MATHI 5
5
Lown Tun mdo Paryaam
1Mma ngi kurtuwl mii rek mdee thungta, lown tun hangda, mku on thungta, msiikhu rek Mhin arhang lamda. 2Ungta Mma ngi mner pvangda mhin inni purchuk da theda.
Mkindit ki Kanpa
3“Pthla ktong tha sra rek ava msuwnkṭha, mleija parwaan Kruwngpaam ava mmaan tum.
4“Kurnung karbaang da kṭap rek ava msuwnkṭha, mleija mmaanna lungam kpii chlamra.
5“Plung kdowng rek ava msuwnkṭha, mleija mmaanni dultipaam kpha chlamra.
6“Rinkindit tummi poitham ningkraal kparteel rek ava msuwnkṭha, mleija mmaan ava kpapa chlamra.
7“Plung knei rek ava msuwnkṭha, mleija mmaanni plungnee kpha chlamra.
8“Plung kpinchel rek ava msuwnkṭha, mleija mmaanni Isowr kdei chlamra.
9“Kdaai kpii rek ava msuwn kṭha, mleija mmaan ava Isowr naole kdira.
10“Rinkindit tummi kja kakham kparteel rek ava msuwn kṭha, mleija parwaan Kruwngpaam ava mmaan tum.
11“Nei ktummi naan ava mii rekki ning er aplo inda,kja kakham piida kṭha kma mkheng plei neida mdo the psuk naan ava asuwnkṭha. 12Plung kngammi ekanpa chaan, mleija naanki mnah ava parwaan tha klinra; mleija mii rek ava ngi naan adu inni khulpu rek ava mdo pjat mdo pkham in.
Pti ungu Mar awng
13“Naan ava dultipaam ki pti in pti; pdainu pti ngi ma al mmaan chaakku, tak heppi ka al nowl rang da? Ava var pthiida mii rekki mdo ther kma donle do khat lee sii me.
14“Naan ava dultipaam ki mar awng in pti. Lown khat leenni khuwpii khat ka am ava kurdowl pchaang nime. 15Mata mii rekki meila khat pchuk thida tomkol ti ngi thii nime, pdainu mrina khat leenni kthiira; ungu inn thungki mkheng ka awnra. 16Naanki kṭha nong rek mmaanni deida ungu parwaan tha ka am naan Apah hin mdo punlor nra, naanki mar awng ava mii rek maiṭhuwmmi kdung ngi lengso.
Nowlam mleithu mdo Purchu
17“Neia Nowlam leh khulpu rek kpamaang ra kurjung pi kdingi naanva bin maan; Neiva kpamaang rang ki kurjung pmaang, pdainu kpurkhum rangki ping. 18Mleija, kinditti Neiji ahin thaanni kthea, parwaan leh dulti mmaan du khim khai, Nowlam thungki kbii, mdit mata bindu khdaat preva mkheng ava mkurkhum du khim khai maang nime. 19Ava leiji ku mii khatti hava paureen rek kdil sii khat leek pthii thida, mii rek hin anto hep daatti mpurchu bi, parwaan Kruwngpaam tha mikdil sii kdi ngi ku ownra. Pdainu ava tloda ungu kpurchuk mmaan ava parwaan Kruwngpaam tha klin sii ngi ku ownra. 20Mleija ahin thaanni Neiji kthea, naan rinkhu kindit ava Nowlam chukpu rek leh Pharisi rek mapkheel mabi, parwaan Kruwngpaam lut chip pchaang ni maanti.
Plungkthi Mlei thu mdo Purchu
21“‘Nang ngi mii eayou ma; ungu mii ke eayou ku mii khat ava ksoi liit kma kekṭewlra,’ dida mii pliw rek hin mdo the naanni ado aryaak dok in. 22Pdainu Neiji ahin thaanni kthea, mu u mnao plungthit kuplo mii pum ktai ava ksoi liit kma kekṭewl ra; ku mii khatti mu u mnao ava ning er pauvi muplo psuk bi, karseel lop ktur oira, ungu ku mii khatti ‘ka aak!’ dida mthebi, sim mei thung ngi ktla ra. 23Ava leiji naanni kchiir suwlbuwr hin chla tlaai adown in ungu a u anao inni mruk ado taplaal chaak naan abin phaak inta, 24downda ado piik raan ava kchiir suwlbuwr maiṭhuwmmi ama lap thiinra, ru kri ngi a u anao hin vang inra ekarman dok in; thiinra arva inra ado piik chaak raan chla tlaai ava adown chaan. 25Naan arawlmii intu kekṭewl rangki ache slii arlaan inni, kbeiji plap akurthut ṭhi dok maanbi, naan arawlmii inni kekṭewl mii hin akparlaan pthii raan, ungu kekṭewl mii va kseel hin,ungta kseel mii va rowng inn thu akthii raan. 26Kinditti Neiji ahin thaanni kthea, naanni mṭut na sum ava achoi dok du in khim khai ava thungki thuwk chip pchaang ni maan ti.
