟော်ပေမယ့် နတ်ဒေဝါခေါ့ ဇာခရိကွို “မကျွောဂ်ပေါ်နောင့်ဇာခရိ။ စော်ကျွောင့်လောဟန်ကော နန့်ယယ့်ဆုတွောင်းဆောင်ကွို ဖရောဆန် ကျောဆိဆတိုမူပီ။ နန့်ယယ့်မိင်းမော့ ဧလိရှဗက်ဟော် နန့်အတွ ဆောယွောဂ်ကျောငါတယွောဂ်ကွို မွီးပေးလောဂ်မယ်။ ပွီးယန် နန်ဟော် ဆူ့ကွိုယောဟန်လွို့ နောင်မယ်ပေးယော့မယ်။ 14ဆူမွီးရယ့်အခှိင်မောင် နန်တွို့ ကော်တရော်ဝုန်းဆော်ယော့သလွို အချောဆူမျောတွို့ခေါ့လယ်း ကော်တရော်ဝုန်းဆော်ယော့လောဂ်မယ်။ 15စော်ကျွောင့်လောဟန်ကော ယောဟန်ဟော် ဖရောဆန်ယယ့်ချယ့်တို‌မွောဂ်မောင် ကျွီးကှာမှင့်မှဂ်ရယ့်ဆူဖှဂ်လော်မယ်။ ဆူဟော် စော်အခေါ်မောင့် ဝိုင်နောင့်အရဂ်ရယ်ကွို ဆွောဂ်မောင်မဟွိ။ ဆူ့မွေ့ယယ့်ခှေးဖောဂ်ထားခေါ့ခယန်း ဆူဟော် ညင်အလန်းတိုယယ့် ဦးဆွောင်လောင်းပျော့မုအွောဂ်မောင် ဆိလောဂ်မယ်။ 16ယောဟန်ဟော် အစ္စရယ်းလူမျွိုးမျောကွို အပှဂ်ဒုစရောဂ်ခေါ့နေ နွောင်တော့ဆောင်ဝီဂေါ့ယော့စေပွီး ဆူတွို့ယယ့် အဆန်သခန်ဖှဂ်ရယ့် ဖရောဆန်ဖဂ်ကွို ပှန်ခှယ့်စေလောဂ်မယ်။ 17ယောဟန်ဟော် ပရောဖက်kဧလိယလွိုမျွိုး ညင်အလန်းတိုနောင့် တခွိုးဆိပွီး အဆန်သခန်ယယ့် ချယ့်တိုပှေးဖှဂ်လောဂ်မယ်။ ဆူဟော် မွေ့ဖော့ရယ်ခေါ့ ဆောဆမီးရယ်ကွို ပှန်စည်းလုန်းစေပွီး နော်ခေါင်ခှန်းမဆိရယ့်လူရယ်ကွို ဖွှောင့်မတ်ရယ့်အဆိတရောရယ်ကွို လောဂ်နော်ဖွို့ ဆန်ပေးလောဂ်မယ်။ အယ်းယော်ကျွောင့် လူရယ်ဟော်လယ်း အဆန်သခန်ပှန်ကျို့ ယွောဂ်လော်ရယ့်အခှိင်မောင် အဆန်သင့်ဖှဂ်နေကျော့လောဂ်မယ်” လွို့ ဆွိုလေရယ်။ 18ဇာခရိဟော်လယ်း နတ်ဒေဝါကွို “နန်ဟိုးသလွိုမျွိုး အမင်တကာဖှဂ်လော်မယ်ဆွိုတော် ငေါ်စလွိုဆိဆနောင်မလော။ စော်ကျွောင့်လောဟန်ကော ငေါ်ယောငေါ့မိင်းမော့ပေါ် နေယွောဂ်စလုန်းဟော် ကော်တရော်အွိုမန်းနေပေါပီ” လွို့ပှန်ဟိုးလေရယ်။ 19အယ်းအခေါ် နတ်ဒေဝါခေါ့ ဇာခရိကွို “ငေါ်ဟော် ဖရောဆန်ယယ့်ချယ့်မွောဂ်မောင် တော်ဝမ်ထောင်းဆွောင်ယော့ရယ့် ဂါဗြေလဖှဂ်ရယ်။ ဟော်လွိုမျွိုး မန်ဂလော်ဆတန်းစကောကွို နန့်နောင်းလော်ဟိုးဖွို့အတွ ဖရောဆန်ခေါ့ ငေါ့ကွိုစေခွှဂ်လောဂ်ခှန်းဖှဂ်ရယ်။ 20ဟော်ပေမယ့် နန်ငေါ့ယယ့်စကောကွို မယုန်ကျည်ရယ့်အတွ ဟော်အဖှဂ်အပျဂ်ရယ် မဖှဂ်ပျဂ်ခန်အခှိင်ထိ နန်ဟော် စကောမဟိုးနောင်ဝါးနောင့်အော့နေလောဂ်မယ်။ စော်ကျွောင့်လောဟန်ကော ငေါ့စကောဟော် အခှိင်တန်ယန်ဖှဂ်လော်လောဂ်မယ်” လွို့ဆွိုလေရယ်။ 21ဇာခရိနောင့် နတ်ဒေဝါတွို့ဟော် ဗိမာန်တိုထားမောင် စကောဟိုးနေခှိင် အပှန်ဖဂ်မောင်ဆိရယ့် လူထုတွို့ဟော် ဇာခရိကွိုစွောင့်နေကျော့လေရယ်။ ဆူတွို့ဟော် ဗိမာန်တိုထားမောင် ဇာခရိစော်ကျွောင့်အခှိင်ကျော်နေတော်ကွို ဆိဆခှန်နေကျော့ရယ်။ 22ဇာခရိအပှန်ကွို ပှန်ထွလော်ရယ့်အခှိင်မောင် စကောမဟိုးနောင်တို့လွို့ ဗိမာန်တိုထားမောင်ဆိနေခှိင် ဇာခရိဟော် နမိင့်လဂ်ခနော်တခုခုကွို မျိုခယ့်ယော့ရယ်လွို့ လူထုတွို့ခေါ့ နောလည်ဆိုးကျော့လေရယ်။ ဆူဟော် လူရယ်ကွို ခှေဟန်လဂ်ဟန်နောင့်ပယ်း အမူအယော်မျောပျော့နေခယ့်ပေမယ့် အအော့အတောင်းပယ်းဆိနေလေရယ်။ 23အယ်းနွောဂ်မောင် ဇာခရိဟော် ဗိမာန်တိုမောင် ပုရောဟိတ်တွို့လုတ်ဆွောင်ယော့မယ့် အမုကိစော့မျောကွို လုတ်ဆွောင်ပွီးစီးရယ့်အခေါ် ဆူ့ယယ့်အိင်ကွိုပှန်လေရယ်။ 24အခှိင်ကျော်ရယ့်အခေါ် ဇာခရိယယ့်မိင်းမော့ဧလိရှဗက်မောင် ကွိုယ်ဝမ်ဆိလော်လွို့ ဆူဟော် ငေါလော့လွောဂ်ကျော်ရယ့်အထိ အိင်ထားအိင်ပှန်ကွို မထွပယ်းနေရယ်။ 25“ဖရောဆန်ဟော်ငေါ့ကွို ကွိုယ်ဝမ်ဆွောင်နောင်ခှန်းအခွမ့်ကွို ပေးဆနောတိုမူပီ။ ဆူဟော် ငေါ့ကွို ဆနောဂရုနော်ထောပွီး ငေါ့ယယ့်လူပယ့်ငါမယော့နောင်ခှန်းကျွောင့် လူအမျောယယ့် ကာ့ရခှန်းခေါ့နေပျွောဂ်စေတိုမူပီ” ဆူ့ကွိုယ်ဆူတွယ်းနေလေရယ်။ 26ဧလိရှဗက်ကွိုယ်ဝမ်ချောဂ်လော့လွောဂ်ဆိလော်ရယ့်အခေါ် ဖရောဆန်ဟော် နတ်ဒေဝါဂါဗြေလကွို ဂါလိလဲပှယ်မောင်ဆိရယ့် နာဇရက်မွှို့ကွိုစေခွှဂ်ပွီ 27မာရိလွို့ခိုရယ့် အပျွိုစန်စဂ်တယွောဂ်နောင်းကွို