Shiyanso 35

UYaakobo iitina ku Beteeli

1Ilisiku limonga uNguluvi wámujovela uYaakobo, “Uwuushe, ulute mbakha ku lijumbi lya Beteeli,#35:1 Yimba mu litaafili lya Shiyanso 28:19. ukhale ukho na kinisenjela one Nguluvi uluvala lwa kihumisa ishadanda, pala pina nakutwiwushilaga, uluhaavi luna ukhandi ukimusiga uEsawu umaamo.”#35:1 Yimba mu litaafili lya Shiyanso 28:11-17.

2Lino, uYaakobo wávajovela avaanu va mu nanda yaakwe na woona vina akhandi nawo wáaja, “Humyaji isanaamu isa manguluvi sina munaso, muyivalase, mufwale amenda gina gakhansiilwe. 3Shoshi ku Beteeli, ukho nisimusenjele uNguluvi uluvala lwa kihumisa ishadanda. Umwene wánitanjilisaaga pina nikhandi mu luhaavi lwa malava gangu na akhandi lumo noone kokoona kuna nikhandi niiluta.” 4Baheene vamupeela uYaakobo isanaamu soona sina vakhandi vanaso ni heleeni sina vakhandi vafwele ngaja hiliisi mu makutu gaanave. UYaakobo wáfisiila fyona pansi pa linsina lya mupishi umwalooni, nkholeela ni lijumbi lya Shekemu.

5Baheene vawuukha. UNguluvi wávagaha avaanu woona va mu majumbi ga nkholeela vatiile mandu. Ndeeno, kusiina umuunu yuna wámufwataga kiija, amuyalushile kwa wulugu uYaakobo na vaanu vaakwe. 6UYaakobo na vaanu vaakwe vaafikha ku lujinji lwa Lusu luna lutambulwa Beteeli mu nyi ya Kanaani. 7Ukho, wásengaga uluvala lwa kihumisa ishadanda, wálutambulila ilitaawa lya Eli-Beteeli,#35:7 Eli-Beteeli: Litaawa lya Shihebulaniya. Uluganulo lwakwe, Nguluvi wa Beteeli. kwa kiiva uNguluvi wámutwiwushilaga uluhaavi pina akhandi ikimusiga umaame. 8Uluhaavi lula uDeboola yuna akhandi ikimusunga uLebeka wáfwisaga. Wásiilwa pansi pa linsina lya mupishi umwalooni ku lukwawo ulwa Beteeli. Ndeeno, uYaakobo wápatambulila apo ilitaawa lya Aloni-Bakuti.#35:8 Aloni-Bakuti: Litaawa lya Shihebulaniya. Uluganulo lwakwe, mupishi gwa shivembo.

9Pina uYaakobo wáganaga kiwuya kihuma ku nyi ya Padani-Alaamu, uNguluvi wámutwiwushilaga khanji na kimuyimiilila. 10wáaja, “Ilitaawa lyakho ilya Yaakobo usiiva wishemeelwa khanji Yaakobo, leelo usiive wishemeelwa Isilaheli.”#35:10 Yimba mu litaafili lya Shiyanso 32:28. 11UNguluvi wámujovela khanji wáaja, “One yuune Nguluvi Munya Ngufu Soona. Usave avaana, uyooloshe, uve ni fimyanja finshi. Ifimyanja fya nyi ni fipuga ifikhome fya fikholo fya nyi fikhahuma kunyaakho, na vatwa vakhahuma mu shisafi shaakho! 12Inyi iyi yina navapeelaga uAbulahamu nu Isaaka, nisikupeele owe, khanji nisishipeele ishisafi shaakho.” 13UNguluvi wáganile kimala kilogola nu Yaakobo hela, wáaluta kushaanya. 14Baheene uYaakobo wáyiimikha insimbili ya lingʼanga pala pina uNguluvi wálogolaga na woope, wálibaagula, wálikunulila isadaakha ya shingʼwelwa na mafuta pashaanya yaakwe. 15Baheene uYaakobo wápatambula apo Beteeli,#35:15 Beteeli: Litaawa lya Shihebulaniya. Uluganulo lwakwe, nanda ya Nguluvi. kiiva apo uNguluvi wálogolaga nawo.

Kisawa kwa Benyamini na kiifwa kwa Laheli

16Baheene, uYaakobo na vaanu vaakwe vawuukha kihuma ku Beteeli. Uluhaavi pina vakhandi vashaanali vishuula viiluta ku Efulaata, uLaheli wáava nu wuvafi uwukhamu mandu uwa kisava. 17Pina uwuvafi wukhandi wumukheete mandu, umusavisaaji yula akhandi ikimutanga wámujovela wáaja, “Usikhatiilaga, kiiva khanji waapata umwana uyunji umudiimi.” 18Lino uLaheli pina wáali isakula kiifwa, wámutambulila umwana yula ilitaawa lya Benooni,#35:18 Benooni: Litaawa lya Shihebulaniya. Uluganulo lwakwe, mwana wa malava. leelo uwiihe wámutambulila ilitaawa lya Benyamini.#35:18 Benyamini: Litaawa lya Shihebulaniya. Uluganulo lwakwe, mwana wa liwokho lya kundiilo, lina likhandi liwokho lya bahati nofu mu ngʼoma sa Vaisilaheli. 19Ino uLaheli wáafwa, wásiilwa palubali pa nsila ya kiluta ku Efulaata, insiku isi litambulwa Betelehemu. 20Apo, uYaakobo wáliyiimikha ilingʼanga lya luuju pashaanya ya lijooja lya Laheli. Ilingʼanga ilyo liwonensa ilijooja lya Laheli mbakha iminsiyaano. 21UIsilaheli wáyitenekha kishuula mbakha ku milimo ya nsimbili ya Edali, wásenga ilitinga.

22Pina uIsilaheli akhandi iikhala mu nyi iyo, umwanaakwe uLubeni wáagona nu Biliha umudala umunangʼana wa wiihe. Woope uIsilaheli wápulikha amaswi ago.

Avaana va Yaakobo

UYaakobo akhandi ana vaana va shidiimi ishumi na vavili. 23Avaana avadiimi va Leya vakhandi uLubeni, umwana wa wutasi wa Yaakobo, wátunjilila uSimiyoni, uLaawi, uYuuda, uIsakaali nu Sabulooni. 24Avaana avadiimi va Laheli vakhandi uYusufu nu Benyamini. 25Avaana avadiimi va Biliha umuvanda wa Laheli, vakhandi uDani nu Nafutaali. 26Avaana avadiimi va Silipa umuvanda wa Leya vakhandi uGaadi nu Asheeli. Ava vaveene vaana va Yaakobo vina wásavaga pina akhandi ku nyi ya Padani-Alaamu.

Imfwa ya Isaaka

27Baheene uYaakobo wáawuya ku Mamule kukhaaya kwa wiihe uIsaaka, nkholeela ni lijumbi lya Kiliyati-Aluba, insiku isi litambulwa Hebuloni. Apa papeene pina uAbulahamu nu Isaaka vakheele ngaja vahensa. 28UIsaaka wáganile kifisa maakha ligana limo na mashumi munaana (180), 29wáava agosiipe mandu, wáafwa. Avaswamuve uEsawu nu Yaakobo vamusiila.

Valgt i Øjeblikket:

Shiyanso 35: Shisangu

Markering

Del

Kopiér

Vil du have dine markeringer gemt på tværs af alle dine enheder? Tilmeld dig eller log ind

Læs mere om IShiyanso nu Lufingo uLupya