text: copyright The Konta New Testament The Word for the World,  audio: copyright The Konta New Testament ℗ 2018, Davar Partners International 

Ooratsa C’aak’uwa Kontaso Doona

ዬሱሲ ጮራ ኣሳ ቤዒዴ፥ ፑዴ ዴሪያ ኬሲዴ ኡቴዳ። ኣ ካሊያዋንቱ ኣኮ ሺቄዲኖ። ኡንቱንታ ሃዋዳን ያጊ ታማሪሱዋ ዶሜዳ።


«ባሬንቱ ኣያና ዴዑዋን ሂዬሳ ጊዴዳዋ
ኤሪያዋንቱ ኣንጄቴዳዋንታ፤
ኣዪሲ ጎፔ፥ ሳሉዋ ካዉቴይ ኡንቱንቱሳ።
ካዮቲያዋንቱ ኣንጄቴዳዋንታ፤
ኣዪሲ ጎፔ፥ ፆሳይ ኡንቱንታ ሚኒሳና።
ኣሺኬ ጊዴዳዋንቱ ኣንጄቴዳዋንታ፤
ኣዪሲ ጎፔ፥
ኡንቱንቱ ሳዓ ላታና።
ፂሎቴ ኮሻቲያዋንቱኔ ሳሜቲያዋንቱ
ኣንጄቴዳዋንታ፤
ኣዪሲ ጎፔ፥ ፆሳይ ኡንቱንታ ካሊሳና።
ማሪያዋንቱ ኣንጄቴዳዋንታ፤
ኣዪሲ ጎፔ፥
ፆሳይ ኡንቱንታ ማራና።
ዎዛና ጌሻቱ ኣንጄቴዳዋንታ፤
ኣዪሲ ጎፔ፥
ኡንቱንቱ ፆሳ ቤዓና።
ኣሳ ሲጌያዋንቱ ኣንጄቴዳዋንታ፤
ኣዪሲ ጎፔ፥ ፆሳይ ኡንቱንታ፥
ባሬ ናና ጊዴ ፄሳና።
ፂሎቴ ዲራው
ዬዴርሴቲያዋንቱ ኣንጄቴዳዋንታ፤
ኣዪሲ ጎፔ፥ ሳሉዋ ካዉቴይ ኡንቱንቱሳ።
«ሂንቴ ታና ካሊያ ዲራው፥ ኣሳይ ሂንቴና ቦሪያ ዎዴኔ ዋዪሲያ ዎዴ፥ ቃሲ ሂንቴ ቦላ ኢታባ ኡባ ዎርዱዋን ሃሳዪያ ዎዴ፥ ሂንቴ ኣንጄቴዳዋንታ። ሂንቴው ሳሉዋን ዎልቃማ ዎይታይ ዴዒያ ዲራው፥ ናሼቲቴ፤ ሃሹ ጊቴ፤ ኣዪሲ ጎፔ፥ ኣሳይ ሂንቴፔ ካሴ ዴዔዳ ናባቱዋ ሄዋዳን ዬዴርሴዲኖ።


«ኣሳ ኡባሲ ሂንቴ ማፂኔ ማላ፤ ሺን ማፂኒ ማልዓና ዮፔ፥ ዛሪዴ ኣ ዎቲ ማልዔኔ? ካሬ ኦሊና፥ ኣሳይ ኣ ዬ ሃሜታናፔ ኣቲን፥ ሲንው ኣይኔ ማዴና።
«ሃ ኣላሜው ሂንቴ ፖዖ፤ ዴሪያ ሁጲያን ኬፄቴዳ ካታማይ ጌማና ዳንዳዬና። ፆምፒያ ፆምፒዴ፥ ሶዪን ዴዒያ ኣሳ ኡባው ፖዓና ማላ፥ ቂያ ሳን ዎፔ ኣቲን፥ ካሚያ ሚሻ ጊዶን ቁምዒ ዎያ ኣሳይ ኦኒኔ ባዋ። ሄዋዳንካ፥ ኣሳይ ሂንቴ ኦያ ሎዖ ኦሱዋ ቤዒዴ፥ ሳሉዋን ዴዒያ ሂንቴ ኣዉዋ ቦንቻና ማላ፥ ሂንቴ ፖዑ ኣሳ ሲንን ፖዖ።

