Mataayo 5
5
Amamanyiso ga Yeesu ku shidunda
(Luuka 6:20-23)
1UYeesu wáganile kishaaga ishipuga shila isha vaanu, wátaanile ku shidunda, wáakhala. Baheene wáganile kikhala, avamanyisiwa vaakwe vamulutiile. 2Wáyansa kivamanyisa wáaja,
3“Shiba awo vina vikimusakula uNguluvi mu numbula saanave,
kiiva uWutwa wa Nguluvi waanave.
4Shiba awo vina vasugumiilwe,
kiiva uNguluvi asivayishilise.
5Shiba awo vina vahuugu,
kiiva uNguluvi akhavahaasa inyi yina wátahisaaga.
6Shiba awo vina vidobokha mandu kigaha gina idobokha uNguluvi,
kiiva uNguluvi akhavapeela gina vidobokha.
7Shiba awo vina vikivasungupila avanji,
kiiva uNguluvi woope akhavasungupila.
8Shiba awo avanya numbula nofu,
kiiva vakhamwaga uNguluvi.
9Shiba awo vina vikivalingaania avaanu,
kiiva vakhava vaana va Nguluvi.
10Shiba awo vina vilafisiwa kwa kiiva ya kisenga gina idobokha uNguluvi,
kiiva uWutwa wa Nguluvi wukhava waanave.
11“Shiba omwe muna mwiligwa, mwilafisiwa na mwidehelwa shila wunansi kwa kiiva yangu. 12Kiiva shiisho ndeeno hata avambuyaanave shina vavalafyaga avakuwamalago ava pawukuulu. Shendeevaji mandu na kishima, kwa kiiva uNguluvi avavishiile amahombo amakhome kushaanya.
Umuunyo nu lumuli
(Maluko 9:50; Luuka 14:34-35)
13“Omwe muli ngaja muunyo gwa nyi. Leelo nda gunanjishe, gusikwiliile kiiva nu wunofu wowoona khanji. Umuunyo ngaja ugo, gwiva gugaya nsengo, leelo gwiva gwa kitaaga na kikhanywa hela na vaanu.
14“Omwe muli ngaja lumuli lwa nyi luna lukivamulishila woona. Ilijumbi lina lisenjiilwe pashaanya ya shidunda, lisikwiliile kityega. 15Khanji, kusiina umuunu yuna iveesa ulumuli, na kigubikha ni shigaana. Leelo, iviikha pa liwumbila, baheene avaanu woona vina vali mukhati vawaaje uwuvalafu. 16Shiisho ndeeno, uwunofu weenyu wuwoneshe kwa woona ngaja uwuvalafu wula, baheene avaanu vasaaje insengo seenyu inofu, vamusufye uWiheenyu uwa kushaanya.
Amamanyiso ga Yeesu aga ndaji sa Musa
17“Musikhahiivaji kiija nayinsaga kisiwuusa indaji sa Musa#5:17 Indaji sa Musa: Yimba iliswi Musa mu Maswi aMahensa. na mamanyiso ga vakuwamalago. Nisikhayinsile kiwuusa, leelo kigakwisa gina avakuwamalago vatavililaga. 18Shiyooli nikivajovela kiija, mbakha mu luhaavi luna uwulanga ni nyi fikhawuukha, kusiina hata helufi yimo iya ndaji yina yikhawuukha, mbakha gasenjeshe goona gina uNguluvi wátahisaaga. 19Umuunu yoyoona yuna ikiyisala indaji yimo indoodo kishila indaji soona na ikivamanyisa avanji kiija vasisale, uyo yumwene akhava munangʼana mandu mu Wutwa wa Nguluvi. Leelo yoyoona yuna ikisiyinatila indaji na kivamanyisa avanji, uyo yumwene yuna akhava mukhome mu Wutwa wa Nguluvi. 20Nikivajovela kiija nda musiiva vagolofu kivashila aVafalisaayo na vamanyisaaji va ndaji sa Musa, mumanyaje kiija musikhayinjila kaa, mu Wutwa wa Nguluvi.
Amamanyiso aga nkhalasi
(Luuka 12:57-59)
21“Mupuliishe kiija avaanu ava pawukuulu vajoveelwe kiija, ‘Usikhabudaga#5:21 Yimba mu litaafili lya Kihuma 20:13. na kiija umuunu yoyoona yuna ikimubuda umuyine, isakulwa ahigwe.’ 22Leelo one nikivajovela kiija, umuunu yoyoona yuna ikimukhalalila umuyine, isakulwa kihigwa, yuna ikimusala ulukholo lwakwe, akhahigwa ni livansa. Umuunu yuna ikimujova ulukholo lwakwe kiija muyasu, isakulwa kitaagwa mu malafyo ga mooto gwa shiluta!
23“Nda wiihumya isadaakha pa luvala ulwa kihumisa ishadanda, leelo wakumbukha kiija munangeene nu muyaago, 24yilekhaga tangusiina isadaakha iyo pa luvala ulo, ulute upulinkhane nu muyaago yula. Baheene uyinse kihumya isadaakha yaakho.
25“Umunya mukhole waakho nda ikikutwala pa livansa, pina muli mu nsila jimbaga kimulambiisila, kiija mupulinkhane. Nda usigahile ndeeno, asikutwale pa livansa, ukho usiihigwe na kitwalwa kwa ngufu mu shifungo. 26Shiyooli nikikujovela kiija, usikhapoola mukhati umo, mbakha uhombe umukhole goona!
