Cäk 39
39
Jothep kekë Tiiŋ de Pɔtipar
1Ku Jothep acïï kɔc ke Yicmiɛl lɛɛr Rip, lek ɣɔ̈c Pɔtipar bɛ̈ny ë kɔc ee ɣön ë melik de Rip tiit thok. 2#Luɔi 7:9. Bɛ̈nydït atɔ̈u ke Jothep, ku ye Jothep tɔ tiëm. Ku Jothep arɛ̈ɛ̈r baai de bɛ̈nyde, raan ë Rip. 3Ago bɛ̈nyde ye tïŋ luɔi tɔ̈u ë Bɛ̈nydït ke yen. Ku tïŋ luɔi yen ka nu në yeciin ŋuak nyïïn. 4Go Pɔtipar piɔ̈u miɛt ke yen arëët, ku tɔ ye lïm ë ɣön ë naamde. Ku tɛ̈ɛ̈u ë kake ɣönde nïïm kedhie. 5Gɔl ë köölkɛn ë tɛ̈ɛ̈u en en në kake nïïm ku le tueŋ, Bɛ̈nydït ë baai de Pɔtipar bɛ̈n thieei ëbɛ̈n në këde Jothep. Ku thieei kake kedhie ayadäŋ, ka nu ë duumiic. 6Ago Pɔtipar kake jɔ tääu në Jothep ciin kedhie, ku cïn këdɛn yen bɛ diɛɛr, ee pëk ë cäm kɔ̈u yetök.
Ku Jothep aaye dhuŋ lɛ̈ɛ̈k ee kɔc diir. 7Na ɣɔn, në ee nïn likë, ke Jothep ë diir tiiŋ ë bɛ̈nyde. Go tik lɛ̈k en an, “Bä nöm ɛn.” 8Go Jothep tiiŋ ë bɛ̈nyde jäi, lëk en an, “Tïŋ ënɔɔnë, bɛ̈nydï acie bɛ diɛɛr në kë nu baai ëbɛ̈n, në luɔi nu yɛn eenë. Ë käŋ tääu në yaciin kedhie. 9Yɛn cï nɔm dɛ riɛl cït riɛlde baai eenë. Ku acïn këdɛn kën gäm ɛn, ee yïn akën gäm ɛn yïtök. Ka ye tak duɛ̈ɛ̈r kërɛɛc cït ë kënë bɛ looi adï, ku wääc Nhialic piɔ̈u?” 10Aa ye tik dhiɛl ŋäk Jothep aköölnyïïn ëbɛ̈n, go Jothep aa jai ke cïï tɔ̈c ke yen.
11Na ɣɔn ë kööl tök, Jothep acï lɔ ɣöt lee luɔide looi ɣööt. Ku acïn raan däŋ ë nu baai. 12Na wën, ke tik ë bɔ̈ ɣöt të nu yen thïn, ku dɔm në lupɔ. Ku lëk en, an, “Nöm ɛn.” Go Jothep e nyäŋ lupɔ, ku kɔt ke lɔ biic. 13Na wën, aa tïŋ ë tik luɔi cï Jothep lupɔ nyääŋ piny ku kɔt ke lɔ biic, 14ke cɔl lïïm ke ɣönde, ku lëk keek an, “Tiëŋkï Ɣeberuu wään bïï ë monydï baai luɔi cï yen wo yɔ̈ɔ̈r gup. Acï bɛ̈n ɣöt të nu yɛn thïn, ku në yen aa nööm ɛn. Guɔ kiɛɛu luɔc arëët. 15Na wën, atïŋ ɛn luɔi cän kiiu, ke kɛɛc biic ku nyiëëŋ lupɔde piny në yalɔ̈ɔ̈m.”
16Na wën, ke tik ë päl lupɔ arɛ̈ɛ̈r ëtɛ̈ɛ̈n abï bɛ̈ny ë Jothep bɛ̈n baai. 17Ku be tɛ̈t en cït man awën, lueel an, “Ɣeberuu, lïmduön wään bɛ̈ɛ̈iyë ë woyiic, ë lɔ̈ɔ̈k bɛ̈n ɣöt në yen aa nööm ɛn. 18Na wën, aluɔc kiɛɛu, ke kɛɛc biic ku nyiëŋ ɛn lupɔde.”
19Na wën, aa piŋ ë bɛ̈ny ë Jothep jam wën tɛ̈të tiiŋde yen, ke diu piɔ̈u arëët. 20Ku jɔt Jothep le mac të ye kɔc ë mɛc ë melik tääu thïn, go lɔ tɔ̈u ëtɛ̈ɛ̈n. 21#Luɔi 7:9. Ku Bɛ̈nydït atɔ̈u ke Jothep, ku ye Jothep nyuöth nhiëër agɔk. Ku tɔ nhiɛɛr ë raan ee kɔc mac tiit. 22Ago raan ee kɔc mac tiit Jothep tääu në kɔc mac nïïm kedhie, ku tɔ ye yen nu në këriëëcden nɔm ëbɛ̈n. 23Go raan ee kɔc mac tiit cuök ee bɛ diɛɛr në ka nu në Jothep ciin, në luɔi ë tɔ̈u ë Bɛ̈nydït ke Jothep. Ku aye Jothep tɔ tiëm në këdɛn ye looi yic ëbɛ̈n.
Valgt i Øjeblikket:
Cäk 39: dip-JPB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Jieeng de Padang © The Bible Society in South Sudan, 2011.