Shiyanso 28
28
1UIsaaka wámushemeela uYaakobo, wámuyimiilila, wámulajisa wáaja, “Usikhajelaga kitoola umuhinja uwa Shikanaani. 2Wuukha ulute ku nyi ya Padani-Alaamu, kukhaaya kwa mbuyeenyu uBetuweli umusava umaayi weenyu, utoole umuhinja umunyaayumo wa vaali va Labani, uwulumbu wa maayi weenyu. 3UNguluvi uMunya Ngufu Soona akuyimiilile, usave uyooloshe uve daada wa fipuga fya fikholo fikhome fya vaanu. 4Akuyimiilile owe na vanaakho ngaja shina wámuyimililaga umbuyeenyu Abulahamu, uhaale inyi yina ukheele ngaja muhensa, yina uMutwa uNguluvi wámupeelile uAbulahamu.” 5Lino, uIsaaka wámuhwesa uYaakobo kiija alute ku Padani-Alaamu kwa Labani umwana wa Betuweli uMwalaamu. ULabani uyo, akhandi wulumbu muvaha wa Lebeka, uLebeka akhandi maayi wa Yaakobo nu Esawu.
UEsawu itoola umushimaayi uwa wutatu
6UEsawu wáamanya kiija uIsaaka wámuyimiilila uYaakobo na wámujovela alute atoole umushimaayi ku Padani-Alaamu. UIsaaka pina wámuyimililaga, wámulajisaaga wáaja, “Usikhajelaga kitoola umuhinja wa Shikanaani.” 7Khanji uYaakobo wávatiilaga uwiihe nu maayi waakwe na kiluta ku Padani-Alaamu. 8Apo, uEsawu wáamanya kiija uwiihe asivageene avahinja ava Shikanaani. 9Kwa kiiva ya ilyo, uEsawu wáaluta kwa Ishimayeli umwana wa Abulahamu. Wáaluta ukho kimutoola uMahalati, uwulumbu umunangʼana uwa Nebayoti, umwali wa Ishimayeli.
Amalooto ga Yaakobo ku Beteeli
10UYaakobo wáganaga kiwuukha kihuma ku Belisheeba,#28:10 Yimba mu litaafili lya Shiyanso 21:31. wáaluta ku lijumbi lya Halani. 11Ilijuva lyaganile kisota, wáava afishile uluvala lumonga. Wálamula kigona baaho, wátoola ilingʼanga live lihagulo baheene wáagona. 12Uluhaavi pina agonile, wáloota ilitaanilo liyimiikhwe kihuma pansi mbakha lipyasiise ku wulanga. Wáawona avamalayikha va Nguluvi vitaana na kiyiikha pa litaanilo ilyo. 13Pashaanya ya litaanilo ilyo, wáali ayiimile uMutwa uNguluvi. Baheene uMutwa uNguluvi wámujovela wáaja, “One yuune Mutwa Nguluvi, Nguluvi wa mbuyo uAbulahamu na Nguluvi wa Isaaka. Inyi iyi yina uyigoneele, nikikupeela owe nu lusawo lwakho. 14Avanaakho vakhava vinshi ngaja luhankha. Vakhayalaalila uluvala loona, ulwa kusikha, kunena, kunyiikho, na kunyagamo. Kwa kiiva yaakho ni shisafi shaakho, nikhafiyimiilila ifikholo fyona ifya nyi. 15Uyinatilaje kiija one nikhava noowe, nikhava nikikuyangalila shila luvala luna ukhava wiiluta, na nikhakuwuyiisa mu nyi iyi. Nisikwiliile kikulekha, mbakha nigasenje gina nakutahisisaaga.”
16Baheene uYaakobo wálamukha mu tulo, wáaja, “Shiyooli, uMutwa uNguluvi akwali apa, leelo one nikhandi nisimeenye.” 17UYaakobo wáyansa kitiila kuno iijova, “Uluvala ulu lusito ngaja shishi! Shiyooli iyi nanda ya Nguluvi, khanji shikwilo sha kiyinjilila kushaanya.”
18Kwaganile kiisha hela, uYaakobo wálamukha, wálitoola ilingʼanga lila lina akhandi ayihagwile ku mutwe, wáliyiimikha kiiva nsimbili ya luuju lwa luvala ulusito, baheene wápabaagula, wálikunulila ilingʼanga amafuta. 19Uluvala ulo, wálupeela ilitaawa lya Beteeli, uluganulo lwakwe, nanda ya Nguluvi. Ulwamwandi ilijumbi ilyo likhandi litambulwa Lusu. 20Apo, uYaakobo wáfinga kwa Nguluvi wáaja, “Nda usiive lumo noone na unidiime mu lushuulo lwangu, na unipeele ishakiilya na menda aga kifwala, 21na niwuye kukhaaya kwa wiheesu wunofu, apo baheene owe Mutwa Nguluvi ukhava Nguluvi wangu. 22Apa pa lingʼanga ili lina naliyiimikha ngaja nsimbili pasiive luuju na kiiva luvala lunofu ulwa kikufuunya owe Mutwa Nguluvi. Nisikupeele shila shiinu shimo isha fipuga ishumi ifya fiinu fyofyona fina usiive ukinipeela.”
Valgt i Øjeblikket:
Shiyanso 28: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.