Matalikilo 2
2
1Mbombuboobu julu anyika, azintu zyoonse zili mumo mbuzyakalengwa. 2Lino mubuzuba bwaciloba Leza wakalimanide mulimo wakwe ngwaakacita, mubuzuba oobo wakalyookezya kuzwa kumulimo wakwe woonse ngwaakacita. 3Lino Leza wakabuleleka buzuba bwaciloba akubusalazya, nkaambo muli mbubo Leza wakalyookezya kuzwa kumulimo wakwe woonse wakulenga ngwaakacita.
Muunda wa Edeni
4Mboobu nyika azintu zyoonse zili mujulu mbuzyakalengwa. Ciindi eciya Mwami Leza naakalenga julu anyika, 5zisyango zyoonse zyamusokwe tiizyakaliko anyika, aziteyo zyoonse tiizyakana mena, nkaambo Mwami Leza taakana wisya mvula anyika. Alimwi kwakanyina muntu uulima nyika. 6Nikuba kuti imvula tiiyakali kuwa, kwakali sikunku wakali kuzwa ansi akutesya nyika.
7Lino Mwami Leza wakasuna bulongo kuzwa kunyika, mpoonya wakabumba muntu abulongo oobo. Naakamana Mwami Leza wakayoyela muuya wabuumi mumpemo zyamuntu, nkabela muntu wakaba muumi.
8Eelyo Mwami Leza wakapanda muunda mu Edeni, kulubazu lwakujwe, oomo mwaakabikka muntu ooyo ngwaakalenga. 9Mumuunda ooyo Mwami Leza wakamenya misamu yeebeka yamisyobo yoonse yakali kuzyala micelo mibotu kulya. Nkabela akati kamuunda kwakali musamu uupa buumi, alimwi amusamu wakuzibya bubotu abubi.
10Kwakali mulonga wakali kukunka kuzwida munyika ya Edeni, nguwakali kwiida muunda, nkabela mulonga ooyo wakali andeene mumilonga yone. 11Izina lyamulonga wakusaanguna ngu Pisyoni, ooyu ulakunka kuzinguluka cisi coonse ca Havila. 12Mucisi eeco momujanwa ngolida mbotu kapati, alimwi momujanwa abulimbo bununkilila kabotu alimwi amabwe aalaamakwalala mbuli cibize. 13Izina lyamulonga wabili ngu Gihoni, ulakunka akuzinguluka cisi coonse ca Kusyi. 14Mulonga watatu ngu Taigilisi, uukunkila kujwe lyacisi ca Asiliya. Mulonga wane ngu Yufuletisi.
15Lino Mwami Leza wakatola muntu, waakumubikka mumuunda wa Edeni kuti aubambe akuulimina kabotu. 16Mwami Leza wakalailila muntu kuti, “Ulakonzya kulya micelo yamisamu yoonse iili mumuunda, 17pele ulikke buyo musamu wakuzibya bubotu abubi, utakalyi micelo yawo pe. Naa kuti ukalye, uyoofwa ncobeni.”
18Lino Mwami Leza wakalyaambila kuti, “Tacili cibotu kuti mwaalumi kakkede alikke. Njoomupangila mweenzinyina uumweelede kuti kamugwasya.” 19Lino kuzwa kubulongo Mwami Leza wakalengede kale banyama abayuni boonse, eelyo wakabaleta kumuntu kuti abaulike mazina. Kufumbwa zina ndaakaulika lyakaba ndendilyo. 20Nkaako muntu wakaulika banyama boonse bavubwa, bayuni abanyama bamusokwe, pele taakajana mweezinyina weelede kumugwasya.
21Lino Mwami Leza wakooneka muntu ŋonzi mpati, nkabela kacoona boobo, Leza wakagwisya kabambo komwe kuzwa kulinguwe, wakabweedezya nyama mubusena bwayo. 22Aboobo Mwami Leza wakapanga mukaintu kuzwa kukabambo nkaakagwisya kumwaalumi, wakamuleta mukaintu ooyo kulinguwe. 23Eelyo mwaalumi wakati,
“Iiyoobuya! Lino ambebo ndajana mweenzuma, muntu ooyu mubili wamubili wangu, ndifuwa lyazifuwa zyangu,
nyama yanyama yangu. Uyooitwa kuti ‘Mukaintu’ nkaambo wagwisigwa kumwaalumi.”
24Nkakaambo aaka mwaalumi ncasiila wisi abanyina akukakatila kumukaintu wakwe eelyo aaba bobilo baba mubili omwe.
25Lino boonse aaba bobilo mwaalumi amukaintu wakwe, bakali aacintanda, pele tiibakali kufwa nsoni pe.
Valgt i Øjeblikket:
Matalikilo 2: Tonga96
Markering
Del
Kopiér
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fda.png&w=128&q=75)
Vil du have dine markeringer gemt på tværs af alle dine enheder? Tilmeld dig eller log ind
Tonga Bible © United Bible Societies, 1994.