Yòhanɛ̀s 2
2
Wo le kpe nyɔ̃nù lè Kanàn
1Lè èŋùkèkè ètɔ̃gɔ̃a gbèa, wo le kpe nyɔ̃nù lè Kanàn, èdù ɖe kè lè Galilea be ànyigbã jia. Yesù be ènɔ̀ lè nyɔ̃nùkpepea. 2Wo kpe Yesù ku yebe nukplaviwo cã. 3Ekè vɛ̃ va dɛ̃a, Yesù be ènɔ̀ gblɔ̃ na ɛ̀ be: “Vɛ̃ vɔ̀ na wo.” 4Vɔ̀a Yesù ɖo e ŋuti na ɛ̀ be: “Nyɔ̃nù, ènyà kɛ ye lè ènyè ku wò dòmè ò? Gàmè mu kpɔ sù na mù hàɖe ò.” 5Ènɔa to na sumɔ̃viawo be: “Mì wɔ̀ ènu ɖekpekpe kè be la gblɔ̃ na mìa.” 6Èkpeze kèwo mè Yudàviwo xɔ̀nà èsì ɖo, sɔ lènà woa ɖokoewo ɖìa àdɛ̃ lè funu. Èkpeze ŋuawo ɖèka xɔ̀nà èsì jijenu èvè àlo ètɔ̃. 7Yesù gblɔ̃ na sumɔ̃viawo be: “Mì kù èsì ɖɔ èkpezeawo.” Eye wo kù èsì ɖɔ wo, pɔpɔpɔ. 8Yesù gblɔ̃ na wo be: “Fifìa, mì kù ì yì na ènu ɖùɖu jikpɔtɔa.” Eye, wo kù ì yì na ɛ̀. 9Kè ènu ɖùɖu jikpɔtɔa ɖɔ èsì kè trɔ zũ vɛ̃a kpɔ, eye mu nya àfi kè vɛ̃ ŋua so òa, tovò na ènu ɖùɖumatɔ kèwo ku èsìa, e yɔ nyɔ̃nùkpetɔa, 10gblɔ̃ na ɛ̀ be: “Vɛ̃ nyuɛ̃a ye àmè sia àmè nana àmèwo cucugbãa, eye ne àhà va le mu àmèwo vɔ̀a, wo ɖènà vɛ̃ kè mu nyɔ òa to. Vɔ̀a, èwò yaa, wò sɔ vɛ̃ nyuɛ̃a ɖɛ, kaka va na fifì!”
11Ekèa ye nyi Yesù be ŋùdãdɔ cucugbã kè be wɔ̀ lè Kanàn, lè Galilea be ànyigbã jia. So ekèa jia, e ɖè yebe gogo fiɔ, eye yebe nukplaviwo xɔ̀ e ji sè. 12Ekèa yomè a, Yesù ku ènɔa, kudo nɔ̀viawo, gbàkudo yebe nukplaviawo, yì Kapɛrnaum eye wo nɔ̀ funua ŋùkèkè vi ɖe.
Yesù do bùbu mawuxɔa ŋuti
(Màt 21.12-13; Mrk 11.15-17; Luk 19.45-46)
13Yudàviwo be Toŋutivayì be àzãa gogo, eye, Yesù yì Yèruzàlɛm. 14E kpɔ àmèwo le sà ènyìwo ku àlɛ̃wo kudo àhɔ̃newo lè mawuxɔa mè, e kpɔ ègàɖɔ̀lìtɔwo cã nɔ̀ ànyi lè mawuxɔa mè. 15E sɔ èkà lɔ̃ àtãŋù, eye, be nyà woa kpata to lè mawuxɔa mè. E nyà wo ku woabe àlɛ̃wo kudo woabe ènyìwo. E kãkã ègàɖɔ̀lìtɔwo be ègàwo, eye be mù woabe èkplɔ̃wo pu ànyi. 16E gblɔ̃ na àmè kèwo le sà àhɔ̃neawo be: “Mì lɔ mìabe ènuwo jo lè fikèa. Mì mu gbà sɔ Ètɔ nyè be àxue sɔ wɔ̀ àjɔdope ò!” 17Yebe nukplaviwo ɖoŋù be wo ŋlɔ̀ ɖɛ be: “Lɔ̃lɔ̃ kè mù ɖo na àxue wòa le bì lè mè nyè.”
18Vɔ̀a, Yudàviwo ɖo e ŋuti na ɛ̀ be: “Jèsìdo kɛ ye wò la sɔ fiɔ mi be wò ɖo la wɔ̀ ènu kèa ò?” 19Yesù ɖo e ŋuti na wo be: “Mì gbã mawuxɔ kèa eye, mù la gbìgbɔ̀ tù ì lè ŋùkèkè ètɔ̃ mè.” 20Yudàviwo gblɔ̃ na ɛ̀ be: “Èpè èkà ci àdɛ̃ ye wo sɔ tù mawuxɔ kèa, vɔ̀a, wò yaa, wò be yè la gbìgbɔ̀ tù ì lè èŋùkèkè ètɔ̃ mèa?” 21Vɔ̀a E yaa, yebe ŋutilã ye le nyi mawuxɔ kè ŋuti be le pò nupo soa. 22Ènu kèa ŋuti ye, wàlɛbɛ kè Yesù fɔ̃ so èkua, yebe nukplaviwo ɖoŋù be e gblɔ̃ nène na yèwo kpɔ; eye wo xɔ̀ ŋɔ̀ŋlɔ̃awo ku ènu kèwo Yesù gblɔ̃ na woawo ji sè.
Yesù jèsi àgbètɔ be èjì mè nyuɛ̃ ɖe
23Wàlɛbɛ kè Yesù nɔ̀ Yèruzàlɛm, lè *Toŋutivayì be àzã hùenua, àmè sùgbɔ xɔ̀ e ji sè, ɖo wo kpɔ ŋùdãdɔ kèwo be lè wɔ̀a. 24Vɔ̀a Yesù mu dojì ɖo woa ŋuti ò, ɖo e jèsi woa kpata nyuɛ̃ ɖe. 25Eye mu hiã be woa ɖù ɖase na yè so àgbètɔ ŋuti ò, ye ŋutɔ nya ènu kè lè àgbètɔ be èjì mèa.
Valgt i Øjeblikket:
Yòhanɛ̀s 2: GEN
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Mina Bible © Bible Society of Togo, 2014.
