Shiyanso 29

UYaakobo iiluta kwa Labani

1Baheene uYaakobo wáshuula, wáafikha mbakha ku nyi ya vaanu va kunena. 2Kula, wályaga ilisima paakhati naakhati ya lunyikha, ni fipuga fitatu fya nkholo ni mene sigonile mulubali siheepile kingʼwesewa amalenga. Ilisima ilyo likhandi ligubiikhwe kwa lingʼanga ilikhome. 3Yikhandi mbakha inkholo soona sikungaane, baheene avadimaaji vabiluse ilingʼanga ilyo kihuma pa lisima. Pina vaamala kisingʼwesa, vakhandi vikiliwuyiisa ilingʼanga pa lisima ilyo.

4Baheene uYaakobo wávaposa avadimaaji wáaja, “Valukholo lwangu, muhumile kwi?” Vamujovela, “Tihumile ku Halani.” 5Khanji wávaposa wáaja, “Wuli, mumumeenye uLabani umusukulu wa Naholi?” Vamujovela vaaja, “Timumeenye.” 6Baheene uYaakobo wáyitenekha kivaposa wáaja, “Wuli, umwene ilamukha?” Vamugomosesa vaaja, “Umwene ilamukha. Loleela kula, umwali waakwe uLaheli yula, ayinsile ni mene ni nkholo saakwe.” 7UYaakobo wávajovela, “Mbona ishiminsi shishaanali, na uluhaavi ulwa kifikungaania ifidiimwa lushaanali. Fingʼwesi ifidiimwa na mufiwuyiise kifidiima.” 8Leelo avadimaaji vala vamujovela, “Tisikwiliile kigaha ndeeno mbakha ifipuga fyona fikungaane panu, baheene tilibiluse ilingʼanga pa lisima, tifingʼwese ifidiimwa.”

9Uluhaavi pina akhandi ashaanali ilogola nawo, uLaheli wáafikha ni nkholo ni mene isa wiihe, kwa kiiva uLaheli akhandi mudimaaji. 10UYaakobo wáganile kimwaga uLaheli, umwana wa Labani uwulumbu wa nyina ni nkholo sa Labani, wáaluta wálibiilusa ilingʼanga pa lisima, baheene wáfingʼwesa ifidiimwa fya yaaye uLabani. 11Baheene uYaakobo wámunoonela uLaheli, wákhoola kwa wushendeefu. 12UYaakobo wámujovela uLaheli wáaja, “One nili lukholo nu wiheenyu, nili muswamuve wa Lebeka.” ULaheli wáganile kipulikha ilyo, wáasiga luvilo, wáaluta kimujovela uwiihe.

13ULabani wáganile kipulikha imola isa yaaye uYaakobo, wáaluta luvilo kimuhunjila. Wámuwaawusa, wámunoonela, baheene wámusaajisa kunyaakwe. Baheene uYaakobo wámutaviilila injowo soona. 14ULabani wámujovela uYaakobo wáaja, “Shiyooli, owe uli lukholo lwangu, danda yiyiimo noone!” UYaakobo wáakhala kunyaakwe luhaavi lwa mwesi gumo.

UYaakobo ikivatoola avaali va Labani

15Ilisiku limonga uLabani wámujovela uYaakobo wáaja, “Owe uli lukholo lwangu, lino kwashi unisenjelaje bule? Unijovele ishiinu isha kikuhomba.”

16Lino, uLabani akhandi ana vaali vavili, umukhome akhandi itambulwa Leya, umunangʼana akhandi itambulwa Laheli. 17ULeya akhandi ana meeho gangaya ngufu, leelo, uLaheli akhandi ana muvili munofu, khanji akhandi anojeele.

18UYaakobo wáali amuganile uLaheli, baheene wámujovela uLabani wáaja, “Nisikusenjele insengo maakha fungati, baheene unitwase umwali waakho umunangʼana uLaheli.” 19ULabani wámujovela wáaja, “Nayiitikha, lunofu nikutwase owe kulikho kimutwasa kwa muunu uyunji. Ukhale noone baaha panyangu.” 20Baheene, uYaakobo wámusenjela insengo uLabani maakha fungati aga kimutoola uLaheli. Amaakha fungati ago, akhagaweene ngaja nsiku nsheefu, kwa kiiva akhandi amugeene mandu uLaheli.

