ປະຖົມມະການ 2
2
1ດັ່ງນັ້ນ ຈັກກະວານແລະແຜ່ນດິນໂລກ ກັບສັບພະທຸກສິ່ງທັງໝົດທີ່ມີຢູ່ໃນນັ້ນກໍສຳເລັດເສັດສິ້ນ. 2ມື້ທີເຈັດສິ່ງທີ່ພຣະເຈົ້າໄດ້ສ້າງກໍສຳເລັດ ແລະພຣະອົງໄດ້ຢຸດພັກກິດຈະການ. 3ພຣະເຈົ້າອວຍພອນມື້ທີເຈັດ ແລະຕັ້ງໄວ້ໃຫ້ເປັນວັນສັກສິດບໍຣິສຸດ ເພາະໃນມື້ນັ້ນ ພຣະອົງໄດ້ຢຸດພັກຈາກການນິຣະມິດສ້າງ ແລະຢຸດກິດຈະການທັງສິ້ນ. 4ປະຫວັດຈັກກະວານແລະແຜ່ນດິນໂລກໄດ້ຖືກນິຣະມິດສ້າງຂຶ້ນມາກໍເປັນດັ່ງນີ້.
ສວນເອເດນ
ເມື່ອພຣະເຈົ້າຢາເວ ພຣະເຈົ້າໄດ້ສ້າງແຜ່ນດິນໂລກແລະຈັກກະວານນັ້ນ; 5ຕົ້ນໄມ້ກັບກໍຫຍ້າບໍ່ທັນມີເທິງແຜ່ນດິນໂລກ ເພາະພຣະເຈົ້າຢາເວພຣະເຈົ້າຍັງບໍ່ໃຫ້ຝົນຕົກລົງມາ ແລະຍັງບໍ່ທັນມີຈັກຄົນທີ່ທຳມາຫາກິນຢູ່ເທິງແຜ່ນດິນໂລກ, 6ແຕ່ຍັງມີນໍ້າຂຶ້ນມາເທິງໜ້າດິນ ແລະເຮັດໃຫ້ພື້ນດິນຊຸ່ມຊື່ນທົ່ວໄປ.
7ແລ້ວພຣະເຈົ້າຢາເວພຣະເຈົ້າກໍເອົາຂີ້ດິນແຕ່ພື້ນດິນ ມາປັ້ນເປັນຊາຍ ແລະເປົ່າລົມຫາຍໃຈໃສ່ຮູດັງຂອງຊາຍທີ່ຖືກປັ້ນຂຶ້ນມານັ້ນໃຫ້ມີຊີວິດ ແລະຊາຍທີ່ຖືກປັ້ນນັ້ນກໍໄດ້ເລີ່ມມີຊີວິດ.
8ແລ້ວພຣະເຈົ້າຢາເວພຣະເຈົ້າກໍສ້າງສວນແຫ່ງໜຶ່ງໃນເອເດນ ຢູ່ທາງທິດຕາເວັນອອກ ແລະເອົາຊາຍຜູ້ທີ່ພຣະອົງໄດ້ປັ້ນຂຶ້ນນັ້ນມາຢູ່. 9ໃນສວນແຫ່ງນີ້ພຣະເຈົ້າຢາເວພຣະເຈົ້າບັນດານໃຫ້ມີຕົ້ນໄມ້ທຸກຊະນິດ ໃບຂຽວງາມດີ ແລະໝາກໄມ້ກໍເປັນໜ້າຢາກກິນ. ໃນກາງສວນນັ້ນພຣະອົງບັນດານໃຫ້ມີຕົ້ນໄມ້ທີ່ໃຫ້ຊີວິດ, ໃຫ້ຮູ້ຈັກດີ ແລະຮູ້ຈັກຊົ່ວ.
10ນອກນີ້ກໍຍັງມີແມ່ນໍ້າສາຍໜຶ່ງ ທີ່ໄຫລອອກຈາກເອເດນມາລໍ່ລ້ຽງສວນນີ້; ແມ່ນໍ້ານີ້ແບ່ງອອກເປັນສີ່ສາຍ ດັ່ງນີ້: 11ສາຍທີໜຶ່ງຊື່ວ່າ ປີໂຊນ ຊຶ່ງໄຫລອ້ອມດິນແດນຮາວີລາ. ( 12ໃນດິນແດນນີ້ມີບໍ່ຄຳຊັ້ນດີ ແກ້ວປະເສີດໂກຣາ ແລະຕົ້ນຢາງຫອມທີ່ມີຄ່າສູງ) 13ສາຍທີສອງຊື່ວ່າ ກີໂຮນ ຊຶ່ງໄຫລອ້ອມດິນແດນກູເຊ. 14ສາຍທີສາມຊື່ວ່າ ຕິກຣິດຊຶ່ງໄຫລຜ່ານດິນແດນປະເທດອັດຊີເຣຍ ແລະສາຍທີສີ່ ຊື່ວ່າ ເອີຟຣັດ.
