Bɛ̈n 4
4
Nhialic Agëm Mothe Riɛl de Ka ke Gäi
1Go Mothe puɔ̈k nɔm Bɛ̈nydït an, “Na le kɔc ke Yithriɛl ya rɛɛc thok, ku cïkï kë luɛɛl piŋ? Eeŋö bä looi të le kek a jɔ̈ɔ̈ny nɔn kën yïn tuöl tëde yɛn?”
2Go Bɛ̈nydït Mothe luɔp an, “Eeŋö ë kë muk ë yïciinë?”
Go puk nɔm an, “Ee thieec.”
3Go Bɛ̈nydït lueel an, “Cuatë piny.” Na wën, aa cuɛt piny, ke thieec ë puk rɔt aye kërac, go Mothe kat në yen. 4Go Bɛ̈nydït lɛ̈k Mothe an, “Guöŋë dɔm yɔ̈l, ku jatë nhial.” Go Mothe guŋ ku dɔm yɔ̈l, go rɔt bɛ puk ke ye thieec. 5Go Bɛ̈nydït lɛ̈k en an, “Lɔ luöiyë kɔc ke Yithriɛl ee kënë ke bïk gam nɔn ee yen Bɛ̈nydït, Nhialic de kuarken yen ë cï tuöl tëde yïn, Nhialic de Abraɣam kekë Yithaak, ku Jakop.”
6Ku be Bɛ̈nydït ŋoot ke jam kekë Mothe, lëk en an, “Luötë yïciin në lupɔdu yic.” Go Mothe yeciin luöt. Na wën, aa bïï bei, ke yök acïï wɛth dɔm, ka cï rɔt wuöt në kaɣer ë wic cït alath. 7Go Nhialic lɛ̈k en an, “Be yïciin luöt ë lupɔ yic.” Go yeciin bɛ luöt. Na wën, aa bïï bei ee kë ciëënë, ke yök acï dem ka cï kït kekë guöp. 8Go Nhialic lɛ̈k en an, “Na kënkï yï gam thok në kë tueŋ, ku ŋootkï ke ke ŋït piɔ̈ɔ̈th, ke kë ciëënë abï ke jɔ tɔ gäm. 9Na cï ka gɛ̈ɛ̈iyë ke kaarou looi, ku ŋootkï ke ke cïï këdu piŋ, ku cïkï kɔɔr nɔn bï kek e gam, ke yï gem pïïu Kiir ku wälë keek biic. Kek pïïu cï gem abïk röt puk aye riɛm.”
10Go Mothe Bɛ̈nydït lɔ̈ŋ an, “Acie yen Bɛ̈nydït, yɛn kën kɔn aa raan ŋic jam ë caŋdï, gɔl të wën ë ciɛk Yïn jam wekë yɛn aɣët cï ye manë. Yɛn thiek liep, ka yɛn ye jam ban.” 11Go Bɛ̈nydït lɛ̈k en an, “Eeŋa ë lui raan thok? Ku eeŋa ee ye tɔ thiek yïth ku tɔ miŋ? Eeŋa ee ye tɔ daai, ku nɔn tɔ yen cɔɔr? Cie Yɛn, Yɛn Bɛ̈nydït? 12Ku ënɔɔnë, lɔ, yïn bä lɔ lɛ̈k kë bä lɔ lueel, ku kuɔny yïn në jam.” 13Go Mothe lɛ̈k Bɛ̈nydït an, “Acïï go ye dhääl Bɛ̈nydït, toc raan däŋ.”
14Ku ëtɛ̈ɛ̈n, Bɛ̈nydït acï piɔ̈u jɔ diu kekë Mothe, go lɛ̈k en an, “Na Aron Wänmuuth, raan ë Lebai yïdï? Aŋiɛc nɔn ŋic en jam apiɛth. Ku yen ënɔɔnë abɔ̈ kueer ke loor yïnɔm. Ku abï piɔ̈u miɛt të le yen yï yök. 15Jam we yen, guiëërë kë kɔɔr bä lɔ lueel ëbɛ̈n. Wek bä kuɔny wedhie waarou, ku wek bä nyuöth kë bäk looi. 16Yen abï ya raan ee jamdu guiir. Yïn bï jɔ ciët Nhialic. Abä aa lɛ̈k jamduön kɔɔr aa luel, ku abï jamdu jɔ ya guiëër kɔc. 17Ku muk ee thienyë, bï yïn ka gɛ̈ɛ̈iyë ke lɔ looi në yen.”
