Cäk 34
34
Wïn ë Dina
1Na kööl tök, ke Dina, nyan ë Liya ɣɔn cï dhiëth Jakop acï duet ke wut kɛ̈ny. 2Na wën, atïŋ ë Cekem en, wën ë Ɣamor, bɛ̈ny de ee wunë, raan ë Ɣib, ke lɔ ku dɔm, ku wit piny, ku nööm ë nɔ̈m ayäär. 3Cekem acïï Dina nyan ë Jakop diir, go nhiaar guöp ku thut.#34:3: them bä thut; nɔn tɔ mit piɔ̈u. 4Ku lëk ë Cekem Ɣamor wun an, “Thiëkë yɛn ee nyanë.”
5Go Jakop piŋ luɔi cï Dina nyande wit, ku mïthke aake ŋoot roor në thökiic, ku ɣɔ̈k. Go rëër ke cïn kë looi, abï mïthke kɔn bɛ̈n. 6Go Ɣamor wun Cekem, lɔ tëde Jakop, lek jam guiir. 7Ago piny lɔ rɔ̈m ke wɛ̈ɛ̈t ke Jakop, ke ke bɔ̈ roor të wën cï kek thok piŋ. Aake cï piɔ̈ɔ̈th kuöc diu arëët në ayärdïït cïï Cekem luöi kɔc ke Yithriɛl. Në biäk cï yen nyan ë Jakop wiëët. Ku keek acïkï karɛc cït ee kakë ee kɔɔr nɔn bï ke looi. 8Ago Ɣamor lɛ̈k Jakop an, “Wëndiën Cekem acïï nyandu diir aläl. Ku ënɔɔnë, yïn läŋ an tɔ thiɛɛk. 9Thiëkku röt, gämkï mïthkuɔ duetkun, ku thiakkï duetkuɔ. 10Ku rɛ̈ɛ̈rë eenë we wook. Piäätë alɔ të kɔɔr në yïpiɔ̈u, ku ye kuëëth thïn cït man ë kë kɔɔr ë piɔ̈ndu, ku nɔ̈më rɔt piny.”
11Ku bëër ë Cekem lëk Jakop kekë mïthke an, “Dhuɛ̈ŋkï ya guöp, ku alɔ kë cak lueel, abä gäm week. 12Luɛlkï kuën ë thiëëk, na cak tuöc abïï ciët ŋö, abä ke tääu piny ayï athek, cït man ë kë cak lueel. Luɔi bï duet aa tiiŋdï yetök yen akaar.”
13Ago mïth ke Jakop Cekem math kekë Ɣamor wun, në luɔi cï Cekem Dina nyankënëden yɔ̈ɔ̈r. 14Ku lëkkï keek an, “Kë cït ee kënë acuku duëër looi. Wo cï nyankënëda duëër gäm raan kënë cueel. Kënë aduëër aa yäär në wogup. 15Töŋ duëër wok mat në week kï: të ta wek röt cuel wek röör wedhie cït man ë wok. 16Yen aduëër wok we jɔ gäm duetkuɔ, ku nömku duetkun, ku joku rëër në week ë tök ke wo ye kɔc tök. 17Na kɛ̈nkï këda gam, ku kɛ̈nkï röt tɔ cuel, ke wo bï nyankënëda jɔt ku jëlku.”
18Go jamden Ɣamor miët piɔ̈u kekë Cekem wënde. 19Ago dhuŋ tui kɛ̈n gääu në luɔɔi de ee kakë, në biäk ë cï duet en diir arëët. Ku Cekem yen aaye raan töŋ ë nhiɛɛr ë kɔc ke baaiden guöp kedhie arëët.
20Ago Ɣamor lɔ në kal ë wunden thok kekë Cekem wënde, lek jam në kɔc ke wut, luelkï an, 21“Kɔc kë, ee kɔc piɛth në wook, takkï keek piäät ë pinyë yic në wook. Ku bïk aa kuëëth thïn cït man ë kë kɔɔrkï. Tïŋ piny alääu, aduëër ke lɛɛr. Ke wo bï duetken aa thiaak, ku thiakkï duetkuɔ. 22Ku töŋ bï kɔc kë tɔ gam rëër në wook, abuk aa kɔc tök kï: Në kek an tɔku röt cuel wok röör wodhie, cït man ë kek. 23Ku ɣɔ̈kken, ayï këriëëcden ëbɛ̈n, cïkï bï ya kakuɔ wadäŋ? Töŋ buk looi ee luɔi bï wok gam, ku tɔku keek rɛ̈ɛ̈r në wook.” 24Ago kɔc ke wut këde Ɣamor kekë Cekem wënde gam kedhie, ku tɔkï röt cuel.
25Na ɣɔn, në kööl ye akööl diäk, akööl ë cueel ë ke, ku cï tëtöök jɔ but, ke wɛ̈ɛ̈t ke Jakop kaarou, yï Thimion kekë Lebi, wɛ̈ɛ̈t ke man Dina, ë ke nöm abätɛ̈ɛ̈uken ë määth. Ku lek wutic ke cïn raan cï ke tïŋ. Ku lek röör nɔ̈k kedhie. 26Arëk abïk yï Ɣamor mat thïn kekë Cekem wënde. Ku bïïkï Dina bei ɣön ë Cekem, ku jëlkï. 27Na wën, acïk kɔc nɔ̈k, ke mïth ke Jakop kɔ̈kë ë ke löök wut yakic, në luɔi ë cï nyankënëden yɔ̈ɔ̈r. 28Nömkï thök ke wut, ku ɣɔ̈k, ku këriëëcdɛn ë nu wut, ayï ka nu roor. 29Nömkï kaken kedhie, mïth ku diäär, ku ka nu ë ɣöötiic kedhie, peckï keek abï ciɛ̈n tök.
30Ago Jakop lɛ̈k Thimion kekë Lebi an, “Wek ë ya yiɛ̈n guöp wël. Wek ë rinkï riɔ̈ɔ̈k tëde kɔc de piny, kɔc ke Kanaan ku kɔc ke Peridh. Tiɛ̈ŋkï, wok lik. Na lek keyiic määt, ku yïnkï wo tɔŋ. Cïkï ya bï riɔ̈ɔ̈r nyin wokë baaidï ëbɛ̈n?”
31Agokï puk nɔm an, “Ka yen duëër nyankënëda jɔ looi cït man ë akɔɔrröör?”
Valgt i Øjeblikket:
Cäk 34: dip-JPB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Jieeng de Padang © The Bible Society in South Sudan, 2011.