Shiyanso 15
15
UNguluvi ifinga kwa Abulaamu
1Gaganile kishila ago, iliswi lya Mutwa uNguluvi lyamuyinsila uAbulaamu pina ilolootwa, kiija, “Abulaamu! Usikhatiilaga, one nikikugombelela ngaja ngula na nisikupeele ulutono ulukhome.” 2Leelo, uAbulaamu wáaja, “Wee Mutwa Nguluvi! Lino, usinipeele shishi ongo na yuune nimugaya mwana? Umwana yuna asihaale yu Eliyeseeli uMudamesiki? 3Puliisa! Usinanipeelaje ulusawo, kwa kiiva ya ilyo umuvanda yuna wáasawa kukhaaya yangu, yumwene akhava muhalaaji wangu!”
4Baheene iliswi lya Mutwa uNguluvi lyamuyinsila uAbulaamu khanji lyamujova kiija, “Uyu uEliyeseeli asikhava muhalaaji waakho! Umwanaakho yumwene akhava muhalaaji waakho.” 5Baaho uNguluvi wámuhumya panja wámujovela wáaja, “Loleela kushaanya usivase inondwe, nda shiyooli ukwiliile kisivasa. Shiisho ndeeno shina shikhava shiyolweshe hata ishikholo shaakho.”
6UAbulahamu wámuhuviilila uNguluvi, ndeeno uNguluvi wámuvasa kiiva mugolofu.
7Baheene uNguluvi wámujovela wáaja, “One yuune Nguluvi yuna nakuhumyaga ku lijumbi lya Uli, ku nyi ya Vakalidaayo, kiija nikupeele inyi iyi uyihaale.” 8Leelo uAbulaamu wámuposa wáaja, “Wee Mutwa Nguluvi! Nisiimanye wuli kiija one nisihaale inyi iyi?”
9UNguluvi wámugomosesa wáaja, “Nileetela indama#15:9 Indama: Ingʼoma sa Vahebulaniya, indama yoope yikhandi yiyiitikhwa kihumisiwa ishadanda ngaja isadaakha isinji. iya maakha gatatu, ni mene itogota iya maakha gatatu, inkholo iduuvi iya maakha gatatu, inkunda ni nyana nkunda.” 10UAbulaamu wámuleetela uNguluvi ifyo fyona, wáfishinja. Wálandulania shila shidiimwa paakhati kihuma ku mutwe mbakha ku mushila, wásiviikha siloleelane. Leelo inyuni asikhasilandwile. 11Lino inumbusi sayansa kituula pashaanya pa nyama sila, leelo uAbulaamu wáava ikisihwasa.
12Ilijuva pina likhandi liisota, uAbulaamu twamufuna utulo utufuno, baaho inshiisi insito nu wutungumafu fyamugubikha. 13Baheene uNguluvi wámujovela mu malooto wáaja, “Umanyaje shiyooli kiija, avaana va lusawo lwakho, vakhava vahensa mu nyi yina yisili yaanave. Ndeeno, vakhava vavanda na kipata amalava kwa maakha magana gana (400).#15:13 Yimba mu litaafili lya Kihuma 1:1-14; Nsengo sa Vanandeje 7:6. 14Leelo, one nikhayinsa kiyihiga inyi yina yikhavalafya na vina vakhavagaha omwe kiiva vavanda vaanave avaanu awo. Baheene kuwudugo, avanaakho vakhapoola nu wusi winshi kihuma mu nyi iyo. 15Leelo owe ukhagoosipa, ukhafwa na kisiilwa wunofu pina ukhava ugogolweshe. 16Ishisafi shaakho isha wuna#15:16 Ishisafi shaakho isha wuna: Ulukhalala ulu, ishisafi shimo shikwiliile kiiva ngaja maakha ligana limo. shikhatina khanji apa, kwa kiiva uwunansi wa Vaamoli wusinakwilane.”
17Ilijuva lyaganile kisota, inshiisi yadinda mandu, baaho ishikhoso shina shisinkha ilyosi nu lumuli luna lumulikha mandu, shaashila paakhati naakhati ya nyama sila. 18Ilijuva lilila uNguluvi wáfinjile nu Abulaamu wámujovela wáaja, “Navapeela ulusawo lwakho inyi iyi, kihuma umukhoga ugwa Misili mbakha umukhoga gula umukhome ugwa Efulaati. 19Inyi iyi viikhala aVakeeni, aVakenisi, aVakadomoni, 20aVahiti, aVapeleesi, aValefayi, 21aVaamoli, aVakanaani, aVagiligashi na Vayebusi.”
Valgt i Øjeblikket:
Shiyanso 15: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.