RUIHNGEI TULLU 1

1Masha tek ti abai hina Theophilus nakolla keina Jisu hina rouram ma alo ta athouna ah chupi takpi mo ae ta jiek inge. 2Thangwan ram ma amota rui ah kal lang rungnie pha malim ma mahalsa rouron kolla muihla athieng hana chupi jar ra. 3Aol madang sutakka amona matak mak ninga mani maikunga ri pi ah dangpi rungnie nasomly sunga Chungthieng rengram rouril phur ae. 4Mani hitta ma am ha leiya amo na manita Jerushalem houphurra thingno rang rou pe ae chuti weta, “Pathieng na saro ei sha khuthul ha hakka am mo naha chu karil phur nangei theipha rou ha ae.” 5Rouram chu Johon na tuisunga baptias ae pi hal kom nangei na muihla athieng hitta atun hai thou rungnie shot no wa baptias ae ange.”

Jisu Ta Thangwan Na Rui Kal So Ae

6Chuna ahalsha rouron mani makhai na phao weta rachun na makolla sai. “Rengpa Israel ngei rengram hi lea ah nasem rang apha hi jo mo ae?” 7Jisu na manita sange, “Apha rungnie ha nangei na dang rang ephao am no ae rouram chu naha Pathieng na mahal nujuija masem sa ae. 8Chuti weta nangei na muihla athieng hana jaitha pha juija Jerushalem ma kataranga nangei na meelung ngir pi anga ae hana Judiah akha chu Samaria hana simlei atreem na ram phao sunga.” 9Nahi rilla ma am lei apha ah akha chu mani na an na amlei ja amo ta Chungtienga sumphai na rui ah kalso mani maikunga. 10Amo na hata makal juija mani na wan tienga anna amlei sunga edang dang no wa mani am na ningkolla pun ngau hlum spa ani ngir tolla am so. 11Manui na ril, “Galily ah am malmashi ngei oh, ejeranga thangwan tienga mai hai ah ngirra an na am ma chau? Na Jisu, nangei ningkol hai thou wa wan ramma rui ah kal nangei ri hekta jung sier ange.”

Judas Hut

12Chuna mani na olivet mul hai thou wa Jerushalem ma lea so ae naha chu hupi haithou wa kelometer jong pa ae. 13Mani na Jerushalem lut juija mani na Pitar Johon, Jacob, Andrew, Philip Thomas, Bartholomeu Mithew, Alphaeus sanao Jacob akha chu Simon Zealot akha chu Jacob sanao Judas ngei am na inn kang chunga kal so. 14Na manilimpa hi mani takmak na atreem am no lutta namei ahre hitta nie ha ah am meh. Jisu manu Mary akha chu ma u-manao ngei kom tolla. 15Hana tak rungnie nutienga ngoiring ngei bom akha am meh (mani abom ha chu masing riha lea sam nie chuna Pitar nangirthou wa rillea.) 16“Uleh nao ngei oh” amona ril, “Jieksha rou hi tung ang so weh, ha chu, apha eja amatienga Jisu ta rui ah hup ranga lam kai phur Judas hina rou sarukka muihla athieng jarra David murra rilphur ha. 17Judas hi kani kar sunga akha ae, rouram chu amo kom matun mahlou taranga ahalsa akha ae.” 18(Mahratno na amant hana amo na phailou akha lei ae, chuna amo na bukka tu ve ta awon kui ah athibung ariel alei therak ti ae. 19Jerushalem ma am malmashi limnatheipha ah na phailoupuk hata mani tronga Akeldama ta dang hlak ae, na hina rilna chu “Athee hina phailou.”)

20“Rouram chu Pslams sunga hita jiekka shi sha so ae,

‘Ma inn mun hi, hita rukka am shu oh;

atu akha na phao hana ring no shu oh.’

Hita kom jiekka shi shil ae,

akha chu ‘Atujung akha na mahut laa shu oh.’

21“Chuna atujung spa akha na ani karra tol shu oh amo ha chu arengpu Jisu na ani kar hai thou shukka thing akha chu lut apha chang honna am tol akha changa tah ae. 22Johon na ae pi thou nie hai thou wa ani kar hai thou rui ah kal rungnie phao sunga amtol mee chang shu oh, rouram chu amo hana ani hitta maring thouna meelung ngir pekha ranga.”

23Chuna mani na Josep akok na chu Barsabbas hana Justus takom danghlak akha chu Mathias manui ani ta halla hla so ae. 24Chuna mani na hita nie so, “Arengpu, nangna kani lim lung eheilim ri nea che ae chuna manui ani sunga kani taranga atu ta halla che? 25Judas hoitienga mo mahai na ah mathing sa rukka mahouphur rouron rui hana tun hlou ha shilranga.” 26Chuna sarukka mani na manui ani ta rawan chang ann hlakka naha Mathea na changa arui asom akha sunga tol pi so ae.

Valgt i Øjeblikket:

RUIHNGEI TULLU 1: CHOTBSI

Markering

Del

Kopiér