ဆိုးယွောဂ်ပွီး ဆတန်းစကောဟိုးစေရယ်။ မာရိဟော် ဘရန်ဒါဝိဒ်ယယ့်မျွိုးရွိုးခေါ့နေ ဆန်းသဂ်လော်ဆူဖှဂ်ရယ့် ယောသပ်နောင့်စယ့်စောဂ်ထောဆူဖှဂ်ရယ်။ 28အယ်းနွောဂ်မောင် နတ်ဒေဝါခေါ့ မာရိယယ့်အိင်နောင်း ဝမ်လော်ပွီး နွောဂ်ဆဂ်ပွီးရယ့်အခေါ် မာရိကွို “ဖရောဆန်ဟော် ဆူ့ယယ့် ကျွီးမောရယ့်မေတ္တော်ဂရုနော်ကွို နန့်အပိုမောင် အချောအမျွိုးဆမီးရယ်အောလုန်းထဂ် ပွိုပွီးပျော့လေပီ ဖရောဆန်ဟော် နန်နောင့်အတူတူဆိတိုမူပီ” လွို့ ဟိုးလေရယ်။ 29ဟော်ပေမယ့် မာရိဟော် ဟော်နွောဂ်ဆဂ်စကောကွိုကျောရယ့်အခေါ် ကော်တရော်စိဆုပ်ဆိုးဟော့ပွီး နတ်ဒေဝါယယ့်စကောမျောဟော် စော်ကွိုဆွိုလွိုရယ့်အကျွောင်းကွို တွယ်းလေရယ်။ 30အယ်းနွောဂ်မောင် နတ်ဒေဝါခေါ့ဆူ့ကွို “မကျွောဂ်ပေါ်နောင့်၊ မာရိ။ ဖရောဆန်ဟော် နန့်ကွို ကျွီးမောရယ့်မေတ္တော်ဂရုနော်ကွို ပျော့တိုမူလေပီ။ 31နန်ဟော် ကွိုယ်ဝမ်ယော့လော်ပွီး ဆောတိုတပေါမွီးလော်မယ်။ ဆူ့နောင်မယ်ကွို ယေရှုလွို့ခိုယော့မယ်။ 32ဆူဟော် ကျွီးမှဂ်ဆူတယွောဂ်ဖှဂ်လော်ပွီး အမှင့်မှဂ်ဆုန်း ဖရောဆန်ယယ့်ဆောတိုလွို့ ခိုဆွိုခှန်းကွိုခေါင်ယော့လောဂ်မယ်။ ဆူ့ယယ့်ဖွိုးပွောင်အဆဂ်ဆဂ်ဖှဂ်ရယ့် ဘရန်ဒါဝိဒ်လွိုမျွိုး ဆူ့ယယ့်လူမျွိုးရယ်ကွို အုတ်စွိုးနောင်ရယ့်အခွမ့်ကွို ဖရောဆန်ခေါ့ ဆူ့ကွိုပေးလောဂ်မယ်။ 33ဆူဟော် ဘရန်တယွောဂ်လွိုမျွိုးယာကုပ်lယယ့် အမျွိုးအနွာအပွေါင်းတွို့ကွို ‌ထော်ဝရော့အုတ်စွိုးမောင်ဖှဂ်ပွီး ဆူ့ယယ့်နောင်းအဆဂ်ဆဂ်ဟော်လယ်း စော်အခေါ်မောင့်ပျဂ်ဆိုးလောဂ်မောင်မဟွိဘူး” လွို့ ဟိုးလေရယ်။ 34အယ်းအခေါ် မာရိခေါ့ “ငေါ်ဟော် အပျွိုတယွောဂ်ဖှဂ်လွို့ အယ်းအယော်ခေါ့စလွိုဖှဂ်နောင်မလော” လွို့ နတ်ဒေဝါကွိုဟိုးလေရယ်။ 35နတ်ဒေဝါခေါ့လယ်း “ညင်အလန်းတိုဟော် နန့်နောင်းကွိုယွောဂ်ဆိလော်ပွီး အကျွီးမှဂ်ဆုန်းဖရောဆန်ယယ့် ဖုန်းတခွိုးတိုဟော်လယ်း နန့်အပိုမောင်သဂ်ယွောဂ်လောဂ်မယ်။ အယ်းယော်ကျွောင့် နန်မွီးလော်မယ့် မှင့်မှဂ်ရယ့်လူပယ့်ငါဟော်လယ်း ဖရောဆန်ယယ့်ဆောတိုလွို့ ခိုဝိုခှန်းခေါင်ယော့လောဂ်မယ်။ 36နန့်ယယ့်အမျွိုးဖှဂ်ရယ့် ဧလိရှဗက်တအွောင်မောင့် အဆဂ်အရွာကော်တရော်ကျွီးနေခှိင်မောင် ကွိုယ်ဝမ်ဆိနေပွီး လူပယ့်ယော့တို့မောင်ဖှဂ်ရယ်။ လူပယ့်မယော့နောင်ဘူးလွို့ဟိုးနေကျော့ပေမယ့်လယ်း ဆူဟော် ကွိုယ်ဝမ်ဆွောင်နေတော်မောင် ချောဂ်‌လော့တအွောင် ဆိနေပီဖှဂ်ရယ်။ 37အကျွောင်းမောင်ကော ဖရောဆန်အတွမဖှဂ်နောင်ရယ့်အယော်ဆွိုလွို့ စော်မောင့်မဆိဘူး” လွို့ ဟိုးလေရယ်။ 38အယ်းနွောဂ်မောင် မာရိခေါ့ “ငေါ်ဟော် ဖရောဆန်ယယ့် အစေခေါင်တယွောဂ်ဖှဂ်ပေါ်ရယ်။ နန်ဟိုးရယ့်စကောအတောင်း ငေါ့အပိုမောင်ဖှဂ်ပေါ်စေ” လွို့ ဟိုးလေရယ်။ အယ်းနွောဂ်မောင် နတ်ဒေဝါဟော်လယ်း မာရိနောင်းခေါ့နေထွဆိုးလေရယ်။ 39ရတ်နယ်းနယ်းအကျော်မောင် မာရိဟော်အဆန်သင့်ပှန်ပွီး ဇာခရိနေထောင်ယော် ယုဒပှယ်မောင်ဆိရယ့် တွောင်ပိုမွှို့တမွှို့ကွိုအမှန်ဆိုးလေရယ်။ 40အယ်းနေယော်ကွိုယွောဂ်ရယ့်အခေါ် ဆူဟော် ဇာခရိယယ့် အိင်ထားကွိုဝမ်ပွီး ဇာခရိမိင်းမော့ဖှဂ်ရယ့်ဧလိရှဗက်ကွို နွောဂ်ဆဂ်လေရယ်။ 41ဧလိရှဗက်ဟော် မာရိယယ့် နွောဂ်ဆဂ်စကောကွို ကျော့လောဂ်ယော့တော်နောင့် ဆူ့ယယ့်ခှေးဖောဂ်ထားခေါ့ လူပယ့်ငါဟော် ပျိုဆွမ်လွို့တလန့်နွိလဂ်ပွီး ဧလိရှဗက်ဟော်လယ်း ညင်အလန်းတိုယယ့် ဦးဆွောင်လောင်းပျော့မုအွောဂ်မောင်ဆိနေရယ်။ 42ဧလိရှဗက်ဟော် မာရိကွို “ဖရောဆန်ဟော် နန့်ကွို တချောအမျွိုးဆမီးအောလုန်းထဂ် ကွောင်းကျွိုးချောင်းဆော်အလုန်းစုန်ကွို ပေးပွီး နန်မွီးလော်မယ့်လူပယ့်ငါဟော်လယ်း ကွောင်းကျွိုးချောင်းဆော်အလုန်းစုန်ကွို ပေးလောဂ်မယ်။ 43ငေါ့နောင်းကွို အဆန်သခန်ယယ့်မွေ့ဟော် စော်ကျွောင့်ယွောဂ်ဆိလော်ယော့သလော၊ စနန်အကျွောင်းကျွောင့် ဟော်လွိုကွောင်းမှဂ်ရယ့်အယော်ကွို ငေါ်ခေါင်စောယော့သလော။ 44ငေါ့ယယ့်ခှေးဖောဂ်ထားခေါ့ လူပယ့်ငါဟော် နန့်ယယ့်နွောဂ်ဆဆောင်ကွို