21Kuwudugo, uYaakobo wámujovela uLabani, “Nakwisa amaakha aga kikusenjela insengo, lino nipeela umudala wangu nive nawo.” 22Baheene, uLabani wávayaana avaanu woona ava luvala ulo, wáagaha ishiwungo. 23Leelo paashilo, uLabani wámutwala uLeya kwa Yaakobo, uYaakobo wáagona nawo. 24ULabani akhandi amupeelile uLeya umuvanda waakwe wa shidala yuna akhandi itambulwa Silipa, uwa kimusunga uLeya. 25Kwaganile kiisha, uYaakobo wátinukha! Humbe, uyu yu Leya! Baheene wámuposa uLabani wáaja, “Shishi ishi shina wanigaha? Wuli, nisakusenjela insengo kwa kiiva ya Laheli? Lino, kwashi wanijanga ndeeni?” 26ULabani wámujovela wáaja, “Kunyeesu kuno tisiigaha ndeeno, usikwiliile kitala kimutoola umunangʼana, umuleshe umukhome. 27Maliisa nsiku fungati isa shiwungo nu Leya, baheene tikupeele uLaheli umutoole, khanji unisenjele insengo kwa maakha aganji fungati.” 28UYaakobo wáyiitikha. Insiku fungati isa shiwungo nu Leya saganile kisila, baheene uLabani wámutwasa uLaheli kwa Yaakobo ave mudala waakwe. 29ULabani wámupeela uLaheli umuvanda waakwe wa shidala yuna akhandi itambulwa Biliha, ave muvanda waakwe. 30Lino uYaakobo akhandi iigona nu Laheli, akhandi amugeene mandu kishila uLeya. UYaakobo wámusenjela insengo uLabani kwa maakha aganji fungati.

Avaana va Yaakobo

31UMutwa uNguluvi wáganile kiwona kiija, uLeya akhandi asiganiilwe nu Yaakobo, baheene wámupeela avaana. Leelo, uLaheli akhandi asipaapukha. 32Lino, uLeya wásumula ulwanda, wáasava umwana wa shidiimi, wámutambulila ilitaawa lya Lubeni,#29:32 Lubeni: Litaawa lya Shihebulaniya. Uluganulo lwakwe, Loleela, mwana mugoosi. kwa kiiva wájovile, “Shiyooli, uMutwa uNguluvi wágaaga amalava gangu, lino umugoosi wangu asinigane.” 33ULeya wáava nu lwanda khanji, wáasava umwana wa shidiimi wámutambulila ilitaawa lya Simiyoni,#29:33 Simiyoni: Litaawa lya Shihebulaniya. Uluganulo lwakwe, kipulikha. kuno iijova, “UMutwa uNguluvi wánipeela umwana uyunji kwa kiiva wányaaga shina nikhalalilwa.” 34Wáava nu lwanda ulwa wutatu, wáasava umwana wa shidiimi baheene wáaja, “Lino umugoosi wangu asiive lumo noone, kwa kiiva namusavila avaana vatatu ava shidiimi.” Lino, umwana uyo wámutambulila ilitaawa lya Laawi.#29:34 Laawi: Litaawa lya Shihebulaniya. Uluganulo lwakwe, Nalunganisiwa. 35ULeya wásumula ulwanda khanji, wáasava umwana wa shidiimi, ndeeno wáaja, “Eena uluhaavi ulu nisimusufye uMutwa uNguluvi.” Baheene wámutambulila ilitaawa lya Yuuda,#29:35 Yuuda: Litaawa lya Shihebulaniya. Uluganulo lwakwe, Asufisiwaajwe. apo, uLeya wáyiima kisava avaana.

Valgt i Øjeblikket:

Shiyanso 29: Shisangu

Markering

Del

Kopiér