Mātaio 13
13
Te parabole o te rūrū 'ua
(Māreko 4.1-9; Luka 8.4-8)
1I taua rā ra, kua 'akaruke atura a Iēsū i taua 'are ra, no'o i'ora ki te pae roto ra. 2#Luk 5.1-3'E mānganui te urupū tei 'uipā mai ki aia ra, 'aere atura aia ki runga i tēta'i poti, no'o i'ora ki reira. Tē tū 'ua maira 'oki te tangata tini i ta'atai. 3'E mānganui tāna 'āpi'i'anga i a rātou nā roto i te au tuatua parabole, nā kō maira,
“Inā, 'aere atura te rūrū 'ua e rūrū i te 'ua. 4Ē tei te rūrū'anga ra, topa i'ora ēta'i 'ua ki te pae arāta'a, ē kua 'aere maira te au manu o te reva, kai i'ora i te reira. 5Topa i'ora ēta'i 'ua ki te ngā'i paikea, kāre i ra'i te one i reira, ē tutupu vave 'ua atura, nō te mea, kua pāpaku 'ua te one. 6Ē e rā'ia i'ora, vera atura ia; ē nō te kore 'e aka, mae rava atura ia. 7Topa i'ora ēta'i 'ua ki rotopū i te ngāngā'ere, tupu akera te ngāngā'ere, pōkia atura rātou. 8Topa i'ora ēta'i 'ua ki te ngā'i one meitaki ē kua 'u'ua i'ora, tēta'i e ta'i 'ānere, tēta'i e ono nga'uru, ē tēta'i e toru nga'uru. 9'E taringa tōna, e 'akarongo aia.”
Te 'akakoro'anga o te au parabole
(Māreko 4.10-12; Luka 8.9-10)
10Kua 'aere maira te au pipi ē kua ui maira ki a Iēsū, “'E a'a koe i tuatua atu ei ki a rātou nā roto i te au tuatua parabole?”
11Kua pa'u atura a Iēsū ki a rātou, “Kua 'ōronga'ia mai ki a kōtou te kite i te au mea ngaro o te bāsileia o te ao ra, kāre rāi i 'ōronga'ia ki a rātou. 12#Māt 25.29; Mār 4.25; Luk 8.18; 19.26Nō te mea, tēta'i 'ua atu tei pu'apinga'ia ra, 'e ma'ata atu te ka 'ōronga'ia atu ki aia kia ma'ata roa atu tāna; ē tēta'i 'ua atu kāre āna ra, e rave kē'ia rāi tāna. 13Tēia te tumu e tuatua atu nei au ki a rātou nā roto i te au tuatua parabole: kāre rātou e kite, noa atu ē tē 'ākara nei rātou; ē kāre rātou e 'akarongo ē kāre rātou e mārama, noa atu ē tē 'akarongo nei rātou. 14#Isa 6.9,10Ē kua tupu ki a rātou te toto'u a Īsaia, ko tei nā kō ē,
‘Ka 'akarongo kōtou ki ō kōtou taringa ē kāre rāi e mārama,
ē ka 'ākara kōtou ki ō kōtou mata ē kāre rāi e kite.
15Kua mātorutoru 'oki te ngākau o tēianei 'iti tangata,
ē kua 'akarongo ngatā tō rātou taringa
ē kua tōpiri i o rātou mata;
ko te kite ā'ea rātou ki o rātou mata,
ē te rongo ā'ea tō rātou taringa
ē te mārama ā'ea o rātou ngākau
ē te 'aka'āriu ā'ea'ia mai rātou
ē ka 'akaora au i a rātou.’
16 #
Luk 10.23,24 “'E ao rā tō kōtou mata tē 'ākara nei ia, ē tō kōtou taringa tē 'akarongo nei ia. 17Koia mou tāku e karanga atu ki a kōtou na, 'e mānganui te au peroveta ē te au tangata tuatua tika i 'inangaro i te 'ākara i te au mea tā kōtou e 'ākara nei, ē kāre ake nei rātou i 'ākara, ē i te 'akarongo i te au mea tā kōtou e 'akarongo nei, ē kāre ake nei i 'akarongo.”