ကျောလောဂ်ယော့ခှိင်မောင် ပျိုဆွမ်လွို့ နွိလဂ်ပေါ်ရယ်။ 45ဖရောဆန်ယယ့်ဆတန်းစကောဟော် အမင်တကာဖှဂ်လော်ပေါ်လောဂ်မယ်လွို့ နန်ယုန်ကျည်ရယ့်အတွကျွောင့် နန်ဟော် တကာပယ်းမန်ဂလော်ဆိပေါ်ရယ်” လွို့ ကှာပနန်းရယ့်အဆောင်နောင့်အိုဟဂ်လေရယ်။ 46အယ်းအခေါ် မာရိခေါ့လယ်း “ငေါ့ယယ့်စိနလုန်းနောင့်အတူ ထော်ဝရော့ဖရောဆန်ကွို ခှီးမွမ်းပေါ်ရယ်။ 47ပွီးယန် ငေါ့ယယ့်စိနလုန်းဟော်လယ်း ကာတန်ဆန်ဖရောနောင်းမောင် အောရော့ပျိုဆွမ်ယော့ပေါ်ရယ်။ 48အကျွောင်းမောင်ကော ငေါ်ဟော် ကွိုယ်တော်ယယ့် နိကှော့ရယ့်အစေခေါင်ဖှဂ်ပေမယ့် ဆူဟော် ငေါ့ကွို မမေ့ထောပေါ်။ ခုအခှိင်ခေါ့စော့ပွီး နွောင်လော်မယ့် လူရယ်အောလုန်းဟော် ငေါ့ကွို မျဂ်နော်ဆော်ပေးခေါင်ယော့ဆူလွို့ ဟိုးကျော့လောဂ်မယ်။ 49စော်ကျွောင့်လောဟန်ကော တခွိုးတိုကျွီးမှဂ်ရယ့် ဖရောဆန်ယယ့်နောင်မယ်ဟော် ငေါ့အပိုနောင်း မှင့်မှဂ်ရယ့်အယော်ရယ်ကွို သဂ်ယွောဂ်စေခယ့်ပွီး ဆူ့ယယ့်နောင်မယ်ဟော်လယ်း မှဂ်မှင့်တိုမူရယ်။ 50ဖရောဆန်ဟော် ခေတ်အဆဂ်ဆဂ်မောင် ဆူ့ကွို ယုန်ကျည်ကွိုးကွာရယ့်လူရယ်နောင်း မေတ္တော်ဂရုနော်ကွို အစန်အမှားထန်ထန်ဆောဆောပျော့လေရယ်။ 5151ဆူယော် လူအပွေါင်းတွို့ကွို ဆူ့ယယ့်ကျွီးမောရယ့်တခွိုးတိုကွို ပျော့တိုမူပွီး မိမိတွို့ယယ့်စိနလုန်းအတွမ်းမောင် မာန်မော်နော့ထွောင်လွားနေဆူအပွေါင်းတွို့ကွို အနောင်ယူတိုမူပီ။ 5252ဆူဟော် အော်နော်ကျွီးမောရယ့်မန်းတွို့ကွို ဆူတွို့ယယ့်အခွမ့်အော်နော်ခေါ့နေ ဖာဆောလောဂ်ပွီး နိခှော့တတ်ရယ့် လူအောလုန်းတွို့ကွို ပှယ့်စုန်ရယ့်ဆူမျောဖှဂ်စေပေါ်ရယ်။ 53ဖရောဆန်ဟော် ငတ်မွဂ်နေရယ့်ဆူတွို့ကွို ကွောင်းရယ့်အယော်ရယ်နောင့် ပှယ့်စုန်စေပွီး ကျွာဝို့ချောင်းဆော်ရယ့် ဆူရယ်ကွို စော်မောင့်မပေးဝါးနောင့် စေခွှဂ်တိုမူရယ်။ 54ဖရောဆန်ဟော် ငေါ်တွို့ယယ့်အာဗြဟံနောင့် ဆူ့ယယ့်မျွိုးရွိုးတွို့အပို အစန်ထော်ဝရော့ကျွီးမောရယ့်မေတ္တော်ဂရုနော်မေတ္တော်တိုထောဆိမယ်လွို့ ကတိတိုပေးခယ့်ရယ်။ 55အခုအခေါ်မောင် ဖရောဆန်ဟော် ကတိတိုကွိုဆတိယော့လေပီ။ အယ်းယော်ကျွောင့် ဆူဟော် ငေါ်တွို့နောင့် ဆူ့ယယ့်အမုတိုကွိုထောင်းဆွောင်ဆူအစ္စရယ်းလူမျွိုးအောလုန်းကွိုကူညီလေပီ” လွို့ ဖရောဆန်ယယ့်ဂုဏ်တိုကွို ခှီးမွမ်းလေရယ်။ 56အယ်းနွောဂ်မောင် မာရိဟော် ဧလိရှဗက်နောင့်အတူ ဆုန်းလော့လွောဂ်နေထောင်ပွီးရယ့်အခေါ် နာဇရက်မွှို့မောင်ဆိရယ့် ဆူ့ယယ့်အိင်ကွိုပှန်လေရယ်။ 57အယ်းနွောဂ်မောင် ဧလိရှဗက်ဟော် မွီးဖွို့အခှိင်ကှော့လော်ရယ့်အခေါ် ဆောယွောဂ်ကျောတယွောဂ်ကွို မွီးလေရယ်။ 58ဧလိရှဗက်အပိုမောင် ဖရောဆန်ဟော် ကျွီးမောရယ့်မေတ္တော်ဂရုနော်ပျော့ပုန်ကွို ကျောဆိဆကျော့လွို့ ဆူ့ယယ့်အိင်နီးခှန်းမျောနောင့် အမျွိုးမျောဟော် ဆူနောင့်အတူပျိုဆွမ်ဝုန်းဆော် ကျော့ယော့လေရယ်။ 59အယ်းနွောဂ်မောင် ဆတ်ရဂ်မွှောဂ်ရယ့်နေ့မောင် အယေဖျောခှီးခှန်းmမန်ဂလော် လွိုမျွိုး လုတ်ဆွောင်ဖွို့ ဗိမာန်တိုကွိုလော်ခယ့်ကျော့လေရယ်။ ဆူတွို့ဟော်လူပယ့်ငါယယ့်နောင်မယ်ကွို ဖော့ဖှဂ်ဆူဇာခရိယယ့် နောင်မယ်လွိုမျွိုးပေးခှန်ကျော့ရယ်။ 60ဟော်ပေမယ့် မွေ့ဖှဂ်ဆူခေါ့ “မဟွိဘူး ဆူ့နောင်မယ်ကွို ယောဟန်လွို့ပယ်းခိုယော့မယ်” လွို့ ဟိုးလေရယ်။ 61အယ်းအခေါ် လူအပွေါင်းတွို့ခေါ့လယ်း ဧလိရှဗက်ကွို “နန့်မွေ့ဆောစုထားမောင်လယ်း ယောဟန်လွို့နောင်မယ်မဆိ” လွို့ ဟိုးကျော့လေရယ်။ 62အယ်းယော်ကျွောင့် ဆူတွို့ဟော် လူပယ့်ငါယယ့် ဖော့ဇာခရိကွို လဂ်ဟန်ခှေဟန်နောင့် စလွိုမျွိုးနောင်မယ်ကွို ခိုခှန်သလောလွို့မေးကျော့လေရယ်။ 63အယ်းနွောဂ်မောင် ဇာခရိဟော် ကွှောဂ်ဆောင်ပုန်းတခှောဂ်ကွိုတွောင်းယူလောဂ်ပွီး ကွှောဂ်ဆောင်ပုန်းပိုမောင် ဆူ့ယယ့်ဆောနောင်မယ်ခေါ့ ယောဟန်ဖှဂ်ပေါ်ရယ်လွို့ ရယ်းလောဂ်လွို့ မျိုတွိယော့ဆူအောလုန်းတွို့ဟော်လယ်း အောင့်အိုးဆိုးကျော့လေရယ်။ 64အယ်းယော်ပွီးယန် ဇာခရိဟော် ခှခှန်းပယ်းစကောကွို