Bakaanelabu 16
16
Tímote li anaboo li Fool buko li Silaas
1Fool li ajow boot li ésukayi yata Delib, ban li ahaaŋ boot li yata Lisit. Nan aŋejumuu, li atook bo ágoom. Tímote jaawool asuwif áyinene li Yéesu, bale atuubawool an ata Gilees. 2Káyinenumuu li Yéesu kalakomuu li ésukayi yata Lisit li kata ésukayi yata Ikóniyom, li kunaak kulob majake bale kuya li Tímote. 3Fool li afañ min aŋa’ Tímote ájowetum. Li aŋalool ateyen búkut kakinumuu li etaamayi inyu kúji, mata buko foofiil feh kuhaase koon atuubawool an ata Gilees. 4Muñeˈe li sísukasu ban kújowummuu, li kulob káyinenumuu kulimaku kan kufootalaku kujokumuu, ban li kooniil kukaan loon kulobumuu. 5Sijanguwasu li sihaŋ malit li káyinenaku, ban bukanabuku káyinenumuu li kunaak kuhaŋ mameeŋ hunakoohunak.
Fool li ahimmo nan alakomuu li ésukayi yata Tulowaas
6Buyinumabu Banabaabu li buhi’ Fool buko li Silaas kúwaalewum Hulimahu hata Ateemit li etaamayi yata Aasi. Muñeˈe li kújowum li etaamayi yata Filiisi li yata Galasi. 7Nan kujowumuu kulehen etaamayi yata Miisi, li kufañeen min kujow boot Bitini, bale Buyinumabu bata Yéesu bukatutiil min kujow. 8Muñeˈe li kújowum Miisi kuhaaŋ boot li kásikaku kata Tulowaas. 9Li líiŋ li hukahu, Fool li ajuk li kahimmo ánayine ata Maseduwaan, mayitowe hákilool min al̥okoolool aanool:
— Ubil boot Maseduwaan min úlambenoli!
10Muñeˈe nan Fool ajukumuu kahimmowaku unku fú’ tó, li jiyaan jiŋes min jijow boot Maseduwaan, mata jíyinenyinen kaanaku Ateemit láhooñolihooñ mata min jijow jiwaale Hulimahu Hásuumaahu bukanabuku kata etaamayi inyu.
Liidi li áyinen li Amaaŋenawu li ésukayi yan koonemuu Fílib
11Li jíjufowum li ésukayi yata Tulowaas li ébato, min jíjowum tó jicol boot li étebelemukayi yata Samotulaas. Hunak hukaten, li jihaaŋ boot Néyafoliis. 12To untu jíjowummuu boot Fílib, yammuu ésukayi yáamakayi yata etaamayi yata Maseduwaan, yan kata Lom kookenumuu. Li jikaan li ésukayi inyu kunak kameeŋe. 13Li líiŋ li húyiiyaayahu hata Kusuwifaku, li jífulul li ésukayi min jijow boot bata katantaku kata mul̥uuwamu, ban jinaake jiyinoomuu li joon fan jijuk bo tikee tan Kusuwifaku kul̥awe. Li jibah to min jilob li kanaalaabuku kawoog tomuu. 14Akee li kanaalaabuku umbuku kajawool Liidi. Liidi an ata ésukayi yata Tiyatiil, ban li alako ájulaˈa ata sileesa sájunke satiineniye ŋáa’, ban li anaak amanen Ateemit. Liidi li ájantenoli. Muñeˈe Amaaŋenawu li ábabulool buyinum, min abet sifintuwool feh li kulimaku kan Fool alakomuu elobayi. 15Muñeˈe nan kúbatiisemuu Liidi boot li butoŋool ló ban, li áloboli min jijow boot boola áanoli:
— Nokoomuu loon jijuujuk kaanaku líyinenyinen li Amaaŋenawu, li jibil jilako búmbaam.
Muñeˈe li átuuŋoli min joon éehe’.
Fool buko li Silaas li kukul̥i li ésukayi yan koonemuu Fílib
16Li líiŋ hunak hukee áloli li ejow ban ésukayi el̥awemuu, jiloka jísungute li jibil jifam. Jísungutaaju unju buyinum bajakut bújufo jó, min bunaak bukaan jo jilob wahawu wammuu li ubaj. Elobayi inyu yan alobemuu ákibben li éji kunahaanaku kata jo li kubaj sídalam sáamak. 17Jísungutaaju unju li jinaak jínabul li Fool li óloli, mo jilobemaa butiya joon:
— Kánayinaabuku umbuku kuloka kata Ateemit ata Haatiya tiya! Kubiibil min kúhiisuul bútinabu bata kafakaku!
18Jísungutaaju li jikaan mo jow baj kunak. Muñeˈe Fool huuñool li hulit, gay li átiiwowul aan buyinumabu bajakutumuu:
— Leeni li kajaw kata Yéesu Kilisita, úfu’ li jísungutaaju unju!
