मत्ती 2
2
अगुणी दिसाऊँ ज्योतस्याँ को आबो
1हेरोद राजा क राज करबा का दिना म यहूदिआ क बेतलम म ईसु को जलम होयो जणा अगुणी दिसाऊँ क्युंक ज्योतसी जखा चाँद-तारा को ज्ञान राखता हा यरूसलेम म आया। 2बे बुज्या, “यहूदि मिनखा को राजा होबा ताँई जलम्यो बो टाबरियो कठै ह? बिको तारो अगुणी दिसा म उग्यो जणा म्हें बि तारानै देख्या। म्हें बि टाबर की भगती करबा आया हा।” 3इ बात का समचार जद हेरोद राजानै लाग्या जणा बो अर यरूसलेम का बोळा मिनख घबरागा। 4जणा बो सगळा परधान याजक अर सास्तरानै सीखाबाळानै भेळा कर बाऊँ बुजबा लाग्यो, “मसी को जलम कठै होणो चाए?” 5बे बिऊँ बोल्या, “यहूदिआ क बेतलम म” क्युं क परमेसर की खेबाळो अंय्यां मांड्यो ह:
6“हे यहूदिआ दिसावर की बेतलम नगरी का मिनखो, थारी नगरी दुसरी नगर्याऊँ ख्याई कम कोनी;
क्युं क इमैऊँ एक मिनख राजा बणसी, जखो इजरायल म रेह्बाळा मेरा मिनखा की मुख्याई करसी।”
7जणा राजा हेरोद ज्योतस्याँनै छानैसीक बुलार बुजबा लाग्यो क तारो सऊँ पेली की टेम चमक्यो। 8अर बो बानै अंय्यां ओडार बेतलम भेज्यो क, “बि टाबर क बारां म पाछा आर मनै ठिक-ठिक खबर दिज्यो जिऊँ क म बिकै धोक खार आऊँ।” 9बे राजा की बात सुणर चलेगा अर जखो तारो बानै अगुणी दिसा म दिख्यो हो। बो बाकै आगै-आगै चाल्यो अर जठै टाबर हो बि झघा जार रूकगो। 10जद बे बि तारानै देख्या जणा बोळा राजी होया। 11बे घर म जार बि टाबरनै बिकी माँ मरीयम कनै देख्या, अर बि टाबर क आगै धोक खाई। अर आप-आपका झोळानै खोलर बिकै सोनो, लोबान अर धूप की भेंट चढाई। 12जद ज्योतसी सोर्या हा जणा सपना म परमेसर बानै चेतायो क, हेरोद कनै मना जायो, जणा बे दुसरा गेलाऊँ आपकै देस चलेग्या।
युसूफ को आपका बाळबच्चा क सागै मिसर देस म जाबो
13ज्योतस्याँ क चल्या जाबा क पाछै परबु को एक ईस्बर नगरी दुत युसूफनै सपना म दरसाव देर ओडायो, “उठ अर टाबर अर बिकी माँनै लेर मिसर देस म भागज्या अर जद ताँई म तेरूँ नइ बोलुँ जद ताँई बठैई रेह्जे; क्युं क राजा हेरोद इ टाबरनै ढुंढर्यो ह। बो इनै मारबो चावै ह।” 14जणा बो रातनैई उठर टाबर अर बिकी माँनै लेर मिसर देस कानि चाल पड़्यो। 15अर जद ताँई हेरोद राजा कोनी मर्यो बे बठैई रिह्या। जिऊँ क बो बचन जखो परमेसर की खेबाळो बोल्यो हो पूरो होवै क, “म मेरा बेटानै मिसरऊँ बुलायो हूँ।”
राजा हेरोद बेतलम का टाबरियानै मरवा गेर्यो
16जद राजा हेरोद आ देख्यो क ज्योतसी मनै बावळो बणाग्या हीं जणा बो लाल-तातो होगो अर लोगानै भेजर ज्योतस्याँ क बताएड़ा टेम म बेतलम अर बिका आस-पास का सगळा टाबरानै जखा दो बरस अर बिऊँ छोटा हा बानै मरवा गेर्या। 17जणा जखा बचन यरमिआ परमेसर की खेबाळो खयो हो पूरा होया:
18“राहेल की नगरी रामा म बार-घोड़ो होर्यो ह;
बा आपका टाबरा ताँई रोरी ह,
अर चुप कोनी होबो चावै,
क्युं क बिका टाबरिया इब इ दुनिया म कोनी रिह्या।”
मिसरऊँ पाछो आबो
19राजा हेरोद क मरबा क पाछै परबु को ईस्बर नगरी दुत मिसर म युसूफनै सपना म दरसाव दिओ, 20अर बोल्यो, “उठ टाबर अर बिकी माँनै लेर इजरायल देस म चल्योजा, क्युं क जखा टाबर का पिराण लेबो चावै हा बे मरगा हीं।” 21जणा युसूफ टाबर अर बिकी माँनै सागै लेर इजरायल देस म आगो। 22पण आ सुणर क अरखिलाउस आपका बाप हेरोद की झघा प यहूदिआ दिसावर प राज करबा लाग्यो ह, बठै जाबाऊँ डर्यो। अर ओज्यु सपना म परमेसर क खया गेल गलिल दिसावर म चलेगो। 23#मर 1:24; लूक 2:39; यह 1:45अर नासरत नाम की नगरी म जा बस्यो, जणा बो बचन पूरो होयो, जखो परमेसर की खेबाळो बोल्यो हो: “बो नासरी खुवासी।”
Valgt i Øjeblikket:
मत्ती 2: एस डब्लु वी
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
(c) 2010-2017, New Life Computer Institute. All rights reserved