Shiyanso 11
11
Umunaala umutali mandu ugwa ku Babeeli
1Uluhaavi ulo, avaanu woona va nyi vakhandi shimyanja shimo ni shilogolo shimo. 2Yaava kiija, avaanu vaganile kiyansa kihaama kihuma kunena, vaafikha ku lunyikha lwa Shinaali, baheene vayansa kikhala ukho.
3Insiku saganile kishila, vajovelana vaaja, “Vayaa! Tilute, tifyatule amatofaali, tiganyaanye wunofu.” Ndeeno, vaava na matofaali aga kipyanisa pa mangʼanga, ni lami kipyanisa pa sementi. 4Khanji vajovelana vaaja, “Lino, tilute tisenje ilijumbi nu munaala mutali mandu. Pashaanya ya munaala ugu pawudugo gufishe ku wulanga, ndeeno ilitaawa lyesu live limanyikha tileshe kipalankhana mu nyi yoona.”
5Leelo, uMutwa uNguluvi wáyiikha pansi, kiija alyaje ilijumbi nu munaala gula guna vakhandi visenga avaanu. 6Apo, wáaja, “Avaanu awo vaanu va nyi yimo, ishilogolo shaanave shimo na ishi shiyanso hela sha gala gina viyansa kigasenga. Shoshoona shina vidobokha kisenga, vangasenga ngaja shina vidobokha. 7Lino, shoshi tiyiishe pansi, tishinanje ishilogolo shaanave, baheene vapootwe kipulinkhana.”
8Apo, uMutwa uNguluvi wávapalankhania mu nyi yoona, woope vaalekha kisenga ilijumbi lila. 9Lulwene, ilijumbi lila lyatambulwa Babeeli,#11:9 Babeeli: Litaawa lya Shihebulaniya. Uluganulo lwakwe, kihansinkhania hansinkhania. Yimba iliswi Babeeli mu Maswi aMahensa. apo papeene pina wáhansinkhaniaga ifilogolo fya vaanu woona va nyi. Shiyooli, kihuma apo wávapalankhaniaga avaanu mu nyi yoona.
Ifisafi fya Sheemu mbakha uAbulaamu
10Isi mola sa shisafi sha Sheemu. USheemu wáganile kifisa maakha mashumi ishumi, wámusava uAlifakisadi. Uluhaavi ulo gakhandi gashilile maakha gavili kihuma ulufuwukho ulwa malenga kishila. 11USheemu wáganile kimusava uAlifakisadi, wákheele maakha magana gasaanu (500). Uluhaavi ulo, akhandi ana vaana va shidiimi na va shihinja.
12UAlifakisadi wáganile kifisa maakha mashumi gatatu na gasaanu, wámusava uSheela. 13UAlifakisadi wáganile kimusava uSheela, wákheele maakha magana gana na gatatu (403). Uluhaavi ulo, akhandi ana vaana va shidiimi na va shihinja.
14USheela wáganile kifisa maakha mashumi gatatu, wámusava uEbeeli. 15USheela wáganile kimusava uEbeeli, wákheele maakha magana gana na gatatu (403). Uluhaavi ulo, akhandi ana vaana avanji ava shidiimi na va shihinja.
16UEbeeli wáganile kifisa maakha mashumi gatatu na gana, wámusava uPeleegi. 17UEbeeli wáganile kimusava uPeleegi, wákheele maakha magana gana na mashumi gatatu (430). Uluhaavi ulo, akhandi ana vaana va shidiimi na va shihinja.
18UPeleegi wáganile kifisa maakha mashumi gatatu, wámusava uLeewu. 19UPeleegi wáganile kimusava uLeewu, wákheele maakha magana gavili ni gonja (209). Uluhaavi ulo, akhandi ana vaana va shidiimi na va shihinja.
20ULeewu wáganile kifisa maakha mashumi gatatu na gavili, wámusava uSeluugi. 21ULeewu wáganile kimusava uSeluugi wákheele maakha magana gavili ni fungati (207). Uluhaavi ulo, akhandi ana vaana va shidiimi na va shihinja.
22USeluugi wáganile kifisa maakha mashumi gatatu, wámusava uNaholi. 23USeluugi wáganile kimusava uNaholi, wákheele maakha magana gavili (200). Uluhaavi ulo, akhandi ana vaana va shidiimi na va shihinja.
24UNaholi wáganile kifisa maakha mashumi gavili ni gonja, wámusava uTeela. 25UNaholi wáganile kimusava uTeela, wákheele maakha ligana limo ni lishumi ni gonja (119). Uluhaavi ulo, akhandi ana vaana va shidiimi na va shihinja.
26UTeela wáganile kifisa maakha mashumi fungati, wámusava uAbulaamu,#11:26 Abulaamu: Litaawa lya Shihebulaniya. Uluganulo lwakwe, daada yuna atunwilwe. uNaholi nu Halani.
Ishisafi sha Teela
27Isi mola sa shisafi sha Teela. Avaana va Teela vava Abulaamu, uNaholi nu Halani. UHalani wámusavaga uLooti. 28UTeela pina akhandi ashaanali muumi, uHalani wáfwisaga mu lijumbi lya Uli muna wásavilwagwa. Ilijumbi ilya Uli likhandi mu nyi ya Vakalidaayo. 29UAbulaamu nu Naholi vatoolaga. Umudala wa Abulaamu akhandi yu Salaayi, umudala wa Naholi akhandi yu Milika. UMilika akhandi nu wulumbu waakwe yuna itambulwagwa Isika. Woona ava vavili vakhandi vaana va Halani. 30USalaayi akhandi agaya mwana kwa kiiva akhandi mugumba.
31Ilijuva limonga uTeela wávatoolaga uAbulaamu umwanaakwe, uLooti umusukulu waakwe umwana wa Halani nu Salaayi umukhamwanaakwe. Woona vapoola mu lijumbi lya Uli mu nyi ya Vakalidaayo, valungama insila iya kiluta ku nyi ya Kanaani. Leelo, vaganile kifikha ku lijumbi lya Halani, valamula kikhala ukho. 32UTeela wáfwililaga ku Halani akhandi ana maakha magana gavili na gasaanu (205).
Valgt i Øjeblikket:
Shiyanso 11: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.