Populære bibelvers fra Jan 21

Del

Lò yé fin manjé, Jézi palé pou Pyèr: “Simon, pitit Jan, ès to kontan mo plis ki sa ya?” Li di li: “Wi, Mèt, to savé byen mo kontan to.” Jézi di li: “Bay mo timouton-yan manjé.” Li viré doumandé li roun dézyèm fwè: “Simon, pitit Jan, ès to kontan mo? Li réponn: “To savé byen mo kontan to.” Jézi di li: “Bay mo timouton-yan manjé.” Epi li doumandé li roun trwazyèm fwè: “Simon, pitit Jan, ès to kontan mo? Tchò Pyèr té krazé lò Jézi doumandé li pou trwazyèm fwè-a: “Es to kontan mo? E li réponn li: “Mèt, to konèt tout bagaj, to savé mo kontan to.” Jézi di li: “Bay mo mouton-yan manjé.”

Sa mo ka di to-a, a lavérité, lò to té pli jenn, to té ka maré to ren to menm, é to té ka alé koté to lé, mé lò to ké vyé, to ké louvri to bra pou rounnòt maré to ren é mennen to koté to pa ké lé alé.”

Li di yé: “Voyé zòt tranmay bò koté drèt di kanno-a é zòt ké fè roun bèl kout pèch.” Yé jité yé tranmay, mé atò yé pran tèlman poson yé pa té menm pouvé ralé l bò kanno-a.

Simon Pyèr di ròt-ya: “Mo ka alé fè roun kout pèch.” Yé di li; “Nou osi, nou ka alé ké to.” Yé pati é yé monté an kanno-a. Mé tout lannwit-a pasé é yé pa pran roun poson.