ပှန်ဟိုးနောင်လော်ပွီး ဖရောဆန်ယယ့်ဂုဏ်ကျယ်းဇူးကွို စော့ပွီးခှီးမွမ်းလေရယ်။ 65အယ်းအဖှဂ်ပျဂ်ကွို အိင်နီးခှန်းမျောမျိုရယ့်အခေါ် အောင့်အိုးကျွောဂ်လန့်ဆိုးကျော့လေရယ်။ လူအောလုန်းတွို့ဟော် ဟော်ဆတန်းကွို ယုဒပှယ်တွောင်ပိုမောင်ဆိရယ့် နေယော်တောင်းမောင်ဟိုးဆွိုနေကျော့လေရယ်။ 66အယ်းဆတန်းတွို့ကွို ကျောဆိဆယော့ရယ့် လူအပွောင်းတွို့ခေါ့လယ်း “ဟော်လူပယ့်ငါကျွီးလော်ရယ့်အခေါ် စနန်လူမျွိုးဖှဂ်မလော” လွို့ ဆူတွို့ယယ့် စိနလုန်းထားမောင် တွယ်းပွီးတီးတွိုးဟိုးနေကျော့လေရယ်။ အကျွောင်းမောင်ကော ဖရောဆန်ယယ့်တခွိုးတိုဟော်လယ်း လူပယ့်ငါနောင့်အတူဆိနေရယ့်အတွကျွောင့်ဖှဂ်ရယ်။ 67အယ်းနွောဂ်မောင် လူပယ့်ငါယယ့်ဖော့ဖှဂ်ရယ့်ဇာခရိဟော် ညင်အလန်းတိုယယ့် ဦးဆွောင်လောင်းပျော့မုနောင့် ဖရောဆန်ယယ့်ဆတန်းစကောကွို ဟိုးကျောယော်မောင် 68“အစ္စရယ်းလူမျွိုးအောလုန်းတွို့ယယ့်အဆန်သခန်ဖှဂ်ရယ့် ဖရောဆန်ယယ့်ဂုဏ်ကျယ်းဇူးတိုကွို ခှီးမွမ်းပေါ်ရယ်။ ကွိုယ်တော်ဟော် ဆူ့ယယ့်လူမျွိုးအပွောင်းတွို့ကွို ကာတန်ဖွို့နောင့်လွဂ်မွှောဂ်ခှန်းပေးဖွို့ ယွောဂ်လော်လေပီ။ 69ငေါ်တွို့အောလုန်းအတွ ဖရောဆန်ဟော်မိမိယယ့်အစေခေါင်ဖှဂ်တိုမူရယ့် ဘရန်ဒါဝိဒ်ယယ့်မျွိုးရွိုးခေါ့နေတဆန့်ဆန်းသဂ်လော်ရယ့် တန်ခွိုးအော်နော်ကျွီးမောရယ့်ကာတန်ဆန်ကွို ပေးဆနောလေပီ။ 70ချယ့်အခှိင်ခေါ့ခယန်း ဆူ့ယယ့်မှင့်မှဂ်ရယ့်ပရောဖက်မျောခေါ့နေတဆန့် ဖရောဆန်မိင့်ပဂ်ဟော့ရယ့်အတောင်း 71ငေါ်တွို့ကွို တခွိုးကျွီးရယ့်ကာတန်ဆန်ဟော် ရန်ဆူလဂ်ထားခေါ့နေ ကာတန်မယ့်အပှင် ငေါ်တွို့ကွိုငွိုးရယ့်ဆူရယ်ယယ့်ဘေးအန်တရယ်ခေါ့နေလယ်း ကန်းလွဂ်စေမောင်ဖှဂ်ရယ်။ 72ဖရောဆန်ဟော် ငေါ်တွို့ယယ့် ဖွိုးပွောင်အဆဂ်ဆဂ်မျောအပို ဆူ့ယယ့်ကျွီးမောရယ့်မေတ္တော်ဂရုနော်တိုကွိုပျော့တိုမူ မောင်ဖှဂ်ကျွောင်းနောင့် ဆူ့ယယ့်မှဂ်မှင့်ရယ့်ကတိတိုထောဆိမှုကွို ဆတိယော့တိုမူလောဂ်မယ်လွို့ မိင့်တိုမူခယ့်ရယ်။ 