Amamanyiso aga wushemi
27“Mupuliishe indaji yiijova kiija, ‘Usikhawafukhaga.’#5:27 Yimba mu litaafili lya Kihuma 20:14. 28Leelo one nikivajovela kiija, umuunu yoyoona yuna ikimuloleela uwashimaayi kwa kimudobokha, iiva wáwaafukha mu numbula yaakwe. 29Iliiho lyakho ilya kundiilo, nda likikupinsa kigaha uwunansi, lijodola! Shiba uve usiina ishilungo shimo sha muvili gwakho, kulikho umuvili gwakho goona gutaagwe mu malafyo ga mooto gwa shiluta. 30Khanji, iliwokho lyakho ilya kundiilo, nda likikupinsa kigaha uwunansi, lidumula na kilitaaga. Shiba kiyasa ishilungo shimo mu muvili gwakho, kulikho umuvili gwakho goona gutaagwe mu malafyo ga mooto gwa shiluta.
Amamanyiso aga kilekhana umudala nu mugoosi
(Mataayo 19:9; Maluko 10:11-12; Luuka 16:18)
31“Khanji, mupuliishe indaji yiijova kiija, ‘Umuunu yoyoona yuna ikimulekha umudala waakwe, isakulwa kimupeela ibalula ya kimulekha.’#5:31 Yimba mu litaafili lya Luuju lwa Ndaji 24:1. 32Nikivajovela kiija, nda umuleshe umudala waakho shiishi hela asiwafwishe, nda alute atoolwe khanji, usiive wávagaha vave vaafu woona, umudala waakho lumo nu mugoosi yuna wámutoola.
Amamanyiso aga kiyiyiiga
33“Mupuliishe kiija avaanu ava pawukuulu vajoviilwe kiija, ‘Mbakha mukwise na kigaha goona ago gina mukiyiyiiga kwa Mutwa.’ 34Leelo one nikivajovela kiija, musikhayiyiigaji khabisa kwa litaawa lya kushaanya kwa Nguluvi, kiiva ukho kukwene wiikhasi waakwe. 35Khanji musikhayiyiigaji kwa nyi, kwa kiiva ukho kukwene kuna uNguluvi iviikha amagulu gaakwe, awu musikhayiyiigaji kwa lijumbi lya Yelusalemu, kwa kiiva ilyo lilyene lijumbi lya Mutwa uMukhome. 36Khanji, musikhayiyiigaji kwa matwe geenyu kwa kiiva musikwiliile kiseetula luyele hata lumo mu nyele seenyu kiiva luvalafu awu lutiitu. 37Nda mwiyiitikha, yitikhaji. Awu nda mwikhaana, khaanaji. Aganji goona gina giyonjelela mu ago, giihuma kwa Munansi yula uShetaani.
Amamanyiso aga kihombesa
(Luuka 6:29-30)
38“Mupuliishe indaji ya Musa yiijova kiija, ‘Nda umujodole umuyaago iliiho awu umugobole iliino, na yuuwe usijodolwe iliiho na kigobolwa iliino.’#5:38 Yimba mu litaafili lya Kihuma 21:24; Njowo sa Valaawi 24:20; Luuju lwa Ndaji 19:21. 39Leelo one nikivajovela kiija musikhamugomosesaaji amavi umuunu yuna ikivagahila amavi. Leelo umuunu nda akutove ku likhatu ilya kundiilo, mutawulaga akutove khanji ku likhatu ilya kunshiji. 40Khanji, umuunu nda akusitaashe kwa lugulumilo lwa kitoola igwanda yaakho, mulekha atoole nali likhooti.#5:40 Yimba mu litaafili lya Kihuma 22:26-27; Luuju lwa Ndaji 24:12-13. 41Khanji, umuunu nda akungʼangʼaniise kisumula umusigo gwakwe mbakha kifisa kilomiita yimo, fisaaga umusigo ugo mbakha kilomiita sivili. 42Umuunu nda ikikulomba ishiinu shoshoona, mupeelaga. Khanji, umuunu nda ayinsile kikuyaasimya ishiinu, mupeelaga usikhamufinyaga.
Amamanyiso aga kivagana avalugu
(Luuka 6:27-28, 32-36)
43“Mupuliishe indaji ya Musa yiijova kiija, ‘Umuganaje umuyaago,#5:43 Yimba mu litaafili lya Njowo sa Valaawi 19:18. leelo mukhalalilaga umulugu waakho.’ 44Leelo one nikivajovela kiija vaganaji avalugu veenyu. Khanji, vafunyilaji kwa Nguluvi woona vina vikivatesa. 45Apo baheene musiive vaana va Wiheenyu yuna ali kushaanya, kiiva yumwene yuna ikivamulishila ilijuva avaanu avagolofu na vanansi. Khanji, itoonyesa inoonya kwa vaanu vina vagolofu na vina vasili vagolofu. 46Nda muvagane vala hela vina vikivagana, musiipate lutono lushi? Wuli, avatofya khoodi#5:46 Avatofya khoodi: Yimba iliswi Vatofya khoodi mu Maswi aMahensa. woope vasikivagana vina vikivagana hela? 47Khanji, nda muvahunjile avalukholo lwenyu hela, wuli, musiive mwasenga shishi isha kishila? Hata vina vasili Vayahuudi woope viigaha shiisho ndeeno! 48Lino, muveesaje vagolofu ngaja uWiheenyu uwa kushaanya shina mugolofu.”
Valgt i Øjeblikket:
Mataayo 5: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.