Te 'āite'anga o te parabole o te rūrū 'ua
(Māreko 4.13-20; Luka 8.11-15)
18“Ē tēianei ka 'akarongo maina i te 'āite'anga o te parabole o te rūrū 'ua nei. 19Kia 'akarongo mai tēta'i 'ua atu tangata i te tuatua o te bāsileia nei ē kāre aia i mārama, tē 'aere maira te Mea Kino e rave atura i tei rūrū'ia ki roto i tōna ngākau. Ko te 'ua tēia tei rūrū'ia ki te pae arāta'a ra. 20Ko tei rūrū'ia ki te ngā'i paikea ra, ko ia tei 'āriki viviki i te tuatua ma te rekareka i te 'akarongo'anga. 21Kāre rā i aka'ia i roto i aia, 'e tāpū'anga poto 'ua tāna. Kia tupu 'oki tēta'i tūmatetenga, mē kāre rā, tēta'i tākinga kino'anga nō te tuatua, takakē tākiri atura ia aia i reira ra. 22Ko tei rūrū'ia ki rotopū i te ngāngā'ere ra, ko ia tei 'akarongo mai i te tuatua, pōkia atura te tuatua i te apiapi o te ora'anga nei ē te pikika'a o te 'apinga nui, ē kāre atura i 'ua mai. 23Kāreka tei rūrū'ia ki te ngā'i one meitaki ra, ko ia tei 'akarongo mai i te tuatua ē kua mārama. E 'u'ua maira ia, tēta'i ta'i 'ānere, tēta'i ono nga'uru, ē tēta'i toru nga'uru.”
Te parabole o te tītā i rotopū i te sītona
24Kua taki 'aka'ou atura a Iēsū i tēta'i parabole ki te tangata tini, nā kō atura, “E 'aka'āite'ia te bāsileia o te ao ra ki tēta'i tangata tei rūrū i te 'ua meitaki ki tōna kāinga. 25Kia moe rā te au tangata, kua 'aere maira tōna 'enemi, kua rūrū i'ora i te tītānia ki rotopū i te sītona, 'aere atura. 26E kao atura te 'uri 'ōu ra, ē 'ua akera, kitea katoa i'ora te tītānia. 27Kua 'aere maira te au tāvini o taua pū kāinga ra, kua ui maira ki aia, ‘E te 'atu, kāre āinei 'e au 'ua meitaki tā'au i rūrū ki roto i tō'ou kāinga? Nō 'ea rā te tītānia?’ 28Kua pa'u atura aia ki a rātou, ‘Nā tēta'i 'enemi te reira i rūrū.’ Kua ui maira te au tāvini ki aia, ‘Ka 'inangaro āinei koe kia 'aere mātou e 'uti'uti i te reira?’ 29Kua pa'u atura aia, ‘Auraka, ko te kiriti katoa ā'ea kōtou i te sītona i te 'uti'uti'anga i te tītānia. 30E 'akaruke 'ua, kia tupu kāpipiti ē kia mou. Ē kia tae ki te tuātau kokoti'anga i te mou ra, ka 'akakite au ki te aronga kokoti ra, E nā mua i te 'akaputuputu i te tītānia ē ruru 'aere nō te a'i; 'akaputu rā i te sītona ki roto i taku 'are vairanga ra.’ ”
Te parabole o te 'ua sinapi
(Māreko 4.30-32; Luka 13.18-19)
31Kua taki 'aka'ou atura a Iēsū i tēta'i parabole ki te tangata tini, nā kō atura, “E 'āite te bāsileia o te ao ra ki tēta'i 'ua sinapi i rave'ia e tēta'i tangata ē kua tanu'ia ki roto i tōna kāinga. 32Ko te 'ua meangiti ia o te au 'ua tini rava rāi, kāreka kia tupu rā, 'e ma'ata atu ia i te au rākau rikiriki. E riro 'ei pū rākau, ē e 'aere mai te au manu o te reva e tō mai ki runga a'o i tōna au rārā.”
Te parabole o te 'ōpue
(Luka 13.20-21)
33Kua taki 'aka'ou atura a Iēsū i tēta'i parabole ki te tangata tini, nā kō atura, “E 'āite te bāsileia o te ao ra ki tēta'i va'ine i kā'iro e 'ā ngauru litera 'ōpue ki te varāoa mata. Kua 'aka'ōpue'ia i reira te varāoa katoa ra.”