15ແລ້ວພຣະເຈົ້າຢາເວພຣະເຈົ້າກໍເອົາຊາຍ ຜູ້ທີ່ພຣະອົງໄດ້ສ້າງມານັ້ນ ໄປເຝົ້າຮັກສາແລະເບິ່ງແຍງສວນ. 16ແລ້ວພຣະເຈົ້າຢາເວພຣະເຈົ້າສັ່ງລາວວ່າ, “ໝາກໄມ້ທຸກຕົ້ນໃນສວນນີ້ເຈົ້າກິນໄດ້ 17ເວັ້ນໄວ້ແຕ່ຕົ້ນທີ່ໃຫ້ຮູ້ຈັກຄວາມດີ ແລະຮູ້ຈັກຄວາມຊົ່ວ. ເຈົ້າຢ່າກິນໝາກໄມ້ໃນຕົ້ນນັ້ນ; ຖ້າເຈົ້າຂືນກິນເມື່ອໃດ ເຈົ້າກໍຈະຕາຍເມື່ອນັ້ນ.”
18ແລ້ວພຣະເຈົ້າຢາເວພຣະເຈົ້າກໍກ່າວອີກວ່າ, “ບໍ່ເປັນການສົມຄວນທີ່ຜູ້ຊາຍຕ້ອງຢູ່ໂດດດ່ຽວຢ່າງນີ້. ເຮົາຈະສ້າງຜູ້ຊ່ວຍທີ່ເໝາະສົມໃຫ້ລາວ.” 19ແລ້ວພຣະເຈົ້າຢາເວພຣະເຈົ້າຈຶ່ງເອົາຂີ້ດິນຈາກພື້ນດິນ ມາປັ້ນເປັນຮູບສັດຕ່າງໆທີ່ຢູ່ໃນທົ່ງ ແລະນົກທັງຫລາຍທີ່ຢູ່ໃນອາກາດ ແລະໄດ້ນຳສັດເຫຼົ່ານັ້ນມາໃຫ້ຊາຍນັ້ນເບິ່ງວ່າ ລາວຈະໃສ່ຊື່ໃຫ້ຢ່າງໃດ ແລະຊື່ໃດທີ່ລາວຕັ້ງໃຫ້ສັດທັງຫລາຍທີ່ມີຊີວິດຈຶ່ງເປັນຊື່ຕໍ່ໆມາ. 20ສະນັ້ນ ຊາຍຜູ້ນີ້ຈຶ່ງຕັ້ງຊື່ໃຫ້ສັດລ້ຽງທັງຫລາຍແລະຝູງນົກໃນອາກາດ ແລະໃຫ້ສັດປ່າທັງໝົດ; ແຕ່ບໍ່ມີສັດໂຕໃດເລີຍເປັນຜູ້ຊ່ວຍທີ່ເໝາະສົມແກ່ລາວ.
21ແລ້ວພຣະເຈົ້າຢາເວພຣະເຈົ້າຈຶ່ງເຮັດໃຫ້ຜູ້ຊາຍນັ້ນນອນຫລັບສະໜິດ ແລະໃນຂະນະທີ່ລາວນອນຢູ່ນັ້ນ ພຣະອົງກໍເອົາກະດູກຂ້າງຊີກໜຶ່ງຂອງລາວອອກມາ ແລະເຮັດໃຫ້ເນື້ອໜັງຈອດຕິດກັນດັ່ງເດີມ. 22ພຣະເຈົ້າຢາເວພຣະເຈົ້າເອົາກະດູກຂ້າງມາສ້າງເປັນຜູ້ຍິງ ແລະນຳນາງມາມອບໃຫ້ລາວ. 23ແລ້ວຊາຍຜູ້ນັ້ນກໍເວົ້າວ່າ,
“ນີ້ເດ ແມ່ນຜູ້ທີ່ມີຮູບຮ່າງຄືເຮົາ;
ກະດູກຂອງນາງມາຈາກກະດູກຂອງເຮົາ
ເນື້ອໜັງຂອງນາງມາຈາກເນື້ອໜັງຂອງເຮົາ;
ຜູ້ຍິງແມ່ນຊື່ຂອງນາງເພາະນາງມາຈາກຜູ້ຊາຍ.”
24ດ້ວຍເຫດນີ້ ຜູ້ຊາຍຈຶ່ງຈາກພໍ່ແມ່ຂອງຕົນ ແລະໄປຕິດພັນຢູ່ກັບເມຍຂອງຕົນ ແລະເຂົາທັງສອງກໍກາຍເປັນຄົນດຽວກັນ.
25ຊາຍແລະຍິງໄດ້ເປືອຍກາຍຢູ່ ແຕ່ພວກເຂົາບໍ່ຮູ້ສຶກລະອາຍກັນເລີຍ.
Valgt i Øjeblikket:
ປະຖົມມະການ 2: ພຄພ
Markering
Del
Kopiér
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fda.png&w=128&q=75)
Vil du have dine markeringer gemt på tværs af alle dine enheder? Tilmeld dig eller log ind
@ 2012 United Bible Societies. All Rights Reserved.