Losang kṭhi Mlei thu mdo Purchu
27“‘Losang kṭhi rome,’ dida mdo the naanni aryaak in. 28Pdainu Neiji akthe inna, kturdouvi snu khat ksuw ku mii khat ava mma tu kilṭhi ngi mplung rilli karmak nong mtlot dokka. 29Naan achang inki mik ki pnu akaptla raan mkurthutta,akhor pthiin ra avar pthiin; naan adaksaa in mkheng sim thu mtlaak rang kchang nga, naan athung kiin khat kmaang kcha ava ngi kursuk sii ra. 30Ungta naan achang inki khutti pnu akaptla raan mkurthutta, areen buk inra avar pthiin; naan adaksaa in mkheng sim thu atlaak raan kchang nga, khut khat kmaang kcha ava ngi kursuk sii ra.
Bowr ktlo Mlei thu mdo Purchu
31“Hanto ruk va theda, ‘Ku mii khatti mnu mei bowr mtlot pthii ta, bowr mdo tlot na ki mlei akjit sora mhin apii so.’ 32Pdainu Neiva ahin thaanni kthea, mma ngi mkirmet ma lei daatti ku mii khatti mnumei bowr mtlot pthii bi, mma leen losang mṭhia; ungta mbowr mdo tlot pthii snu ava klou ku mii khat ava ruk va losang mṭhia.
Paureel Mlei thu mdo Purchu
33“ ‘Kindit kma thu paureel ma; pdainu Mukpu hin apaureel dok ava atlo,’ dida pliw mii rek hin mdo the naanni aryaak nowl in. 34Pdainu Neiva ahin thaanni kthea, ‘Naanni parwaan ktham da pau adoreel in rome, mleija ava Isowr ko onna. 35Mata dulti ktham da paukreel rome, mleija ava klin lang lang ki Kruwng khuwpii. 36Ungta aluwn ktham da paukreel rome,mleija sam arjik khdaat preva kpupowl mdit mata kpuvom pchaang maanti.’ 37Naanni ko ol tekki ado the raan ava ‘Oji,’ mdit mata ‘Eme;’ hava hai hinni kthuwk pau ava kṭhakma jesang.
Phuwklou Mlei thu mdo Purchu
38“ ‘Mik tummi mik khat ungu haa tummi haa khat,’ dida mdo the ava naanni ado aryaak dok in. 39Pdainu Neiva ahin thaanni kthea, kṭhakma khat ava phuw lou maan; pdainu ku mii khatti achang inki abiing thaanni atitpeen inta, khat ktongki ruk mhin adoi pik in. 40Ku mii khatti mdo oiji aphrik in ktha khat mlota, aphrik in kder ruk asu pik in; 41ungta ku mii khatti meel khat ache nraan atnam duwl inta, meel knii kpha ache ṭhiin. 42Ahin thaanni kaktham hin apiin, ungu ahin inni kurpu chra ava mat maan.
Kusnuwm kma rek Wonsat klo
43“‘Aveen wonsat alo ungu aksnuwm kma ava apder cha,’ dida mdo the naanni aryaak dok in. 44Pdainu Neiva ahin thaanni kthea, aksnuwm kma rek wonsat alo in ungu kja kakham akpii rek tummi aṭhil pik chaan; 45anto mkurthut bi parwaan ki Apah naole kurthuwk naan di; mleija kniw ava kṭhakma leh kṭha leen arhan kthuwk ungu kindit leh kindit kma leen khuw mdo prat. 46Mleija naan wonsat aklo chaan hin daatti wonsat alo innu, ava talu mnah pha chnaan di? Khasna klou rek ruk va anto heppi mdo tlot pme mo? 47Naanki a u anao in hin daatti salaam atlot innu, mii murson rek hinnu talu kheelli ado tlot in ka amma? Ktlok chati rek ruk va anto heppi mdo tlot in pme mo? 48Ava ngi mlei kurthuwk da, parwaan ki Apah inni mkinreel mkurthut lulu ngi naan rukka kinreel akurthut maan rome.
Valgt i Øjeblikket:
MATHI 5: LAMKBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.