Mal̥egen buyinumabu bajakutumuu li buyaan búfu’ li jo. 19Nan kunahaanabuku kata jísungutaaju kujukumuu kaanaku kuyilaat muñeˈe kúbajum sídalam li jo, li kujok Fool buko li Silaas kújowetum boot tin kaayeenaku kata ésukayi, hákil kunahaanaku kata Lom. 20Li kuŋaliil kusen kutiibaaku kata Lom, ban li kooniil:
— Kánayinaabuku umbuke kumbuku li kakaan búgul̥a li ésukayi yoololaal. Buko kusuwif koom. 21Kuliikeneliiken bukanabuku bakaane ban eluwaayi yoololaal, ololaal jáamiyaamuu bukan kata Lom, éhilolaal úfañumaal bo, mantee foof li ukaanaal bo.
22Búsukabu foof li buyitowul li buko. Kutiibaabuku li kulob min kuñak wañawu wata Fool buko li Silaas kúfulen, ban li kooniil kuŋa’ hukaluwaas min kutekiil. 23Nan kutekiilumuu matek kuban, li kuŋaliil kukul̥ min koon afooyaawu afooyiil jak. 24Nan kuyaane kulobumuu loon muñaˈa, afooyaawu li aŋa’ Fool buko li Silaas akul̥ li káfit káluul̥o ló li hukul̥ahu, ban li aŋa’ sijenk min ajenkiil.
Buu afooyaawu ata hukul̥ahu áyinenummuu li Yéesu eeno
25Nan hukahu hujeˈe hulitumuu, Fool buko li Silaas li kulako kal̥aw, ban li kunaak kukijen min kusal Ateemit. Bukan kaabuku kan kukul̥umuu li kulakoyiil bajanten. 26Li kuyaan kulako to, etaamayi li egolool ŋáa’ min kuteefaku kuleeteemaaku kata hukul̥ahu kúlilliŋoo. Wámbiilawu feh li uyaan úbabulo, sijenkasu feh sata bukanabuku kan kukul̥umuu li sil̥el̥o. 27Muñeˈe afooyaawu li áliwo. Nan ajukumuu min wámbiilawu úbabulomuu, li áñakul ékunduwayi yoola boot min amukoolo, mata lanaanaak aan bukanabuku kan kukul̥umuu kuteyitey kuheek. 28Bale Fool li alobool butiya aanool:
— Jakum ukaanoolo majakut! Olóli fóofoli feh jumbuke taate!
29Afooyaawu ata hukul̥ahu li alob min kuhiiten, ban li asommen anoken li káfitaku. Li ákoli gay li anaak ateelen, min ajow ákuntuŋ hákil Fool buko li Silaas. 30Fúlum tó, li akaaniil kúfulul, ban li agel̥l̥eniil aaniil:
— Kunahaan, buu leete ikaan min ifak?
31Fool buko li Silaas li koonool:
— Uyínenumuu li Amaaŋenawu Yéesu, fan ufak boot li butoŋi ló.
32Ban li kuwaalewool Hulimahu hata Amaaŋenawu, akila li kakinumuu li eluufayi yoola feh. 33Afooyaawu li aŋaliil li ehukaayi inyu, min ajow afos ucokawu wooliil. Ban li kuyaan kúbatiisewool, okila li bukanool. 34Li aŋa’ Fool buko li Silaas ájowetum boola, ajow aseniil kutiñ. Afooyaawu humumool li butoŋabu boola, li kubaj ésuumahukow yáamak min kúyinenumuu li Ateemit.
35Nan tikatenumuu, kutiibaaku kata Lom li kuboñ bukan kujow koon afooyaawu ata hukul̥ahu:
— Ukaten kánayinaabuku umbuku.
36Afooyaawu ata hukul̥ahu li abil aheb Fool aanool:
— Kutiibaaku kata Lom kúboñuuboñul kubil koonom ikatenuul. Kama muñeˈe jiyilo jífu’ jijow li kásuumaay.
37Bale Fool li aan bukanabuku kan kúboñulumuu:
— Waa? Kújokoli kutek hákil ésukayi feh, buko bátiibutoli jak loon kaanemuu, áloli jammuu bukan kata Lom, ban li kúŋaloli kujow kukul̥! Líiŋ muñeˈe li kufañ min kúkatenoli an bahaasut? Let baj! Buko humumiil kubil kúkatenoli!
38Bukanabuku kan kúboñulumuu li kujow kulob kutiibaabuku kata Lom, kulimaku kan Fool buko li Silaas kulobiilumuu. Ekole yáamak li ejokiil, nan kujamumuu kaanaku Fool buko li Silaas bukan kata Lom. 39Muñeˈe kutiibaabuku li kubil kul̥awiil kabonket, ban li kukaaniil kúfulul li hukul̥ahu, ban li kuyaakooliil kúfu’ li ésukayi. 40Nan Fool buko li Silaas kúfulumuu li hukul̥ahu, li kujow boot bata Liidi. Li kujukoo li kutuyiil feh min kuwankuleniil kuban, li kujow.
Valgt i Øjeblikket:
Bakaanelabu 16: cskDBL
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2008, Wycliffe Bible Translators, Inc. All rights reserved.