«ታኒ ሙሴ ሂጊያኔ ናባቱ ታማሪሲያዋ ዪሳናው ዬዳዋ ሂንቴው ማላቶፖ፤ ታኒ ፖላናው ዬዳዋፔ ኣቲን፥ ዪሳናው ያቤይኬ። ኣዪሲ ጎፔ፥ ታኒ ሂንቴው ቱሙዋ ኦዳይ፤ ሳሉኔ ሳዓይ ኣና ጋካናው፥ ቃሲ ኡባባይካ ፖሌታና ጋካናው፥ ሂጊያፔ ኢቲ ጫቻይካ ዎይ ቄሪ ፒዶሊካ ኣና። ሄዋ ዲራው፥ ሃ ኣዛዙዋ ኡባፔ ጉፂያ ኢቲ ኣዛዙዋ ሜንያ ኡራይ ኦኒኔ፥ ቃሲ ሃራቱካ ባሬዋዳን ሃናናዳን ታማሪሲያ ኡራይ ኦኒኔ፥ ሳሉዋ ካዉቴን ኡባፔ ጉ ጊዳና፤ ሺን ኣዛዙዋ ኦያዌኔ ሃራንቱካ ኦናዳን ታማሪሲያዌ ኦኒኔ ሳሉዋ ካዉቴን ቃ ጊዳና። ኣዪሲ ጎፔ፥ ሂንቴ ፂሎቴይ ሙሴ ሂጊያ ታማሪሲያዋንቱ ፂሎቴፔኔ ፓሪሳዋቱዋ ፂሎቴፔ ዳራና ዮፔ፥ ሳሉዋ ካዉቴ ሂንቴ ሙሌ ጌሌናዋ ታኒ ኦዳይ።
«ቤኒ ኣሳው፥ ‹ኣሳ ዎፓ፤ ኣሳ ዎዳ ኦኒኔ ፒርዴታና› ጌዳዋ ሲሴዲታ። ሺን ታኒ ሂንቴው ኦዳይ፤ ባሬ ኢሻ ሃንቄቲያ ኡባይ ፒርዴታና፤ ባሬ ኢሻ ቦሪያ ኡባይ ሻንጉዋ ፒርዳው ሺቃና፤ ቃሲ ባሬ ኢሻ፥ ‹ሎዌ› ጊያ ኡባይ ጋናሚያ ታማ ፒርዳው ሺቃና። ሄዋ ዲራው፥ ኔኒ ያርሺያሳን ያርሺሺን፥ ኔ ኢሻ ናቄዳባይ ኔው ሄዋን ሃሳዬቶፔ፥ ኔ ያርሹዋ ሄዋን ኣጋዴ ባ፤ ካሴታዴ ኔ ኢሻና ሲጌታ ዲጋ፤ ሄዋፔ ካላ ያዴ፥ ኔ ያርሹዋ ያርሻ።
«ኔና ሞቲያዋና ዎዲ ዴዒሺን ኤሌ ኣናና ሲጌታ ዲጋ፤ ሄዌ ዮፔ፥ ኢ ኔና ዳና ሲን ኣና፤ ቃሲ ዳናይ ኔና ፖሊሴው ኣ ኢሚና፥ ፖሊሲ ኔና ቃሾ ጎሌን ዬጋና። ታኒ ኔው ቱሙዋ ኦዳይ፤ ኔኒ ኢቲ ሳንቲሚ ኣቴናን፥ ኔ ማጋጩዋ ዉርሳዴ ጪጋና ጋካናው፥ ሙሌካ ቃሾ ጎሌፔ ኬሳካ።

« ‹ዎሹሞፓ› ጌዳዋ ሲሴዲታ። ሺን ታኒ ሂንቴው ያጋይ፤ ‹ማጫዉኖ ፄሊዴ ኣሞቲያ ኡባይ፥ ባሬ ዎዛና ጊዶን ሄ ዎዴ ኢናና ዎሹሜዳ።› ኔ ኡሼቻ ኣይፊ ኔና ናጋራ ኦሲሶፔ፥ ኔፔ ዎጫዴ ኦላ ኣጋ፤ ኣዪሲ ጎፔ፥ ኔ ቦላይ ሙሌካ ጋናሚያ ታማን ኦሌቲያዋፔ፥ ኣፔ ኢቱ ፓጪንቶ ኔው ሎዓ። ቃሲ ኔ ኡሼቻ ኩሺ ኔና ናጋራ ኦሲሶፔ፥ ኔፔ ቃንፃዴ ኦላ ኣጋ፤ ኣዪሲ ጎፔ፥ ኔ ቦላይ ሙሌካ ጋናሚያ ታማን ኦሌቲያዋፔ፥ ኣፔ ኢቱ ፓጪንቶ ኔው ሎዓ።