Mothe Apuk Rɔt Rip
18Go Mothe yenɔm puɔ̈k Jethro, monywun, ku lëk en an, “Tɔ ya puk a nɔm Rip të nu kɔckuɔ la ke tïŋ na ŋootkï ke ke pïr.” Go Jethro gam, ku pot kueer.
19Ku të ɣɔn ŋoot ë Mothe Midian, aa cïï Bɛ̈nydït lɛ̈k en an, “Dakë yïnɔm Rip, kɔc wään kɔɔr nɔn nɛ̈k kek yïn acïk thou kedhie.” 20Go Mothe mïthke tääu ë muul kɔ̈u në manden ëtök, ku jɔt keek lek Rip. Ku Mothe aa muk thieec në yecin, thieny wään lëk ë Nhialic en an muk.
21Go Bɛ̈nydït bɛ lɛ̈k Mothe an, “Të cïn lɔ Rip, ke them ëgɔk nɔn looi yïn kake gäi kedhie në melik nɔm, ka cän ke yï gäm riɛlden. Ku melik abä tɔ ril nɔm, ka cïï kɔc ke Yithriɛl bï puɔ̈l ajël. 22Ku abä dhiɛl guiëër melik ëgɔk an, ‘Acïï Bɛ̈nydït lueel an Yithriɛl yen aye wën kɛ̈idï. 23#Bɛ̈n 12:29. Yen alɛ̈k en e yïn an päl wëndï alɔ Ya lɔ̈ŋ, go jaai. Ka ënɔɔnë, Yɛn bï kɛ̈idu nɔ̈k.’ ”
24Na wën, ke Mothe ë lɔ kɔ̈p kueer. Go Bɛ̈nydït lɔ të nu yen ku kɔɔr aa nɛ̈k. 25Go Dhipoora tiiŋde kuur moth thok nööm, ku cueel wëndɛn thiinë, ku jiɛk Mothe cök#4:25-26: cök: Kë nyooth ë “cök” ee kueer däŋ ye kake moc cɔɔl. në dɛ̈l cï tɛ̈ɛ̈m bei, ku lueel an, “Yïn ee monydiën ë riɛm.” 26Go Bɛ̈nydït Mothe tɔ ŋuɛ̈ɛ̈n guöp. Ee këde cuɛ̈l yen atɔ tik lëk en Mothe an, “Yïn ee monydiën ë riɛm.”
27Ku acïï Bɛ̈nydït bɛ̈n lɛ̈k Aron ëtɛ̈ɛ̈n, an, “Lɔ loor Mothe nɔm ë jɔ̈ɔ̈ric.” Go lɔ loor nɔm. Na wën, ke ke lɔ rɔ̈m në kuur ë Nhialic lɔ̈ɔ̈m, go Aron Mothe ciim thok. 28Na wën, ke Mothe ë tët Aron ka cïï Bɛ̈nydït lɛ̈k en kedhie, të ɣɔn lëk en ë yen an puɔ̈kë yïnɔm Rip. Ku guïïr ka gɛ̈ɛ̈iyë ke cï Bɛ̈nydït lɛ̈k en an bï ke lɔ looi. 29Ago Mothe lɔ Rip kekë Aron. Ku lek röördït ke Yithriɛl mat nïïm. 30Na wën, ke guïïr Aron keek ka cïï Bɛ̈nydït lɛ̈k Mothe. Ku loi Mothe kake gäi kedhie në kɔc nïïm. 31Agokï gam. Na wën, aa piŋkï luɔi cïï Bɛ̈nydït ciɛɛŋ cieŋ ë keek arac tïŋ, acïk kenïïm bɛ̈n guöt piny, ku läŋkï.
Valgt i Øjeblikket:
Bɛ̈n 4: dip-JPB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Jieeng de Padang © The Bible Society in South Sudan, 2011.