मूक चेलाकू 12

जेहेल अते पतरसराः एचे उडुंग

1दो हनमेला हरदोस राजा एरुसलेम सहरराः कलसियारिकुःआ होड़कू संताव लगा एचे साबतेडकूखन जेहेलरेय सींगतेडकुःआ। 2अरू हाँय एहुनारीग वगात एकूब, तलवइरतेय भोका ञेड एंडातिरिया। 3नाःआ कता एहूदाकू लगा मंजूरयान हना हरदोस सुदीगोतेड दो हाँय पतरस होंय एचे साबतेरा। पसहा परोब अरू रुटीराः परोब मेलारे नाःआ कता होयानेना।#12:3 चइत महिनाराः चउदाह दिनरे एहूदाकू पसहा परोबकू मनाःता अरू हना तयोमरे सात दिन वरी रुटीराः परोब होंकू मनाःता। 4पतरसकू साबतिरिगखन तयोमरे हरदोस हाँय जेहेलरेय एचे सींगगोतेडीग। हाँय अगुरागे लगा चइर चइर होड़कू दोहोनता हँकुःआ चइरगोटोंग गउदाकू एचेरेय जिमातेरा। पसहा परोब तयोमरे जमा होड़कू मड़ंगरे पतरस फड़ियावगे लगा हरदोस ओंगलेःआ। 5दो पतरस जेहेलरे सींगतोय दोहोना हनमेला कलसियारिकुःआ होड़कू भगवान एचेरे हाँय लगा अरजी घड़ीनकू असेःआ।

6पतरस एचे फड़ियाव लगा हरदोस ओंगलेःआ हना रइत पतरस बारटोंग सिकिड़ीते तोलतो बार होड़ सइनाकिन तलारेय अपीगा अरू एटाः अगुरा होड़कू जेहेल दुवाररे अगुरागे लगाकू दोहोना। 7दो असाका परबू भगवानरीग बराहील पतरस गेतेगा हना छिनारेय एचे ञेलयान अरू मरसल विड़चेड़नेना। हाँय परतस ढोकलाव बेरेडतिडिगखने कताया, “हलीमे, रिमुः।” अरू हननमेला हाँयकू तोलतेरा हना सिकिड़ीकून हाँय तिःईते कसड़यान।

8हनते हाँयग बराहील पतरस एचेरेय कताया, “आम पेटारमे तोल अरू चाटीम तुसिंग।” दो पतरस हनन इयाय एचेतेरा। हनते बराहील कतातेड, “बहरी सोनहेम ओयोन अरू ईंग देह दूरमे ओतोंग वेग।” 9दो पतरस हनन इया एचेतेरा अरू हाँय अगीय ओतोंग सेना। मनदो पतरस मेरेय ओंगलेःआ हाँय जीवरे नाःआ कता सतायरे होयाःतना, माःआन। हाँय तोनोंगाः दरसने ञेलतना माःआने ओंगलेःआ। 10दो हँकिन मड़ंग अगुरादारकू अरू एटाः अगुरादारकू तलारेकिन सेने पारयान। हनते होड़कू सहर पेंदारेकू सेना हना जेहेलराः हताराः लोहा दुवार हँकिन मड़ंगरे अँनपनते गीगनेना अरू हँकिन बहरीकिन सेनेडा। हनते हँकिन गुनमिन तान संडकरे संग संगकिन सेनेडा दो हाँयग सेरमो देसरीग बराहील पतरस अड़ाःतेडखन तोराय।

11हनते पतरस सुरतानेनखने कताया, “नुँहू बेगर जाःतेयिंग सुदीयतना भगवान आँयग बराहील वारतिरिगखन हरदोसराः तिःई अते अरू एहूदाकू ओंगोल दोहोतेरा हना जमा ओंगोलकून अतेय सडावकिरिंगा।”