Tā Iēsū 'akapu'apinga'anga i te au parabole
(Māreko 4.33-34)
34Ko tēia katoa nei au mea tā Iēsū i 'āpi'i atu i te tangata tini nā roto i te au tuatua parabole ra, ē kāre rava i 'āpi'i atu i a rātou ma te kore e tuatua parabole, 35#Sal 78.2kia tupu tei 'akakite'ia mai nā roto i te peroveta i te nā kō'anga mai ē,
“E tuatua tōku va'a nā roto i te au tuatua parabole,
e 'akakite atu au i te au mea ngaro mei te 'akamata'anga mai o tēianei ao.”
Tē 'akamārama nei a Iēsū i te 'āite'anga o te parabole o te tītā
36Tuku atura a Iēsū i te tangata tini ra, 'aere atura aia ki roto i te 'are. Ē kua 'aere maira tāna au pipi, nā kō maira ki aia, “E 'akamārama mai koe ki a mātou i te 'āite'anga o te tuatua parabole o te tītānia i roto i te kāinga.”
37Kua pa'u atura aia ki a rātou, nā kō atura, “Ko tei rūrū i te 'ua meitaki ra, ko ia te Tamaiti a te Tangata; 38te kāinga ra, ko ia tēianei ao; te 'ua meitaki ra, ko ia te tamariki o te bāsileia; ē te tītānia ra, ko ia te tamariki a te Mea Kino ra; 39ko te 'enemi i rūrū ra, ko ia te Tiāporo; te mou ra, ko ia te 'openga o tēianei ao; ē te aronga e kokoti, ko ia te au 'āngela. 40Ē mei te tītānia e 'akaputuputu'ia ē e ta'una'ia ki te a'i ra, pērā katoa kia tae ki te 'openga o tēianei ao. 41E tono mai te Tamaiti a te Tangata i tāna au 'āngela, ē nā rātou e 'akaputuputu mai mei roto mai i tōna bāsileia i te au tumu kātoatoa nō te 'ara ē te au tangata tei rave i te kino; 42ē ka titiri atu ei i a rātou ki roto i te umu a'i ra, tei reira te auē'anga ē te pākati'angā ni'o. 43'Ei reira 'oki te aronga tuatua tika e kakā mai ei i roto i te bāsileia o tō rātou Metua mei te rā ra. 'E taringa tōna, e 'akarongo aia.”
Te parabole o te 'apinga 'u'una'ia
44“E 'āite te bāsileia o te ao ra ki tēta'i 'apinga pu'apinga i 'u'una'ia i roto i te koro. E kitea i'ora e tēta'i tangata, kua 'u'una rava atura aia, ē nō tōna rekareka, kua 'aere atura e 'oko atu i te au 'apinga tini rava rāi nāna ra, ē kua 'oko maira i taua kāinga ra.”
Te parabole o te poe
45“E 'āite 'aka'ou te bāsileia o te ao ra ki tēta'i tangata 'oko'oko tei kimi i te au poe mēmeitaki ra. 46E kitea i'ora e ia tēta'i poe meitaki ma'ata roa ra, 'aere atura aia, 'oko atura i te au 'apinga katoa nāna ra e 'oko mai i te reira.”
Te parabole o te kupenga
47“E 'āite 'aka'ou te bāsileia o te ao ra ki tēta'i kupenga i tukuna'ia ki raro i te tai, ē tā 'ei mai i te au ika 'e mānganui te tū. 48E kī akera, takitaki maira te au ravakai i te reira ki uta, no'o i'ora ē tuku atura i te au ika mēmeitaki ki roto i te au 'āriki, kua titiri rā rātou i te mea kikino. 49Pērā katoa kia tae ki te 'openga o tēianei ao. Ka 'aere mai te au 'āngela e 'akatakakē i te aronga kino mei roto mai i te aronga tuatua tika, 50ē e titiri atura i te aronga kino ki roto i te umu a'i ra, tei reira te auē'anga ē te pākati'angā ni'o.”