« ‹ቃሲ ባሬ ማቻቶ ዬዲያ ኦኒኔ ኢዞ ዬዲያ ፓራማ ኢሞ› ጌቴቴዳ። ሺን ታኒ ሂንቴው ያጋይ፤ ‹ባሬ ማቻታ ዎሹሜናን ዴዒሺን ዬዲያ ኦኒኔ ኢዞ ዎሹማ ኬሴ፤ ቃሲ ኣሲናይ ዬዴዳ ሚሺራቶ ኣኪያዌ ኦኒኔ ዎሹሜ።›

«ቃሲ ቤኒ ኣሳው፥ ‹ዎርዱዋን ጫቆፓ፤ ሺን ኔ ጎዳው ጫቄዳዋ ፖላ› ጌዳዋ ሲሴዲታ። ሺን ታኒ ሂንቴው ያጋይ፤ ‹ኡባካ ጫቆፒቴ›፤ ሳሉ ፆሳ ካዉቴ ኦይዲያ ጊዲያ ዲራው፥ ‹ሳሉዋን ጫቆፒቴ› ቃሲ ሳዓይ ኣ ጌዲ ዬያሳ ጊዲያ ዲራው፥ ‹ሳዓን ጫቆፒቴ›፤ ቃሲካ፥ ዬሩሳላሜ ዎልቃማ ካቲያ ካታማ ጊዲያ ዲራው፥ ‹ዬሩሳላሜኒካ ጫቆፒቴ› ኔኒ ኢቲ ቢናናካ ቦ ዎይ ካሬ ኬሳናው ዳንዳዬና ዲራው፥ ‹ኔ ሁጲያንካ ጫቆፓ።› ሺን ሂንቴ፥ ‹ኤ› ዎይ፥ ‹ጊዴና› ጊቴ፤ ሃዋንቱፔ ሃራይ ሴፃናፔ ዬ።


« ‹ኣዪፊያ ዲራው ኣዪፊያ፤ ኣቻ ዲራው ኣቻ› ጌዳዋ ሲሴዲታ። ሺን ታኒ ሂንቴው ያጋይ፤ ‹ሂንቴው ኢታባ ኦያ ኡራው ኢታን ዛሮፒቴ፤ ኦኒኔ ኔ ኡሼቻ ባጋ ሻዪያ ባቆፔ፥ ኔ ሃዲርሳ ባጋ ሻዪያካ ኣ ቤሳ፤ ኔ ሻሚጪያ ኣካናው ኢቲ ኡራይ ኔና ሞቶፔ፥ ሄ ኡራው ኔ ኮቲያካ ጉጃ ኢማ። ኦኒኔ ኔና ኢቲ ሳቲያ ኦጊያ ባሬናና ባናዳን ዎልቃንፔ፥ ኣናና ላዑ ሳቲያ ኦጊያ ባ። ኔና ዎሲያ ኡራው ኢማ፤ ቃሲ ኔፔ ታልዓና ኮዪያ ኡራዉካ ዲጎፓ።›


« ‹ኔ ላጌቱዋ ሲቃ፤ ኔ ሞርኪያ ሞርካ› ጌዳዋ ሲሴዲታ። ሺን ታኒ ሂንቴው ያጋይ፤ ሳሉዋን ዴዒያ ሂንቴ ኣዉዋሲ ናና ጊዳና ማላ፥ ሂንቴ ሞርኬቱዋ ሲቂቴ፤ ሂንቴና ሼቂያዋንታ ኣንጂቴ፤ ሂንቴና ኢፂያዋንቶ ሎዖባ ኡዲቴ፤ ሂንቴና ዬዴርሲያዋንቶ፥ ፆሳ ዎሲቴ፤ ኣዪሲ ጎፔ፥ ኢታ ኣሳዉካ ሎዖ ኣሳዉካ ፆሳይ ባሬ ኣዋ ኣዋፂሴ፤ ቃሲ ፂላቱዋሲካ ናጋራንቻቱዋሲካ ባሬ ኢራ ቡኪሴ። ሂንቴ ሂንቴና ሲቂያዋንቱ ፃላላ ሲቆፔ፥ ሂንቴው ኣይ ዎይታይ ዴዒ? ሃራይ ኣቶ፥ ናጋራንቻቱካ ሄዋዳን ኡዲኖ። ሂንቴ ሂንቴንቱ ኢሻቱዋ ፃላላ ሳሮቶፔ፥ ሃራቱ ኡዲያዋፔ ኣያባ ኣያ ኡዴዲቴ? ሃራይ ኣቶ፥ ኣዪሁዴ ጊዴና ኣሳይካ ሄዋዳን ኡዴ። ሄዋ ዲራው፥ ሳሉዋን ዴዒያ ሂንቴ ኣዉ ፖሎ ጊዶዋዳን፥ ሂንቴካ ፖሎ ጊዲቴ።

Lyt til ማቶሳ 5