Shiyanso 48
48
UYaakobo ikivayimiilila uManaase nu Efulahimu
1Insiku saganile kishila, uYusufu wájovelwa kiija, uwiiho mutamu. Baaho, wávatoola avanaakwe vavili, uManaase nu Efulahimu, wáaluta nawo kwa wiihe. 2Woope uYaakobo wájovelwa, “Umwanaakho uYusufu wáyinsa.” UIsilaheli wáyikhangasa wálamukha, wáakhala pa wusaga.
3Baheene uYaakobo wámujovela uYusufu wáajova, “UNguluvi uMunya Ngufu Soona wánitwiwushilaga, pina nikhandi ku lijumbi lya Lusu, mu nyi ya Kanaani, wániyimiilila. 4Wánijovela ndeeni, ‘Nisikuyimiilile uyooloshe uve na vaana, usiive mbuya wa shisafi shikhome. Ishisafi shaakho shikhahaala inyi iyi shiluta!’#48:4 Yimba mu litaafili lya Shiyanso 35:9-15.
5“Lino avanaakho vavili uEfulahimu nu Manaase, vina vasawaagwa apa pa Misili pina nikhandi nisinayinse kunyaakho, vakhavasiwa kiiva vanangu ngaja uLubeni nu Simiyoni. 6Leelo avaana avanji vina ukhasava paanyuma, awo vakhavasiwa kiiva vaakho. Inyi yina vakhahaala yikhavasiwa kiiva wuhaasi wa Efulahimu nu Manaase. 7Pina nikhandi niiwuya kihuma ku Padani-Alaamu nasugumilwagwa mandu, kwa kiiva umaayi weenyu uLaheli wáfwisaga mu nsila. Uluhaavi lula, tikhandi nkholeela ni lijumbi lya Efulaata mu nyi ya Kanaani. Ndeeno, namusiilaga palubali ya nsila iya kiluta ku Efulaata, yaani ku Betelehemu.”#48:7 Yimba mu litaafili lya Shiyanso 35:16-20.
8UIsilaheli wáganaga kivaaga avaana va Yusufu, wámuposa, “Ava vava naani?” 9UYusufu wámugomosesa uwiihe wáaja, “Ava vanangu vina uNguluvi wánipeelaga pina nikhandi kuno ku Misili.” Baheene uwiihe wáajova, “Vahejeesa panu, nisakula nivayimiilile.”
10Lino, ameeho ga Isilaheli gakhandi gateleepe kwa kiiva ya wugogolo. UYusufu wávavejeesa avanaakwe kwa wiihe, baheene woope wávanoonela na kivakumbaatila. 11UIsilaheli wámujovela uYusufu wáajova, “Mwanangu, nisikhandi nimeenye kiija nikhawaaga uweeni waakho khanji, leelo lino uNguluvi wánigaha nivaaje hata avanaakho.”
12Baheene uYusufu wávawuusa avanaakwe pa mafugamilo ga wiihe, umwene wásungama mbakha pansi kwa lishima. 13Gaganile kishila ago, uYusufu wámuviikha uEfulahimu ku liwokho lya kunshiji ilya Isilaheli, uManaase wámuviikha ku liwokho lya kundiilo, baheene wávahejeesa nkholeela nu mbuyaanave. 14Leelo, uIsilaheli wágobelenkhania amawokho, iliwokho ilya kundiilo, wáviikha ku mutwe gwa Efulahimu umunangʼana wa Manaase, iliwokho ilya kunshiji wáviikha ku mutwe gwa Manaase yuna akhandi wa wutasi kisawa. 15Baheene wámuyimiilila uYusufu wáajova,
“UNguluvi wa vambuyeesu uAbulahamu nu Isaaka,
uyo yumwene yuna vamutiilaga,
uNguluvi uyu yuna mudimaaji wangu nsiku soona,
16umalayikha yuna wánikulusaaga mu mavi goona,
umwene avayimiilile avadiimi ava.
Vave vitambulwa kwa litaawa lyangu, na kwa mataawa ga vambuyeesu, uAbulahamu nu Isaaka,
vayooloshe vave vinshi mandu.”
17UYusufu wáganaga kiwona kiija, uwiihe wáviikha iliwokho lyakwe ilya kundiilo pa mutwe gwa Efulahimu, asikhanojeelwe. Ndeeno, wáajesa kiwuusa iliwokho lya wiihe pa mutwe gwa Efulahimu, aliviishe kwa Manaase. 18UYusufu wámujovela uwiihe, “Wiheesu, usikhagahaga ndeeno! Uyu yumwene muswamu wangu wa wutasi. Nikikulomba mandu, uviishe iliwokho lyakho ilya kundiilo pa mutwe gwakwe.”
19Leelo, uwiihe wákhaanaga wáajova, “Nimeenye mwanangu. Avaana va Manaase woona vakhayoolokha vave vinshi, khanji akhava muunu mukhome. Leelo umunangʼana waakwe, akhava mukhome kimushila umwene ni shisafi shaakwe shikhava shikholo shikhome mandu mu nyi.” 20Ilisiku ilyo, uIsilaheli wávayimiilila avaana va Yusufu wáajova,
“Kwa mataawa geenyu, aVaisilaheli vasiive viyimililana viija,
‘UNguluvi akugahe ngaja uEfulahimu nu Manaase!’”
Shiisho ndeeno, uIsilaheli wámuviikha uEfulahimu pa Manaase.
21Kuwudugo, uIsilaheli wámujovela uYusufu, “Mwanangu, ngaja shina ukinyaaga, one nili nkholeela kiifwa. Leelo uNguluvi akhava lumo noomwe, akhavatinia ku nyi ya vambuyeenyu. 22Lumo na ilyo, nikikupeela uluvala ulunofu mandu kishila avalukholo lwakho, uluvala luna navapokhaga kwa wulugu aVaamoli.”
Valgt i Øjeblikket:
Shiyanso 48: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.