Te au tuatua mou 'ōu ē te au tuatua mou ta'ito
51Kua ui atura a Iēsū ki tāna au pipi, “Tē mārama āinei kōtou i tēia au mea katoa nei?”
Kua pa'u atura rātou ki aia, “Āe.”
52Kua tuatua atura aia ki a rātou, “Nō reira, ko te au Pū'āpi'i Ture katoa tei 'āpi'i'ia nō runga i te bāsileia o te ao ra, e 'āite ia ki tēta'i pū ngutu'are tei 'apai mai i te au mea 'ōu ē te au mea ta'ito nō roto mai i tāna ngā'i vairanga.”
Tē kōpae'ia nei a Iēsū i Nāzarēta
(Māreko 6.1-6; Luka 4.16-30)
53E oti akera i a Iēsū te reira au tuatua parabole, 'akaruke atura aia i te reira ngā'i. 54Ē i tōna tae'anga atura ki tōna 'ua'orāi 'ōire, kua 'āpi'i atura aia i tō reira i roto i tō rātou sūnago. Ē nō reira, kua vā 'ua maira rātou ē kua uiui ē, “Nō 'ea mai 'oki te pakari ē te au 'akairo mana a tēianei tangata? 55Kāre āina tēia te tamaiti a te kāmuta ra? Kāre āina ko Māria te ingoa o tōna metua va'ine? Ē kāre āina ko Iākōbo, ko Iōsēpha, ko Simona ē ko Iūda tōna 'ai taeake? 56Ē kāre āina tē no'o nei tōna 'ai tua'ine ki ō tātou nei? Nō 'ea mai 'oki te au rāvenga a tēia tangata?” 57#Ioa 4.44Maitu i'ora rātou i aia.
Kua tuatua atura a Iēsū ki a rātou, “Kāre tēta'i peroveta e ngere i te ngāteitei, māri rā i tōna 'ua'orāi 'ōire ē tōna 'ua'orāi 'enua.” 58Ē kāre akera aia i rave i te au 'akairo 'e mānganui i te reira ngā'i nō tō rātou 'irinakikore.
Valgt i Øjeblikket:
Mātaio 13: CIMRNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.
Mātaio 13
13
Te parabole o te rūrū 'ua
(Māreko 4.1-9; Luka 8.4-8)
1I taua rā ra, kua 'akaruke atura a Iēsū i taua 'are ra, no'o i'ora ki te pae roto ra. 2#Luk 5.1-3'E mānganui te urupū tei 'uipā mai ki aia ra, 'aere atura aia ki runga i tēta'i poti, no'o i'ora ki reira. Tē tū 'ua maira 'oki te tangata tini i ta'atai. 3'E mānganui tāna 'āpi'i'anga i a rātou nā roto i te au tuatua parabole, nā kō maira,
“Inā, 'aere atura te rūrū 'ua e rūrū i te 'ua. 4Ē tei te rūrū'anga ra, topa i'ora ēta'i 'ua ki te pae arāta'a, ē kua 'aere maira te au manu o te reva, kai i'ora i te reira. 5Topa i'ora ēta'i 'ua ki te ngā'i paikea, kāre i ra'i te one i reira, ē tutupu vave 'ua atura, nō te mea, kua pāpaku 'ua te one. 6Ē e rā'ia i'ora, vera atura ia; ē nō te kore 'e aka, mae rava atura ia. 7Topa i'ora ēta'i 'ua ki rotopū i te ngāngā'ere, tupu akera te ngāngā'ere, pōkia atura rātou. 8Topa i'ora ēta'i 'ua ki te ngā'i one meitaki ē kua 'u'ua i'ora, tēta'i e ta'i 'ānere, tēta'i e ono nga'uru, ē tēta'i e toru nga'uru. 9'E taringa tōna, e 'akarongo aia.”
Te 'akakoro'anga o te au parabole
(Māreko 4.10-12; Luka 8.9-10)
10Kua 'aere maira te au pipi ē kua ui maira ki a Iēsū, “'E a'a koe i tuatua atu ei ki a rātou nā roto i te au tuatua parabole?”