73ငေါ်တွို့ယယ့် ဖွိုးပွောင်အဆဂ်ဆဂ်ဖှဂ်ရယ့်အာဗြဟံကွို ဖရောဆန်ပေးထောပဂ်ဟော့ရယ့်ကတိအတောင် 74ငေါ်တွို့ကွို ရန်ဆူရယ်လဂ်ထားခေါ့နေလွဂ်မွှောဂ်စေပွီး ငေါ်တွို့ဟော် အဆဂ်ချန်နေသမျော့ ကော်လော့လုန်း ဖရောဆန်ယယ့်ချယ့်တိုမောင် မှဂ်မှင့်ခှန်းနောင့်ရွိုးဆောဖွှောင့်မတ်ခှန်းဆိကျော့ပွီး အကျွောဂ်တရောကန်းကန်းနောင့် ဖရောဆန်ကွို ဝဂ်ပှုကွိုးကွာနောင်ကျော့မောင်” ဖှဂ်ရယ်။ 75အကျွောဂ်တရောကန်းကန်းနောင့် ဖရောဆန်ကွို ဝဂ်ပှုကွိုးကွာနောင်ကျော့မောင်” ဖှဂ်ရယ်။ 76အယ်းနွောဂ်မောင် ဇာခရိဟော် ဆူ့ယယ့်လူပယ့်ငါကွို “ငေါ့ဆောငါ၊ နန်ဟော် အမှင့်ဆုန်းဖှဂ်ရယ့်ဖရောဆန်ယယ့်ပရောဖက်လွို့ ခိုဝိုခှန်းကွိုခေါင်ယော့မောင်ဖှဂ်ပွီး ကွိုယ်တော်ယယ့်လောင်းကွိုပှန်ဆန်ဖွို့ ကွိုယ်တော်ယယ့်ချယ့်ခေါ့နေ ဆိုးယော့လောဂ်မယ်။ 77ကွိုယ်တော်ဟော် လူရယ်ယယ့်အပှဂ်ဒုစရောက်ရယ်ကွို ခွမ့်ခွှဂ်ခှန်းနောင့်ကာတန်ခှန်း အခွမ့်ကွိုပေးဖွို့ လော်နေပီဆွိုရယ့်အကျွောင်းကွို နန်ဟော်လူရယ်ကွို ဟိုးပျော့ယော့လောဂ်မယ်။ 78ဖရောဆန်ဟော် ငေါ်တွို့အပိုမောင် မေတ္တော်ဂရုနော်တိုကျွီးမောရယ့်အတွကျွောင့် ဆူ့ယယ့်လူမျွိုးရယ်ကွို ကာတန်မောင်ဖှဂ်ရယ်။ 79မနဂ်အစိုးမောင်ထွရယ့်နေမန်းဟော် အမွောင်ကွိုပျွောဂ်စေသလွိုမျွိုး ဖရောဆန်နောင်းခေါ့လော်ရယ့် မေရှိယဟော်လယ်း ဖရောကွိုမဆိဆမမျိုကျော့ရယ့်ဆူရယ်နောင့် ဆေခှန်းတရောကွို ကျွောဂ်နေကျော့ရယ့်လူရယ်ကွို ကူညီဖွို့ကျို့ယွောဂ်လော်လောဂ်မယ်။ ဆူဟော် ငေါ်တွို့အောလုန်းကွို ညိင်းခှောင်း ဆော်ယော်ရယ့်လောင်းကွို ဦးဆွောင်လောင်းပျော့ပေါ်လောဂ်မယ်” လွို့ ဟိုးလေရယ်။ 80ယောဟန်ဟော် အရွာယွောဂ်လော်ပွီး စိဓာတ်ကျောင့်ခေါင်လော်ရယ်။ ဖရောဆန်ဟော် ဆူ့ကွို အစ္စရယ်းလူမျွိုးတွို့ချယ့်မောင် အမုတိုကွိုစော့တန်လုတ်ဆွောင်စေလွိုရယ့်နေ့ရတ်မတောင်ခန်အထိ ဆူဟော် တိုးကန်တော်ရော့ထားမောင်နေထောင်လေရယ်။

Lyt til Luke 1