12नाःआ कता पतरस सुदीतेड दो, हाँय एहुनारीग एंगात मरियमराः ओड़ाःरेय सेनेडा। हाँयग एहुनाराः एटाः ञाव दोहोना मरकूस। हंडा मुरुक होड़कू जुमावनेनखन भगवान एचेरे पतरस लगाकू अरजीःआ। 13पतरस हंडाय सोदरनेनखन दुवाररेय टोकोःआ अरू रोधा ञावीग मी होड़ सेवकीन धंगड़ी दुवार गीग लगाय सेनेडा। 14हाँय पतरसराः अरो अयूमतेडखन दुवार मेरेय गीगगाड मनदो बहालतेय बतकाव सेनेडा अरू जमाकू एचेरेय कतातेड, पतरस ओड़ाः बहरी इदानिया, माःआन।

15मनदो हँकू मेरकू बिसवासगाड अरू हाँय एचेरेकू कतातेड, “आम बउड़ाहायनाम जा?”

मनदो हाँय अरूय कतातेड, “हना इया कोवान। सनातायरे हाँय बहरी चड़ाँत इदानिया।”

दो हँकू कतातेड, “दो हाँय पतरसराः रवा हवे।”

16पतरस दुवाररे अरूय टोकोःगोड ञवना। हनते हँकू दुवारकू गीगतेड दो हाँय ञेलतिडिगखनकू बयावयान। 17पतरस हँकुःआ होड़कू कलेकालकू दोहोन लगा तिःईतेय रोंकावतेडकुःआ। हनते हँकू एचेरेय कतातेरा, भगवान ईंग करा उड़ी जेहेल अतेय एचे उडुंगकिरिंगा। हनते हाँय कतातेड, “नाःआ कताकून एकूब अरू एटाः बिसवासी होड़कूपे कता उदुःवा।” हना तयोमरे हाँय हना अते एटाः अगी तोराय।

18निंदावा पतरसकू अगुरातेरा हँकुःआ होड़कू हाँयके करेगयना माःआनकू ओंगलेःआ अरूकू बोरोयान। 19दो हरदोस राजा पतरस मुरुक अता पताय लगावतिरिया मनदो हाँय मेरेय ञामगडीग। हनालगा हाँय हँकुःआ अगुरा होड़कू जासतेडखन एचे ञेड एंडाकू लगाय हुकुमतेरा।

हरदोस गोएगनेना

हनते हरदोस राजा एहूदिया छतर अते कइसरिया सहर अगी सेनेडखन तोनोंग दिन वरी हंडाय दोहोना। 20हाँय सूर अरू सइदा छतररिकुःआ होड़कू सुदा राजूते मेरेय दोहोगान। हँकुःआ होड़कू अँकूराः जोम जिनिस लगा हाँयग राजा एचेरे भरसातेकू दोहोना। हनालगा हँकू मिनीयानखन हाँय सुदा हेल-मेलते दोहोन लगा हाँयग राजारीग बिसवासगेयीग सेवादार बलासतूसते हाँय सुदा एचे राजूगेय लगा हाँय एचेरेकू वेजेडा।

21मड़ंग अते तोल दोहोतेरा हना दिनरे हरदोस, राजाकू तुसिंगता हना सोनहे तुसिंगतेडखन राजाराः हातपातराः गदीरेय दुड़ुःयान। हनते हाँय हँकू एचेरे मीटोंग भासाड़े एमेतेरा। 22दो हँकुःआ होड़कू हुमइसकेकू कताया, “अरे, हायरे हायरे! नाःआ बड़रा तोनोंगीग होड़राः बड़रा ना लवे ननदो तोनोंगीग देवताराः हवे।” 23हरदोस भगवान मेरेय जागगाड, दो ओहेन परबू भगवानरीग बराहील हाँये ञेड कसड़तिरिया अरू पिलवाकू हाँयकू जोम गोएगतेरा।

24मनदो मुरुक बगरा होड़कू भगवानराः सरवनकू अयूमतेरा अरूकू मनवेःआ।

25बरनाबास अरू साहूल अँकिनराः सेवा चबातेडखन एरुसलेम सहर अते अंतकिया सहर अगीकिन कुदायान। सेनेन मेला हँकिन सुदा एहुनाकिन गोःयाड। अरू हाँयग एहुनाराः एटाः ञाव दोहोना मरकूस।

Valgt i Øjeblikket:

मूक चेलाकू 12: kfp

Markering

Del

Kopiér