11Kua pa'u atura a Iēsū ki a rātou, “Kua 'ōronga'ia mai ki a kōtou te kite i te au mea ngaro o te bāsileia o te ao ra, kāre rāi i 'ōronga'ia ki a rātou. 12#Māt 25.29; Mār 4.25; Luk 8.18; 19.26Nō te mea, tēta'i 'ua atu tei pu'apinga'ia ra, 'e ma'ata atu te ka 'ōronga'ia atu ki aia kia ma'ata roa atu tāna; ē tēta'i 'ua atu kāre āna ra, e rave kē'ia rāi tāna. 13Tēia te tumu e tuatua atu nei au ki a rātou nā roto i te au tuatua parabole: kāre rātou e kite, noa atu ē tē 'ākara nei rātou; ē kāre rātou e 'akarongo ē kāre rātou e mārama, noa atu ē tē 'akarongo nei rātou. 14#Isa 6.9,10Ē kua tupu ki a rātou te toto'u a Īsaia, ko tei nā kō ē,
‘Ka 'akarongo kōtou ki ō kōtou taringa ē kāre rāi e mārama,
ē ka 'ākara kōtou ki ō kōtou mata ē kāre rāi e kite.
15Kua mātorutoru 'oki te ngākau o tēianei 'iti tangata,
ē kua 'akarongo ngatā tō rātou taringa
ē kua tōpiri i o rātou mata;
ko te kite ā'ea rātou ki o rātou mata,
ē te rongo ā'ea tō rātou taringa
ē te mārama ā'ea o rātou ngākau
ē te 'aka'āriu ā'ea'ia mai rātou
ē ka 'akaora au i a rātou.’
16 #
Luk 10.23,24 “'E ao rā tō kōtou mata tē 'ākara nei ia, ē tō kōtou taringa tē 'akarongo nei ia. 17Koia mou tāku e karanga atu ki a kōtou na, 'e mānganui te au peroveta ē te au tangata tuatua tika i 'inangaro i te 'ākara i te au mea tā kōtou e 'ākara nei, ē kāre ake nei rātou i 'ākara, ē i te 'akarongo i te au mea tā kōtou e 'akarongo nei, ē kāre ake nei i 'akarongo.”
Te 'āite'anga o te parabole o te rūrū 'ua
(Māreko 4.13-20; Luka 8.11-15)
18“Ē tēianei ka 'akarongo maina i te 'āite'anga o te parabole o te rūrū 'ua nei. 19Kia 'akarongo mai tēta'i 'ua atu tangata i te tuatua o te bāsileia nei ē kāre aia i mārama, tē 'aere maira te Mea Kino e rave atura i tei rūrū'ia ki roto i tōna ngākau. Ko te 'ua tēia tei rūrū'ia ki te pae arāta'a ra. 20Ko tei rūrū'ia ki te ngā'i paikea ra, ko ia tei 'āriki viviki i te tuatua ma te rekareka i te 'akarongo'anga. 21Kāre rā i aka'ia i roto i aia, 'e tāpū'anga poto 'ua tāna. Kia tupu 'oki tēta'i tūmatetenga, mē kāre rā, tēta'i tākinga kino'anga nō te tuatua, takakē tākiri atura ia aia i reira ra. 22Ko tei rūrū'ia ki rotopū i te ngāngā'ere ra, ko ia tei 'akarongo mai i te tuatua, pōkia atura te tuatua i te apiapi o te ora'anga nei ē te pikika'a o te 'apinga nui, ē kāre atura i 'ua mai. 23Kāreka tei rūrū'ia ki te ngā'i one meitaki ra, ko ia tei 'akarongo mai i te tuatua ē kua mārama. E 'u'ua maira ia, tēta'i ta'i 'ānere, tēta'i ono nga'uru, ē tēta'i toru nga'uru.”
Te parabole o te tītā i rotopū i te sītona
24Kua taki 'aka'ou atura a Iēsū i tēta'i parabole ki te tangata tini, nā kō atura, “E 'aka'āite'ia te bāsileia o te ao ra ki tēta'i tangata tei rūrū i te 'ua meitaki ki tōna kāinga. 25Kia moe rā te au tangata, kua 'aere maira tōna 'enemi, kua rūrū i'ora i te tītānia ki rotopū i te sītona, 'aere atura. 26E kao atura te 'uri 'ōu ra, ē 'ua akera, kitea katoa i'ora te tītānia. 27Kua 'aere maira te au tāvini o taua pū kāinga ra, kua ui maira ki aia, ‘E te 'atu, kāre āinei 'e au 'ua meitaki tā'au i rūrū ki roto i tō'ou kāinga? Nō 'ea rā te tītānia?’ 28Kua pa'u atura aia ki a rātou, ‘Nā tēta'i 'enemi te reira i rūrū.’ Kua ui maira te au tāvini ki aia, ‘Ka 'inangaro āinei koe kia 'aere mātou e 'uti'uti i te reira?’ 29Kua pa'u atura aia, ‘Auraka, ko te kiriti katoa ā'ea kōtou i te sītona i te 'uti'uti'anga i te tītānia. 30E 'akaruke 'ua, kia tupu kāpipiti ē kia mou. Ē kia tae ki te tuātau kokoti'anga i te mou ra, ka 'akakite au ki te aronga kokoti ra, E nā mua i te 'akaputuputu i te tītānia ē ruru 'aere nō te a'i; 'akaputu rā i te sītona ki roto i taku 'are vairanga ra.’ ”
Te parabole o te 'ua sinapi
(Māreko 4.30-32; Luka 13.18-19)
31Kua taki 'aka'ou atura a Iēsū i tēta'i parabole ki te tangata tini, nā kō atura, “E 'āite te bāsileia o te ao ra ki tēta'i 'ua sinapi i rave'ia e tēta'i tangata ē kua tanu'ia ki roto i tōna kāinga. 32Ko te 'ua meangiti ia o te au 'ua tini rava rāi, kāreka kia tupu rā, 'e ma'ata atu ia i te au rākau rikiriki. E riro 'ei pū rākau, ē e 'aere mai te au manu o te reva e tō mai ki runga a'o i tōna au rārā.”
Te parabole o te 'ōpue
(Luka 13.20-21)
33Kua taki 'aka'ou atura a Iēsū i tēta'i parabole ki te tangata tini, nā kō atura, “E 'āite te bāsileia o te ao ra ki tēta'i va'ine i kā'iro e 'ā ngauru litera 'ōpue ki te varāoa mata. Kua 'aka'ōpue'ia i reira te varāoa katoa ra.”
Tā Iēsū 'akapu'apinga'anga i te au parabole
(Māreko 4.33-34)
34Ko tēia katoa nei au mea tā Iēsū i 'āpi'i atu i te tangata tini nā roto i te au tuatua parabole ra, ē kāre rava i 'āpi'i atu i a rātou ma te kore e tuatua parabole, 35#Sal 78.2kia tupu tei 'akakite'ia mai nā roto i te peroveta i te nā kō'anga mai ē,
“E tuatua tōku va'a nā roto i te au tuatua parabole,
e 'akakite atu au i te au mea ngaro mei te 'akamata'anga mai o tēianei ao.”
Tē 'akamārama nei a Iēsū i te 'āite'anga o te parabole o te tītā
36Tuku atura a Iēsū i te tangata tini ra, 'aere atura aia ki roto i te 'are. Ē kua 'aere maira tāna au pipi, nā kō maira ki aia, “E 'akamārama mai koe ki a mātou i te 'āite'anga o te tuatua parabole o te tītānia i roto i te kāinga.”
37Kua pa'u atura aia ki a rātou, nā kō atura, “Ko tei rūrū i te 'ua meitaki ra, ko ia te Tamaiti a te Tangata; 38te kāinga ra, ko ia tēianei ao; te 'ua meitaki ra, ko ia te tamariki o te bāsileia; ē te tītānia ra, ko ia te tamariki a te Mea Kino ra; 39ko te 'enemi i rūrū ra, ko ia te Tiāporo; te mou ra, ko ia te 'openga o tēianei ao; ē te aronga e kokoti, ko ia te au 'āngela. 40Ē mei te tītānia e 'akaputuputu'ia ē e ta'una'ia ki te a'i ra, pērā katoa kia tae ki te 'openga o tēianei ao. 41E tono mai te Tamaiti a te Tangata i tāna au 'āngela, ē nā rātou e 'akaputuputu mai mei roto mai i tōna bāsileia i te au tumu kātoatoa nō te 'ara ē te au tangata tei rave i te kino; 42ē ka titiri atu ei i a rātou ki roto i te umu a'i ra, tei reira te auē'anga ē te pākati'angā ni'o. 43'Ei reira 'oki te aronga tuatua tika e kakā mai ei i roto i te bāsileia o tō rātou Metua mei te rā ra. 'E taringa tōna, e 'akarongo aia.”
Te parabole o te 'apinga 'u'una'ia
44“E 'āite te bāsileia o te ao ra ki tēta'i 'apinga pu'apinga i 'u'una'ia i roto i te koro. E kitea i'ora e tēta'i tangata, kua 'u'una rava atura aia, ē nō tōna rekareka, kua 'aere atura e 'oko atu i te au 'apinga tini rava rāi nāna ra, ē kua 'oko maira i taua kāinga ra.”
Te parabole o te poe
45“E 'āite 'aka'ou te bāsileia o te ao ra ki tēta'i tangata 'oko'oko tei kimi i te au poe mēmeitaki ra. 46E kitea i'ora e ia tēta'i poe meitaki ma'ata roa ra, 'aere atura aia, 'oko atura i te au 'apinga katoa nāna ra e 'oko mai i te reira.”
Te parabole o te kupenga
47“E 'āite 'aka'ou te bāsileia o te ao ra ki tēta'i kupenga i tukuna'ia ki raro i te tai, ē tā 'ei mai i te au ika 'e mānganui te tū. 48E kī akera, takitaki maira te au ravakai i te reira ki uta, no'o i'ora ē tuku atura i te au ika mēmeitaki ki roto i te au 'āriki, kua titiri rā rātou i te mea kikino. 49Pērā katoa kia tae ki te 'openga o tēianei ao. Ka 'aere mai te au 'āngela e 'akatakakē i te aronga kino mei roto mai i te aronga tuatua tika, 50ē e titiri atura i te aronga kino ki roto i te umu a'i ra, tei reira te auē'anga ē te pākati'angā ni'o.”
Te au tuatua mou 'ōu ē te au tuatua mou ta'ito
51Kua ui atura a Iēsū ki tāna au pipi, “Tē mārama āinei kōtou i tēia au mea katoa nei?”
Kua pa'u atura rātou ki aia, “Āe.”
52Kua tuatua atura aia ki a rātou, “Nō reira, ko te au Pū'āpi'i Ture katoa tei 'āpi'i'ia nō runga i te bāsileia o te ao ra, e 'āite ia ki tēta'i pū ngutu'are tei 'apai mai i te au mea 'ōu ē te au mea ta'ito nō roto mai i tāna ngā'i vairanga.”
Tē kōpae'ia nei a Iēsū i Nāzarēta
(Māreko 6.1-6; Luka 4.16-30)
53E oti akera i a Iēsū te reira au tuatua parabole, 'akaruke atura aia i te reira ngā'i. 54Ē i tōna tae'anga atura ki tōna 'ua'orāi 'ōire, kua 'āpi'i atura aia i tō reira i roto i tō rātou sūnago. Ē nō reira, kua vā 'ua maira rātou ē kua uiui ē, “Nō 'ea mai 'oki te pakari ē te au 'akairo mana a tēianei tangata? 55Kāre āina tēia te tamaiti a te kāmuta ra? Kāre āina ko Māria te ingoa o tōna metua va'ine? Ē kāre āina ko Iākōbo, ko Iōsēpha, ko Simona ē ko Iūda tōna 'ai taeake? 56Ē kāre āina tē no'o nei tōna 'ai tua'ine ki ō tātou nei? Nō 'ea mai 'oki te au rāvenga a tēia tangata?” 57#Ioa 4.44Maitu i'ora rātou i aia.
Kua tuatua atura a Iēsū ki a rātou, “Kāre tēta'i peroveta e ngere i te ngāteitei, māri rā i tōna 'ua'orāi 'ōire ē tōna 'ua'orāi 'enua.” 58Ē kāre akera aia i rave i te au 'akairo 'e mānganui i te reira ngā'i nō tō rātou 'irinakikore.
Valgt i Øjeblikket:
:
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.